¿Ximod labúu gacné oración looy?

Pamela bixogoluʼ né goyeebu ló doctor per láaca gonabbu Dios nadudy fuers láabu par labúu ñony guantarybu galnagancu. ¿Noʼ pu gocné oración láabu la?

Láabu nábu: «Dzú bixonéya galguitz cáncer, xidal buelt bidzubi. Per órni goninéya Jehová bialdó xcalnabani né gocnéni naʼ buni guantary. Cadudyraya ló xiroʼ galrrioʼob per oración racnéni naʼ par diti goni pensary ló xcalguidza. Órni buñ ranabdiitz naʼ ximod noʼya, raabi layibu: Diti nasaca, per nakit noʼ xcalnabani».

Diti fuerspa guicalóno toib galnagandaʼ par guininéno Dios. Guiráno racalóno galnagan ná nacni xiroʼ o mitien, raquiinno galrracné par gony guantaryno. ¿Rasac guininéno Dios la?

La Biblia ná: «Bisal xquiixlo laidy Jehová, né láabu sacnébu looy. Dipa sadudybu lagary que buñ ni rony xinésni guiab» (Salmo 55:22). ¡Diitzreʼ nigolú racnéni lóono! Per ¿ximod labúu gacné oración lóono? Órni raninéno Dios xomod rioladxbu, sadudybu ni caquiinno par guicalóno galnagan (bibiʼ ro ná «Mod racné oración lóono»).

Mod racné oración lóono

Rasacno sacró

«Colgaiby láabu ni caquiinto, né paz xtuny Dios ni digaldi guieen buñgudxlio san xcalnabanyto né xpensaryto por Cristo Jesús» (Filipenses 4:6, 7). Pal raibyno Dios galrrasaʼ ni noʼno ló, láabu sacnébu lóono tzoʼno sacró né gonyno xinésni ná cacalóno galnagan.

Rapno galnan

«Pal riatz galnan toibtica de lóoto, guirá ór guinabto láani Dios, né sacaʼto láani, portín Dios radudy láani né guidopy xcalnabany sin guisetlabu láani lóo buñ» (Santiago 1:5). Órni noʼno ló xiroʼ galrrasaʼ rioʼ ór diti ronyno xinésni. Per pal ranabno xcalnan Dios, sacnébu lóono guisetnaladxno tipnés litz galán ni sieed ló la Biblia.

Racnéni lóono né rialdó xcalnabanyno

«Napa fuers par goni nitisi cós portín Dios radudy galnadip naʼ» (Filipenses 4:13). Jehová nac Dios ni nap xiroʼgolu galnadip, racnébu lóono guicalóno galnagan o par labúu gony guantaryno prueby (Isaías 40:29). La Biblia láaca rabeʼ laa Jehová «Dios ni rasialdó xcalnabanyno» ni labúu guisialdó lóono «ló guirá galnagan ni radudyno» (2 Corintios 1:3, 4).