‘Yakha Indlu Yakho”
1 Akungabazeki ukuthi ukuphila komkhaya kuwohloka kuzo zonke izinhlobo zempucuko emhlabeni wonke. Izwe likaSathane licwile emangeni nasekuziphatheni okubi. (1 Joh. 5:19) Lokhu kugcizelela ukuphuthuma kokuba ‘sakhe indlu yethu’ futhi sifundise nabanye ukuthi bangakwenza kanjani okufanayo ezindlini zabo.—IzAga 24:3, 27.
2 Izimiso ZeBhayibheli Ziyisivikelo: Imfihlo yenjabulo yangempela yomkhaya itholakala ekusebenziseni izimiso zeBhayibheli. Lamaqiniso anamandla azuzisa ilungu ngalinye lomkhaya kuzo zonke izici zokuphila. Umkhaya ozisebenzisayo uyojabula futhi uyojabulela ukuthula kukaNkulunkulu.—Qhathanisa no-Isaya 32:17, 18.
3 Izimiso ezingasisiza ukuba sakhe indlu yethu zichazwe ngendlela efushanisiwe encwadini entsha ethi, Imfihlo Yenjabulo Yomkhaya. Isahluko ngasinye siphetha ngebhokisi lokufundisa eliwusizo eligcizelela izimiso okufanele amalungu omkhaya azikhumbule. Amaningi alamabhokisi aqala ngombuzo othi, “Lezi zimiso zeBhayibheli zingawusiza kanjani . . . ?” Lokhu kudonsela ukunakekela emiqondweni kaNkulunkulu ukuze sithole umbono wakhe ngendaba edingidwayo.—Isaya 48:17.
4 Jwayelana nalencwadi. Funda ukuthola izimiso ezingaba wusizo lapho kuphakama izinkinga ezihlukahlukene. Lencwadi ikhuluma ngezinto ezinjengalezi: lokho umuntu okufanele akubheke lapho ecabangela umuntu azoshada naye (isahluko 2), izihluthulelo ezibalulekile zokuvula umnyango oya enjabulweni yomshado ehlala njalo (isahluko 3), indlela abazali abangakhulisa ngayo abantwana babo abeve eshumini nambili ukuba babe abantu abadala abaqotho, abesaba uNkulunkulu (isahluko 6), indlela yokuvikela umkhaya emathonyeni alimazayo (isahluko 8), izimiso zokusiza imikhaya yabazali abangabodwa ukuba baphumelele (isahluko 9), usizo olungokomoya lwemikhaya ehlushwa umlutha wotshwala kanye nobudlova (isahluko 12), lokho okungase kwenziwe lapho izibopho zomshado zisengcupheni yokugqashuka (isahluko 13), lokho okungenziwa ukuze kudunyiswe abazali asebekhulile (isahluko 15), indlela yokuthola ikusasa elihlala njalo lomkhaya wakho (isahluko 16).
5 Yisebenzise Ngokugcwele Lencwadi Entsha: Uma ningakayifundi, kungani ningaqali ukuyifunda ndawonye njengomkhaya lencwadi ethi Injabulo Yomkhaya? Futhi, noma nini lapho umkhaya wakho uhlaselwa izinkinga ezintsha noma izinselele, bukeza izahluko ezikulencwadi eziphathelene nalokho, bese ngomthandazo ucabangela indlela ongasisebenzisa ngayo lesi seluleko. Ngaphezu kwalokho, ngo-March, hlela ukuba nesikhathi esiningi senkonzo yasensimini ukuze wenze umzamo wokuyihambisa kubantu abaningi ngangokunokwenzeka lencwadi ethi Imfihlo Yenjabulo Yomkhaya.
6 Imikhaya enokuzinikela kokuhlonipha uNkulunkulu iyoqiniswa ngokomoya futhi yenziwe ibe nobunye futhi ikulungele kahle ukubhekana nokuhlasela kukaSathane. (1 Thim. 4:7, 8; 1 Pet. 5:8, 9) Yeka indlela esijabula ngayo ngokuthi sithola imfundo yaphezulu evela kuMsunguli womkhaya!