Yisakazeni Kabanzi I-Kingdom News No. 35
1 Sonke Siyobe Simatasa Ngezinyanga Zika-october No-november. Ezinsukwini Zokuqala Ezingu-11 Zika-october, Siyohambisa Umagazini Inqabayokulinda Ne-phaphama! Kuyothi Ngesonto, Ngo-october 12, Kuze Kube Isonto, Ngo-november 16, Sihlanganyele Ekusakazeni I-kingdom News No. 35 Emhlabeni Kabanzi. Siyoba Nelungelo Lokuyisa Umyalezo Obalulekile Kubo Bonke Abantu Endaweni Yakithi. Lomyalezo Uyimpendulo Yombuzo Othi, “Ingabe Bonke Abantu Bayoke Bathandane?” Phakathi Nalomkhankaso Okhethekile, Siyosakaza I-kingdom News No. 35 Phakathi Nezinsuku. Ngezimpelasonto, Siyohambisa Omagazini Bamuva, Kanye Ne-kingdom News.
2 Obani Abangahlanganyela? Njengenhlalayenza, abadala bayohola kulomsebenzi. Wonke umuntu uyakujabulela ukusakaza i-Kingdom News, futhi akungabazeki ukuthi abamemezeli abaningi bazobhalisa njengamaphayona asizayo ngenye yezinyanga zalomkhankaso noma ngazo zombili. Abanye abamemezeli bayofisa ukuchitha isikhathi esingaphezu kwesivamile enkonzweni.
3 Ingabe unaso isifundo seBhayibheli esesiqhubekile impela nesifundo saso sencwadi Ulwazi futhi maduzane nje esizofanelekela ukuhlanganyela enkonzweni yasensimini? Mhlawumbe singaba ummemezeli ongabhapathiziwe kungekudala ukuze sihlanganyele emkhankasweni we-Kingdom News. Intshumayelo elula nje edingekayo ukuze wethule ipheshana. Ngokwesibonelo, ungase uthi: “Lomyalezo ubaluleke kangangokuba usakazwa emhlabeni wonke kulenyanga ngezilimi ezingu-169. Ngithanda ukuba ube nekhophi yakho siqu.” Ngisho nezingane ezincane zingaba nengxenye enhle kulomsebenzi ojabulisayo.
4 Abaqhubi bezifundo zencwadi kufanele bakhuthaze wonke amalungu amaqembu abo ukuba ahlanganyele ngokugcwele ekusakazeni i-Kingdom News No. 35. Kungenzeka nokuthi kunabamemezeli asebepholile kodwa abangabuye bakhuthale enkonzweni uma bethola isikhuthazo abasidingayo. Ngaphambi komkhankaso, abadala kufanele bahambele ngamunye wabanjalo ngenjongo yokubona ukuthi yini engase yenziwe ukuze basizwe bahambe nabamemezeli abanokuhlangenwe nakho kulesi sici senkonzo.
5 Singawuqhuba Nini Umhlangano Wenkonzo? Wonke lomsebenzi uzodinga amalungiselelo avumelana nezimo okufakaza njengeqembu. Noma nini lapho kungenzeka, usuku ngalunye phakathi nesonto, ngezimpelasonto nakusihlwa, kufanele kuhlelwe imihlangano yenkonzo. Kufanele iqhutshwe ngezikhathi eziyokwenza abamemezeli namaphayona bakwazi ukusisebenzisa ngokunenzuzo isikhathi sokufakaza. Kungenziwa namalungiselelo okuba kuhlanganwe kusihlwa ukuze kuzuze izingane zesikole, abasebenza amashifu nabanye. Umbonisi wenkonzo kufanele aqikelele ukuthi kutholakala insimu enkulu yendlu ngendlu neyamabhizinisi ukuze wonke umuntu ahlanganyele ngokugcwele kulomsebenzi. Lapho kunabamemezeli abaningi endaweni ethile, kufanele baqaphele ukuthi bangaki abasebenza engxenyeni ethile yensimu.
6 Kuthiwani Ngabangekho Emakhaya? Sifuna ukukhuluma umlomo nomlomo nabaninikhaya abaningi ngangokunokwenzeka ukuze sibachazele ukuthi kungani kufanele bayifunde i-Kingdom News No. 35. Ngakho, uma kungekho muntu ekhaya olihambele, bhala ikheli bese ubuya ngesinye isikhathi sosuku. Uma imizamo yakho yokuthola abaninikhaya ingaphumeleli kuze kube isonto lokugcina lomkhankaso, ungashiya ikhophi ye-Kingdom News endaweni abantu abadlulayo abangeke bayibone kuyo. Ezindaweni ezinemizi, phaphamelani ukubahambisela i-Kingdom News abantu abazihambela emgwaqweni. Lapho nisebenza ensimini engabelwe, emaphandleni noma lapho kunensimu enkulu khona eningeke niyihlanganise phakathi nomkhankaso, ikhophi ye-Kingdom News ningayishiya ngokuhambela kokuqala lapho kungekho muntu khona.
7 Uyini Umgomo Wethu? Amabandla kufanele azame ukuyihambisa yonke i-Kingdom News anayo esitokweni ukuze ayihlanganise yonke insimu yawo ngaphambi kokuphela komkhankaso ngo-November 16. Uma isabelo sensimu yebandla lenu sisikhulu futhi kuphephile ukusebenza wedwa kunokusebenza nothile, ungase ukuthole kuwusizo ukwenza kanjalo. Lokhu kuyokwenza ukwazi ukufinyelela abantu abafanelekayo abaningi ngangokunokwenzeka ngezindaba ezinhle. (Math. 10:11) Qikelela ukuthi ugcina umbhalo ocacile walabo abanesithakazelo.
8 Nikulungele Ukuqala? Abadala kufanele bacabangele kusengaphambili ukuthi bangaki omagazini abengeziwe ibandla elizobadinga futhi baba-ode ngokwaleso sidingo. Ibandla ngalinye lizothunyelelwa ama-Kingdom News No. 35. Amaphayona akhethekile, avamile nasizayo azothola amapheshana angu-250 umuntu emunye azowasakaza, kanti abamemezeli bebandla bazonikezwa amakhophi angu-50 emunye. Sinomsebenzi esiwuhlelelwe. Ingabe nizimisele ukuhlanganyela kulomsebenzi onamisayo? Akungabazeki ukuthi nizimisele. Masiwusakaze kabanzi ngangokunokwenzeka lomyalezo obalulekile osekelwe eBhayibhelini okuyi-Kingdom News No. 35!