ARTÍCULO NI GUISUIDYNO 25
CANCIÓN 7 Jehová es mi fuerza y mi salvación
Guisetnaladxno que Jehová nac «Dios ni nabany»
«¡Jehová nabany!» (SAL. 18:46).
TEMA
Galnasác ni racaʼno por ni rasetnaladxno que Dios ni ronyno xchiin nabany.
1. ¿Xí labúu gacné lóono par gonyrano xchiin Jehová ná radudyno ló xidal galnagan?
LA Biblia ná que tiemp ni nabanyno nigoreʼ nacni «tiemp nagan, né nagan par gony guantary buñ láani» (2 Tim. 3:1). Ló gudxliogoxreʼ guiránac buñ nap galnagan, per ni nacno xpiin Dios diti nosi racalóno galnagan ni racaló buñ, láaca racalóno oposición né persecución. ¿Xí labúu gacné lóono par gonyrano xchiin Jehová ná racalóno guirá galnagan reʼ? Toibtica ni labúu gacné lóono láani ngú, guisetnaladxno que Jehová nac «Dios ni nabany» (Jer. 10:10; 2 Tim. 1:12).
2. ¿Ximod raslooy Jehová que nacbu Dios ni nabany?
2 Nigolú noʼ Jehová, né racnébu lóono órni radudyno ló galnagan né rayopybu oportunida par gonybu láani (2 Crón. 16:9; Sal. 23:4). Ni guibiʼno láabu xomod toib Dios ni nabany sadudyni fuers lóono par gony guantaryno nitisi prueby ni tudyno ló. Modcu góc né rey David, guibiʼno ximod.
3. ¿Xí láani bidudy diitz David órni goniʼbu: «¡Jehová nabany!»?
3 David bimbu né gop confianz lóo Jehová. Gonabbu xcalrracné Jehová órni rey Saúl né stipnés buñ cuanal láabu par nagaity láabu (Sal. 18:6). Órni bibiʼbu que Jehová cuapy oración xtunybu né bilaa láabu, David goniʼ: «¡Jehová nabany!» (Sal. 18:46). Né ni goniʼbu, diti nosi bidudybu diitz que nigolú noʼ Dios. Toib obra de consulta náni que David bislooy confianz ni napbu lóo Jehová «xomod toib Dios ni nabany ni racné xcudx guirá ór». David bibiʼ ximod gocné Jehová láabu ló xcalnabánybu né ngú buny que ñapbu más confianz que Dios nabany né bidudy fuers láabu par ñonyrabu xchiin Jehová (Sal. 18:28, 29, 49).
4. ¿Xí galnasác racaʼno por ni rabiʼno Jehová xomod Dios ni nabany?
4 Ni gapno confianz que Jehová nac Dios ni nabany sacnéni lóono par gonyno xchiimbu né gan, gony guantaryno nitisi galnagan né sachiinni lóono gonyno dxiin nadip por láabu. Né láaca sony dxichni ni ma goloʼno guicno tzoʼno gaxca láabu.
DIOS NI NABANY SADUDY FUERS LOOY
5. ¿Xí láani sacné lóono par guicalóno galnagan né confianz? (Filipenses 4:13).
5 Labúu sony guantaryno nitisi galnagan ni guicalóno pal rasetnaladxno que Jehová nabany né noʼbu puext par gacnébu lóono. Diti noʼ ni toib galnagan más xiroʼ que Jehová. Láabu napbu Xiroʼgolu galnadip né labúu guidudybu fuers lóono par gony guantaryno nitisi galnagan (bíil Filipenses 4:13). Por ngú napno xidal razón par gony guantaryno prueby né confianz. Ni rabiʼno que Jehová racné lóono né galnagan mitien, ronyni que gapno confianz que láaca sacnébu lóono ló galnagandaʼ.
6. ¿Xí cós ni bibany David buny nadipni confianz ni gopbu lóo Jehová?
6 Guibiʼno chop cós ni godudy David ló né xi gocné láabu par ñapbu más confianz lóo Jehová. Órni gonbu xiil, toib betz gonás toib xiil xtuny bixiosbu, né stoib dzú, toib ós buny ngúca. Ló guiropca ndeʼ, David né balory cuanal betz né ós né bilaabu xilieenbu. Gonbu que Jehová bidudy fuers láabu par ñonybu láani né por ngú diti biyopybu mod ñonyxiroʼ buñ láabu (1 Sam. 17:34-37). David dipa bialadx guirá ndeʼ. Bunybu pensary loni né modcu gopbu confianz que Dios ni nabany ñony nadip láabu ló dzú ni sietra.
7. ¿Ló xí cós goloʼ David guic, né xigony gocnéni láabu nacalóbu Goliat?
7 Después, órni David góc mbioxhlasien, goyguenbu campamento xtuny soldad de gudx Israel. Bibiʼbu que guirá soldad xtuny israel nigolú cadzuiby portín toib soldad filisteo ni nigolú nasoʼ ni góc laa Goliat caniʼ: «¡Dzureʼ nainy naʼ tíila né soldad xtuny Israel!» (1 Sam. 17:10, 11). Guirá soldadcu bidzuibyibu portín goloʼyibu guicyibu balaati nasoʼ Goliat diti ló ni caniʼbu (1 Sam. 17:24, 25). Per David diti buny ngú, láabu bibiʼbu que Goliat cacaló «soldad xtuny Dios ni nabany», diti nosi soldad xtuny Israel (1 Sam. 17:26). Né máspa la, bunybu pensary lóo Jehová. Gopbu confianz que Dios ni gocné láabu né xilieen xtunybu, láaca ñacné láabu ló galnagancu. Né xcalrracné Jehová, cualóbu Goliat né mod ma nanno, ¡bigaitybu filisteo reʼ! (1 Sam. 17:45-51).
8. ¿Xí laani sacné lóono par gac nadip confianz ni napno Jehová ló tiemp nagan? (Láaca bibiʼ retrat).
8 Xomodca David, labúu gony guantaryno prueby pal rasetnaladxno que Dios ni nabany puextca noʼ par gacné lóono (Sal. 118:6). Labúu gony dxichno confianz reʼ pal ronyno pensary ló guirá ni ma bunybu ló dzú ni see. Por ejemplo, bíil historias ni sieed ló la Biblia ni gony que guisetnaladxlo ximod bilaa Jehová xpiin (Is. 37:17, 33-37). Né láaca, bisuidy información ni noʼ ló jw.org ni raslooy ximod ma gocné Jehová herman ló naareʼ. Né bisetnaladx ximod ma gocné Jehová looy ló xcalnabánylo. Diti tzoʼlo ló galrrasaʼ pal diti ritzanló ló xpensarylo toib experiencia ni radziguiaʼ buñ xomod ni gony gan buñ toib betz o toib ós. Ni más rasac ngú que Jehová ma gocné looy xidal buelt ló xcalnabánylo. Por ejemplo, biruʼbu looy par gaclo ximigbu (Juan 6:44). Né por xcalrracnébu noʼlo ló galnigolú. ¿Xigony diti ranablo gacnébu looy par guisetnaladxlo órni cuapybu oración ni bunylo, órni gocnébu looy né gonásbu looy ló galnagan? Ni gonylo pensary ló guirá ni ma buny Jehová por looy. Sacnéni looy par gaplo más confianz que láabu sacnérabu looy.
Mod racalóno galnagan, raguiñani toib cós más xiroʼ. (Bibiʼ párrafos 8 né 9).
9. ¿Ximod non guibiʼno galnagan? (Proverbios 27:11).
9 Ni nanno que Jehová nac Dios ni nabany sacnéni lóono par guibiʼno galnagan xomod rabiʼbu láani. Nacni toib cós más xiroʼ ni raguiña Jehová né Buñdzab. Buñdzab ná que órni guicalóno galnagandaʼ sasianno Jehová (Job 1:10, 11; bíil Proverbios 27:11). Por ngú, pal diti rasianno Jehová, saslooyno que nadxiʼno Jehová né que Buñdzab rascú. ¿Cacalólo oposición xtuny gobierno, diti naplo bidxiich o buñ diti ná guicadiag looy órni rieelo predicación o stipnés galnagan la? Pal nacni scú bisetnaladx que: guirá galnagan ni cacalólo radudyni oportunida looy par coʼ nakitlo xcalnabany Jehová. Diti guialadxlo que láabu diti sadudybu lagary guicalólo toib prueby ni diti labúu gony guantarylo (1 Cor. 10:13). Sadudybu fuers looy par gony guantarylo.
DIOS NI NABANY SAGUIIXBU LOOY
10. ¿Xí láani sony Dios ni nabany por buñ ni rony adorar láabu?
10 Jehová raguiix buñ ni rony adorar láabu (Heb. 11:6). Nigoreʼ racnébu lóono par guiguaʼno goxt né nakit, né ló dzú ni sietra sadudybu lóono galnabány tipzó. Napno confianz que nainy quiixbu lóono né que napbu galnadip par gonybu láani. Ndeʼ rachiin lóono par gonyno dxiin nadip por láabu, xomodca buny xpiin Dios ló dzú ni see. Guibiʼno ni gosaclóo né Timoteo (Heb. 6:10-12).
11. ¿Xí láani bichiin Timoteo par ñonybu dxiin nadip lainy congregación? (1 Timoteo 4:10).
11 (Bíil 1 Timoteo 4:10). Timoteo golaʼijbu esperanza xtunybu lóo Dios ni nabany. Gondxichbu que Dios naguiix láabu. Por ngú bunybu dxiin nadip por Jehová né por stipnés. ¿Xí bunybu? Apóstol Pablo buny animar láabu ñacbu toib galán mextra, natudybu discurs sacró, né ñacbu toib galán ejemplo par herman mbioxhlas né ni ma nac buñgol. Cuacuentbu dxiin nagan, xomod ni nadudybu consej nadipien per né galrronladx a herman ni biquiin láani (1 Tim. 4:11-16; 2 Tim. 4:1-5). Timoteo gopbu confianz que dada órni diti ñoʼ chú nabiʼ dxiin ni bunybu o diti ñoʼ chú nagoʼ cuent láani, Jehová naguiix láabu (Rom. 2:6, 7).
12. ¿Xí láani labúu guichiinni ancianos par gonyibu dxiin nadip? (Láaca bibiʼ retrat).
12 Xomodca Timoteo, ancianos láaca labúu gapyibu confianz que Jehová rabiʼ né rasac par láabu dxiin ni ronyibu. Diti nosi ragonésyibu congregación, rasuidyibu né raniʼyibu xtiitz Dios, xidal ancianos láaca ronyibu dxiin ló proyectos de construcción né ló labores de socorro. Stipnésyibu ronyibu dxiin ló Grupos de Visita a Pacientes o ló Comités de Enlace con los Hospitales. Nanyibu que congregación nacni xtuny Jehová, diti xtuny buñgudxlio. Por ngú ronyibu xchiinyibu né guidopy xcalnabanyibu, né napyibu confianz que Jehová saguiix layibu (Col. 3:23, 24).
Dios ni nabany saguiix looy por dxiin nadip ni ronylo lainy congregación. (Bibiʼ párrafos 12 né 13).
13. ¿Ximod rasac Jehová órni rabiʼbu que ronyno rutirigaʼlni lóono por gonyno xchiimbu?
13 Diti guiráno labúu gacno ancianos, per guiráno noʼ ni labúu guidudyno Jehová. Par láabu nigolú rasac ni ronyno rutirigaʼlni lóono por guidudyno ni más galán ni napno. Por ejemplo nigolú rasac par láabu donación ni radudylo par dxiin ni rac ló guidopynac Gudxlio, ná pal diti xiroʼni. Rioʼ nakitbu órni rabiʼbu que ralíslo ñalo par gony comentarlo ná radzuibylo né ratoylo. Né nigolú rabaladxbu órni ratudylo scásiʼ ni rony stipnés looy. Pal ronylo pensary que diti labúu ronylo midid raniiny looy por Jehová, bisetnaladx que láabu rabiʼbu ni labúu ronylo. Láabu nadxiʼbu né saguiixbu looy por ni ronylo (Luc. 21:1-4).
TZOʼNO GAX DE DIOS NI NABANY
14. ¿Xigony ranino que ni tzoʼno gax de Jehová racnéni lóono par gacno fiel? (Láaca bibiʼ retrat).
14 Pal ronyno crer que nigolú noʼ Jehová, diti sasac naganno gacno fiel. Ngú góc né José, ni diti gosaguel ñony galyoxh. Bunybu crer que nigolú noʼ Dios né diti goniiny láabu ñonybu cós ni diti rioladxbu (Gén. 39:9). Par láaca gonyno crer que nigolú noʼ Jehová, non cueʼno tiemp par gonyno oración né guisuidyno Xtiitzbu. Modcu, sadzaktzayno más láabu. Pal xomodca José radzaktzayno Jehová, dipa saniiny lóono gonyno cós ni diti rioladxbu (Sant. 4:8).
Ni guibigaxlo Dios ni nabany sacnéni looy par gaclo fiel. (Bibiʼ párrafos 14 né 15).
15. ¿Xí rasuidyni lóono mod buny israelitas ni goyoʼ ló yoovich? (Hebreos 3:12).
15 Buñ ni rialadx que Jehová nac Dios ni nabany diti sasac naganyibu galsityibu de Jehová. Gonyno pensary ló ni gosaclóo israelitas órni goyoʼyibu ló yoovich. Gonyibu que noʼ Jehová, per gosaló bunyibu pensary pal nigolú nadudybu ni caquiinyibu. Dada gonabdiitzyibu: «¿Noʼ Jehová ladno la o yaca?» (Éx. 17:2, 7). Después ma diti bisobyibu Dios. Diti nainy gonyno xomod bunyibu (bíil Hebreos 3:12).
16. ¿Xí labúu nagoʼ prueby fe xtunyno?
16 Gudxliogoxreʼ ronyni que gac nagan tzoʼno gax de Jehová. Xidal buñ raniʼ que diti noʼ Dios, né casi guirá ór ralooyni más rieeni galán buñ ni diti rony ni nábu. Guirá ndeʼ labúu coʼni prueby fe xtunyno. Nigolú, dipa sonyno crer que diti noʼ Dios, per pentzi labúu ñonyno pensary pal nigolúpa sacnébu lóono. Moda ngú gosaclóo ni bicaʼ Salmo 73. Bibiʼbu que buñ ni diti bisob leyes xtuny Dios galán goyeeni layibu. Ngú buny que nanabdiitzbu pal raquiin gony buñ xchiin Jehová o yaca (Sal. 73:11-13).
17. ¿Xí láani sacné lóono par tzoʼno gax de Jehová?
17 ¿Xí láani gocné salmista reʼ par natzaʼbu mod bunybu pensary? Bunybu pensary ló ni guisaclóo buñ ni rialadx Jehová (Sal. 73:18, 19, 27). Láaca bunybu pensary ló galnasác ni guicaʼbu por ni ronybu xchiin Dios (Sal. 73:24). Lóono láaca labúu gonyno pensary ló guirá galnasác ni ma bidudy Jehová lóono né guitzakno guiráni né mod ñac xcalnabányno pal diti ñonyno xchiimbu. Ni gonyno ngú sacnéni lóono par dipa guisianno Jehová né guinino ni goniʼca salmista: «Per naʼ sabigaxa ronoʼ Dios portín ngú ni más sacró par naʼ» (Sal. 73:28).
18. ¿Xigony labúu guibiʼno dzú ni sietra né confianz?
18 Labúu gony guantaryno nitisi galnagan ni guicalóno ló dzú ni ma guidubylagaʼ reʼ, portín nacno xomós «Dios ni nabany né ni nigolú» (1 Tes. 1:9). Nigolú noʼ Dios ni rioʼ galrrasaʼ por lóono, né guirá ór noʼbu puext par gacnébu lóono. Bunybu láani né xpiimbu ló dzú ni see né sonyrabu láani ló naareʼ. Mápa mer saló toib tribulación ni diti ma goyoʼ ór góc, per diti sioʼno toibno (Is. 41:10). Por ngú, labúu guinino né confianz: «Jehová racné naʼ. Diti sadzubi» (Heb. 13:5, 6).
CANCIÓN 3 Tú me das fuerza, confianza y valor