ARTÍCULO NI GUISUIDYNO 16
CANCIÓN 87 Ven a recibir ánimo
Ni guibigaxno xhermanno ngú ni más sacró par lóono
«¡Colguibiʼ balaati galán né sacró órni xhermanno raguaʼyibu toibsi!» (SAL. 133:1).
TEMA
Ximod guibigaxno más xhermanno né xi galnasác guicaʼno pal ronyno láani.
1, 2. ¿Xí cós ngú ni más rasac par Jehová, né xí nainy láabu gonyno?
MOD ragobiono stipnés nigolú rasacni par Jehová. Jesús bisuidy gandxiʼno saʼno xomodca randxiʼno lóocano (Mat. 22:37-39). Ndeʼ raguiñani cobiono buñ ni diti nac xpiin Jehová. Modreʼ rasuʼno Bixiosno ni noʼ guibá, ni rony que «ranaa ló Govitz par buñtzay né buñ mal né rasiabbu guié par buñ ni rony xinésni né buñ ni diti rony xinésni» (Mat. 5:45).
2 Ná Jehová nadxiʼbu guirá buñ, nadxiʼbu né guidopy xcalnabanybu buñ ni rasobdiitz láabu (Juan 14:21). Nainy láabu guisuʼno láabu né por ngú rony animarbu né raibybu lóono gandxidoʼtno saʼno (1 Ped. 4:8; Rom. 12:10). Clas galnadxiʼ reʼ nacni xomod galnadxiʼ ni rasacno por xhermanno, xfamilnadxno o ximigdxinno.
3. ¿Xí láani non guisetnaladxno de galnadxiʼ?
3 Galnadxiʼ nacni xomod tipxan yaguien, ni raquiin guiseʼ buñ né gan buñ láani par niʼsni. Apóstol Pablo gochbu cristianos: «Colgandxiʼra xhermanto suusi nadxiʼto xfamilto» (Heb. 13:1). Jehová raniiny guisniʼsno galnadxiʼ ni rasacno por stipnés. Ló artículo reʼ, guisuidyno xigony non guibigaxno más xhermanno né ximod labúu gonyrano láani.
XIGONY NON GUIBIGAXNO MÁS XHERMANNO
4. ¿Xí sacné lóono par guisac par lóono mod raguaʼno toibsi né saʼno mod ni raniʼ Salmo 133:1? (Láaca bibiʼ retrat).
4 (Bíil Salmo 133:1). Xomodca salmista, ranino «balaati galán né sacró» gacno ximig buñ ni nadxiʼ a Jehová. Noʼ riesga ma diti guibiʼno balaati móz raguaʼ xcudx Jehová toibsi. Labúu guisaclono xomod toib buñ ni rabiʼ toib yac rodann guirá dzú per conforma radudy dzú rianébu láani né ma diti radziguiaʼbu mod nacni. Lóono láaca scúca guirága ór rabiʼno xhermanno, rioʼ ór xidal buelt lainy xomal, por ngú, ¿xí labúu sacné lóono par guisacyibu par lóono xomodca dzú ni bimbuno layibu? Cueʼno tiemp par gonyno pensary xigony tigaagayibu nigolú rasacyibu par lóono né par congregación.
Dipa non guialadxno balaati móz raguaʼ xcudx Jehová toibsi. (Bibiʼ párrafo 4).
5. ¿Ximod labúu gacné a stipnés galnadxiʼ ni raslooyno xhermanno?
5 Órni tipnés buñ riee primerdiguieʼ buelt xireunionno, tipnésyibu nigolú radziguiaʼyibu órni rabiʼyibu balaati raslooyno galnadxiʼ saʼno né raduʼdyibu cuent que ndeʼ galnigolú. Jesús goniʼ: «Modcu guirá buñ san que lóoto nacto xpiina: pal nadxiʼto saʼto» (Juan 13:35). Guibiʼno ni gosaclo Chaithra, toib buñgonaʼ ni goyee toib scuel xirop né gosaló bisuidy ni ná la Biblia. Láabu cuacuentbu invitación par tzeebu samblia de tzón govitz, né después ni godudy primer dzú gochbu hermana ni bisuidy láabu ni ná la Biblia: «Bixiosa né xinaʼya dipa ma goduʼuchyibu naʼ ni toib buelt. ¡Per primer dzú de samblia xtunylo 52 buñ goduʼuch naʼ! Famil reʼ ronyni que guisaca que Jehová nadxiʼ naʼ. Nainy naʼ tzoʼya ladyibu». Chaithra bisuidyra ni ná la Biblia né goyonisbu ló íz 2024. Órni buñ rasaló radop né lóono rabiʼyibu cós tzaay ni ronyno, ni raguiña galnadxiʼ ni raslooyno saʼno né láaca raguiñani galnadxiʼ ni rasacno por lóocano, xidal buelt ngú rachiin layibu par gonyibu xchiin Jehová (Mat. 5:16).
6. ¿Ximod rapni lóono ni rabigaxno más ronoʼ xhermanno?
6 Ni guibigaxno más ronoʼ xhermanno láaca rapni lóono. Pablo gochbu cristianos: «Colgony animar saʼto guirá dzú […] modreʼ xcalnadip xtuny galkié diti sony nagudxni lóoto» (Heb. 3:13). Pal radxin ór rareʼganno né rasacno que ma careʼno ló xinés Jehová, láabu labúu saquiimbu toib herman par gacné lóono (Sal. 73:2, 17, 23). ¡Nigolú sacróni par lóono ni napno galrracné reʼ!
7. ¿Ximod radzak galnadxiʼ né ni raguaʼno toibsi? (Colosenses 3:13, 14).
7 Noʼno lad buñ ni rony dada rutirigaʼlni layibu par guislooyibu xcalnadxiʼyibu saʼyibu, né por ngú racaʼno xidal galnasác (1 Juan 4:11). Por ejemplo, galnadxiʼ rachiinni lóono par gony guantaryno saʼno, né ngú rony que raguaʼno toibsi (Efes. 4:2-6; bíil Colosenses 3:13, 14). Por ngú ló reunión nigolú móz raguaʼno né saʼno, diti noʼ stoib religión ni raslooy galnadxiʼ saʼ xomod lóono.
GAPNO RESPET SAʼNO
8. ¿Ximod racné Jehová lóono par guiguaʼno toibsi?
8 Ni xcudx Jehová raguaʼ toibsi ló guidopynac gudxlio nacni toib galrradziguiaʼ ni rony Jehová ná nacno buñ galkié (1 Cor. 12:25). La Biblia ná: «Dios ma casuidybu lóoto gandxiʼto saʼto» (1 Tes. 4:9). ¿Ximod ronybu láani? Né xcalrracné Xtiitzbu raibybu lóono xi ngú ni non gonyno par guibigaxno más saʼno. Né lóono raduʼdyno lagary Jehová guisuidy lóono órni rasuidyno ni ná la Biblia né racáno cuidad ni raibybu lóono né ronyno láani (Heb. 4:12; Sant. 1:25). Ngú ni merpa ronyno lóono ni nacno testigos xtuny Jehová, ronyno dada rutirigaʼlni lóono.
9. ¿Xí rasuidy Romanos 12:9-13 lóono mod ni gapno respet saʼno?
9 ¿Ximod labúu gacné Xtiitz Dios lóono par guibigaxno xhermanno? Guibiʼno ni goniʼ Pablo ló Romanos 12:9-13 (bíil). Guicaatzayno cuidad ni ná diitzreʼ «Primer lóoto guislooyto respet saʼto». ¿Xí raduʼdyni diitz? Que non guiyopyno oportunida par guislooyno que randxiʼno saʼno de xidal mod, xomod ni guituʼdyno scásiʼ ni rony stipnés, cobiono sacró buñ né guiduʼdyno ni napno né guidopy xcalnabanyno (Efes. 4:32). Diti non cuésno que stipnés ngú ni guibigax ronoʼno. Lóono primer non guibigaxno ronoʼyibu, né modcu sabiʼno ximod rac cumplir ni goniʼ Jesús: «Más rabaladxno órni raduʼdyno que órni racaʼno» (Hech. 20:35).
10. ¿Ximod labúu gonyno dxiin nadip órni gapno respet saʼno? (Láaca bibiʼ retrat).
10 Guicáano cuidad ni goniʼ Pablo que lóono primer non guislooyno que guibigaxno ronoʼ xhermanno, goniʼbu: «Colgony dxiin, diti gacto buñgotzab». Toib buñ ni rony dxiin ronybu láani né gan, né órni racaʼbu toib dxiin, galán ronybu láani. Proverbios 3:27, 28 raduʼdy consej reʼ lóono: «Diti guiañ gacnélo buñ ni non gacnélo, pal labúu gacnélo layibu». Por ngú, pal rabiʼno que noʼ ni raquiin galrracné, gonyno ni rigaʼlni lóono gacnéno láabu. Diti guisianno láani par stoib ór, né diti gonyno pensary que stoib buñ gacné láabu (1 Juan 3:17, 18).
Lóono ngú ni primer non gacnéno xhermanno órni caquiinyibu láani. (Bibiʼ párrafo10).
11. ¿Xí labúu gacné lóono par guibigaxno más xhermanno?
11 Stoib mod ni guislooyno que napno respet stipnés láani ngú nimaca guituʼdyno scásiʼ ni ronyibu lóono. Efesios 4:26 ná: «Diti guiduʼdyto lagary guiaʼis govitz laʼga cadzuitzto». ¿Xigony yaca? Par «diti guiduʼdyto lagary gac ni ná Buñdzab», mod ná versículo 27. Ló Xtiitzbu, Jehová guirága ór raibybu lóono guituʼdyno scásiʼ ni rony stipnés lóono. Colosenses 3:13 raduʼdy consej reʼ lóono: «Colguituʼdy scásiʼ xcalkié saʼto». Ni ratuʼdyno scásiʼ ni rony stipnés lóono nacni toib mod ni más galán par guibigaxno más ronoʼyibu. Modcu racnéno par gac mod ni ná diitzreʼ «colgony rutirigaʼlni lóoto par guiguaʼto toibsi né diti tíilto» (Efes. 4:3). Ló chop tzónsi diitz, pal diti ratuʼdyno scásiʼ ni rony stipnés lóono dipa labúu saguaʼno toibsi né guiguaʼno sacró.
12. ¿Ximod racné Jehová par guituʼdyno scásiʼ ni rony stipnés lóono?
12 Nigolú, rioʼ ór labúu gac nagan par lóono guituʼdyno scásiʼ ni rony toib buñ ni ma bunynaa lóono. Per labúu gonyno láani né xcalrracné espíritu xtuny Dios. Después ni la Biblia buny animarni lóono guislooyno galnadxiʼ saʼno né gonyno dxiin nadip, náni: «Colguislooy que napto xiroʼ espíritu santo». Ló stoib diitz, né xcalrracné espíritu santo, toib cristiano labúu tzoʼ gan xcalnabanybu par gonybu xinésni, ni raguiña gandxiʼno stipnés né guituʼdyno scásiʼ ni ronyibu né guidopy xcalnabanyno (Romanos 12:11). Por ngú ranabno Jehová gacné lóono (Luc. 11:13).
«DITI TZOʼ GALRRADÍIL LADTO»
13. ¿Xí labúu gony que tzoʼ galrradíil lainy congregación?
13 Congregaciones ni noʼ goyaʼni por «guirá clas buñ» (1 Tim. 2:3, 4). Tigaagano gadzéga mod bibanyno, por ngú, diti toibsi mod ragoʼno guicno gonyno tipnés cós xomod mod guacno xhapno né gactzayno, xi remeidy guicaʼno né xi galnakitien gonyno. Pal diti rapno cuidad, ngú labúu gony que ma diti guiguaʼno toibsi (Rom. 14:4; 1 Cor. 1:10). Per Dios ma bisuidy lóono par gandxiʼno saʼno, por ngú diti ranino que ni ragoʼno guicno gonyno más galán láani que ni ragoʼ stipnés guic gony (Filip. 2:3).
14. ¿Xí cós non gonyno rutirigaʼlni lóono por gonyno, né xigony?
14 Stoib cós ni labúu gonyno par diti tíilno lainy congregación láani ngú gonyno guirá ór rutirigaʼlni lóono par gony animarno né gony nadipno stipnés (1 Tes. 5:11). Ló ndeʼga, ma xidal buñ ni góc inactivos néca buñ ni bireʼ lainy congregación ma bibiguet lainy xcudx Jehová stoib. Lóono racacuentno layibu né guidopy xcalnabanyno (2 Cor. 2:8). Órni toib hermana ni góc inactiva 10 íz goyee reunión goniʼ ndeʼ: «Guirá herman lainy congregación goniʼ dioxh naʼ né nigolú bibaladxyibu ni bibiʼyibu naʼ ló reunión» (Hech. 3:19). ¿Ximod gocnéni láabu mod cuacuent herman láabu? Nábu: «Gosaca que ña Jehová godabioo naʼ par nabiguetta lagary ro rioʼ buñ nakit». Órni ronyno rutirigaʼlni lóono par gony animarno stipnés, Jesús labúu guiquiin lóono par guisialdóno xcalnabany buñ ni noʼoy «cós ni nanaʼ» (Mat. 11:28, 29).
15. ¿De xí stoib mod labúu gacnéno par guiguaʼno toibsi? (Láaca bibiʼ retrat).
15 Láaca labúu gacnéno guiguaʼ herman toibsi por mod nac diitz ni rareʼ roʼno. Job 12:11 ná: «¿Xí diti rony guidiag buñ prueby diitz ni racadiag xomod loch buñ rony prueby galrro la?». Toib buñ ni ronytzaay galrro guirá ór primer ronybu prueby láani par ganbu que nigolú naníxni. Modcuca antes ni guinino, primer non guicáano cuidad xi láani guinino par guicáano cuidad que xtiitzno sony animarni, sony nadipni né sacnéni buñ ni racadiag láani (Sal. 141:3; Efes. 4:29).
Antes de guinino guicaano cuidad xi clas diitz guireʼ roʼno. (Bibiʼ párrafo 15).
16. ¿Chú layibu ngú ni máspa non gony dada rutirigaʼlni par guiniʼ de toib mod ni gony animar stipnés?
16 Né máspa buñguieeu ni ma noʼ tzeʼel, buñguieeu né buñgonaʼ ni ma noʼ xiin non gonyibu rutirigaʼlni layibu par gacnéyibu buñ né xtiitzyibu (Col. 3:19, 21; Tito 2:4). Ancianos láaca rony animaryibu né rasialdóyibu xiil xtuny Jehová (Is. 32:1, 2; Gál. 6:1). Toib proverbio ná: «¡Né galán láani órni toib buñ raniʼ merpa xorni!» (Prov. 15:23).
GANDXIʼNO «NÉ GUIDOPY XCALNABANYNO NÉ NI RONYNO»
17. ¿Xí labúu gonyno par gandxiʼno xhermanno né guidopy xcalnabanyno?
17 Apóstol Juan goniʼ: «Diti nosi guinino que nadxiʼno, xalagary ngú guislooyno láani né guidopy xcalnabanyno né ni ronyno» (1 Juan 3:18). ¿Xí labúu gonyno par gandxiʼno buñ né guidopy xcalnabanyno? Laʼga más radudyno tiemp né xhermanno, más sabigaxno layibu né más nadip sac galnadxiʼ ni napno. Guiyopyno ór par tzoʼno né xhermanno ló predicación né ló reunión. Láaca, cueʼno tiemp par tzáguenno layibu. Pal ronyno láani, buñ labúu saniʼ de lóono: «Dios ma casuidybu lóoto gandxiʼto saʼto» (1 Tes. 4:9). Lóopano guibiʼno «balaati galán né sacró órni xhermanno raguaʼyibu toibsi» (Sal. 133:1).
CANCIÓN 90 Animémonos unos a otros