IsAmbulo—Izimfihlakalo Zembuliwe
1 Sekuyisikhathi eside incwadi yesAmbulo iyimfihlakalo. Emakhulwini eminyaka izazi zeBhayibheli zazifuna ukwembula izimfihlakalo zayo, nakuba yaba ncane impumelelo ezaba nayo. Kodwa ukwaziswa okuphefumlelwe ngokwaphezulu okukusAmbulo kwakungahloselwanga ukugcinwa kuyimfihlo phakade. Kuyingxenye yeZwi likaNkulunkulu okudingeka siliqonde. (2 Thim. 3:16, 17) Ngokujabulisayo, uNkulunkulu uyasembula isAmbulo njengoba iziprofetho zaso ezijabulisayo zigcwaliseka osukwini lwethu. Njengoba uJehova asebenzisa uJohane ekudluliseleni lemibono kumaKristu ayekanye nawo, namuhla usebenzisa ‘inceku ethembekileyo’ ukuba yembule incazelo yalesiprofetho esivusa amadlingozi.—Math. 24:45-47; IsAm. 1:1-3.
2 Isipho SangoMarch: Incwadi ethi IsAmbulo—Umvuthwandaba Waso Omkhulu Useduze! iye yabakhanyisela futhi yabakhuthaza kakhulu abantu bakaNkulunkulu. Kodwa kungani kufanele ibathakazelise abantu abasensimini yenu? Ngenxa yokuthi lencwadi ejabulisayo iphathelene nezenzakalo eziwumvuthwandaba ezichazwa encwadini yeBhayibheli yesAmbulo ezenzeka kulezinsuku zokugcina. Ingabe abantu abacabangayo abanaso yini isithakazelo esikhathini esizayo njengoba sembulwa uNkulunkulu? Nakuba incwadi yeBhayibheli yesAmbulo iveza izahlulelo zikaNkulunkulu zokulunga, inikeza futhi nezithembiso zezibusiso ezimangalisayo zesikhathi esizayo. (IsAm. 21:1-5) Ukuqonda isigijimi sayo esiphefumlelwe kusisiza ukuba sibone ukuthi sikuphi nesikhathi futhi kugcizelela kithi ukuphuthuma kokwenza intando kaNkulunkulu.
3 Ingabe incwadi Umvuthwandaba WesAmbulo ijule kakhulu ukuba umphakathi uyiqonde? Ngokusobala, abaningi abazange bayithole inzima kakhulu. Phawula nje ukukhulumela okumbalwa kokuningi okwashiwo abafundi balencwadi. Enye indoda yathi: “Lokhu kwaziswa kunamandla. Kodwa kuyathakazelisa. Ngiyakuthanda.” Umfundisi othile wathi: “Angikaze ngazi noma ngifunde okuthile okujabulisa futhi okuneqiniso ngaphezu kwalencwadi!” Omunye umuntu owafunda lencwadi wayiqeda lingakapheli isonto wathi: “Manje amehlo ami alibona kakhulu iqiniso. Ngifuna ukukushintsha ngokuphelele ukuphila kwami.” Ngokusobala, abaningi bathola injabulo njengoba befunda incwadi yeBhayibheli yesAmbulo ngokuyiqonda ngokokuqala ngqá ekuphileni kwabo futhi beqala ukugcina amazwi ayo.
4 Tusa Ngobuqotho Umvuthwandaba WesAmbulo Kwabanye: Lapho uhla- nganyela izingxoxo ezingokomBhalo nabanye phakathi noMarch, unganqikazi ukubonisa abanesithakazelo incwadi Umvuthwandaba WesAmbulo. Batshele labo abalangazelela ukuyifunda ukuthi bangaphawula izingxenye zalencwadi abangaziqondi, futhi lapho ubuya, uyoxoxa nabo ngalawomaphuzu. Lokhu kungaba indlela yokubona ukuthi banesithakazelo esingakanani futhi kukunikeze isisekelo esengeziwe sokuphindela kubo.
5 Ngaphandle kwenkonzo yendlu ngendlu, abaningi baye baba nempumelelo ekuhambiseni ngokwethukela incwadi Umvuthwandaba WesAmbulo ezihlotsheni, kubantu abajwayelene nabo, nakubantu abaxhumana nabo kwezebhizinisi. Bonisa indlela wena ngokwakho oye wazuza ngayo emifanekisweni ecacile, emashadini awusizo, kanye nakwezinye izinsiza-kufundisa ezimangalisayo ezikulencwadi. Lokhu kungabakhuthaza abanye ukuba bayihlole lencwadi yesAmbulo, nakuba kungenzeka bebenomuzwa wokuthi iyinkimbinkimbi kakhulu ukuba bangayiqonda.
6 Yeka indlela esinelungelo elihle ngayo ngokuba nolwazi lwezenzakalo zesikhathi esizayo ezembulwe encwadini yesAmbulo futhi zachazwa ngomzila kaNkulunkulu namuhla! Njengoba siphathiswe ulwazi olunjalo, ngokungafani nababhali bosuku lukaJesu kanye nabefundisi banamuhla, masingalokothi sihluleke ukuyenza yaziwe noma ukwembula incazelo yeZwi likaNkulunkulu kulabo abayolalela. (Qhathanisa noLuka 11:52.) Njengoba senza kanjalo, sinethemba lokuthi abaningi ngokwengeziwe bayolamukela ithemba lokuphila okuphakade emhlabeni omusha kaNkulunkulu futhi bahlanganyele nathi ekwenzeni intando yoMdali wethu.—IsAm. 4:11.