Guiich ni raxel Tidxó Buñ ni nap xiroʼ Galnann ni Rasanir

Par xhermando ni nadxiʼgoludo:

«Guirási ór raduidydo guixquix Dios órni rasetlado lóoto, portín guirási ór rasetnaladxdo dxiin fiel ni ronyto, dxiin nadip ni ronyto por galnadxiʼ, né ni rony guantaryto por ni rabésto ló Señor Jesucristo xtunyno né nisló Dios ni nac Bixiosno.» (1 Tes. 1:2, 3.) Diitzreʼ nigolú rabexatzayni ni rasacdo por guiráto. Nigolú raduidydo guixquix Jehová por ni noʼto né lóodo né por galán dxiin ni ronyto.

Ló guidopy íz ni godudyno, goyodieʼto bunyto «dxiin fiel» né «dxiin nadip ni ronyto por galnadxiʼ» ló xchiin Gobierno xtuny Dios. Xidal de lóoto ma biyopyto mod par gonyto más ló xchiin Dios. Tipnésto ma noʼto toib lagary ro raquiin más herman par guiniʼ de Gobierno xtuny Dios, ná nacni xcudxto o ló stoib gudxrop. Stipnésto raniʼto de diitz sacró locay. Xidal de lóoto gócto ni racné ni raxal néz ló xtzú Memorial, ló beʼo ni superintendente de circuito goyguen lóoto o ló campaña ni gopno ló beʼo agost íz 2014. Ná cadudyto ló nitisi galnagan galán cayonyto dxiin né guidopy xcalnabanyto par Jehová (Col. 3:23, 24). Nigolú raxquixdo Dios por «dxiin fiel» ni ronyto.

Láaca nigolú rasacdo sacró por «dxiin nadip ni ronyto por galnadxiʼ» por ni racnéto riaʼ yoʼ par gony adorarno Dios. Lóoto nanto que xcudx Jehová caniʼsni, por ngú guirá yoʼ reʼ nigolú raquiinni (Is. 60:22). Godobís bidxin gócno 8,201,545 buñ ni raniʼ xtiitz Dios, né guirá beʼo bisuidyno 9,499,933 buñ par gan de Dios. Por ni xidal buñ cadxin lainy xcudx Jehová, raquiin gacxiroʼ né gac copy xidal sucursales. Ndeʼ láaca raduidy diitz que cayatz par tzaʼ más Lagary ro Radopno. Láaca, ló xidal gudxrop raquiinni tzaʼ yoʼ ro cués né gony traductores dxiin lagary ro raniʼ buñ diitz ni ratzaʼyibu.

Por ni nando que raquiin guirá ndeʼ, ¿xí labúu gonyno par gacnéno? Sigory toibtica de lóono labúu gacnéno par gac guirá dxiinreʼ. Per ná nanno rasaʼno yoʼ o yaca, guiráno napno privilegio par guiduidyno «guirá cós ni rasac» ni napno par gac guirá dxiinreʼ (Prov. 3:9, 10). Antes de nasaló nasaʼ israelitas tabernáculo, bitnéyibu xidalgoluʼ cós ni biquiin par ñaʼni né dada bidxin midid goyoʼ ni góoch layibu que ma diti nitnéyibu más (Éx. 36:5-7). Guirá ndeʼ ni rasetlaa la Biblia rascochni xcalnabanyno né rachiinni lóono gonyno más. Lóoto ni nacto xhermando, «dxiin nadip ni ronyto por galnadxiʼ» nacni stoib razón por ni raduidyno guixquix Jehová.

Ni rachiin lóono gacnéno, láani ngú ximod xhermanno cayonyibu xchiin Dios ná naganni par layibu. De goló íz 1950, mbioxhlas Testigos de gudx Corea del Sur rioʼyibu press xidal íz o tidxósi íz por ni diti racyibu toibsi né gudxliogoxreʼ. Xidalguixo herman ma buny guantaryibu galnagan de clas reʼ né diti rasian raniʼyibu de Jehová. Ni rony guirá herman reʼ rony nadipni fe ni napno.

Ló gudx Eritrea, láaca noʼ hermanas ni ma goyoʼ press né ximbiox. Per noʼ tzón de xhermanno ni ma sané más de gaal íz. Ná ma biyopydo mod par guireʼyibu, par nigoreʼ diti ma bunydo xitcal. Ná scú nacni, xhermanno nacyibu fiel cayonyibu ni ná Jehová. Diti rasianyibu xcudx Jehová ná cadudyibu ló galnagan, lóodo nigolú ranabdo lóo Dios gacné layibu (Rom. 1:8, 9).

Xidal de lóoto diti noʼto press por fe ni napto. Per napto xi de gony guantaryto galnagan por ni ma nacto buñgol, caxoʼto, por ni xfamilto diti rioladx nacto herman, né por stipnés galnagan ni cadudyto ló ni nosi lóoto nanto. Ná cadudyto ló guirá ndeʼ diti rasianto ronyto ni ná Jehová (Sant. 1:12). ¡Galán cayonyto láani! Por ni rony guantaryto, nacni stoib razón por ni raduidydo guixquix Jehová.

Por ngú, dxiin fiel ni ronyto, dxiin nadip ni ronyto por galnadxiʼ né por ni rony guantaryto nacni razón par guiduidyno «guixquix Jehová, portín láabu natzayxatbu» (Sal. 106:1). Nigolú ronladxdo lóoto né ranabdo lóo Jehová gony nadip fe xtunyto, né láaca gacnébu lóoto guisagaʼdxichto né guiduidybu xilaaybu lóoto par labúu gonyto ni nábu por tipzó.

Xhermanto,

Tidxó Buñ ni nap xiroʼ Galnann ni Rasanir nisló testigos xtuny Jehová