Ña Jehová diti dopni

1. ¿Ximod bislooy Moisés confianz lóo Jehová órni goleʼbu israelitas de gudx Egipto?

LIBRO xtuny Hebreos rasetlani xidal ejemplos de buñ ni gop fe lóo Jehová. Toibtica de layibu ngú Moisés, láabu bislooybu que gopbu xiroʼ fe lóo Jehová (Heb. 3:2-5; 11:23-25). Bislooybu cualidad reʼ órni goleʼbu israelitas gudx Egipto. Diti bidzuibybu faraón né guirá soldad xtuny. Gopbu confianz lóo Jehová né golonésbu gudxcú ló nisdaʼ Xináa né ló yoovich (Heb. 11:27-29). Casi guirá israelitas diti gopyibu confianz que Jehová labúu ñan layibu, per Moisés gop confianz lóbu. Né galán goyeeni láabu, portín Jehová biduʼdy galrro né nís guirá buñ israelitas órni gosaayibu ló yoovich par diti ñaityibu (Éx. 15:22-25; Sal. 78:23-25).a

2. ¿Xigony gonabdiitz Jehová a Moisés ni sieed ló Números 11:21-23?

² Midid tobiz de goló goleʼ Jehová Israel lainy gudx Egipto, goniʼbu que naduʼdybu beʼel ñooyibu. Ná Moisés gopbu xiroʼ fe diti tampa bunybu crer ni goniʼ Jehová, gosacnaganbu ñonybu pensary pal Jehová labúu nadzel xiroʼ beʼel par nayaʼan xidal millón de buñcu ló yoovich. Por ngú, Dios gonabdiitz láabu: «¿Xí nigolú dop ña Jehová la?» (bíil Números 11:21-23). Reʼ, diitz ni ná «ña Jehová» raduʼdy diitz galnadip ni raquiin Dios par gonybu ni nábu o espíritu santo xtunybu. Ló stoib diitz, Jehová gonabdiitz láabu: «¿Ronylo pensary que diti labúu soni ni raabi la?».

3. ¿Xigony nigolú rasac guisuidyno ni gosaclóo Moisés né israelitas?

³ Looy ga, ¿ma gonabdiitzlo looy toibtica buelt pal Jehová labúu saduʼdy ni caquiinlo né xfamilo par labúu tudyto dzú la? Ná ma bunylo galrranabdiitz cu o yaca, guisuidyno ejemplo xtuny Moisés né israelitas, ni diti gop confianz que Jehová labúu naduʼdy ni caquiinyibu. Láaca sasuidyno tipnés textos ni sacné lóono gapno confianz que dipa dop ña Jehová.

¿XÍ RASUIDY EJEMPLO XTUNY MOISÉS NÉ ISRAELITAS LÓONO?

4. ¿Xigony israelitas diti tampa gopyibu confianz que Jehová labúu ñan layibu?

⁴ ¿Xigony xidal israelitas diti gopyibu confianz que Jehová labúu ñan layibu? Gudx Israel né xidal buñ de stipnés gudx bireʼyibu gudx Egipto né ma sanéyibu xidzú tiemp ni casaayibu ló yoovich par guidxinyibu ló Layoo ni Jehová goniʼ guiduʼdy layibu (Éx. 12:38; Deut. 8:15). Buñ de stipnés gudx bixacladxyibu godóyibu maná né gosaló bitzotz roʼyibu. Né xidal israelitas buny scúca (Núm. 11:4-6). Gosaló bisetnaladxyibu beʼel né stipnés galrro ni godóyibu dzú goyoʼyibu Egipto. Né Moisés, por ni guirá buñcu nigolú gonab beʼel ñoo, bikíilyibu Moisés par ñoʼ galrrasaʼ nayopy beʼel par ñooyibu (Núm. 11:13, 14).

5, 6. ¿Xí rasuidyno mod bisuʼ israelitas mod buny buñ de stipnés gudx?

⁵ Mod rabiʼno, buñ israelitas bisuʼyibu buñ de stipnés gudx ni diti nan raduʼdy guixquix. Lóono láaca labúu nasuʼno mod nac buñ ni nagoo lóono ni diti nan raduʼdy guixquix, né nadxin midid ma diti nabaladxno por cós ni raduʼdy Jehová lóono. Labúu nasaló nasetnaladxno ni gopno ló dzú ni see né ñapno envidy ni nap stipnés. Per sioʼno más nakit pal rioʼno conforme né ni napno.

⁶ Buñ israelitas non nasetnaladxyibu ni Jehová biduʼdy xtiitz ñony né layibu. Jehová góoch layibu naduʼdy xidalguixo cós layibu órni nadxinyibu ló Layoo ni láabu biduʼdybu xtiitzbu nacaʼyibu, diti órni casaayibu ló yoovich. Scúca, xalagary gonygoluʼno xpensaryno ló cós ni diti napno nigoreʼ, más galán gonyno pensary ló guirá cós ni guiduʼdy Jehová lóono ló gudxlio copy. Láaca, labúu gonyno pensary ló tipnés textos ni racné lóono gapno confianz lóo Jehová.

7. ¿Xigony labúu gandxichno que ña Jehová diti dopni?

⁷ Sigory ranabdiitzno lóocano xigony gonabdiitz Dios a Moisés: «¿Xí nigolú dop ña Jehová la?». Sigory goniiny láabu ñen Moisés que ñabu, ni raduʼdy diitz galnadip ni napbu, dipa radopyni né láaca radxinni rotísi lagary ná gacni nigolú sit. Por ngú, ná buñ israelitas goyoʼyibu galay yoovich, Jehová labúu naduʼdy xiroʼ beʼel layibu. Dios bislooy xcalnadipbu né barñabu ni sioʼol (Éx. 6:6). Por ngú, órni cadudyno ló toib galnagan, labúu gapno confianz que ña Jehová labúu sigaʼl lóono rotísi noʼno (Sal. 138:6, 7).

8. ¿Xí raquiin gonyno par diti tzaguiabno ló galrraché ni buny israelitas? (Láaca bibiʼ dibuj).

⁸ Jehová buny cumplir xtiitz né bixelbu ronoʼ xcudxbu xidalguixo né por montón guidguiʼx. Per buñ israelitas diti biduʼdy guixquix láabu por galrradziguiaʼ reʼ, xalagary ngú bisobladxyibu. Né godudyibu tipdzú gorol bitopyibu guirá guidguiʼx ni goygaʼlni layibu natopyibu. Jehová bidzuitz né guirá buñ «ni bislooy que buny pensary en láasiyibu» né buny castigar layibu (Núm. 11:31-34). ¿Xí rasuidy ejemplo reʼ lóono? Gapno cuidad que diti nigolú guisobladxno. Ni más guisac par lóono ná nacno buñ pobre o buñ ric, láani ngú guicuaʼ montonno «cós ni rasac lainy guibá» par gony nadipno mod radzakno Jehová né Jesús (Mat. 6:19, 20; Luc. 16:9). Pal ronyno láani, labúu gapno confianz que Jehová saduʼdy ni caquiinno.

9. ¿Xí láani nandxichno?

⁹ Ló naareʼ, Jehová láaca puextca noʼbu par gacnébu xpiimbu. Per ndeʼ diti raduʼdy diitz que dipa sioʼ dzú sac falt bidxiich o galrro lóono.b Ná scú, labúu gapno confianz que Jehová dipa sasian lóono. Saduʼdybu galnadip lóono par guicalóno nitisi galnagan. Guisuidyno chop mod ro labúu guislooyno que napno confianz que Jehová san lóono: 1) órni diti napno bidxiich né 2) órni gonyno pensary ximod tudyno dzú órni ma nacno buñgol.

ÓRNI DITI NAPNO BIDXIICH

10. ¿Xí galnagan labúu guicalóno?

¹⁰ Laʼga cabigax xfin gudxliogoxreʼ sigory sadxin dzú ma diti sapno bidxiich. Labúu nasnitno xchiinno, xcósno o lidxno xtol política, guerr, desgrasy o stoib pandemia. Pentzi raquiin guiyopyno toib dxiin copy lagary ro rabésno o sigory gaibyno tzoʼno stoib lagary né xfamilno par guiyopyno toib dxiin ni gonyno par guidxinaʼno ni guáno. ¿Xí láani labúu gacné lóono par guislooyno que napno confianz lóo Jehová órni cuuno xí ni gonyno?

11. ¿Xí láani labúu gacné lóono órni diti napno bidxiich? (Lucas 12:29-31).

¹¹ Toib cós ni nigolú rasac né ni sacné lóono láani ngú gaibyno Jehová xi galrrasaʼ napno (Prov. 16:3). Guinabno sabiduría Jehová par ganno xi láani gonyno né gacnébu lóono guisacno sacró né lóocano par diti tzogoluʼno ló «galrrasaʼ» (bíil Lucas 12:29-31). Guinabno láabu tzoʼno conforme né ni napno par tudyno dzú (1 Tim. 6:7, 8). Guiyopyno ló publicaciones xtunyno temas ni rabexa ximod labúu tudyno dzú. Xidal herman ma gocné layibu videos né artículos de jw.org ni raniʼ de tema reʼ.

12. ¿Xí galrranabdiitz labúu gacné toib herman par ganbu xí láani ngú más galán par xfamilbu?

¹² Tipnésyibu bisian xfamil né goyguny dxiin stoib lad per después tipnésyibu biduʼdyibu cuent que diti láani ngú ni bunyibu. Antes de guicacuentno toib dxiin copy diti nosi gonyno pensary balaati bidxiich gony ganarno, láaca raquiin gonyno pensary ló espiritualidad xtunyno (Luc. 14:28). Gonabdiitz looyca: «¿Ximod saguiñani xcaltzeela pal naʼ tzoʼya sit de tzeʼela? ¿Labúu siaʼya guirá reunión, predicación né tzoʼya lad herman la?». Pal ma noʼ xiinlo, nigolú rasac guinabdiitzlo looyca ndeʼ: «¿Ximod guisniʼsa ximbioxa mod ná Jehová pal diti noʼya né layibu»? (Efes. 6:4). Órni coʼlo guiclo gonylo toib cós, raquiin gonylo mod ni rony Dios pensary, né diti gonylo ni raiby xfamilo o ximiglo looy ni diti rasob ni ná la Biblia.c Tony, ni rabés Asia occidental, xidal buelt goyoʼ ni ná naduʼdy dxiin láabu stoib gudxrop per después ni gonabbu xcalrracné Jehová né goniʼbu láani né tzeelbu diti cuacuentbu dxiincu, né biyopybu mod diti tampa ñonybu gaxt né xfamilbu. ¿Xí rony pensary Tony nigoreʼ? Láabu nábu: «Ma labúu gocnéya xidal buñ bimbu Jehová né ximbioxdo nadxiʼyibu galnigolú. Ma bisuidydo que pal rasobdo ni ná Mateo 6:33, Jehová san lóodo».

ÓRNI GONYNO PENSARY XIMOD TUDYNO DZÚ ÓRNI MA NACNO BUÑGOL

13. ¿Xí raquiin gonyno nigoreʼ par labúu gapno ni guiquiinno ló dzú ni sietra?

¹³ Confianz ni napno lóo Jehová láaca labúu ñoʼni ló prueby órni ganno ximod tudyno dzú órni ma nacno buñgol. La Biblia raiby lóono gonyno dxiin nadip né modcu ló dzú ni sietra labúu tudyno dzú (Prov. 6:6-11). Pal labúuni, guitoplono tidxó bidxiich ni guiquiinno ló dzú ni sietra. Ná bidxiich noʼ ro labúu racnéni lóono, diti nainy lóono que láasini guisac ló xcalnabányno (Ecl. 7:12).

14. ¿Ximod racné Hebreos 13:5 lóono par ganno ximod tudyno dzú órni ma nacno buñgol?

¹⁴ Jesús bisetlaa toib ejemplo par golexabu que diti noʼ pu raquiin ni gap toib buñ xiroʼ bidxiich pal «diti nacbu ric nisló Dios» (Luc. 12:16-21). Diti nanno xi gac né lóono guixí (Prov. 23:4, 5; Sant. 4:13-15). Jesús láaca goniʼbu que buñ ni ná gac xpiimbu non guisaguelyibu guisianyibu guirá xcósyibu (Luc. 14:33). Ló siglo primero, cristianos de gudx Judea bunyibu ngú, né sacró cuacuentyibu láani (Heb. 10:34). Ló xtzúno, xidal de xhermanno ma bisnit xchiin o xcós por ni biañ nasaguelyibu ñoʼyibu lad política (Apoc. 13:16, 17). Raslooyibu que nigolú napyibu confianz ló ni ma goniʼ Jehová: «Dipa sasiana looy, né diti sioʼ dzú sialadxi looy» (bíil Hebreos 13:5). Ronyno rutirigaʼlni lóono par gapno ni caquiinno dzú ni ma nacno buñgol né napno confianz lóo Jehová pal rac toib cós ni diti caa guicno gac.

15. ¿Ximod non guibiʼ bixios mbiox ni nac cristianos xiin? (Láaca bibiʼ retrat).

¹⁵ Tipnés lagary buñ rioʼ xiin, portín ronyibu pensary que ma xiinyibu gony dxiin né gap xiroʼ bidxiich par gan layibu órni ma nacyibu buñgol. Per la Biblia ná que bixios mbiox ngú ni gacné layibu (2 Cor. 12:14). Per, órni bixiosyibu ma rac buñgol, sigory saquiinyibu que xiinyibu gacné layibu né bidxiichen né láaca de stipnés mod, né xidalyibu rony láani né guidopy xcalnabany (1 Tim. 5:4). Per, ni más ragoʼ nakit bixios mbiox ni nac cristianos láani ngú gacnéyibu xiinyibu gony xchiin Jehová, né diti rasniʼsyibu xiinyibu par labúu gan layibu órni ma nacyibu buñgol (3 Juan 4).

16. ¿Ximod labúu gacné bixios mbiox xiin par tzoʼyibu puext tudyibu dzú ló dzú ni sietra? (Efesios 4:28).

¹⁶ Bixios mbiox, órni guisuidyto xiinto par guidxinaʼ ni gap ló dzú ni sietra, colguiduʼdy toib ejemplo galán layibu né colguisuidy layibu gapyibu confianz lóo Jehová. Dada dzú ni nacyibu mitien colguislooy layibu balaati rasac gony buñ dxiin nadip (Prov. 29:21; bíil Efesios 4:28). Laʼga caniʼs xiinto colguisuidy layibu gonyibu dada rutirigaʼlni layibu lainy yolayscuel. Colguiquiin publicaciones ni ma napno par gacnéto layibu gonyibu pensary galán xi láani cuuyibu, pal tzeeyibu scuel o yaca. Meta ni non gapto láani ngú gacnéto xiinto guidzel toib dxiin ni gacné layibu tudyibu dzú né gapyibu tiemp par guireʼyibu predicación o gacyibu precursores.

17. ¿Xí láani gandxichno?

¹⁷ Guirá xpiin Jehová ni diti rasian láabu napyibu confianz que Jehová labúu né nainy láabu gacnébu xpiimbu par tudy dzú. Laʼga más cabigax xfin gudxliogoxreʼ confianz ni napno lóo Jehová más sioʼni ló prueby. Per, gac nitisi gac, gapno xiroʼ confianz que Jehová saquiimbu xcalnadipbu par guiduʼdybu ni caquiinno. Napno confianz que ñabu diti dopni né sadxinni dada ronoʼno.