¿Xigony raduʼdyno guixquix por ni ratuʼdy Jehová scásiʼ xcalkiéno?

1, 2. ¿Xigony ranino que buñgudxlio cadudyno modpa godudy mbioxhlas ni bisetlano ló párrafo 1?

BUNY pensary ló toib mbioxhlas ni bixiosbu né xinaʼbu nacyibu buñ ric. Per radxin toib dzú noʼ ni raiby láabu que bixiosbu né xinaʼbu goity ló toib desgrasy. Né diti ngúsi. Láaca ranbu que bixiosbu né xinaʼbu buny gaxt guirá xpidxiich né bidobyibu ló diʼin. Né modcu, xalagary ñanébu bidxiich, bianébu diʼin, né buñ ni nasapybu canab láabu quiixbu nimaca diʼincu. Per diʼincu nigolú xiroʼni né dipa labúu saguiixbu láani.

² Lóono ni nacno buñgudxlio cadudyno modcuca. Bixiosno Adán né xinaʼno Eva gocyibu buñ ni diti gop galkié né bibanyibu ló toib lagary móz (Gén. 1:27; 2:7-9). Layibu labúu nabanyibu nakit né sacró. Per bidzaʼ mod bibanyibu. Bisnityibu lidxyibu né bisnityibu oportunida de nabanyibu tipzó. ¿Xí láani bisianéyibu xiinyibu? La Biblia ná: «Xomod por toibsi buñguieeu [Adán], galkié goyoʼni ló gudxlio, né galgoity goyoʼni por galkié, né modreʼ galgoity golaani guirá buñgudxlio portín guiráyibu bichéyibu» (Rom. 5:12). Adán bisiané galkié lóono, ni riné lóono ló galgoity. Galkié reʼ nacni xomod toib diʼin ni diti labúu quiix buñgudxlio (Sal. 49:8).

3. ¿Ximod nac galkié xomod diʼin?

³ Jesús bitzakbu galkié né «diʼin» (Mat. 6:12; Luc. 11:4). Órni ronyno galkié, ronyno toib diʼin né Jehová ni non quiixno. Pal láabu diti ñonybu xitcal par nabeʼbu diʼincu, nosi labúu naguiixno láani né xcalgoityno (Rom. 6:7, 23).

4. a) Pal diti ñoʼ chú ñacné lóono, ¿xí ñac né lóono? (Salmo 49:7-9). b) ¿Xí raduʼdy diitz galkié ló la Biblia? (Bibiʼ cuadriyen ni laa «Galkié»).

⁴ Por stiplóocano diti labúu nacaʼno stoib ni Adán né Eva bisnit (bíil Salmo 49:7-9). Pal diti ñoʼ ni ñacné lóono dipa ñapno esperanza de guibányno tipzó né guiásno lad gueʼet. Ñaityno xomod nimal (Ecl. 3:19; 2 Ped. 2:12).

5. ¿Xí láani ma buny Jehová par gacnébu lóono quiixno diʼin xtuny galkié? (Bibiʼ dibuj).

⁵ Gonyno pensary ló mbioxhlas ni bisetlano ló párrafo toib. ¿Ximod nasacbu pal toib buñguieeu ric naniʼ que láabu quiixbu guirá xtiʼin mbioxhlas reʼ? Nigolú naduʼdybu guixquix né nasaguelbu naguiix buñguieeucu xtiʼinbu. Modcuca, Jehová, Bixiosno ni ronladx lóono, biduʼdybu toib galrrascad lóono ni raguiix diʼin xtuny galkié ni bisiané Adán lóono. Jesús golexabu galrrascadcu modreʼ: «Nigolú gondxiʼ Dios buñgudxlio por ngú bidudybu toibguielot Xiimbu, modreʼ guirá ni gap fe láabu diti guinitló né labúu guibany tipzó» (Juan 3:16). Galrrascadcu láaca ronyni que guidzaktzayno Jehová.

6. ¿Xí cós guisuidyno ló artículo reʼ, né xigony?

⁶ ¿Ximod labúu gacné galrrascad reʼ lóono né tudy scásiʼ xcalkiéno? Par ganno xcalrracapyni, ló artículo reʼ guisuidyno guirá ndeʼ: guidzaktzayno Jehová stoib, expiación, propiciación, rescate, redención né guiniʼ Dios que nacno buñ ni rony xinésni. Ni gonyno pensary ló guirá diitzreʼ sacnéni lóono par guiduʼdyno guixquix por guirá ni ma buny Jehová par guituʼdy scásiʼ xcalkiéno.

NI NAINY GONYNI: GUIDZAKTZAYNO JEHOVÁ STOIB

7. a) ¿Xí más bisnit Adán né Eva? b) ¿Xí láani raquiinno lóono ni nacno xiin Adán né Eva? (Romanos 5:10, 11).

⁷ Adán né Eva diti nosi bisnityibu oportunida de guibanyibu tipzó. Láaca bixinyibu mod bidzakyibu Jehová. Órni yása gonyibu galkié, gocyibu xfamil Dios (Luc. 3:38). Per, órni diti bisobyibu Jehová, ma diti gocyibu xfamil Dios. Guirá ngú góc órni yása tzoʼ xiinyibu (Gén. 3:23, 24; 4:1). Por ngú, guiráno ni nacno xiinyibu non guidzaktzayno Jehová stoib (bíil Romanos 5:10, 11). Toib obra de consulta ná que órni raniʼni, guidzaktzay buñ Jehová stoib, raquiinni toib diitz griego ni raduʼdy diitz «gonyno que xi enemigno gacbu ximigno». Radziguiaʼno que Jehová ngú ni goniʼ que gacno ximigbu stoib. ¿Ximod bunybu láani?

MOD GACNI: EXPIACIÓN

8. a) ¿Xí láani ngú expiación? b) ¿Xí láani ngú propiciación?

⁸ Expiación nacni mod goloʼ Jehová par labúu guidzaktzayno láabu. Raduʼdyni diitz guitzaʼno toib cós por stoib cós ni rasac midid cuca. Modcuca, labúu guicaʼno stoib o guitzaʼno toib cós ni ma binit o ni ma binitló. Escrituras Griegas Cristianas raquiin diitz propiciación, ni rarexa xomodca expiación (Rom. 3:25). Propiciación nacni mod rony Jehová par labúu guiguaʼ buñ sacró né láabu, né gacbu ximigbu.

9. ¿Xí láani goloʼ Jehová par natuʼdybu scásiʼ xcalkié israelitas?

⁹ Ló xtzú israelitas, Jehová goloʼbu toib mod ni labúu nadudy xcalkiéyibu scásiʼ né nadzaktzayibu Jehová stoib. Ló Dzú de Expiación, ni góc tibuelt ló tobiz, sumo sacerdote biduʼdybu galrrascad Jehová por gudx. Nigolú, guirá galrrascadcu diti labúu nasiáditni xcalkié israelitas, portín buñgudxlio más rasac que nimal. Per Jehová goyoʼ puext par natuʼdybu scásiʼ xcalkiéyibu pal israelitas ñac arrepentiryibu né naduʼdyibu sacrificios ni gonabbu (Heb. 10:1-4). Láaca, guirá sacrificios ni biduʼdyibu ló Dzú de Expiación né stipnés ór, bunyni que israelitas nasetnaladx que nacyibu buñ galkié né que raquiinyibu toib mod más galán par nadudy scásiʼ xcalkiéyibu, toib ni diti nadudy xtzú.

10. ¿Ló xí cós buny pensary Jehová par guituʼdybu scásiʼ xcalkié buñ?

¹⁰ ¿Ló xí cós buny pensary Jehová par natuʼdybu scásiʼ xcalkié buñ? Bunybu que xiingaʼnbu ni nadxiʼgolubu «goity toibsi buelt par goʼoybu xcalkié xidal buñ» (Heb. 9:28). Jesús bunycuentbu xcalnabánybu xomod rescate par guilaabu xidalguixo buñ (Mat. 20:28). ¿Né xí láani ngú rescate?

MIDID NI BIAX: RESCATE

11. a) Ló la Biblia, ¿xí láani ngú rescate? b) ¿Xí láani non ñac cumplir par labúu ñax rescate?

¹¹ Ló la Biblia, rescate nacni midid riax par guidzaktzay buñ Jehová stoib.a Par Jehová modreʼ labúu guicaʼ buñ toib cós ni bisnit. Guisetnaladxno que Adán né Eva bisnityibu xcalnabányibu ni diti gop galkié né oportunida de nabanyibu tipzó. Por ngú rescate non nasacni mididpa ni binit cu (1 Tim. 2:6). Nosi toib buñguieeu ni ñony cumplir né guionca requisitos reʼ labúu ñony láani: toib buñ ni diti nap galkié, ni nap oportunida de guibany tipzó ló Gudxlio né ni nasaguel ñaity por lóono. Nosi pal ñac cumplir guirá ndeʼ, xcalnabány buñguieeucu labúu ñoʼni xalagary galnabány ni binit né modreʼ labúu ñoʼ expiación.

12. ¿Xigony labúu godix Jesús rescate?

¹² Guisuidyno tzón cós por ni labúu godix Jesús rescate: 1) diti gopbu galkié, né «diti bunybu galkié», 2) por ngú labúu nabanybu tipzó ló Gudxlio né 3) goyoʼbu puext ñaitybu por lóono (1 Ped. 2:22; Heb. 10:9, 10). Jesús diti gop galkié, xomodca góc Adán órni yása guichébu (1 Cor. 15:45). Modreʼ labúu bisiaabu xcalkié Adán, ni raduʼdy diitz, bitzaʼbu ni bisnit Adán (Rom. 5:19). Modcu, Jesús bidxin góc «último Adán». Ma diti raquiin guieed stoib buñgudxlio ni diti nap galkié par quiixbu ni bisnit Adán. Jesús goitybu «tibuelt né por tipzó» (Heb. 7:27; 10:12).

13. ¿Ximod diti toibsi midid nac expiación né rescate?

¹³ Por ngú, ¿ximod diti toibsi midid nac expiación né rescate? Expiación nacni ni rony Jehová par guidzaktzaybu buñgudxlio stoib. Rescate nacni midid riax xcalkié buñgudxlio. Riaxni né xcalgoity Jesús (Efes. 1:7; Heb. 9:14).

MOD RARECAANI: REDENCIÓN NÉ GUINIʼ DIOS QUE NACNO BUÑ NI RONY XINÉSNI

14. ¿Xí láani guisuidyno nigoreʼ, né xigony?

¹⁴ ¿Ximod racné expiación lóono? La Biblia raquiin xidal diitz par cuéxa láani. Ná guirá diitzcu toibsi midid rarexani, tigaagani rabeʼ loguiaʼni mod goloʼ Jehová par guituʼdybu scásiʼ xcalkiéno. Nigoreʼ guisuidyno diitzreʼ. Ni gonyno ndeʼ racnéni lóono par guisac ni ratuʼdy Jehová scásiʼ xcalkiéno.

15, 16. a) ¿Xí láani raduʼdy diitz redención? b) ¿Ximod rasacno órni ronyno pensary que labúu guireʼno xan xomandary galkié né galgoity?

¹⁵ Diitz redención raduʼdyni diitz guireʼno xan xomandary toib cós né xcalrracné xcalgoity Jesús. Apóstol Pedro golexa láani modreʼ: «Lóoto nanto que diti gocni né cós ni raxin xomod plat né or ni bilaato de galnabány ni diti noʼ pu raquiin ni xfamilto ni bibany ló dzú ni see bitudy lóoto. Xalagary ngú, gocni né runy ni rasac, ni nac xomod xiruny toib xilieen ni nasac, xiruny Cristo» (1 Ped. 1:18, 19).

¹⁶ Por ni goity Jesús por lóono, labúu rareʼno xan xomandary galkié né galgoity, ni ratuʼdy lóono ló galrrioʼob (Rom. 5:21). Nigolú raduʼdyno guixquix Jehová né Jesús por ni bituʼdyibu scásiʼ xcalkiéno né xcalgoity Jesús (1 Cor. 15:22).

17, 18. a) ¿Xí raduʼdy diitz guiniʼ Dios que nacno buñ ni rony xinésni? b) ¿Ximod racnéni lóono?

¹⁷ Ni guiniʼ Dios que nacno buñ ni rony xinésni raduʼdyni diitz que ma diti napno dool né que Jehová ma bialadx guirá cós ni bunyno. ¿Raduʼdy ndeʼ diitz que Jehová diti rasobbu ni láacabu goniʼbu la? Yaca. Láabu diti raniʼbu que por stiplóocano nacno buñ ni rony xinésni nili racacuentbu galkié. Per fe ni napno ló expiación né ló xcalgoity Jesús raquiinni par guituʼdy Jehová scásiʼ xcalkiéno (Rom. 3:24; Gál. 2:16).

¹⁸ ¿Ximod racné lóono ni guiniʼ Jehová que nacno buñ ni rony xinésni? Jehová ma golú tipnés cristianos par gony mandary né Jesús lainy guibá, né ma nacyibu xiin Dios (Tito 3:7; 1 Juan 3:1). Jehová ma bituʼdy scásiʼ xcalkiéyibu; nacni suusi diti bunyibu láani. Por ngú labúu rioʼyibu lad Gobierno xtuny Dios (Rom. 8:1, 2, 30). Stipnés cristianos napyibu esperanza de guibanyibu ló Gudxlio por tipzó né ma nacyibu ximig Dios. Xcalkiéyibu láaca ma godudy scásiʼ (Sant. 2:21-23). Xidalguixo buñ ni diti gaity ló Armagedón, napyibu esperanza que ma dipa sabiʼyibu galgoity (Juan 11:26). Buñ «ni buny xinésni» né «ni diti buny xinésni» ni ma goity siásyibu lad gueʼet (Hech. 24:15; Juan 5:28, 29). Conforma tudy tiemp, guirá xpiin Jehová ni guibany ló Gudxlio sapyibu «libertad ni nap xiin Dios» (Rom. 8:21). Mod ma bisuidyno, expiación racnéni lóono par guidzaktzayno Bixiosno, Jehová. ¡Toib galnasác nigolú sacróyen!

19. ¿Xí labúu ronyno nigoreʼ por ni buny Jehová né Jesús por lóono? (Láaca bibiʼ cuadriyen «Jehová ratuʼdy scásiʼ xcalkiéno»).

¹⁹ Nigolú, diti bidzel xcalrrienno xi láani ñonyno xomod mbioxhlas ni bisnit guirá ni gop né ni biané toib diʼin ni diti labúu naguiixbu. Per Jehová gocné lóono, né por expiación né xcalgoity Jesús, ma bidzaʼ mod nabanyno. Fe ni napno ló Jesucristo racnéni lóono par guireʼno xan xomandary galkié né galgoity. Né láaca, labúu guialadx Jehová xcalkiéno, suusi dipa bunyno láani. Per ni más rasac, láani ngú que nigoreʼ ma labúu radzaktzayno Bixiosno ni noʼ guibá.

20. ¿Xí láani guisuidyno ló artículo ni sieed?

²⁰ Órni ronyno pensary ló guirá ni ma buny Jehová né Jesús por lóono, nigolú raduʼdyno guixquix layibu (2 Cor. 5:15). Pal diti ñacnéyibu lóono dipa ñapno esperanza. Ló artículo ni sieed, guisuidyno tipnés comparaciones ni sieed ló la Biblia ni gacné lóono guientzaayno xi raduʼdy diitz ni ratuʼdy Jehová scásiʼ xcalkiéno.