Asibonise Ukwazisa
ISikhumbuzo Esizoba Ngo-April 17
1. Imuphi umuzwa womhubi ofaneleka ngokukhethekile phakathi nenkathi yeSikhumbuzo?
1 Eshukunyiswa izenzo zikaJehova eziningi zomusa nezokusindisa, umhubi wabuza: “Ngizombuyisela ngani uJehova ngazo zonke izinzuzo zakhe kimi?” (IHu. 116:12) Namuhla, izinceku zikaNkulunkulu zinesizathu esengeziwe sokubonga. Ngemva kwamakhulu eminyaka la mazwi aphefumulelwe elotshiwe, uJehova wanikeza isintu isipho esikhulu kunazo zonke—isihlengo. Njengoba silungiselela ukukhumbula ukufa kukaKristu ngo-April 17, sinesizathu esihle sokubonisa ukubonga kwethu.—Kol. 3:15.
2. Iziphi ezinye zezizathu ezisenza sisazise isihlengo?
2 Izibusiso Zesihlengo: Isihlengo sisenza sikwazi ukuthola “ukuthethelelwa kwezono zethu.” (Kol. 1:13, 14) Lokhu kusenza sikwazi ukukhulekela uJehova ngonembeza ohlanzekile. (Heb. 9:13, 14) Singajabulela inkululeko yokukhuluma noJehova lapho sithandaza. (Heb. 4:14-16) Labo ababonisa ukholo esihlengweni banethemba elimangalisayo lokuphila okuphakade!—Joh. 3:16.
3. Singakubonisa kanjani ukwazisa kwethu kuJehova ngesihlengo?
3 Bonisa Ukwazisa: Enye yezindlela esingabonisa ngayo ukwazisa kwethu okujulile, ukufunda izindima zeBhayibheli zenkathi yeSikhumbuzo usuku ngalunye futhi sizindle ngazo. Isihloko se-Nqabayokulinda ka-February 1, 2011, esithi “Ingabe Usululungele Usuku Olubaluleke Kunazo Zonke Onyakeni?” siklanyelwe ukuba sisisize ekwenzeni lokhu. Singathandaza ngokusuka enhliziyweni kuJehova simtshele indlela esisazisa ngayo isihlengo. (1 Thes. 5:17, 18) Ukuba khona kwethu eSikhumbuzweni kuwukulalela umyalo kaJesu nokubonisa ukubonga esinakho. (1 Kor. 11:24, 25) Ngaphezu kwalokho, singalingisa uthando lukaJehova olukhulu ngokumema abaningi ngangokunokwenzeka ukuba babe khona.—Isaya 55:1-3.
4. Yini okufanele sizimisele ukuyenza?
4 Izinceku ezinokwazisa ngoJehova ngeke zibheke iSikhumbuzo njengomunye nje umhlangano ovamile. Siwumhlangano obaluleke kunayo yonke onyakeni! Njengoba iSikhumbuzo sisondela, kwangathi ukuzimisela kwethu kungaba njengokomhubi owabhala: “Mbonge uJehova mphefumulo wami, ungazikhohlwa zonke izenzo zakhe.”—IHu. 103:2.