“Qhubekani Nikwenza Lokhu”
ISikhumbuzo Esiyoba Ngo-April 5
1. Kungani sibalulekile iSikhumbuzo?
1 “Qhubekani nikwenza lokhu ningikhumbula.” (Luka 22:19) Ngala mazwi, uJesu wanika abalandeli bakhe umyalo wokuba bakhumbule ukufa kwakhe njengesihlengo. Ngenxa yakho konke okwafezwa yisihlengo, alukho usuku kumaKristu olubaluleke ukwedlula usuku lweSikhumbuzo saminyaka yonke. Njengoba sisondela esalo nyaka ngo-April 5, singakubonisa kanjani ukumbonga kwethu uJehova?—Kol. 3:15.
2. Singakubonisa kanjani ukusazisa kwethu iSikhumbuzo ngokutadisha nangokuzindla?
2 Lungiselela: Sivame ukuzilungiselela izinto esizibheka njengezibalulekile. Izinhliziyo zethu singakwazi ukuzilungiselela iSikhumbuzo ngokutadisha njengomkhaya izenzakalo ezenzeka phakathi nezinsuku zokugcina zikaJesu emhlabeni nangokuzindla ngazo. (Ezra 7:10) Ingxenye ethile yemiBhalo ekhuluma ngazo itholakala ekhalendeni nakwethi Ukuhlola ImiBhalo Nsuku Zonke, kuyilapho uhlu oluphelele oluhambisana nezahluko ezikwethi Umuntu Omkhulu, lutholakala emakhasini 23-24 e-Nqabayokulinda ka-February 1, 2011.
3. Singakubonisa kanjani ukusazisa kwethu iSikhumbuzo ngokwandisa inkonzo yethu enkonzweni?
3 Shumayela: Singabonisa ukwazisa kwethu nangokuhlanganyela ngokugcwele enkonzweni. (Luka 6:45) NgoMgqibelo ka-March 10, kuyobe kuwuSuku Lukamagazini olukhethekile, futhi umkhankaso womhlaba wonke wokumemela abantu eSikhumbuzweni uyoqala ngoMgqibelo, March 17. Ungazihlela yini izimo zakho ukuze uchithe isikhathi esengeziwe enkonzweni, mhlawumbe njengephayona elisizayo? Kungani ningakuxoxi lokhu njengomkhaya ekuKhulekeleni Komkhaya okulandelayo?
4. Iziphi izinzuzo esingazithola ngokuba khona eSikhumbuzweni?
4 Yeka ukuthi sizuza kanjani ngokuhlanganyela eSikhumbuzweni unyaka ngamunye! Injabulo yethu nothando lwethu ngoNkulunkulu kuyakhula njengoba sicabanga ngesandla esivulekile sikaJehova sokuletha iNdodana yakhe ezelwe yodwa ukuba ibe isihlengo. (Joh. 3:16; 1 Joh. 4:9, 10) Lokhu kusishukumisela ukuba singabe sisaziphilela thina. (2 Kor. 5:14, 15) Kuvusa nesifiso kithi sokudumisa uJehova obala. (IHu. 102:19-21) Ngempela, izikhonzi zikaJehova ezinokwazisa zibheke phambili ngokulangazela ethubeni eziyoba nalo ‘lokumemezela ukufa kweNkosi,’ eSikhumbuzweni esiyoba ngo-April 5.—1 Kor. 11:26.