¡Galrrianladx sanitlóni por tipzó!
Ná labúu cueʼno galrrianladx lainy xcalnabanyno, per diti labúu gonyno mandary mod nac né mod rony pensary stipnés. Ló naareʼ noʼ xidal buñ ni racaló galrrianladx ná diti nap dool, ¿chú labúu guinitló galrrianladx por tipzó?
Nosi Jehová labúu sabeʼ galrrianladx por tipzó, né la Biblia rasuidy que sonybu láani (Proverbios 20:22).
DIOS SANITLÓ GUIRÁ NI RAGOʼ GALRRIANLADX
1. BUÑDZAB. Buñdzab, ángel ni góc nayaʼ, láabu ngú ni máspa ragoʼ galrrianladx ló Gudxlio. Dios sanitló Buñdzab né guirá ni canal láabu, ni láaca rianladx saʼ (Salmo 37:38; Romanos 16:20).
2. XCUDXLIOGOX BUÑDZAB. Dios sanitló guirá ni ragoʼ galrrianladx ló Gudxlio, xomod guirá partid ni diti rony xinésni né guirá ni rasanir ló religión ni ragoʼ galrradíil. Dios láaca sanitló guirá negosy ni rasobladx bidxiich né rabann buñ (2 Pedro 3:13).
3. XCALKIÉNO. La Biblia rabexa que guirácano golnéno galkié, por ngú más naguel rieed cós mal ló xpensaryno né ronyno cós mal (Romanos 5:12). Galkiécu rachiin lóono guianladxno buñ. Per né xcalrracné Dios, labúu sareʼno ló galkié né ma diti sioʼ galrrianladx lainy xcalnabanyno (Isaías 54:13).
LA BIBLIA NÁ QUE SIOʼ DZÚ MA DITI SIOʼ GALRRIANLADX
1. MA SAC XINÉSNI. Gobierno xtuny Dios ni noʼ lainy guibá sony mandaryni buñgudxlio por tipzó (Daniel 2:44). Ló dzúcu buñ ma diti sabeʼ saʼ tiplad né ma sagobioyibu saʼyibu. Dios sony xinésni né guirá buñ ni cadudy ló galrrioʼob (Lucas 18:7).
2. MA DITI SIOʼ GUERR. Ni toib buñ sadudy ló galrrioʼob por guerr né galrradíil (Salmo 46:9). Ló Gudxlio ma nosi sabany buñ ni diti rioʼ ló galrradíil, por ngú ma diti sadzuibyno (Salmo 72:7).
3. SABANYNO SACRÓ. Guiránac buñ sonladx saʼ (Mateo 22:39). Diti sioʼ ni satudy lóono ló galrrioʼob, nili sasetnaladxno cós mal (Isaías 65:17). Órni galrrianladx ma binitlóni ló Gudxlio, buñ «sabany goxtiguie» (Salmo 37:11).
¿Ñoladxlo nabanylo ló toib Gudxlio ro ma yadi galrrianladx la? Ló naareʼ, xidalguixo testigos xtuny Jehová ni casuidy la Biblia ló guidopynac Gudxlio, ma cachocyibu ló galrrianladx. ¿Ximod ronyibu láani? Rasobyibu ni ná la Biblia (Salmo 37:8). Ná nacyibu de xidal clas gudx né raniʼyibu gadzéga diitz, guirácayibu nacyibu xomod toibsi famil né ronladxyibu saʼyibu (Isaías 2:2-4).
Testigos xtuny Jehová labúu guisuidyibu looy xi racné layibu par guicalóyibu galnagan né xi ronyibu órni noʼ ni rabeʼ layibu tiplad. Ni guisuidylo sacnéni looy cueʼlo galrrianladx lainy xcalnabanylo dxoga dxoga né gaplo galrronladx. Sasuidylo ximod cobiolo guirá clas buñ, dada guirá ni diti ragoʼ cuent o rianladx looy. Labúu sabanylo más goxt nigoreʼ né labúu sadzaklo buñ más sacró. Né ni más rasac: sanlo xi láani non gonylo par labúu guibanylo goxt ló Gudxlio órni Gobierno xtuny Dios cueʼ galrrianladx por tipzó (Salmo 37:29).