Ukuqhuba Isifundo SeBhayibheli Sasekhaya
1 Isifundo seBhayibheli sasekhaya esiphumelelayo siqhutshwa kanjani? Yisiphi isibonelo esiyisisekelo esinaso? Imibhalo esendabeni efundwayo ingacatshangelwa kanjani? Ubani okufanele afunde izigaba? Ngaphezu kwenqubo evamile yokuqhuba isifundo, yikuphi okunye okudingekayo ukuze sisize umfundi enze iqiniso libe ngelakhe? Iziphi izihibe okumelwe zigwenywe?
2 Indlela Yokuqhuba Isifundo: Ngokuvamile, isifundo seBhayibheli sasekhaya sifana neSifundo Se-Nqabayokulinda. Okokuqala, isigaba esizocatshangelwa siyafundwa. Bese kuthi umuntu oqhuba isifundo abuze umbuzo onyathelisiwe walesosigaba abese elindela umfundi ukuba aphendule. Uma umfundi enqikaza, umqhubi wesifundo kufanele akulungele ukubuza imibuzo yokusiza eyokwenza umfundi acabange ngendaba okukhulunywa ngayo futhi afinyelele esiphethweni esifanele.
3 Cabangelani indlela imibhalo ehlobene ngayo nendaba esesigabeni. Bonisa umfundi indlela yokubona imibhalo ecashuniwe, futhi umsize abone indlela esebenza ngayo. Uma imibhalo ikhonjiwe kodwa ingacashuniwe, kuhle ukuba niyibheke eBhayibhelini, uma ingemide kakhulu. Khona-ke vumela umfundi ukuba ayifunde futhi akhulumele indlela esekela noma ecacisa ngayo okushiwo esigabeni.
4 Siza Umfundi Ukuba Enze Iqiniso Libe Elakhe: Khuthaza abafundi ukuba basilungiselele kahle isifundo. Gcizelela ukuthi ukufunda kubalulekile ukuze umuntu abe nolwazi. Lapho umfundi efunda indaba ezofundwa futhi ezindla ngayo, yilapho eyozuza khona ngokwengeziwe. Abanye abaqhubi bezifundo benza umfundi afunde zonke izigaba phakathi nesifundo seBhayibheli. Abanye bayashintshana nomfundi ekufundeni izigaba. Kufanele kusetshenziswe ukwahlulela okuhle, sihlale sicabangela intuthuko engokomoya yomfundi.
5 Ukufunda indaba ngendlela engavezi ukuthi angayisebenzisa kanjani kungase kumsize umfundi abe nolwazi, kodwa ingabe uyakukholelwa lokho akufundayo? Ukuze enze iqiniso libe ngelakhe, kumelwe abone indlela indaba emthinta ngayo yena siqu. Uzizwa kanjani ngalokho akufundayo? Angakusebenzisa kanjani lokho akufundile? Sebenzisa imibuzo yokuhlola ukuze ufinyelele inhliziyo yomfundi.
6 Gwema Izingibe: Kunezingibe okumelwe zigwenywe lapho kuqhutshwa isifundo seBhayibheli. Lapho kungenela izindaba ezingahlobene nokwaziswa okucatshangelwayo, ngokuvamile kungcono ukuxoxa ngazo ekupheleni kwesifundo noma ngesinye isikhathi. Futhi, kubalulekile ukwenza umfundi aphendule ngamazwi akhe kunokufunda encwadini. Lokhu kuzosiza wena njengomqhubi wesifundo ukuba ubone ukuthi umfundi uyayiqonda yini indaba noma cha.
7 Kungani ungazibekeli umgomo wokuqhuba okungenani isifundo seBhayibheli esisodwa? Akuwona umsebenzi onzima uma uthembela kuJehova futhi ulandela inqubo eyisisekelo yeSifundo Se-Nqabayokulinda. Indlela ephumelela kakhulu yokufundisa abanye iqiniso nokwenza abafundi iwukuqhuba isifundo seBhayibheli sasekhaya. Ngokwenza lokhu, nawe ungaba nenjabulo ebangelwa ukuhlanganyela ngokugcwele ekugcwaliseni umyalo kaJesu okuMathewu 28:19, 20.