ARTÍCULO NI GUISUIDYNO 20
CANCIÓN 4 «Jehová es mi Pastor»
Biyopy Jehová par guisialdóbu xcalnabanylo
«Gonyxiroʼno […] Bixiosno ni ronladx lóono né rasialdóbu xcalnabanyno» (2 COR. 1:3).
TEMA
¿Xí rasuidyno mod bisialdó Jehová xcalnabany judíos ni bireʼ de xcudx né goyee gudx Babilonia?
1. ¿Ximod bibany judíos ni goyoʼ gudx Babilonia?
BUNY pensary ló judíos ni bireʼ xcudx né goyee gudx Babilonia. ¿Ximod gosacyibu? Bibiʼyibu ximod gudx Babilonia binitlóni Jerusalén ni góc xcudxyibu. Né xtol xcalkiéyibu né xtol xcalkié xfamilyibu ni bibany ló dzú ni see, buñ babilonios goyné layibu par ñoʼyibu xan xomandaryibu lainy gudx Babilonia (2 Crón. 36:15, 16, 20, 21). Nigolú, lainy gudx Babilonia labúu bunyibu ni goniiny layibu (Jer. 29:4-7). Per nagan mod godudyibu né diti modcu bioladxyibu nabanyibu. Né toibtica de layibu goniʼ mod gosac: «Gorúdo cueʼ guʼuc ni noʼ Babilonia. Gorudxaʼdo órni bisetnaladxdo Sion» (Sal. 137:1). Riendxichni que guirá judíos reʼ biquiinyibu que ñoʼ ni nasialdó xcalnabanyibu, per ¿chú labúu ñony láani?
2, 3. a) ¿Xí láani buny Jehová por judíos ni goyoʼ lainy gudx Babilonia? b) ¿Xí guisuidyno ló artículo reʼ?
2 Jehová nac Dios ni rasialdó xcalnabanyno (2 Cor. 1:3). Jehová nadxiʼ guirá ni rabigax ronoʼbu né raniiny láabu guisialdóbu xcalnabanyibu. Jehová gon que tipnés judíos ni goyoʼ Babilonia nacacuentyibu disciplina xtunyibu né ñony adoraryibu Dios stoib, mod raniiny láabu (Is. 59:20). Por ngú, más de 100 íz antes ni ñee judíos gudx Babilonia, bunybu que Isaías nacaʼ toib libro ni riné laabu. ¿Xigony? Profeta reʼca goniʼ: «Colguisialdó, colguisialdó xcalnabany xcudxi, ná Dios xtunyto» (Is. 40:1). Por ngú Jehová biquiimbu libro xtuny profecía ni bicaʼ Isaías par nasialdóbu xcalnabany judíos ni goyoʼ Babilonia.
3 Lóono láaca nagabga ór raquiinno que tzoʼ ni guisialdó xcalnabanyno. Ló artículo reʼ, guisuidyno tzón mod ni bisialdó Jehová xcalnabany judíos ni goyoʼ gudx Babilonia: 1) biduʼdybu xtiitzbu que guituʼdybu scásiʼ xcalkié ni góc arrepentir, 2) biduʼdybu toib esperanza guirá xpiimbu né 3) gocnébu biinreʼ par diti nadzuiby. Ló tigaaga cós reʼ sabiʼno ximod rony Jehová par guisialdóbu xcalnabanyno ló naareʼ.
JEHOVÁ NIGOLÚ RONLADXBU LÓONO NÉ RATUʼDYBU SCÁSIʼ XCALKIÉNO
4. ¿Ximod bislooy Jehová que binladx buñ judíos? (Isaías 55:7).
4 Jehová nac «Bixiosno ni ronladx lóono» (2 Cor. 1:3). Né bislooybu láani órni biduʼdybu xtiitzbu que natuʼdybu scásiʼ xcalkié judíos ni ñac arrepentir (bíil Isaías 55:7). Láabu goniʼbu: «Né galnadxiʼ ni diti radzaʼ sapa galrronladx looy» (Is. 54:8). ¿Ximod ñonybu láani? Ná guirá judíos nadudyibu ló galnagan xtol xcalnayaʼyibu, Jehová biduʼdy xtiitz layibu que diti ñaʼanyibu lainy gudx Babilonia por tipzó. Nadxin dzú ni nareʼyibu gudx Babilonia (Is. 40:2). Sigory guirá ndeʼ nigolú bisialdóni guirá judíos ni góc arrepentir.
5. ¿Xigony labúu gapno más confianz que buñ judíos de que Jehová nigolú ronladx lóono?
5 ¿Xí rasuidyno? Jehová noʼbu puext guituʼdybu scásiʼ xcalkiéno né guidopy xcalnabanybu. Judíos ni goyoʼ gudx Babilonia gonyibu ndeʼ, per lóono ló naareʼ labúu gapno más confianz que Dios sony láani. ¿Xigony? Portín ma nanno guirá ni buny Jehová par guituʼdybu scásiʼ xcalkiéno. De goló gatzgayoʼ íz ni goniʼ Isaías mod ratuʼdy Jehová scásiʼ xcalkiéno, Bixiosno ni noʼ guibá bixelbu Xiimbu ló Gudxlio par ñaity por guirá buñ ni ñac arrepentir. Xcalgoity Jesús racnéni par guinitló xcalkiéno (Hech. 3:19; Is. 1:18; Efes. 1:7). ¡Dios xtunyno nigolú ronladx lóono!
6. ¿Xigony galán láani gonyno pensary ló xcalrronladx Jehová? (Láaca bibiʼ retrat).
6 Diitz ni buny Jehová que nacá ló Isaías 55:7 láaca rasialdóni xcalnabanyno pal ló dzú ni see bunyno toib galkié né rioʼobsani lóono ná ma góc arrepentirno. Noʼ ni racaló galnagan de clas reʼ, né máspa pal cadudyibu ló galrrioʼob xtol galkié ni bunyibu. Per, pal ma bisetno xcalkiéno né ma diti ronyno láani, labúu gapno confianz que Jehová ma bituʼdy scásiʼ xcalkiéno. Né órni láabu ma bituʼdybu scásiʼ xcalkiéno, ma diti rasetnaladxbu láani stoib (bitzak láani né Jeremías 31:34). Pal Jehová ma diti rony pensary loni, lóono láaca ma diti gonyno pensary ló xcalkiéno. Jehová rabiʼ guirá ni ronyno nigoreʼ, diti ro bichéno ló dzú ni see (Ezeq. 33:14-16). Né guisetnaladxno que mápa mer Bixiosno ni ronladx lóono sanitlóbu galrrioʼob ni radudyno xtol xcalkiéno.
Jehová diti rabiʼ galrraché ni bunyno ló dzú ni see, xalagary ngú rabiʼbu dxiin ni cayonyno nigoreʼ. (Bibiʼ párrafo 6).
7. ¿Xí láani sacné lóono par diti guisac naganno guisetno xcalkiéno?
7 ¿Né xí non gonyno pal rasacno que napno dool por toib galkié rodann ni yása guisetno? La Biblia rony animar lóono guinabno xcalrracné ancianos (Sant. 5:14, 15). Nigolú, sigory sasac naganno gaibyno layibu ni ma bunyno. Per guisetnaladxno que Jehová ma goloʼ herman reʼ par gacné lóono. Por ngú, pal ma góc arrepentirno né rasetnaladxno que Jehová né ancianos sagobioyibu lóono né galrronladx, diti sasacnaganno guinabno xcalrracnéyibu. Guisuidyno ximod binladx Jehová né bisialdóbu xcalnabany toib hermano ni laa Arthur, nigolú gosac malbu por toib galkié ni bunybu.a Láabu nábu: «Midid tobiz bibiʼya pornografía. Per toibtica dzú bicadiaga toib discurs ro ritlaa de xcalrrien buñ, né biseta ni buni a tzeʼela né ancianos. Gosaca sacró por ni biseta láani, per bioʼobrani naʼ por ni buni. Ancianos gochyibu naʼ né galrronladx que Jehová dipa ma goleʼ naʼ tiplad né que rony corregirbu lóono portín ronladxbu lóono. Xtiitzyibu bidxinni lainy xcalnabani né gocnéni naʼ par ma diti ñoʼobni naʼ». Nigoreʼ Arthur nac precursor regular né siervo ministerial. ¡Nigolú rialdó xcalnabanyno ni nanno que pal rac arrepentirno Jehová ratuʼdy scásiʼ xcalkiéno!
JEHOVÁ RADUʼDY ESPERANZA LÓONO
8. a) ¿Xí esperanza biduʼdy Jehová judíos ni goyoʼ gudx Babilonia? b) Mod ná Isaías 40:29-31, ¿ximod gocné esperanza judíos ni góc arrepentir?
8 Buñ bimbu Babilonia xomod toib gudx ni diti raslaʼ buñ ni noʼ xan xomandary. Mod rabiʼ buñgudxlio cós, labúu ñenni que judíos ni goyoʼ lainy gudx Babilonia dipa labúu nabiguetyibu lidxyibu (Is. 14:17). Per Jehová biduʼdybu toib esperanza xcudxbu, biduʼdybu xtiitzbu que nabeʼbu biinreʼ xan xomandary Babilonia. ¡Né nili cós nili buñ labúu nacaa láabu! (Is. 44:26; 55:12). Par Jehová, gudx Babilonia gocyibu xomod goxioo (Is. 40:15). Nosi ralopy buñ, né ¡ma diti noʼ goxioo! Esperanza reʼ bisialdóni xcalnabany judíos ni goyoʼ gudx Babilonia, né diti ngúsi, portín Isaías bicaʼ: «Ni cabés lóo Jehová sapyibu fuers stoib» (bíil Isaías 40:29-31). Esperanza ni gopyibu labúu naduʼdyni xiroʼ fuers layibu par labúu nasapyibu xomod bisié.
9. ¿Xí razón gop judíos ni goyoʼ gudx Babilonia par ñapyibu confianz lóo Jehová né ló ni ma biduʼdybu xtiitzbu gonybu?
9 Judíos ni goyoʼ lainy gudx Babilonia gopyibu razón par ñapyibu confianz ló ni biduʼdy Jehová xtiitz gony. ¿Xí razón gopyibu? Gonyno pensary ló guirá profecías xtuny Jehová ni bibiʼ buñ judíos góc cumplir. Por ejemplo, gonyibu que Asiria buny gan gudx Israel, ni goyoʼ lad reino del norte, né goynéyibu buñ de Jerusalén par ñoʼ xan xomandaryibu (Is. 8:4). Bibiʼyibu ximod buñ babilonios binitlóyibu gudx Jerusalén né goynéyibu buñ de gudxcu par ñoʼ xan xomandaryibu (Is. 39:5-7). Né gonyibu que rey xtuny Babilonia buny dxepbu rey Sedequías né goynébu rey reʼ Babilonia (Jer. 39:7; Ezeq. 12:12, 13). Guirá ni goniʼ Jehová gac góc cumplirni (Is. 42:9; 46:10). Guiráni bunyni que ñapyibu confianz que Jehová láaca ñony cumplir que nabeʼ layibu xan xomandary Babilonia.
10. ¿Xí sacné lóono par coʼno guicno esperanza ni napno ló dzú ni ma cadubylagaʼ reʼ?
10 ¿Xí rasuidyno? Pal ma bireʼganno, esperanza labúu guisialdóni xcalnabanyno né gacnéni lóono par gapno fuers stoib. Nigolú, nabanyno ló tiemp nagan né xi enemigno nigolú nadipyibu, per diti non guireʼganno. Jehová ma biduʼdy toib esperanza sacróyen lóono, esperanza de guibanyno por tipzó né guiguaʼno sacró. Guirá ór non coʼno esperanza ló xpensaryno né lainy xcalnabanyno. Pal diti ronyno ngú labúu nabiʼno nachoʼl esperanza cu, ñacni suusi nabiʼno toib lagary sacróyen niis roʼ toib bentan buidy. ¿Xí sacné lóono par «guisiaano bentan cu», ni raduʼdy diitz, coʼno esperanza cu ló xpensaryno? Guirá ór cueʼno tiemp par gonyno pensary ximod guibanyno ló Gudxlio copycu. Golno artículos, guibiʼno videos, guicadiagno canción ni raniʼ de esperanza ni napno. Né gaibyno Jehová xi cós ni ma biduʼdybu xtiitzbu gonybu, más rioladxno.
11. ¿Xí láani rony toib hermana ni caxoʼ par gapbu fuers?
11 Guibiʼno ejemplo xtuny toib hermana ni laa Joy ni caxoʼ. Láabu rasetlabu ximod esperanza rony nadipni né rasialdóni xcalnabanybu: «Órni rasaca que ma diti labúuni naʼ, raabi Jehová ni noʼ lainy xcalnabani né raapa confianz que láabu riembu ni rasaca. Né Jehová ma cuapy oración xtuni portín raduʼdybu galnadip naʼ» (2 Cor. 4:7). Láabu láaca ronybu pensary que ma noʼbu ló Gudxlio copy, ro «ni toib buñ saniʼ: Caxoʼya» (Is. 33:24). Pal láaca raibyno Jehová guirá ni rasacno né ragoʼno guicno ló esperanza ni napno, láaca saduʼdybu fuers ni caquiinno.
12. ¿Xí razón napno par gapno confianz lóo Jehová né ló ni ma biduʼdybu xtiitzbu gonybu? (Láaca bibiʼ retrat).
12 Xomodca judíos ni goyoʼ gudx Babilonia, lóono láaca napno razón par gapno confianz lóo Jehová, né ló ni ma biduʼdybu xtiitzbu gonybu. Gonyno pensary ló guirá profecías ni cabiʼno cayac cumplir. Por ejemplo, noʼ toib potencia mundial ni rioʼ ór nadip né rioʼ ór yaca (Dan. 2:42, 43). Láaca racadiagno que rioʼ «xo rodann guirá lagary xitzca saʼ», né canino xtiitz Dios «ló guidopynac gudxlio» (Mat. 24:7, 14). Ni rabiʼno mod cayac cumplir profecías reʼ né stipnésni, rasialdóni xcalnabanyno né rony dxichni fe ni napno que guirá ni ma biduʼdy Jehová xtiitz gony sac cumplirni.
Guirá profecías ni cabiʼno cayac cumplir ló naareʼ raduʼdyni toib razón par gapno confianz ló guirá ni ma biduʼdy Jehová xtiitz gony. (Bibiʼ párrafo 12).
JEHOVÁ RACNÉ LÓONO PAR DITI GUIDZUIBYNO
13. a) ¿Xí galnagan nacaló buñ judíos órni mápa mer nabeʼ Jehová layibu de gudx Babilonia? b) Mod ná Isaías 41:10-13, ¿ximod bisialdó Jehová xcalnabany judíos ni goyoʼ gudx Babilonia?
13 Jehová bisialdó xcalnabany judíos ni goyoʼ gudx Babilonia né biduʼdybu toib esperanza guirá biinreʼ, per láaca gonbu que nadxin tiemp nagan órni mápa mer nalaabu xcudxbu. Jehová goniʼ que toib rey ni nadipgoluʼ ñony gan guirá gudx ni nagoo Babilonia né después nadíilbu né Babilonia (Is. 41:2-5). ¿Goyoʼ razón par nadzuiby buñ judíos la? Antes ni ñac ngú, Jehová buny que nacá diitzreʼ ni nasialdó xcalnabanyibu: «Diti guidzuibylo, portín naʼ noʼya né looy. Diti tzoʼlo ló galrrasaʼ, portín naʼ naca Dios xtunylo» (bíil Isaías 41:10-13). ¿Xigony gochbu biinreʼ: «Naʼ naca Dios xtunylo»? Diti gocni par nasetnaladx buñ judíos que non ñony adoraryibu Jehová, xalagary ngú par nasetnaladxyibu que Jehová ñoʼ né layibu par gacné layibu (Sal. 118:6).
14. ¿Xí stoib cós buny Jehová par gocnébu judíos ni goyoʼ gudx Babilonia diti nadzuiby?
14 Jehová buny stoib cós par gocnébu buñ judíos ni goyoʼ gudx Babilonia par diti nadzuibyibu. Gonabbu judíos nabiʼ lainy guibá né gochbu guirá biinreʼ que diti nosi bisaʼbu vitzón, láaca nanbu laa tigaagani (Is. 40:25-28). Por ngú, láaca nanbu ximod laa tigaaga xpiimbu. Né pal gopbu galnadip par nasaʼbu vitzón, láaca napbu galnadip par gacnébu xcudxbu. Diti goyoʼ razón par nadzuiby buñ judíos.
15. ¿Xí láani buny Jehová par gocnébu judíos par ñoʼyibu puext?
15 Jehová láaca biduʼdybu tipnés instrucciones xpiimbu par ñoʼyibu puext. Ló capítulo 26 xtuny Isaías, Jehová gochbu xcudxbu ndeʼ: «Goyoʼ lainy xcuartlo né bisieg xpuertni. Bicachlan por tipratsi dada órni ma godudy galnadzuitz» (Is. 26:20). Sigory versículo reʼ góc cumplirni órni rey Ciro goyoʼ lainy gudx Babilonia. Mod ná historiador griego Jenofonte, órni Ciro goyoʼ lainy gudx Babilonia gochbu guirá soldad xtunybu «nagaityibu guirá buñ ni noʼ fuer [de lidxyibu]» (Ciropedia, traducción de Ana Vegas Sansalvador). ¡Guirá buñ ni bibany lainy gudx Babilonia bidzuibyibu! Sigory guirá judíos ni goyoʼ lainy gudx Babilonia bilaayibu portín bisobyibu instrucciones ni biduʼdy Jehová layibu.
16. ¿Xigony diti non guidzuibyno órni gonyno pensary ló gran tribulación? (Láaca bibiʼ retrat).
16 ¿Xí rasuidyno? Mápa mer guieed toib tribulación ni diti ma goyoʼ ór góc. Órni salóni, buñ ni noʼ ló Gudxlio sigory sadzuibyibu né diti sanyibu xi láani gonyibu. Per lóono diti sadzuibyno, portín nanno que Jehová nac Dios xtunyno. Sapno confianz portín nanno que mápa mer guilaano (Luc. 21:28). Né saprano confianz lóo Jehová órni xidal gudxrop guicaló lóono. Jehová saquiimbu ángeles xtunybu par gap lóono né saduʼdybu instrucciones ni guilaa lóono. ¿Ximod saibybu instrucciones cu lóono? Diti nanno. Sigory saibybu lóono né xcalrracné congregaciones xtunyno. Pentzi congregaciones xtunyno sácni xomod cuart ro diti sioʼ xi sacno. Pal nainy tzoʼno puext, raquiin tzoʼno gax de xhermanno, guisobno né guidopy xcalnabanyno instrucciones ni guiduʼdy xcudxbu lóono, né gapno confianz que Jehová ngú ni ragonés lóono (Heb. 10:24, 25; 13:17).
Ni gonyno pensary que Jehová nap xiroʼ galnadip né labúu guilaabu lóono sacnéni lóono par diti guidzuibyno ló gran tribulación. (Bibiʼ párrafo 16).b
17. ¿Xí láani labúu gonylo par guiyopylo mod rasialdó Jehová xcalnabanylo?
17 Ná nagan mod bibany judíos lainy gudx Babilonia, Jehová bisialdó xcalnabanyibu. Né ngúca sonybu né lóono. Por ngú, nac nitisi cós ni gac ló dzú ni sietra, biyopyra mod ni rasialdó Jehová xcalnabanyno. Bisetnaladx que láabu ronladxbu lóono. Buny rutirigaʼlni looy par gaplo esperanza ló xpensarylo. Né diti guialadxlo que Jehová nac Dios xtunylo, por ngú diti noʼ xi portín guidzuibylo.
CANCIÓN 38 Jehová te cuidará
a Tipnésyibu bidzaʼ laa.
b MOD RAREXA RETRAT:Tipnés herman noʼ toibsi lainy toib yoʼ. Rapyibu confianz que Jehová nap xiroʼgolu galnadip, né que labúu rapbu xpiimbu nac nitisi lagary ro rabésyibu ló Gudxlio.