3 | Ni gosaclóo xpiin Dios ló dzú ni see

LÓ LA BIBLIA RADZELNO: Buñ «ni gosac xomodca lóono» (SANTIAGO 5:17).

¿Xí radudyni diitz?

Ló la Biblia sieed xidal historias de buñguieeu né buñgonaʼ ni gosac xidal mod. Pal rolno mod godudyibu, sigory labúu guidzelno toibtica ni gosac xomod casacno.

¿Ximod racnéni lóono?

Guiráno raniiny lóono tzoʼ ni guieen mod rasacno, máspa órni caxoʼ xpensaryno. Pentzi órni ronyno pensary mod gosac buñ ni bibany ló dzú ni see radudyno cuent que scúca rasacno. Ndeʼ labúu gacné lóono guidudyno cuent que diti nosi lóono radudyno ló ansiedad, ló galrrasaʼ né ló stipnés galnagan.

La Biblia raiby lóono xi goniʼ tipnés buñguieeu ni bidopy xcalnabany. Toibtica ór ma bunylo pensary: «Ma diti labúu gony guantary, diti labúu sabani modreʼ». Modreʼpa gosac Moisés, Elías né David (Números 11:14; 1 Reyes 19:4; Salmo 55:4).
La Biblia rasetlaa de Ana, toib buñgonaʼ ni bioʼobgolu xcalnabany portín diti labúu goyoʼ xiimbu né toib buñgonaʼ ni bianladx láabu buny borla láabu (1 Samuel 1:6, 10).
Sigory láaca rasaclo xomod gosac Job, toib buñguieeu ni rasetlaa la Biblia. Ná gopbu xiroʼ fe, láaca nigolú bioʼob xcalnabanybu né goniʼbu: «Raduidyoʼob xcalnabani naʼ, ma diti nainy naʼ guibani» (Job 7:16).

Guirá buñreʼ bitzaʼyibu mod bunyibu pensary. Lóono láaca labúu sapno fuers par gonyno scúca pal rabiʼno mod bunyibu.

Ximod racné la Biblia a Kevin

¿Xí láani rony trastorno bipolar naʼ?

«Órni gopa midid 50 íz gochyibu naʼ que naca buñ bipolar. Rioʼ ór noʼya nigolú nakit, né rioʼ ór ma nainy naʼ gati».

Ximod racné la Biblia naʼ

«Rasaca xomod gosac apóstol Pedro. Goyoʼ ór gosacbu que diti noʼ pu biquiimbu por galrraché ni bunybu. Per xalagary ñonybu pensary ló guirá cós ni bunybu, biyopybu xcalrracné ximigbu ni goyoʼ galrrasaʼ por láabu. Xtol xcalguidza rioʼ ór nigolú rasaca mal, né órni rasaca modcu roni pensary que diti noʼ pu raquiinna. Per xomod apóstol Pedro, rayobi xcalrracné ximiga. Layibu racnéyibu naʼ par diti guireʼgana.

«Láaca roni pensary ximod gosac rey David, xidal buelt gosac nabambu. Bigotzbu dool láacabu por guirá cós mal ni bunybu. Rioʼ ór láaca rasaca modcu, rasaca mal por cós ni buni né goniya. Por ngú ni bicaʼ rey David ló Salmo 51 rasialdóni xcalnabani. Ló versículo 3, láabu goniʼbu: «Nantzaya xi galkié ma buni né guirá ór rasetnaladxi galkié ni buni». Scúca rasaca órni napa depresión, rolooyni diti noʼ xi rasaca. Per órcu roni pensary ni bicaʼ rey David ló versículo 10: «Dios bidudy naʼ toib galnabany nayaa, bidudy toib espíritu copy naʼ, toib espíritu dxich». Ngúca ranaba Dios, gacnébu naʼ guisaca sacró. Por último, versículo 17 rasialdóni xcalnabani. Náni: «Toib galnabany ni cayoʼob né ni noʼ nabann, oh Dios, diti sabeʼlo láani tiplad». Guirá ór ni roola láani, rasetnaladxi que Jehová ronladx naʼ.

Órni roni pensary ló guirá ejemplos ni rasetlaa la Biblia, né guirá ni ma bidudy Dios naʼ, esperanza xtuni rac nadipni. Roni guantary né diti rareʼganna portín naana que sac cumplir guirá ni ná la Biblia».