Looy labúu guiniʼlo ximod guibanylo ló dzú ni sietra

Ma de goló 3.500 íz, Jehová gochbu xcudxbu ni non ñony par labúu nabany sacró: «Ma goloʼya nislóto galgoity né galnabany, galnasác né cós mal. Né, par guibanyto tanli lóoto né xiinnto, raquiin cuuto galnabany» (Deuteronomio 30:19).

Par labúu nabanyibu sacróyen, non ñonyibu xinésni. Né lóono láaca non gonyno xinésni. La Biblia rabexa xi raquiin gonyno par guibanyno sacró ló dzú ni sietra: «Gonladxto Jehová Dios xtunyto, guicadiagto ni raibybu lóoto» (Deuteronomio 30:20).

¿XIMOD GONLADXLO NÉ GUICADIAGLO JEHOVÁ?

BISUIDY NI NÁ LA BIBLIA. Par gonladxlo Jehová, nír raquiin ganlo ni rasuidy la Biblia de láabu. Né pal ronylo láani, sadudylo cuent que nigolú ronladxbu looy né raniiny láabu tzeeni galán looy. Láaca rioladxbu guininélo láabu, portín rioʼbu galrrasaʼ por looy (1 Pedro 5:7). Pal ronylo xtem por guimbulo láabu, la Biblia ná que sabigaxbu más ronoʼlo (Santiago 4:8).

BISOB NI CASUIDYLO. Par labúu guicadiaglo ni ná Dios, raquiin guisoblo ni ná la Biblia. Né pal ronylo láani «guirá ni gonylo sarebuʼni né saclo buñ ni noʼ xcalrrien» (Josué 1:8).