¿Labúu ganlo más de xcalrrasuidy la Biblia ni diti tampa nagan la?

1. ¿Ximod gosaclo órni bisuidylo galnigolú?

XCALRRASUIDY la Biblia ni diti tampa nagan ma bitzaʼni mod nabanyno. Por ejemplo, ni gonno que laa Dios ngú Jehová gocni primer galrrasuidy sacróyen ni buny que nabigaxno más ronoʼbu (Is. 42:8). Nigolú sacróyen gosacno órni bisuidyno que buñ ni ma goity diti cadudyibu ló galrrioʼob (Ecl. 9:10). Né órni bisuidyno que Dios ma biduʼdy xtiitz que Gudxlio gacni toib Lagary móz, ma diti goyoʼno ló galrrasaʼ ximod guibanyno ló dzú ni sietra, portín bienno que diti nosi labúu guibanyno 70 o 80 íz, xalagary ngú sabanyno por tipzó (Sal. 37:29; 90:10).

2. ¿Ximod nanno que xcalrrasuidy la Biblia ni diti tampa nagan labúu gacnéni dada cristianos ni nadip xfe? (2 Pedro 1:12, 13).

² Ná ma sanéno xidal íz ló galnigolú, diti guialadxno que galrrasuidy ni diti tampa nagan ni sieed ló la Biblia nigolú rasacni. Apóstol Pedro bicaʼbu ni rarop xquiichbu lóo herman ni gosagaʼdxich ló galnigolú (bíil 2 Pedro 1:12, 13). Pedro goniiny láabu ñony nadipbu herman par labúu nacalóyibu tipnés galnagan ni goyoʼ lainy congregación, xomod mextra falz né buñ mal (2 Ped. 2:1-3). Par labúu ñacnébu cristianos reʼ diti nasianyibu Jehová, bunybu que cristianos reʼ nasetnaladx tipnés galrrasuidy ni ma nanyibu.

3. Golexa né toib ejemplo xigony guirá cristianos non gonyrano pensary ló galrrasuidy ni diti tampa nagan ni sieed ló la Biblia.

³ Ná ma sanéno xidzú íz de goló cayonyno xchiin Jehová, xcalrrasuidy la Biblia ni diti tampa nagan, labúu gacnéni lóono. Guisetlano toib ejemplo. Pentzi toib buñ ni nan ronytzaay galrro né toib buñ ni casuidy par gonytzaay galrro raquiinyibu ingredientes cuca par gonytzaayibu galrro. Per buñreʼ ni ma xidzú nac toib buñ ni ronytzaay galrro, nanbu ximod guiquimbu ingredientes par gonytzaaybu toib galrro copy ni naníx. Modcuca, buñ ni casuidy la Biblia, labúu guisuidybu xidal lesiony ni diti tampa nagan de textos né galnigolú ni sieed ló la Biblia, per herman ni sané xidzú íz cayony xchiin Jehová, labúu cueʼyibu lesiony copy ni guioladxyibu. ¿Xigony? Portín sigory de goló goyonisbu noʼ cós ni ma bidzaʼ ló xcalnabánybu o ló dxiin ni cayonybu par Jehová. Órni gonyno pensary ló galrrasuidy ni diti tampa nagan ni sieed ló la Biblia né ximod nac xcalnabányno ló naareʼ, labúu guidzelno toib mod copy ni labúu guisobno láani. Ló artículo reʼ, guisuidyno xi láani labúu gan herman ni ma xidzú noʼ lainy xcudx Jehová de tzón galrrasuidy ni diti tampa nagan ni sieed ló la Biblia.

JEHOVÁ NGÚ NI BISAʼ GUIRÁ NI NOʼ

4. ¿Ximod ma bitzaʼ mod nabanyno ni bisuidyno que Jehová Bisaʼ guirá ni noʼ?

⁴ Hebreos 3:4 ná: «Ni bisaʼ guirá cós ngú Dios». Nanno que noʼ toib ni Bisaʼ Gudxlio né guirá ni noʼ loni, toib ni nap xiroʼ sabiduría né galnadip. Dios bisaʼ lóono, por ngú rimbutzaaybu lóono. Per diti nosi ngú: ronladxbu lóono né nanbu xi láani más raquiinno. Ni nanno ndeʼ, ¿ximod ma bitzaʼni mod nabanyno? Ni nanno que Jehová bisaʼ guirá ni noʼ, ronyni que guioladxno guibanyno.

5. ¿Xí rasuidyni lóono ni nanno que Jehová Bisaʼ guirá ni noʼ? (Isaías 45:9-12).

⁵ Ni nanno que Jehová bisaʼ guirá ni noʼ láaca rasuidyni lóono que non gacno buñdxo. Gonyno pensary ló ni gosaclóo Job. Por tidxó tiemp, goyoʼbu galrrasaʼ por láasibu né biyopybu mod naslooybu que láani ngú ni nábu, per Jehová buny que nasetnaladxbu que láabu ngú ni bisaʼ guirá ni noʼ né que napbu xiroʼgolu galnadip (Job 38:1-4). Ndeʼ gocné Job naduʼdy cuent que Jehová guirá ór rony xinésni. Né después profeta Isaías goniʼ que buñgudxlio dipa non gony pensary, que más nanyibu que Jehová ni bisaʼ layibu (bíil Isaías 45:9-12).

6. ¿Xigony galán láani gonyno pensary balaati xiroʼ nac ni Bisaʼ lóono? (Láaca bibiʼ retrat).

⁶ Toib cristiano ni ma xidzú noʼ ló galnigolú, labúu nasalóbu ñapbu confianz láacabu, xalagary nayopybu ximod ragonés Jehová láabu né Xtiitzbu la Biblia (Job 37:23, 24). Par diti guisaclobu modreʼ, labúu cueʼbu tiemp gonybu pensary balaati xiroʼ nac ni Bisaʼ lóono né balaati sabiduría napbu (Is. 40:22; 55:8, 9). Galnigolú reʼ ni nigolú rasac labúu sacnéni láabu par diti guisnitbu galbuñdxo ni napbu, né gonyni que guisetnaladxbu que Jehová diti rabiʼ cós xomod láabu.

7. ¿Xí láani gocné Rahela nacacuent ni bidzaʼ lainy xcudx Jehová?

⁷ Toib hermana de gudx Eslovenia ni laa Rahela, gosac naganbu nacacuentbu toib cós ni bidzaʼ lainy xcudx Jehová. ¿Xí gocné láabu? Ni gocné láabu láani ngú, bunybu pensary que Jehová ngú ni Bisaʼ guiráxadit cós ni noʼ. Rahela ná: «Moda rac nagan par naʼ guicacuenta tipnés cós ni raniʼ herman ni rasanir ló xchiin Jehová. Por ejemplo, ná ma bibiʼya Informe 8 de Tidxó Buñ ni nap Xiroʼ galnan ni bireʼ ló íz 2023, primer buelt ni bibiʼya toib hermano ni ragaʼ lox bituʼdy discurs, diti gosaca sacró. Por ngú, goninéya Jehová par ñacné naʼ nacacuenta láani». Rahela bieen que ni Bisaʼ guibá né Gudxlio nantzay ximod guisanirbu ló xcudxbu né gonybu láani sacró. Pal looy láaca rasac naganlo guicacuentlo órni rarexa toib cós ni ronyno crer o toib instrucción copy, goleʼ tiemp par gonylo pensary que Jehová ni Bisaʼ lóono, nap xiroʼgolu sabiduría né galnadip (Rom. 11:33-36).

XIGONY RADUʼDY DIOS LAGARY TZOʼ GALRRIOʼOB

8. ¿Ximod ma gocnéni lóono ni bisuidyno xigony raduʼdy Dios lagary tzoʼ galrrioʼob?

⁸ ¿Xigony raduʼdy Dios lagary tzoʼ galrrioʼob? Órni tipnés buñ diti radzel xcalrracapy galrranabdiitz reʼ, radzuitzyibu né Dios o ma diti ronyibu crer lóo Dios (Prov. 19:3). Per looy ma bienlo, que Jehová diti ragoʼbu galrrioʼob, xalagary ngú radudyno ló galrrioʼob portín bianéno galkié né nacno buñ galkié. Láaca ma bienlo que por ni nac Jehová toib Dios ni nap paseins, xidal millón de buñ ma rimbu láabu, né ma nanyibu xi láani gony Jehová par guinitlóbu galrrioʼob (2 Ped. 3:9, 15). Ni ma nanlo galnigolú reʼ, rasialdóni xcalnabanylo né ronyni que guibigaxlo más ronoʼ Jehová.

9. ¿Pu ór galán gonyno repas xigony raduʼdy Jehová lagary tzoʼ galrrioʼob?

⁹ Nanno que laʼga cabésno guidxin dzú ni guinitló Jehová galrrioʼob, non gacno buñ paseins. Órni racalóno galnagan, diti rac xinésni né lóono, raity xfamilno o rabiʼno que toib buñ ni ronladxno radudy guirá galrrioʼob reʼ, sigory ranabdiitzno lóocano, xigony yása guinitló Jehová galrrioʼob (Hab. 1:2, 3). Órni casaclono toibtica cós reʼ, galán láani gonyno pensary xigony raduʼdy Jehová lagary que buñtzay guisacloyibu cós mal (Sal. 34:19).a Láaca non gonyno pensary ló guirá ni Jehová gony, né ximod guinitlóbu galrrioʼob por tipzó.

10. ¿Xí láani racné Anne par ma diti guioʼobgoluʼni láabu xcalgoity xinaʼbu?

¹⁰ Ni nanno xigony raduʼdy Dios lagary tzoʼ galrrioʼob, racnéni lóono gony guantaryno. Anne, ni rabés lainy toib isla ni laa Mayotte, ni riaʼan niis océano Índico, rabexabu: «Dzú goity xinaʼya nigolú gosac nabana. Per rasetnaladxi naʼca que galrrioʼob diti sieedni de Jehová, que raniiny láabu guinitlóbu guirá cós ni ratuʼdy lóono ló galrrioʼob, né guilísbu xfamilno ni ma goity. Órni roni pensary ló galnigolú reʼ, nigolú rasaca sacró né dada radziguiaʼya mod rasaca».

11. Ni nanno xigony raduʼdy Jehová lagary tzoʼ galrrioʼob, ¿xigony rachiinni lóono gony predicarno?

¹¹ Ni nanno xigony raduʼdy Dios lagary tzoʼ galrrioʼob, láaca rachiinni lóono guinino xtiitz Dios. Rienno que por ni napbu paseins, buñ ni rac arrepentir, labúu guilaa. Después ni golexabu ndeʼ, Pedro bicaʼbu: «¡Colgony pensary xi clas buñ non gacto! Colgac nayaa ló guirá ni gonyto né colgony cós ni raslooy que rony adorarto Dios» (2 Ped. 3:11). Toibtica cós ni raslooy que rony adorarno Dios nacni ni ranino xtiitz Dios. Xomodca Bixiosno Jehová, nadxiʼno buñ né raniiny lóono guibanyibu lainy toib gudxlio copy. Jehová nap paseins, por ngú caduʼdybu oportunida buñ ni rabés ló territorio xtunylo par gony adorar láabu. Né looy naplo privilegio rodann de gonylo dxiin toibsi né láabu né gacnélo buñ guimbu láabu antes de guieed fin xtuny gudxliogoxreʼ (1 Cor. 3:9).

RABÉSNO LÓ «DZÚ NI MA GUIDUBYLAGAʼ»

12. Órni rabiʼno ximod cayac cumplir profecía ni raniʼ ximod guibany buñ ló «dzú ni ma guidubylagaʼ», ¿xí láani napno confianz?

¹² La Biblia rabexatzay ximod gac buñ ló «dzú ni ma guidubylagaʼ» (2 Tim. 3:1-5). Nosi raquiin guibiʼno ximod nac buñ ni ragoo lóono par guiduʼdyno cuent que profecía reʼ ma cayac cumplirni. Né órni rabiʼno que mod nac buñ nosi ronyxiroʼni galnagan, ronyni que gapno más confianz que Xtiitz Dios diti rachéni (2 Tim. 3:13-15).

13. ¿Xí galán guinabdiitzno lóocano? (Lucas 12:15-21).

¹³ Ni nanno que ma nabanyno ló dzú ni cadubylagaʼ, láaca racnéni lóono par coʼno guicno ló cós ni más rasac. Jesús goleʼ loguiaʼ balaati rasac guiquintzayno xtiempno ló comparación ni radzelno ló Lucas 12:15-21 (bíil láani). ¿Xigony gochbu buñguieeu reʼ, «Diti noʼ xcalrrienlo»? Portín buñguieeucu goloʼbu guicbu ló cós ni diti raquiin. Goloʼtzaybu «cós ni rasac par láasibu» per diti gócbu buñ «ric nisló Dios». ¿Xigony nigolú gosac que buñguieeu reʼ naquintzay xtiemp? Dios góoch láabu: «Goxin reʼ saitylo». ¿Xí rasuidy ndeʼ lóono? Mápa mer guinitló gudxliogoxreʼ, por ngú galán guinabdiitzno lóocano: «¿Raslooy metas ni napa que nandxichi xí ngú ni más rasac la? ¿Xí metas rony animar xiina gap? ¿Ló xí cós raquiinna xfuerza, xtiempa né xpidxiichi: par gapa cós ni rasac par naʼsi la, o par gapa cós ni rasac lainy guibá?

14. Mod raslooy experiencia xtuny Miki, ¿xigony galán láani gonyno pensary ló prueby ni raslooy que ma nabanyno ló dzú ni ma cadubylagaʼ?

¹⁴ Ni gonyno pensary ló guirá prueby ni raslooy que ma nabanyno ló dzú ni ma cadubylagaʼ, labúu gacnéni lóono par ganno ximod guiquintzayno xcalnabányno. Ngú ni gosaclóo toib hermana ni laa Miki. Láabu nábu: «Órni bistubylagaʼya scuel, goniiny naʼ ñaʼya scuel xirop par nasuʼdi ximod goyaʼ guirá nimal. Per láaca goniiny naʼ ñaca precursora regular né ñacnéya lagary ro raquiin más herman par guiniʼ xtiitz Dios. Tipnés hermanos ni nadip xfe gochyibu naʼ ñony pensary pal labúu nasuʼdi né ñaca precursora o ñaʼya stoib lagary ro raquiin galrracné toibsi ór. Gochyibu naʼ que gudxliogoxreʼ mápa mer guinitlóni né que ló Gudxlio copy, labúu sasuʼdi mod goyaʼ né mod nac guirá nimal ni guiniiny naʼ por tipzó. Por ngú goloʼya guica nasuʼdi ñoni toib dxiin ni ñacné naʼ. Por ni buni ngú, bidzela toib dxiin ni labúu biduʼdy lagary ñaca precursora, né después labúu goyaʼya Ecuador goniya xtiitz Dios». Nigoreʼ Miki né tzeʼel ronyibu dxiin ló galcircuit lainy gudxrop cu.

15. ¿Xí rasuidy ejemplo xtuny Santiago lóono? (Láaca bibiʼ dibuj).

¹⁵ Pal órni rony predicarno, buñ diti ná guicacuent diitz sacró, diti non guireʼganno. Guisetnaladxno que buñ labúu guitzaʼ mod nac. Gonyno pensary lóo Santiago, ni góc toibtica buch Jesús. Santiago bibiʼbu Jesús goniʼs, bibiʼbu ximod bidxin Jesús góc Mesías né ximod bisuidytzaybu buñ. Ná Santiago gon guirá ndeʼ, diti nimaca gopbu fe lóo Jesús. Né gócbu xpiin Jesús dada órni biás Jesús lad gueʼet. Santiago bidxin góc toib cristiano ni nigolú buny xchiin Jehová (Juan 7:5; Gál. 2:9).b Por ngú, diti gonyno pensary que xfamilno ni diti ná guicadiag galnigolú nigoreʼ, diti labúu satzaʼbu. Diti guidzagno, tzáguenrano buñ ni yása guicacuent diitz sacró. Guisetnaladxno que nabanyno ló dzú ni ma cadubylagaʼ, né por ngú nigolú rasac guinino xtiitz Dios nimaca. Ni gaibylo buñ nigoreʼ, pentzi ngú sachiin layibu guitzaʼbu mod nacyibu ló dzú ni sietra, dada labúu guitzaʼyibu después ni saló gran tribulación.c

GUIDUʼDYRANO GUIXQUIX POR GUIRÁ NI RAIBY JEHOVÁ LÓONO

16. ¿Ximod racnéni looy guirá ni raiby Jehová lóono? (Láaca bibiʼ cuadriyen ni laa «Biquiin láani par gacnélo stipnés»).

¹⁶ Tidxó galrro espiritual ni racaʼno, goctzayni par buñ ni diti nan galrrasuidy ni diti nagan ni sieed ló la Biblia. Por ejemplo, discurs ni rioʼ guic xomal, tipnés artículos né videos ni sieed ló jw.org, né revistas par guirá buñ, nacni par buñ ni diti nac Testigo. Per ná scú, guirá ni raiby Jehová lóono racnéni guirácano, portín rony nadipni galnadxiʼ ni napno Jehová, ronyni que gapno más fe ló Xtiitzbu né racnéni lóono guisuidytzayno stipnés galnigolú ni más rasac (Sal. 19:7).

17. ¿Ló xí cós labúu gacné lóono galrrasuidy ni diti tampa nagan ni sieed ló la Biblia?

¹⁷ Lóono ni ma xidzú sanéno cayonyno xchiin Jehová, nigolú rabaladxno órni rarexa xigony radzaʼ mod rienno tipnés cós ni ronyno crer. Ná scú, láaca raduʼdyno guixquix por galrrasuidy ni diti tampa nagan ni sieed ló la Biblia ni bisuidyno órni bimbuno galnigolú. Mod ma bisuidyno, guiráno labúu guisuidyrano de láani. Pal rasac naganno guisobno toib instrucción copy portín moda biaʼno rapno confianz mod ronyno pensary o mod ronyno toib cós, non gacno buñdxo né guisetnaladxno que Jehová ni Bisaʼ lóono, láabu ngú ni ragonés xcudx, né láabu napbu xiroʼgolu sabiduría né galnadip. Órni lóono o xfamilno o ximigno radudy ló galnagan, gapno paseins né gonyno pensary xigony raduʼdy Jehová lagary tzoʼ galrrioʼob. Né órni ganno ximod guiquintzayno xtiempno, cós ni napno, dipa guialadxno que ma nabanyno ló dzú ni ma cadubylagaʼ né que mápa mer guidxin fin. Guisuidyrano de guirá ni raiby Jehová lóono par labúu cutzayno ni gonyno né dipa guisianno láabu.