¿Xí rasuidyno de diitz ni goniʼ Jacob órni ma yaaca gaitybu? (midid 2)

1. ¿Xí guisuidyno ló artículo reʼ?

GUIRÁ xiingaʼn Jacob nagoo láabu né cacadiagtzayibu ni cayaibybu tigaagayibu. Ló artículo ni godudy, bibiʼno que Jacob gochbu Rubén, Simeón, Leví né Judá tipnés diitz ni buny que naniiny nacadiagyibu más né ni sigory bidziguiaʼyibu. ¿Xí ñaibybu nigoreʼ stipnés xiingaʼnbu? Guibiʼno ni labúu guisuidyno de profecía ni goniʼ Jacob de Zabulón, Isacar, Dan, Gad, Aser, Neftalí, José né Benjamín.a

ZABULÓN

2. ¿Xí profecía goniʼ Jacob de Zabulón, né ximod birebuʼni? (Génesis 49:13; láaca bibiʼ cuadriyen).

² (Bíil Génesis 49:13). Jacob goniʼ que xiin Zabulón nabany cueʼ nisdaʼ, niis lad norte xtuny Layoo ni Dios Biduʼdy xtiitz guicaʼyibu. Más de 200 íz después, tribu xtuny Zabulón biané toib territorio ni goyoʼ lad nisdaʼ xtuny Galilea né nisdaʼ Mediterráneo. Né láaca, Moisés goniʼ profecía reʼ: «Bibaladx Zabulón, ló viaj ni ronylo» (Deut. 33:18). ¿Xí goniiny naduʼdybu diitz? Sigory que layoo ni bianéyibu lad chop nisdaʼ reʼ ñacnéni layibu par ñonyibu negosy. Mod nitisi nacni, goyoʼ razón par ñoʼ nakit xiin Zabulón.

3. ¿Xí sacné lóono tzoʼno nakit guirá ór?

³ ¿Xí rasuidyno? Nac nitisi lagary ro rabésno o mod cadudyno, guirá ór noʼ razón par tzoʼ nakitno. Par diti tzoʼ nabanno, non tzoʼno conforme né ni napno (Sal. 16:6; 24:5). Pentzi rioʼ ór diti rioʼ nakitno né cós sacró ni napno, portín más ronyno pensary ló cós ni diti napno. Por ngú, gonyno por coʼno guicno ló cós sacró ni napno (Gál. 6:4).

ISACAR

4. ¿Xí profecía goniʼ Jacob de Isacar, né ximod birebuʼni? (Génesis 49:14, 15; láaca bibiʼ cuadriyen).

⁴ (Bíil Génesis 49:14, 15). Jacob buny felicitarbu Isacar por dxiin nadip ni bunybu, né bitzakbu xiingaʼnbu né toib bor ni nagudx xchit, ni raduʼdy diitz toib nimal ni labúu roʼoy cós nanaʼ. Jacob láaca goniʼ que Isacar nabany lainy toib layoo sacróyen. Né xtiitzbu birebuʼni órni xiin Isacar cuaʼ layoo ni raduʼdy xcaa cueʼ guʼuc Jordán (Jos. 19:22). Sigory bunyibu dxiin nadip órni bidxiʼpyibu ló xaliooyibu, per láaca bunyibu rutigoygaʼlni layibu par gocnéyibu stipnés (1 Rey. 4:7, 17). Guisetlano toib ejemplo, órni juez Barac né profetisa Débora gonabyibu galrracné par guicalóyibu Sísara, tribu xtuny Isacar góc toibtica tribu ni gocné layibu (Juec. 5:15).

5. ¿Xigony nigolú rasac gonyno dxiin nadip por Jehová?

⁵ ¿Xí rasuidyno? Par Jehová nigolú gosac dxiin nadip ni buny tribu xtuny Isacar né láaca rasac par láabu ni ronyno rutirigaʼlni lóono par gonyno xchiimbu (Ecl. 2:24). Por ejemplo, gonyno pensary ló herman ni rony dxiin nadip par ganyibu congregación (1 Tim. 3:1). Layibu diti rieeyibu guerr, per ronyibu rutirigaʼlni layibu par gapyibu xpiin Dios de nitisi cós ni labúu gony que ma diti guidzakyibu sacró Jehová (1 Cor. 5:1, 5; Jud. 17-23). Láaca ronyibu rutirigaʼlni layibu par guisuidyibu né guituʼdyibu discurs ni gony animar né gony nadip congregación (1 Tim. 5:17).

DAN

6. ¿Xí dxiin cuaʼ tribu xtuny Dan? (Génesis 49:17, 18; láaca bibiʼ cuadriyen).

⁶ (Bíil Génesis 49:17, 18). Jacob goniʼ que Dan ñac xomod toib beʼel ni labúu rony gan xi enemig ni más xiroʼ que láamu, xomod toib mainy né buñ ni dxiʼp laidymu. Ni raduʼdy diitz que tribu reʼ nasaguel nacaló né balory xi enemig Israel. ¿Ximod góc cumplirni? Laʼga Israel cayoʼ ló Layoo ni Dios Biduʼdy xtiitz guicaʼyibu, tribu xtuny Dan goyeeyibu «nixitz» campamento né gopyibu guidopy gudx (Núm. 10:25). Ná stipnés diti labúu bibiʼyibu ni buny tribu reʼ, dxiin ni gop tribu xtuny Dan nigolú gosacni.

7. Guirá ór ni gonyno alga por Jehová, ¿xí non guisetnaladxno?

⁷ ¿Xí rasuidyno? Ló dxiin ni ronyno par Jehová, noʼ xidal dxiinien ni stipnés diti rabiʼ, xomod ni guiá né gactzay Salón del Reino, guiduʼdy buñ laa par gony dxiin ló toib samblia né stipnés cós. Pal looy ma bunylo toibtica dxiinreʼ, rony felicitardo looy. Per dipa guialadxlo que Jehová rabiʼ né rasac par láabu guirá ni ronylo por láabu. Né rasacni par láabu, portín nanbu que diti ronylo láani par gonyxiroʼ stipnés looy, xalagary ngú par guislooylo láabu balaati ronladxlo láabu (Mat. 6:1-4).

GAD

8. ¿Xigony goyoʼ buñ ni cualó tribu xtuny Gad ló Layoo ni Dios Biduʼdy xtiitz guicaʼyibu? (Génesis 49:19; láaca bibiʼ cuadriyen).

⁸ (Bíil Génesis 49:19). Jacob goniʼ que buñ gobáan nacaló Gad. Más de 200 íz después, tribu reʼ biané toib territorio niis lad este xtuny guʼuc Jordán, cueʼ xidal gudxrop ni góc xi enemig Israel. Por ngú guirá gudxcu labúu nacaló layibu. Per tribu xtuny Gad goniiny nabanyibu cú, portín ló layoocu goyoʼ guix par ñoo xinimalyibu (Núm. 32:1, 5). ¡Balaati balory gop tribu reʼ! Layibu gopyibu confianz que Jehová ñacné layibu par ñac defenderyibu de xi enemigyibu layoo ni Jehová biduʼdy layibu. Né por xidal íz bixelyibu soldad xtunyibu niis toib lad guʼuc Jordán par gocnéyibu stipnés tribus ñony gan Layoo ni Dios Biduʼdy xtiitz guicaʼyibu (Núm. 32:16-19). Gopyibu confianz que laʼga cayacnéyibu stipnés tribus cu, Jehová ñan tzeʼelyibu né xiinyibu. Né biduʼdybu xcalnasácbu layibu por balory ni gopyibu né sacrificios ni bunyibu (Jos. 22:1-4).

9. Pal rapno confianz lóo Jehová, ¿xí láani sasaguelno gonyno?

⁹ ¿Xí rasuidyno? Par gonyno xchiin Jehová dada ló galnagan non gapno confianz lóo Jehová guirá ór (Sal. 37:3). Ló naareʼ, xidal herman rasaguelyibu gonyibu sacrificios par gacnéyibu ló proyecto de construcción, tzeeyibu stoib gudx ro raquiin más herman par guiniʼ xtiitz Dios o gapyibu stipnés responsabilidad lainy xcudx Jehová. ¿Xigony ronyibu láani? Portín rapyibu confianz que Jehová guirá ór san layibu (Sal. 23:1).

ASER

10. ¿Xí galrraché buny tribu xtuny Aser? (Génesis 49:20; láaca bibiʼ cuadriyen).

¹⁰ (Bíil Génesis 49:20). Jacob goniʼ que tribu xtuny Aser ñap bidxiich, né scú gocni. Layibu bianéyibu tipnés layoo ni más raduʼdy xcaa de guidopy gudx Israel (Deut. 33:24). Territorio xtunyibu bidxinni dada nisdaʼ Mediterráneo né toibtica gudx ni goyoʼ ló territorio cu góc gudx fenicia de Sidón, ro goyoʼ toib lagary ro bidxin bark né ro buñ buny negosy. Per, tribu xtuny Aser biché, órni diti goleʼyibu buñ cananeos de layoocu, por ni diti bunyibu ngú, gosaló cuá mod góc guirá buñcu layibu (Juec. 1:31, 32). Gopyibu bidxiich, sigory por ngú ma diti bunyibu xchiin Dios né gan. Né, órni juez Barac gonabbu israelitas ñacné láabu par nacalóbu soldad cananeos, tribu xtuny Aser diti gocné láabu. Né birecaayibu mal, portín diti bibiʼyibu ximod gocné Jehová xpiin par buny gan «cueʼ nís Meguidó» (Juec. 5:19-21). Godudyibu ló galnatoy órni Barac né Débora bíil toib canción por ni bunyibu gan guerr, ni goniʼ ndeʼ: «Aser goruu sin ñonybu xitcal ro nisdaʼ» (Juec. 5:17).

11. ¿Xigony diti non guisac más par lóono bidxiich?

¹¹ ¿Xí rasuidyno? Raniiny guiduʼdyno ni más galán ni napno Jehová, por ngú non gapno lóono par diti gacno xomod nac buñ de gudxliogoxreʼ ni rony pensary que bidxiich né cós ni rasiʼ buñ né bidxiich, ngú ni más rasac ló xcalnabány buñ (Prov. 18:11). Ná raquiinno bidxiich, gonyno rutirigaʼlni lóono par diti guisac más bidxiich que xchiin Jehová (Ecl. 7:12; Heb. 13:5). Láaca diti nainy lóono guitzatzñano ló xchiin Jehová portín caquiinno xtiempno né xfuersno cayopyno bidxiich. Xalagary ngú, raduʼdyno Jehová ni más galán ni napno né rapno confianz que ló dzú ni sietra, saduʼdybu lóono toib galnabány sacró né xidal cós tzaay (Sal. 4:8).

NEFTALÍ

12. Sigory, ¿ximod góc cumplir profecía xtuny Jacob de Neftalí? (Génesis 49:21; láaca bibiʼ cuadriyen).

¹² (Bíil Génesis 49:21). Jacob goniʼ que Neftalí naniʼ né «diitz móz». Pentzi ndeʼ birebuʼ por mod goniʼ né bisuidy Jesús buñ, dzú bunybu xchiin Dios ló Gudxlio (Juan 7:46). Láabu goyoʼbu xiroʼ tiemp lainy gudx Capernaúm, ni goyoʼ ló territorio xtuny Neftalí, né por ngú la Biblia ná que gocni «xcudxbu» (Mat. 4:13; 9:1). Né Isaías goniʼ que Jesús ñac toib «guii rodann» par buñ de xcudx Zabulón né Neftalí (Is. 9:1, 2). Jesús góc «guii ni nigolú ni rasanídxich guirá clas buñ» por mod sacró ni bisuidybu buñ (Juan 1:9).

13. Pal nainy coʼ nakitno Jehová, ¿xí non gonyno?

¹³ ¿Xí rasuidyno? Par Jehová nigolú rasac xi láani ranino né ximod ranino láani. Pal nainy lóono coʼ nakitno láabu, non guinino né «diitz móz». ¿Né ximod ronyno ngú? Primer, guirá ór non guinino galnigolú (Sal. 15:1, 2). Né láaca non guinino cós ni gony animar stipnés né guiaʼno gony felicitarno layibu por cós tzaay ni ronyibu, xalagary guinino mal de layibu né guitzotzno roʼno (Efes. 4:29). Láaca labúu gapno meta de guisuidyno salóno gooyno diitz né buñ de galnigolú.

JOSÉ

14. ¿Ximod góc cumplir ni goniʼ Jacob de José? (Génesis 49:22, 26; láaca bibiʼ cuadriyen).

¹⁴ (Bíil Génesis 49:22, 26). Jacob goyoʼ nakitbu por José, portín Jehová golú láabu «lad buch». Jacob goniʼ «José nac xpetz toib yac ni raduʼdy xcaa». Jacob góc yac né José góc xomod toib soos ni bireʼ ló yac cu. José góc xiin lagol Raquel, tzeʼel Jacob ni Jacob más binladx. Jacob goniʼ que José ñanee ni bisnit Rubén, xiin lagol Lea, ni góc stoib tzeʼel Jacob (Gén. 48:5, 6; 1 Crón. 5:1, 2). Profecíacu góc cumplirni órni chop xiin José, Efraín né Manasés, gocyibu chop tribus xtuny Israel né tigaagayibu cuaʼ tlaʼ layoo (Gén. 49:25; Jos. 14:4).

15. ¿Xí láani buny José órni diti góc xinésni né láabu?

¹⁵ Órni Jacob goniʼ de José, goniʼbu que tipnés buñ ni rasapy flech «bianladx láabu» né «bisalyibu flech xtunyibu laidybu» (Gén. 49:23). Ndeʼ góc buchbu, ni gop envidy láabu né diti buny xinésni né láabu. Per José diti bidzuitz né layibu nili né Jehová. Mod goniʼ Jacob: «Mbaas xtunybu diti bisisni né ñabu góc nadipni né góc naguelni» (Gén. 49:24). Órni diti goyeeni galán José, láabu biyopybu xcalrracné Jehová. Né láaca, diti nosi bituʼdybu scásiʼ ni buny buchbu láabu, láaca godabiobu buchbu né galrronladx (Gén. 47:11, 12). Biduʼdybu lagary que prueby ni godudybu ló, ñacné láabu par ñacbu toib galán buñ (Sal. 105:17-19). Por ngú, Jehová labúu biquiin láabu de toib mod ni radziguiaʼ buñ.

16. ¿Ximod labúu guisuʼno ejemplo xtuny José órni tudyno ló galnagan?

¹⁶ ¿Xí rasuidyno? Dipa guiduʼdyno lagary que galnagan ni racalóno galsit lóono de Jehová o de xhermanno. Guisetnaladxno que Jehová labúu guiduʼdy lagary tudyno ló galnagan ni ragoʼ prueby fe xtunyno par guisuidybu né gacnébu lóono gacno toib galán cristiano (Heb. 12:7). Modcu sapno né sonyxiroʼno cualidades xomod galrronladx né ni guituʼdyno scásiʼ ni rony buñ lóono (Heb. 12:11). Né nanno que Jehová saguiix lóono por ni rony guantaryno xomod bunybu né José.

BENJAMÍN

17. ¿Ximod góc cumplir profecía ni goniʼ Jacob de Benjamín? (Génesis 49:27; láaca bibiʼ cuadriyen).

¹⁷ (Bíil Génesis 49:27). Jacob primer goniʼ que tribu xtuny Benjamín ñac soldad ni nagaity xidal buñ xomod toib lob (Juec. 20:15, 16; 1 Crón. 12:2). De ngú biquiimbu chop diitzreʼ «rosil» né «godzu». «Rosil», ni raduʼdy diitz órni gosaló goyoʼ rey ni buny mandary gudx Israel, Saúl góc primer rey, né bieedbu de tribu xtuny Benjamín, cualóbu né balory buñ filisteos (1 Sam. 9:15-17, 21). Né «godzu», ni raduʼdy diitz xidal íz después, órni ma diti goyoʼ rey lainy gudx Israel, reina Ester né primer ministro Mardoqueo, ni láaca góc de tribu xtuny Benjamín, gocnéyibu par diti nanitló buñ persas gudx israel (Est. 2:5-7; 8:3; 10:3).

18. ¿Ximod labúu guisuʼno tribu xtuny Benjamín?

¹⁸ ¿Xí rasuidyno? Tribu xtuny Benjamín nigolú goyoʼ nakityibu órni Saúl bidxin góc rey, modcu góc cumplir profecía xtuny Jacob. Per, después, órni Jehová golú David, ni góc de tribu xtuny Judá xomod rey, tribu xtuny Benjamín gocné láabu conforma godudy tiemp (2 Sam. 3:17-19). Xidal íz después, órni stipnés tribus góc nayaʼyibu, tribu xtuny Benjamín diti bisianyibu Judá né rey ni Jehová golú (1 Rey. 11:31, 32; 12:19, 21). Ló naareʼ, Dios ma golúbu herman par conés xcudxbu. Xomodca tribu xtuny Benjamín, dipa guisianno layibu né gacnéno layibu (1 Tes. 5:12).

19. ¿Xí bisuidyno de guirá profecías ni goniʼ Jacob dzú ma yaaca gaitybu?

¹⁹ ¡Ma bisuidyno xidal cós de profecías ni goniʼ Jacob órni ma yaaca gaitybu! Ni ronyno repas mod birebuʼ ni goniʼbu, rony nadipni fe ni napno que stipnés profecías ni sieed ló Xtiitz Dios, láaca sac cumplirni. Né ni rasuidyno xi galnasác cuaʼ xiin Jacob, racnéni lóono guienno xi láani non gonyno pal nainy lóono guibaladx Jehová né lóono.