IBhokisi Lemibuzo

◼ Yini engabhekwa njengezingubo ezifanelekayo lapho umuntu eyobhapathizwa?

Nakuba izindinganiso zokugqoka zihluka ezingxenyeni ezihlukahlukene zomhlaba, isiyalo seBhayibheli sokuba sigqoke ‘ngesizotha nangokuhluzeka kwengqondo’ siyefana kuwo wonke amaKristu, kungakhathaliseki ukuthi ahlalaphi. (1 Thim. 2:9, qhathanisa ne-NW.) Lesimiso kufanele sisetshenziswe lapho kucatshangelwa ukuthi yiziphi izingubo ezifanelekayo uma ubhapathizwa.

INqabayokulinda ka-June 1, 1985, ikhasi 30, inikeza umuntu obhapathizwayo leseluleko: “Eqinisweni kumelwe kuboniswe isizotha ngohlobo lwengubo yokungena emanzini esetshenziswayo. Lokhu kubalulekile namuhla lapho abaklami bezimfashini bebonakala befuna ukugabisa ngobulili nokuveza cishe ubunqunu bomuntu ngokuphelele. Esinye isici okumelwe sicatshangelwe siwukuthi ezinye izingubo ezibonakala zizothile lapho zomile ziba okuphambene nalokho lapho sezimanzi. Akekho obhapathizwayo ongathanda ukuba yimbangela yokuphazamiseka noma yokukhubekisa esenzakalweni esingathi sína [njengobhapathizo].—Filipi 1:10.”

Ngokuvumelana nalesiseluleko, labo ababhapathizwayo bayofuna ukugqoka izingubo ezinesizotha, bekhumbula ukubaluleka kwalesenzakalo. Ngaleyondlela, ingubo yokubhukuda emfushane noma enamathela ngokungenasizotha emzimbeni lapho imanzi ayinakuba ingubo efanelekayo ngomKristu futhi kufanele igwenywe. Ngendlela efanayo, kungaba okungafanelekile ngomuntu ukuba abukeke egqoke ngendlela yobudlabha noma ukunganaki. Ngaphezu kwalokho, ngeke kube okufanelekile ukugqoka izikibha ezinezinkulumo zezwe noma iziqubulo zezentengiselwano.

Lapho abadala ababelwe bebukeza imibuzo yobhapathizo nomfundi ozobhapathizwa, lesi kungaba yisikhathi esihle sokuxoxa ngokubaluleka kokugqoka izingubo ezifanelekayo. Ngalendlela isizotha salesenzakalo siyolondolozwa, futhi siyoqhubeka sivelela njengabahlukile ezweni.—Qhathanisa noJohane 15:19.