Gapno confianz lóo «Juez de guidopynac gudxlio» né ló xcalrronladxbu

1. ¿Xí lesiony ni rasac bisuidy Jehová a Abrahán?

JEHOVÁ biquiimbu toib ángel né gochbu Abrahán que sanitlóbu gudx Sodoma né Gomorra. Sigory Abrahán dipa bialadx órni biiybu diitz né ángelcu. Ná Abrahán gopgoluʼ fe lóo Dios, gosac naganbu ñembu xigony goloʼ Jehová guic guinitló gudxcu, né por ngú gonabdiitzbu: «¿Xí nigolú sanitlólo buñ ni rony xinésni toibsi né buñ mal la? […] ¿Juez de guidopynac gudxlio diti sony ni nac xinésni la? ». Né paseins, Jehová bisuidybu toib lesiony ni rasac a ximigbu: láabu dipa sanitlóbu buñ ni rony xinésni. ¡Balaati rony nadipni lóono ni nanno ngú! (Gén. 18:23-33).

2. ¿Xigony labúu gapno confianz que órni rony juzgar Jehová ronybu láani xinésni né raslooybu galrronladx?

² ¿Xigony labúu gapno confianz que guirá juicios xtuny Jehová racni xinésni né napni galrronladx? Portín nanno que «Jehová rabiʼ ni noʼ lainy galnabany» xtuny buñ (1 Sam. 16:7). Rimbutzaaybu «xcalnabany tigaaga buñ» (1 Rey. 8:39; 1 Crón. 28:9). ¡Nigolú radziguiaʼno láani! Sabiduría xtuny Jehová nigolú xiroʼni, né rioʼ ór diti labúu rientzaayno mod ni rony juzgarbu. Por ngú apóstol Pablo goniʼ: «Diti labúu rabexa buñ juicios xtunybu» (Rom. 11:33).

3, 4. ¿Xí labúu guinabdiitzno? ¿Né xí guisuidyno ló artículo reʼ? (Juan 5:28, 29).

³ Sigory sioʼ ór labúu gonyno galrranabdiitz ni bunyca Abrahán. Pentzi dada guinabdiitzno lóocano: «¿Labúu siás tipnés buñ ni Jehová binitló, xomod buñ ni bibany lainy gudx Sodoma né Gomorra la? ¿Labúu guiásyibu órni guiás gueʼet «ni diti buny xinésni» la?» (Hech. 24:15).

⁴ Gonyno toib repas ni rienno de tema ni guiás gueʼet. Ma xidzúyen golexano mod rienno, ni la Biblia raniʼ que buñ «ni buny cós tzaay siás par guibany, né ni buny cós mal siás par gac juzgar layibu» (bíil Juan 5:28, 29).a Mod rienno láani nigoreʼ, bunyni que guitzaʼno stipnés cós, ni guisuidyno ló artículo reʼ né ló artículo ni sieed. Primer sanino de cós ni diti nanno mod rony juzgar Jehová né después sabiʼno xi láani ngú ni nanno.

NI DITI NANNO

5. ¿Xí láani ma goniʼ publicaciones ló dzú ni see de buñ ni goity lainy Sodoma né Gomorra?

⁵ ¿Xí sac né guirá buñ ni Jehová binitló portín diti bunyibu xinésni xomod buñ ni bibany lainy gudx Sodoma né Gomorra? Ló dzú ni see, gonino que guirá buñcu diti siásyibu. Per, Mós ni rony xinésni bisuidytzay láani né buny oración né bidudybu cuent que diti labúu guinino que scúpa nacni. Guisuidyno xigony yaca.

6. ¿Pu ór binitló Jehová buñ ni diti buny xinésni, né xí diti labúu guinino?

⁶ Noʼ tipnés historias ni sieed ló la Biblia ni rasetlaa tipnés buelt ni Jehová binitló buñ ni diti buny xinésni. Por ejemplo, ló Diluvio goity guirá buñ ni bibany ló Gudxlio, nosi Noé né xfamil bilaa. Después, Jehová buny mandarybu israelitas nanitló buñ ni bibany lainy gatz gudxrop ni goyoʼ ló layoo ni bidudybu xtiitzbu guicaʼyibu. Né stoib ór bunybu que toib ángel nagaity 185.000 soldad asirios ló tigoxinsi (Gén. 7:23; Deut. 7:1-3; Is. 37:36, 37). Ló guirá historias reʼ, la Biblia diti radudy xiroʼ información par guinino que Jehová binitló por tipzó guirá buñcu né por ngú diti siásyibu. Nanoy guisuidyno ndeʼ.

7. ¿Xí láani diti nanno de buñ ni goity ló Diluvio né buñ ni goity órni israelitas binitló gudx Canaán? (Bibiʼ dibuj).

⁷ Ná nanno que Jehová binitló guirá buñreʼ xomod toib grupo, diti nanno ximod bibiʼbu tigaaga buñcu nili pal gopyibu oportunida nasuidyibu de láabu né ñac arrepentiryibu. Órni góc Diluvio, la Biblia ná que Noé «buny predicar xinésni» (2 Ped. 2:5). Per diti náni pal biyopybu mod ñony predicarbu a guirá né tigaaga buñ ni bibany ló guidopynac Gudxlio laʼga bisaʼbu arca. Láaca scúca, diti nanno pal guirá buñ mal ni bibany lainy gudx Canaán gopyibu oportunida de nasuidyibu de Jehová né natzaʼyibu mod bibanyibu.

8. ¿Xí láani diti nanno de buñ ni bibany lainy gudx Sodoma né Gomorra?

⁸ ¿Né xí labúu guinino de buñ ni bibany lainy gudx Sodoma né Gomorra? Nanno que lainy gudx Sodoma bibany toib buñguieeu ni buny xinésni, ni góc laa Lot. Per diti nanno pal buny predicarbu guirá buñ de gudxcu. Nigolú, gocyibu buñ mal, per ¿gonyibu xí láani ngú cós tzaay né xí láani ngú cós mal la? Ralooyni yaca, portín la Biblia ná que timontón buñguieeu de Sodoma, biyopyibu mod naxinyibu buñ ni bidxin lidx Lot. Lad buñcu goyoʼ mbioxhlas ni sigory diti bieen que toib galkié rodann ni goniiny ñonyibu (Gén. 19:4; 2 Ped. 2:7). ¿Nigolúpa labúu guinino que Jehová, ni nap galrronladx, ma goloʼ guic que ni toibtica de buñcu guiás la? Nigolú, Jehová gochbu Abrahán que lainy gudxcu diti goyoʼ nili 10 buñ ni buny xinésni (Gén. 18:32). Por ngú gocyibu buñ ni diti buny xinésni né Jehová buny xinésni órni binitlóbu guirá buñcu. Per, ¿labúu guinino né confianz que ni toib de guirá buñcu labúu siás órni guiás buñ ni diti buny xinésni la? Diti labúu guinino ngú.

9. ¿Xí láani diti nanno de Salomón?

⁹ Né la Biblia láaca raniʼni de tipnés buñ ni buny xinésni per después ma yaca xomod rey Salomón. Bimbutzaaybu Jehová né gonbu ximod non ñony adorarbu Jehová, né láabu bidudybu xiroʼ galnasác Salomón. Per conforma godudy tiemp, gosaló biembu dioxh falz. Ngú nigolú bitzuitzni Jehová, né guidopy gudx godudy ló galrrioʼob por xidalgoluʼ íz xtol xcalkié Salomón. Nigolú, la Biblia ná que órni goity Salomón bigachbu ro bigachca xfamilbu, ladyibu goyoʼ David ni diti bisian Jehová (1 Rey. 11:5-9, 43; 2 Rey. 23:13). Mod bigachbu ¿radudyni diitz que siásbu la? La Biblia diti rasetlaa láani. Per tipnés buñ labúu ñony pensary que siásbu portín Romanos 6:7 ná que «ni ma goity ma biax xcalkié». Per texto reʼ diti radudyni diitz que guirá ni ma goity siás, xomod ni guiáscu buñ ñacni toib derech ni racaʼ buñ nosi portín raity. Ni guiáscu buñ nacni toib galrrascad ni Jehová radudy por galnadxiʼ a buñ ni nainy láabu gap oportunida gony xchiimbu por tipzó (Job 14:13, 14; Juan 6:44). ¿Sac Salomón toibtica de buñcu la? Jehová nan láani; lóono yaca. Ni nanno láani ngú, Jehová sony xinésni.

NI NANNO

10. ¿Ximod rasac Jehová órni ranitlóbu buñ mal? (Ezequiel 33: 11; láaca bibiʼ dibuj).

¹⁰ (Bíil Ezequiel 33:11). Jehová raiby lóono ximod rasacbu órni rony juzgarbu toib buñ. Né xcalrracné espíritu santo Apóstol Pedro bicaʼ diitz xomodca ni bicaʼ profeta Ezequiel. Goniʼbu: «Jehová […] diti nainy láabu que ni toib guinitló» (2 Ped. 3:9). Diitzcu rasialdóni xcalnabanyno. Napno confianz que Jehová dipa ranitlóbu ni toib buñ por tipzó pal diti noʼ razón par gonybu láani. Napbu galrronladx né raslooybu láani guirá ór ni labúuni.

11. ¿Chú layibu diti siás, né ximod nanno láani?

¹¹ ¿Xí buñ nanno que diti siás? La Biblia nosi rasetlaa tipnés.b Por ejemplo, Jesús goniʼ que Judas Iscariote diti siás (Mar. 14:21; láaca bibiʼ ni ná Juan 17:12). Judas gondxich xi láani bunybu órni cualóbu Jehová né Xiimbu (bibiʼ ni ná Marcos 3:29). Jesús láaca goniʼ que tipnés líderes religiosos ni cualó láabu diti siás (Mat. 23:33; láaca bibiʼ Juan 19:11). Né apóstol Pablo goniʼ que apóstatas ni diti ñac arrepentir, diti siás (Heb. 6:4-8; 10:29).

12. ¿Xí láani nanno de xcalrronladx Jehová? Bisetlaa toib ejemplo.

¹² Mod ma bisuidyno, Jehová napgoluʼ galrronladx né «diti nainy láabu que ni toib guinitló». ¿Ximod bislooybu xcalrronladxbu a tipnés buñ ni buny galkié rodann? Rey David buny galyoxh né bigaity buñ, gocni galkié rodann, per góc arrepentirbu né Jehová binladx láabu né bitudybu scásiʼ ni bunybu (2 Sam. 12:1-13). Rey Manasés nigolú buny cós mal por xidal íz. Ná scú, Jehová binladx láabu né bitudybu scásiʼ ni bunybu portín góc arrepentirbu né guidopy xcalnabanybu (2 Crón. 33:9-16). Né guirá ejemplos reʼ rasetnaladxno que Jehová raslooy xcalrronladx órni rioʼ razón par gonybu láani. Salísbu David né Manasés portín bidudyibu cuent que bunyibu galkié rodann né góc arrepentiryibu.

13. a) ¿Xigony binladx Jehová buñ ni bibany lainy gudx Nínive? b) ¿Xí goniʼ Jesús después de buñ de gudx Nínive?

¹³ Láaca nanno que Jehová binladx buñ ni bibany gudx Nínive. Dios góoch a Jonás: «Ma bibiʼya guirá cós mal ni cayonyibu». Per, órni góc arrepentiryibu por xcalkiéyibu, Jehová binladx layibu né bitudybu scásiʼ ni bunyibu. Bislooybu más galrronladx que Jonás. Órni profeta reʼ bidzuitz, Jehová góoch láabu que guirá buñcu nili gonyibu «xí ngú cós tzaay né cós mal» (Jon. 1:1, 2; 3:10; 4:9-11). Después, Jesús biquiin ejemplo xtuny buñ gudx Nínive ni góc arrepentir, par goleʼ loguiaʼbu que Jehová rony xinésni né napbu galrronladx. Goniʼbu que guirá buñcu ñás «ló juicio» (Mat. 12:41).

14. ¿Xí oportunida sap buñ ninivitas órni guiás buñ par gac juzgar?

¹⁴ ¿Ló xí «juicio» ñás buñ ni bibany gudx Nínive? Jesús goniʼ que sioʼ buñ ni guiás par gac juzgar, ndeʼ gac ló dzú ni sietra (Juan 5:29). Bidudybu diitz tiemp ni gony mandarybu por Tipmil Íz, órni guiás «gueʼet ni buny xinésni né ni diti buny xinésni» (Hech. 24:15). Buñ ni diti buny xinésni, «siás par gac juzgar layibu» portín Jehová né Jesús sabiʼtzay layibu par ganyibu pal guisobyibu né gonyibu ni guisuidyibu. Pal toib ninivita riás per diti rasaguelbu gony adorarbu Jehová, saitybu (Is. 65:20). Per, pal rabúbu gacbu fiel Jehová, sieeni galán láabu né labúu guibanybu por tipzó (Dan. 12:2).

15. a) ¿Xigony diti labúu guinino que ni toib buñ ni bibany lainy gudx Sodoma né Gomorra siás? b) ¿Ximod labúu guienno diitz ni sieed ló Judas 7? (Bibiʼ cuadriyen ni laa «¿Xí láani goniiny Judas nadudy diitz?»).

¹⁵ Jesús goniʼ que ló «Día del Juicio», buñ ni diti goloʼ cuent láabu né guirá ni bisuidybu «sacaʼ más xiroʼ que ni cuaʼ Sodoma né Gomorra» (Mat. 10:14, 15; 11:23, 24; Luc. 10:12). ¿Xí goniiny nadudybu diitz? Labúu ñenni que Jesús biquiin toib hipérbole,c per guiráni radudyni diitz que diti gocni scú, xalagary ngú goniʼbu láani ló sentido literal, xomodca bunybu láani órni goniʼbu de buñ ni bibany gudx Nínive. «Día del Juicio» ni goniʼbu reʼ, nacni juicio ni bisetlabu órni goniʼbu de buñ ni bibany lainy gudx Nínive. Tanli ninivitas né buñ ni bibany lainy gudx Sodoma né Gomorra bunyibu cós mal. Per buñ de gudx Nínive gopyibu oportunida par góc arrepentiryibu. Láaca guisetnaladxno que Jesús goniʼ que buñ «ni buny cós mal siás par gac juzgar layibu» (Juan 5:29). Por ngú, ralooyni, sioʼ esperanza par buñ ni bibany gudx Sodoma né Gomorra. Pentzi tipnésyibu guiás né labúu gacnéno layibu guimbuyibu Jehová né Jesús.

16. ¿Xí láani rabiʼ Jehová par guiniʼbu chú buñ guilísbu? (Jeremías 17:10).

¹⁶ (Bíil Jeremías 17:10). Versículo reʼ raniʼni ló chop tzónsi diitz ni ma nanno: Jehová guirá ór rabiʼ «ximod nac xcalnabany buñ» né ranbu «ximod nac xpensary más nagach ni nap buñ». Órni guiniʼbu chú layibu guilísbu, saguiixbu tigaaga buñ «de acuerdo mod ni cayonyibu». Jehová sasagaʼ ló xtiitz órni guiquiinni, per láaca sonladxbu buñ órni labúuni. Por ngú diti labúu guinino que toib buñ diti siás, pal diti nandxichno láani por ni raniʼ la Biblia.

«JUEZ DE GUIDOPYNAC GUDXLIO» GUIRÁ ÓR «SONY NI NAC XINÉSNI»

17. ¿Xí sac né buñ ni ma goity?

¹⁷ Desde dzú ni Adán né Eva góc toibsi né Buñdzab né cualóyibu Jehová, ma goity xidalguixo buñ. Xienemigno, «galgoity» ma bigaityni xidal buñ (1 Cor. 15:26). ¿Xí sac né guirá buñcu? Toib grupo de 144.000 cristianos ni diti guisian Jehová, siásyibu lainy guibá né ma dipa saityibu (Apoc. 14:1). Né xidalgoluʼ buñguieeu né buñgonaʼ ni gondxiʼ Jehová siásyibu órni guiás «gueʼet ni buny xinésni» né sabanyibu por tipzó ló Gudxlio pal diti rasianyibu Jehová ló Tipmil Íz ni gony mandary Cristo né órni gac último prueby (Dan. 12:13; Heb. 12:1). Láaca ló Tipmil Ízcu, buñ «ni diti buny xinésni», ladyibu sioʼ buñ ni dipa buny xchiin Jehová o dada buñ «ni buny cós mal» sapyibu oportunida par guitzaʼyibu xcalnabanyibu né gony adoraryibu Dios (Luc. 23:42, 43). Per, tipnés buñ nigolú gocyibu buñ mal né biyopyibu mod cualóyibu Jehová, né por ngú Jehová ma goniʼ que diti salísbu guirá buñcu (Luc. 12:4, 5).

18, 19. a) ¿Xigony labúu gapno confianz ló ni coʼ Jehová gony né buñ ni ma goity? (Isaías 55:8, 9). b) ¿Xí guisuidyno ló artículo ni sieed?

¹⁸ ¿Labúu gapno confianz que órni Jehová rony juzgar buñ, guirá ór ronybu láani xinésni la? ¡Scú! Xomodca Abrahán, nanno que «Juez de guidopynac gudxlio» diti raché, napbu galrronladx né sabiduría xtunybu dipa radopy. Jehová bisiambu xcuent Xiimbu responsabilidad de gony juzgarbu né ma bisuidybu Jesús ximod gonybu láani (Juan 5:22). Tanli Jehová né Jesús labúu rabiʼyibu ni noʼ lainy xcalnabany buñ (Mat. 9:4). Por ngú ló guiráni sonyibu «ni nac xinésni».

¹⁹ Guirá ór gapno confianz lóo Jehová né ló ni ragoʼbu guicbu gonybu. Láabu diti nacbu xomod lóono, nantzaybu ximod gony juzgarbu (bíil Isaías 55:8, 9). Nanno que layibu rantzaybu lóono, né por ngú rapno confianz ló guirá juicios xtuny Jehová né Xiin. Láaca nanno que Jesús, Rey xtunyno, rasuʼtzay xcalrronladx né justicia xtuny Bixiosbu (Is. 11:3, 4). Ló artículo ni sieed, sasuidyno xi diti nanno né xi nanno mod gony juzgar Jehová né Jesús a guirá buñ ló gran tribulación.