Gacnéno nimaca buñ ni rasaguel guisuidy de Dios

1. ¿Ximod racacuent buñ mensaj ni sanéno? (Hechos 13:47, 48; 16:14, 15).

LÓ SIGLO primero, xidal buñ nimaca cuacuentyibu galnigolú órni goyoʼ ni buny predicar layibu (bíil Hechos 13:47, 48; 16:14, 15). Ló naareʼ noʼ buñ ni racacuent diitz sacró desde dzú racadiagyibu láani. Né noʼ stipnés buñ ni diti raduʼdy diitz que nainy ganyibu ni rasuidy la Biblia, per después racacuentyibu láani né guidopy xcalnabanyibu né raniiny ganyibu más de Dios. ¿Xí non gonyno órni radzelno buñ ni diti rasaguel gan de Dios?

2. ¿Xigony labúu guinino que predicación xtunyno nacni xomod órni ragoʼ buñ binii?

² Labúu guinino que predicación nacni xomod toib layoo ro ragoʼ buñ binii. Laʼga toib buñ cagoʼ binii né casagaʼ stipnés yaguien, pentzi rabiʼbu que stoib yaguien ma cayaa xcaa, né nimaca rachoʼbu láani. Modcuca, laʼga casuidyno de xtiitz Dios toib buñ par guiembu que nigolú rasac ni rasuidy la Biblia, pentzi radzelno toib buñ ni puextca noʼ guicadiag xtiitz Dios, órcuca ronyno rutirigaʼlni lóono gacnéno láabu (Juan 4:35, 36). Pal rabiʼtzayno ximod nac buñ, labúu saduʼdyno cuent que noʼ chop clas buñ né sanno ximod labúu gacnéno tigaagayibu. Ló artículo reʼ sabiʼno xi labúu gonyno primer buelt ni gooyno diitz pal rabiʼno que rasaguelbu racadiagbu lóono. Láaca sabiʼno ximod labúu gacnéno láabu par niʼsbu lainy xcudx Jehová.

PAL BUÑREʼ NAINY GANBU DE XTIITZ DIOS

3. Pal cayony predicarno né radzelno toib buñ ni raniiny gan ni ná la Biblia, ¿xí labúu gonyno? (1 Corintios 9:26).

³ Pal cayony predicarno né radzelno toib buñ ni nainy gan de xtiitz Dios, nimaca nainy gacnéno láabu par saabu ló néz ni riné buñ guibany por tipzó. Diti noʼ xi portín cuésno: más galán gaibyno láabu pal nainy guisuidybu ni ná la Biblia né guiruʼno láabu tzeebu reunión ló primer buelt ni gooyno diitz né láabu (bíil 1 Corintios 9:26).

4. ¿Xí experiencia raslooy que noʼ buñ ni rasaguel guisuidy ni ná la Biblia primerdiguieʼ buelt ni rac predicar láabu?

⁴ Gonabdiitz láabu pal guisuidybu ni ná la Biblia. Noʼ buñ nimaca rasaguel guisuidy ni ná la Biblia. Guibiʼno ni gosaclóo toib mbioxhlas de gudx Canadá. Toib dzú juevy, toib mbioxhlas bibigax ronoʼ toib camionguien né cuaʼbu toib follet Bibany goxtiguie. Hermana ni sagaʼ ronoʼ camionguien góoch láabu que labúu guisuidybu scásiʼ ni ná la Biblia né follet reʼ. Mbioxhlas reʼ góoch láabu que nainy ganbu más né biduʼdybu número de teléfono xtunybu hermana reʼ. Né láaca, dzúcuca mbioxhlas reʼ bixel mensaj lóo hermana reʼ né gonabdiitzbu ximod labúu guisuidybu ni ná la Biblia. Hermana reʼ gochbu mbioxhlascu gooybu diitz guic xomal cu, per mbioxhlascu cuapy láabu: «¿Diti labúu gacni guixí la? Guixí napa tiemp». Stoib dzúcu gosaló bisuidybu ni ná la Biblia, guic xomal cuca goyeebu reunión né desde dzúcu naguel goniʼsbu lainy xcudx Jehová.

5. ¿Xí coʼno guicno órni guisuidyno buñ? (Láaca bibiʼ retrat).

⁵ Diti guirá buñ racadiag lóono xomod mbioxhlascu. Non guisetnaladxno que né xidal buñ nír non gooyno diitz de cós ni rioladxbu par labúu gonyno que guiniiny ganbu más. Ná scú, pal diti rareʼganno né rioʼno galrrasaʼ por buñ, pentzi diti saclano par salóno guisuidyno né láabu ni ná la Biblia. ¿Xí diitz labúu guiquiinno par gaibyno láabu guisuidybu ni ná la Biblia? Galrranabdiitz reʼca gocni né xidal hermanos né hermanas ni nantzay rasuidy buñ ni ná la Biblia. Ganno xi cuapyibu.

6. ¿Xí labúu gonyno par guisaguel buñ guibiguetno né guiniráno de la Biblia né láabu?

⁶ Publicadores né precursores goniʼyibu que lainy tipnés lagary más galán diti guiquiin buñ diitz guisuidylo. Órni raquiinyibu diitz xomod gooyno diitz o guimbutzaaylo ni ná la Biblia buñ ni caninéyibu rasaguel guisuidy. Par gaibyno buñ que nainy guibiguetno par guininéno láabu stoib, guirá herman reʼ ná que guiquiinno diitz xomod «Nigolú radziguiaʼno que la Biblia racapy galrranabdiitz ni rony buñ» o «La Biblia diti nosi raniʼ de religión láaca raduʼdyni consej ni labúu gacné lóono». Né sigory labúu guinino: «Ló 10 o 15 minut labúu guienlo cós ni labúu gacnégoluʼ looy». Diti fuerspa gaibyno láabu que tzoʼno guirá xomal, modreʼ diti sonyno que guixacladxbu o guisacbu que ma nacni toib compromis.

7. ¿Pú ór raduʼdy tipnés buñ cuent que ma bidzelyibu galnigolú? (1 Corintios 14:23-25).

⁷ Biruʼ láabu tzeebu toib reunión. Ralooyni ló xtzú apóstol Pablo goyoʼ buñ ni bidzel galnigolú órni goyee reunión primer buelt (bíil 1 Corintios 14:23-25). Ló naareʼ scúca racni. Xidal buñ naguel raniʼsyibu lainy xcudx Jehová órni rieeyibu xireunionno. Per, ¿pú ór non guiruʼno layibu? Ló libro Bibany goxtiguie ló lesiony 10, sieed toib mod ni labúu gonyno par guiruʼno buñ tzee reunión, per diti fuerspa guidxinno ló lesionycu par guiruʼno layibu. Labúu guiruʼno buñ tzee reunión ni rac guic xomal ló primer buelt ni gooyno diitz né láabu, sigory labúu gaibyno láabu ximod laa discurs ni tudy o labúu gaibyno láabu tipnés cós ni sieed ló Guiich ni caniʼ de xomalcu.

8. Pal raruʼno toib buñ tzee reunión, ¿xí labúu gaibyno láabu? (Isaías 54:13).

⁸ Órni guiruʼno buñ par tzee reunión, gaibyno layibu que diti ronyno xireunionno xomod rony stipnés religión ni sigory rimbubu. Toib buñ ni casuidy ni ná la Biblia, después ni goyeebu primer reunión ro rasuidyno Guiich ni caniʼ gonabdiitzbu xomextrabu ni rasuidy láabu: «Ni rony galrranabdiitz, ¿nanbu laa tigaaga buñ ni racapy la?». Xomextrabu cuapy láabu que congregación nacni xomod toib famil, por ngú guiráno ronyno rutirigaʼlni lóono par ganno laa guiráca saʼno. Estudiante reʼ cuapy láabu que lainy xquidaʼbu casi ni toib nan ximod laa guirá ni radop cú. Sigory xidal buñ láaca diti nanyibu ximod rac xireunionno, por ngú non gaibyno layibu ximod racni (bíil Isaías 54:13). Radopno par guienno Jehová, guisuidyno de láabu né gony animarno saʼno (Heb. 2:12; 10:24, 25). Por ngú diti cuenunysi rac xireunionno né diti ronyno costumbres loni xomod stipnés religión (1 Cor. 14:40). Radopno lainy Salón del Reino par guisuidyno, por ngú rayopyno mod gac naní lainyni. Láaca rasagaʼ galayno, diti ranino de política nili rony apoyarno toib partid. Ló xireunionno láaca diti ranidalno. Par gan buñ ni casuidyno ximod rac xireunionno, guislooyno láabu video ni laa, ¿Ximod rac xireuniondo?

9, 10. Pal raruʼno toib buñ tzee reunión, ¿ximod labúu gacnéno láabu par diti guidzuibybu? (Láaca bibiʼ retrat).

⁹ Tipnésyibu diti ná tzee reunión portín radzuibyibu tzoʼ ni gaiby layibu gacyibu testigos xtuny Jehová. Por ngú, gaibyno buñ ni caninéno que ni diti nac Testigo labúu tzee reunión; pal láabu nábu tzeebu, labúu tzeebu par guicadiagbu, né diti sioʼ ni gony lafuers láabu gony comentarbu né guitzaʼbu de religión. Diti rioʼ reunión par bimbiox, por ngú buñ ni noʼ xiin labúu tzanéyibu xiinyibu né cuuyibu toibsi par guisuidyibu. Modreʼ guirá buñ ni tzané xiin gan guirága ór pu noʼ ximbiox né xi casuidyibu (Deut. 31:12). Láaca diti radop bidxiich, ronydo xomod goniʼ Jesús: «Cuaʼto scásiʼ, colguiduʼdy scásiʼ» (Mat. 10:8). Láaca labúu gaibyno layibu, que diti fuerspa guacyibu lairy ni rasacgoluʼ. Dios diti racaa cuidad xi clas lairy rocno, láabu rabiʼbu ni noʼ lainy xcalnabanyno (1 Sam. 16:7).

¹⁰ Pal buñcu riee reunión, gonyno rutirigaʼlni lóono par guisacbu sacró. Tzanéno láabu par guimbu ancianos né stipnés herman láabu. Pal ronyno que guisacbu sacró, ngú sigory sony que guibiguetbu stoib. Ló reunión, pal diti napbu biblia, labúu guislooyno láabu texto ni sieed ló biblia xtunyno né ximod guiyopybu láani.

PAL RASALÓNO RASUIDYNO TOIB BUÑ

11. ¿Ximod raslooyno que rapno respet tiemp xtuny buñ?

¹¹ Pal rasalóno rasuidyno toib buñ ni ná la Biblia, ¿xí láani non guisetnaladxno? Nigolú rasac gapno respet tiemp ni nap buñcu. Por ejemplo, pal ma gonino tzoʼno toib ór, tzoʼno ór ni gonino, ná buñ de lagary ronoʼno diti rony cumplir né ór ni ma goniʼ. Láaca nigolú rasac que primer buelt ni guisuidyno láabu diti gaclani xiroʼ ór. Tipnés herman ni rasuidytzay buñ náyibu que diti non guiscaʼgoluno xtiitzno, ná buñ ni casuidyno ná gan más. Né diti guiniʼgoluno; guiduʼdyno lagary láabu guiniʼbu (Prov. 10:19).

12. ¿Xí láani coʼno guicno gonyno desde primer buelt ni guisuidyno buñ?

¹² Órni guisuidyno buñ ni la Biblia primerdiguieʼ buelt, non guisuidyno layibu gandxiʼyibu Jehová né Jesús. Par labúu gonyno láani modcu non guisuidyno layibu guirá ni sieed ló la Biblia né diti ni sieed ló xpensaryno (Hech. 10:25, 26). Apóstol Pablo bisuidybu pór de Jesucristo, buñguieeu ni Jehová golú par gacné lóono par guimbuno né gandxiʼno láabu (1 Cor. 2:1, 2). Pablo láaca nayadit goniʼ que gacnéno ni nacopyra nac xpiin Jehová par gapyibu cualidades ni nigolú rasac xomod or, plata né guiee móz (1 Cor. 3:11-15). Tipnésni nac fe, sabiduría, discernimiento né respet ni napno Jehová (Sal. 19:9, 10; Prov. 3:13-15; 1 Ped. 1:7). Guicanalno mod bunybu né gacnéno buñ ni casuidyno gac nadip fe ni napbu né guidzaktzaybu Bixiosbu ni ronladx láabu ni noʼ guibá (2 Cor. 1:24).

13. ¿Ximod gacno buñ paseins né guienno mod rasac buñ ni casuidyno? (2 Corintios 10:4, 5; láaca bibiʼ retrat).

¹³ Guisuʼno mod bisuidy Jesús, gacno buñ paseins né guienno mod rasac buñ ni casuidyno. Diti gonyno galrranabdiitz ni guituʼdy láabu ló galnatoy. Pal raduʼdyno cuent que noʼ toib cós ni diti riembu de tema ni casuidyno láabu, guistubylagaʼno lesiony ni casuidyno né cuéxano láani más delant. Né pal raduʼdyno cuent que rasac naganbu guicacuentbu toib galrrasuidy, diti gony lafuersno láabu, guiduʼdyno tiemp que galnigolú ni casuidybu guidxinni lainy xcalnabanybu (Juan 16:12; Col. 2:6, 7). La Biblia ratzak galrrasuidy falz né toib muro ni guicantaʼno layoo (bíil 2 Corintios 10:4, 5; bibiʼ ni ná nota ló dixtil «derrumbar cosas fuertemente atrincheradas»). Par labúu guicantaʼ buñ ni casuidyno, galrrasuidy falz ni napbu, primer raquiin gacnéno láabu guibiʼbu Jehová xomod ni ralaa láabu (Sal. 91:9).

PAL BUÑ NI CASUIDYNO RIEE TOIB REUNIÓN

14. ¿Ximod non cobiono buñ ni radxin ló xireunionno?

¹⁴ Jehová raniiny diti cuuno buñ, né guislooyno galnadxiʼ guirá buñ ni radxin ló xireunionno, ná pal nacyibu de stoib gudx, pal napyibu bidxiich o yaca (Sant. 2:1-4, 9). Guibiʼno tipnés mod ni labúu gonyno láani.

15, 16. ¿Xí labúu gonyno par guisac sacró ni nacopyga cadxin ló reunión?

¹⁵ Noʼ buñ riee toib reunión nosi par ganbu ximod racni o portín toib buñ ni rabés stoib lagary buny animar láabu tzeebu. Por ngú, pal rabiʼno toib buñ ni laʼra cadxin ló xireunionno, guicacuentno láabu sacró. Gacno buñtzay né láabu, né diti gonyno que guixacladxbu né lóono. Labúu gaibyno láabu cuubu né lóono toibsi. Guiduʼdyno toib biblia láabu né publicaciones, o golno toibsi né láabu. Gonyno pensary ló stipnés mod ni labúu gonyno par guisacbu sacró. Por ejemplo, toib buñguieeu ni goyee toib Salón del Reino rasetnaladxbu que nigolú bidzuibybu portín gosacbu que lairy ni nócbu diti nacni xomod xhap herman. Par nasacbu sacró, herman ni cuacuent láabu góoch láabu que diti ñoʼbu ló galrrasaʼ, portín lóono ni nac testigos xtuny Jehová nacno xomodca láabu. Buñguieeucu goyonis né dipa rialadxbu ni góoch herman cu láabu. Ná scú, ná pal rioʼno ló galrrasaʼ por buñ ni radxin ló reunión ni rapno, non gapno cuidad diti guinabdiitzno cós ni diti raquiin ganno (1 Ped. 4:15).

¹⁶ ¿Xí más labúu gonyno par guisac buñ sacró? Por ejemplo, gapno respet pal ranino cós de buñ ni diti nac Testigo o ni ronyibu crer, órni cayooyno diitz né stipnés, ló comentarios o ló asignación ni rapno ló reunión. Diti non guinino cós ni labúu gonynaa buñ ni riee reunión né xtolno ma diti guibiguetyibu stoib (Tito 2:8; 3:2). Por ejemplo, diti sacró ñenni pal nanino mal ni rony crer stoib religión (2 Cor. 6:3). Herman ni catuʼdy discurs non gapyibu cuidad mod guiniʼyibu. Láaca non guislooyibu que ragoʼyibu cuent buñ ni radxin ló reunión ni diti nac Testigo, né cuéxayibu diitz ni raquiinno xomod Testigos ni pentzi diti rienyibu.

17. ¿Xí láani gonyno nimaca órni toib buñ ná guisuidy ni ná la Biblia?

¹⁷ Conforma radudy dzú más rasac guinino xtiitz Dios né guidzelno buñ ni rasaguel guibany tipzó (Hech. 13:48). Por ngú, pal ranino xtiitz Dios né toib buñ ni rioladx guicadiag láani, nimaca gaibyno láabu que rasuidyno buñ ni ná la Biblia né guiruʼno láabu reunión ni rapno. Modcu sacnéno láabu saabu ló néz «ni riné buñ ló galnabány» (Mat. 7:14).