Siqhubekela Phambili Isimiso Sokwakha AmaHholo OMbuso
1 Ngo-1983 eMihlanganweni Yezigodi ‘Yobunye BoMbuso’ yase-United States, kwamenyezelwa ukuthi kwakuyosungulwa isikhwama esikhethekile sokuxhasa ukwakhiwa nokulungiswa kwamaHholo OMbuso kulo lonke elase-United States naseCanada. Sasingazi ngaleso sikhathi ukuthi leso siqalo esincane sasiyoba naziphi izibusiso. Saqala ukukubona kugcwaliseka ngokugcwele lokho iHubo 92:4 elikuchaza kahle lapho lithi: “Ngokuba ungithokozisile, Jehova, ngezenzo zakho; ngiyakumemeza ngokujabula.”
2 Manje siyathokoza kakhulu ngalokho okufezwayo. Namuhla kuqhubeka isimiso esisheshayo sokwakha amaHholo OMbuso embulungeni yonke. Sonke sinelungelo lokubamba iqhaza kulo msebenzi ngandlela-thile. Lokhu sikwenza ngeminikelo yezimali emikhulu noma emincane esiza ekubhekaneni nezindleko zokwakha izikhungo zokukhulekela ezengeziwe emhlabeni wonke. Abazalwane abaningi banikela ngokuzithandela nangempahla yabo kanye nesikhathi, amakhono, nobuciko babo kulezo zakhiwo. Lonke leli lungiselelo liphumelela ngoba uJehova eyiqondisa, eyisekela futhi eyibusisa kakhulu imizamo yethu ehlangene.—IHu. 127:1.
3 Amagatsha amaningi aye asilandela isibonelo ekuqaleni esasisungulelwe amabandla ase-United States. Emazweni amaningi emaHholo OMbuso, kunebhokisi abamemezeli abafaka kulo iminikelo yabo yeSikhwama SamaHholo OMbuso. E-United States, INkonzo Yethu YoMbuso ka-March 1997 yamemezela ushintsho olwaluzoba khona kulesi simiso. Yathi: “Kusukela kwasungulwa iSikhwama SeNhlangano SamaHholo OMbuso ngo-1983, abafowethu baye banikela ngesandla esivulekile, okwenza ukuba kutholakale izimali ezibolekiswayo zokwakha amaHholo OMbuso. Angu-2 700 amabandla kuleli zwe asezuzile kakade kuleli lungiselelo. Ngaphandle kwalo, amabandla amaningi abengeke akwazi ukwakha amaHholo OMbuso amasha noma ukuvuselela abedinga ukulungiswa. Manje kunesidingo esiphuthumayo sokusebenzisa ezinye zalezi zimali ezinikelwe ukuze kutholakale izimali ezizobolekwa amabandla asemazweni ampofu. INhlangano kanye namabandla azuzayo kule minikelo yenu ikwazisa kakhulu ukuqhubeka kwenu nilixhasa leli lungiselelo.”
4 Leso saziso sasiyisimemo sokubamba iqhaza esimisweni esisheshayo sokwakha amaHholo OMbuso. ISikhwama Sokwakha AmaHholo OMbuso sasizonwetshwa sihlanganise nezidingo zabafowethu bakwamanye amazwe, kuyilapho siqhubeka sinikeza izimali ezibolekiswayo zokwakha amaHholo OMbuso e-United States. Isihloko esalandela kuyi-Nkonzo Yethu YoMbuso yase-United States ka-August 1997 sathi: “Kunesidingo esiqhubekayo sokwakha amaHholo OMbuso emhlabeni wonke. Phakathi nonyaka wenkonzo owedlule uwodwa, kumiswe amabandla amasha angu-3 288. Amaningi ala mabandla ase-Afrika, e-Asia, eMelika Ephakathi, eNingizimu Melika, naseMpumalanga Yurophu.”
5 Kuye kwaba namiphi imiphumela kusukela ngaleso sikhathi? INcwadi Yonyaka Ka-2001 yabika: “Ngenxa yaleli lungiselelo, emazweni angu-30 sekwakhiwe amaHholo OMbuso angu-453, kanti amanye angu-727 asakhiwa. Kugcizelelwa ukuba kwenziwe amapulani amaHholo OMbuso akhiwa ngezinto zendawo nangezindlela zokwakha zezwe ngalinye. EKenya, kusetshenziswa amatshe ambiwe enkwalini; eTogo kuvame ukusetshenziswa izitini; eCameroon kusetshenziswa izitini zikakhonkolo, ezibuye zelekwe ngosimende kamuva. Ngale ndlela, abazalwane bendawo basheshe bakwazi ukufunda amakhono abawadingayo ukuze bafeze imisebenzi ebalulekile emsebenzini wokwakha emazweni akubo.”
6 Ubufakazi bokuthi uJehova uyasibusisa lesi simiso bungatholakala ezwekazini lase-Afrika. Njengoba ubheka izithombe zamanye amaHholo OMbuso aye akhiwa, cabanga ngomphumela ukwakhiwa kwawo okuye kwaba nawo emsebenzini woFakazi BakaJehova! Kusobala lokhu ezicini ezintathu ezivelele—ebunyeni bobuzalwane bethu bomhlaba wonke, emphumeleni okube nawo emphakathini wendawo, nasekwandeni kwababa khona emihlanganweni yebandla. Nakuba lesi senezelo siqokomisa amaHholo OMbuso akhiwe e-Afrika, INkonzo Yethu YoMbuso yezinyanga ezizayo iyogxila endleleni isimiso sokwakha amaHholo OMbuso esiqhubekela phambili ngayo kwamanye amazwe omhlaba.
[Izithombe ekhasini 3]
ECENTRAL AFRICAN REPUBLIC
EBimbo, eBangui
EBegoua, eBangui
[Izithombe ekhasini 4]
E-Ukonga, eTanzania
[Isithombe ekhasini 4]
E-Accra, eGhana
[Isithombe ekhasini 4]
ESalala, eLiberia
[Isithombe ekhasini 4]
EKaroi, eZimbabwe
[Izithombe ekhasini 4, 5]
E-Allada, eBenin—iHholo LoMbuso elidala
E-Allada, eBenin—iHholo LoMbuso elisha
[Isithombe ekhasini 5]
EKpeme, eTogo
[Isithombe ekhasini 5]
ESokodé, eTogo
[Izithombe ekhasini 4, 5]
EFidjrosse, eBenin
[Isithombe ekhasini 6]
ELyenga, eZambia—iHholo LoMbuso elidala
[Isithombe ekhasini 6]
ELyenga, eZambia—iHholo LoMbuso elisha
[Isithombe ekhasini 6]
EKinshasa, eCongo
[Isithombe ekhasini 6]
EMusambira, eRwanda