Ukufeza Inkonzo Yethu YoMbuso Ebandleni
1 NgoJesu Kristu, iNhloko yebandla lobuKristu, uJehova uye waphathisa “umphathi othembekileyo noqondileyo,” noma umphathi wendlu, umthwalo wemfanelo. (Luka 12:42, 43) Lelilungiselelo liye lakwenza kwaba nokwenzeka ngathi ukuba sithole isiqondiso esinyathelisiwe ngendlela ‘okumelwe sihambe ngayo endlini kaNkulunkulu.’ (1 Thim. 3:15) IWatch Tower Publications Index iyithuluzi eliyinhloko lokuthola lokho okuye kwanyatheliswa. (Uma ukuthola kunzima ukusebenzisa iWatch Tower Publications Index ngesiNgisi, uyothola izikhombo eziwusizo ngendlela efanayo ohlwini lwezindaba oluphuma minyaka yonke olungemuva kweNqabayokulinda kaDecember 15 nePhaphama! kaDecember 22.) Ingakusiza kanjani?
2 Ingabe ungumdala? Kunezihloko ezimbili ezihlanganisa okuningi eziphathelene nemithwalo yakho yemfanelo. Esithi “Elders” nesithi “Overseers.” Ingxenye ethi “Elders” inezikhombo eziningi eziholela ekwazisweni okuphathelene nokusiza abantu abehlukahlukene ebandleni, indlela yokunikeza iseluleko, ubuhlobo phakathi kwendikimba yabadala, imithwalo yemfanelo yabadala, njalonjalo. Izikhombo ezikhuluma ngokufaneleka zitholakala ngaphansi kwesithi “Overseers,” njengoba lesosihloko siyigama elisetshenziswa yiBhayibheli lapho likhuluma ngakho. Futhi ngaphansi kwesithi “Overseers” kunezabelo ezingokomthetho, njengalezi “presiding overseer,” “service overseer,” nesithi “secretary.” Isihloko esikhulu esithi “Congregations” naso siyonikeza ukwaziswa okuwusizo.
3 Nani nina eniyizinceku ezikhonzayo nifeza indima ebalulekile ebandleni. Isihloko esithi “Ministerial Servants” sinohlu lokwaziswa okuphathelene nezimfanelo zenu kanye nemithwalo yemfanelo. Niyothola futhi izikhombo zokwaziswa okuphathelene nokubaluleka kwamalungelo enkonzo anivulekele nanokuthi ningakukhuthalela kanjani ukufanelekela umthwalo wemfanelo owengeziwe.
4 Kokubili abadala nezinceku ezikhonzayo banamalungelo ngokuphathelene nemihlangano ebandleni. Isihloko esithi “Meetings” sinikeza izikhombo zazo zonke izici zalesihloko, kuhlanganise nezibonelo ezihlaba umxhwele ngaphansi kwesithi “efforts to attend.” Njengokulindelekile, kunanezihloko eziyinhloko zemihlangano ngaminye.
5 IHubo 68:11 lithi: “Abesifazane ababika indaba ejabulisayo bayisixuku esikhulu.” Njengamalungu esilisa ebandla, odade nabo kufanele banamathele ekuziphatheni okufanele endlini kaNkulunkulu. Ngezinye izikhathi kuphakama imibuzo ephathelene nezihloko ezinjengokuthi kunini lapho udade kufanele athwale khona ekhanda noma ukuthi yini okufanele yenziwe lapho kungekho mzalwane ofanelekayo ukuba aqhube umhlangano noma amelele ibandla ngomthandazo. Isihloko esithi “Women” singakusa ekwazisweni okuphathelene nalezihloko. Futhi ziwusizo izihloko ezithi “Sisters,” “Head Covering,” nesithi “Prayer.”
6 Ingxenye yokuphetha yeyoku-1 Thimothewu 3:15 ibhekisela ebandleni lobuKristu ‘njengensika nesisekelo seqiniso.’ Kuyilungelo lethu ukusekela iqiniso njengoba siziphatha ngokufanele endlini kaNkulunkulu, sifeza inkonzo yethu yoMbuso ebandleni.