Ukuthuthukisa Amakhono Ethu Enkonzweni—Ukubonisa Umninikhaya Indlela Yokuqhuba Isifundo SeBhayibheli Ngencwadi Ethi Okufundiswa IBhayibheli

Okwenza Kubaluleke: Abantu abaningi bangase bangaqondi ukuthi sisho ukuthini lapho sicela izifundo zeBhayibheli zamahhala zasekhaya. Bangase bacabange ukuthi kufanele bajoyine iqembu elifundayo noma bafunde ngeposi. Kunokumane ucele isifundo, kungani ungambonisi indlela isifundo esiqhutshwa ngayo? Ngemizuzu embalwa nje, ngisho noma usemnyango, ungakwazi ukubonisa umuntu ukuthi kulula futhi kuzuzisa kanjani ukutadisha iBhayibheli.

Indlela Yokukwenza:

Ngemva kokuzethula, buza umninikhaya ukuthi ukhathazekile yini ngekusasa.
Mtshele ukuthi baningi abakhathazwa into efanayo bese umbonisa uhlu lokuphakathi olusencwadini ethi Okufundiswa IBhayibheli. Mchazele ukuthi le ncwadi inezifundo okulula ukuziqonda ezibonisa lokho okufundiswa iBhayibheli ngekusasa nangezinye izihloko, bese umbuza ukuthi isiphi isihloko asithandayo.
Mnike ikhophi yencwadi bese nivula isihloko asikhethile. Mchazele ukuthi imibuzo esekuqaleni kwesihloko iphendulwa ezigabeni ezilandelayo.
Cela umninikhaya afunde isigaba sokuqala uma ekhululekile ukwenza kanjalo. Buza umbuzo waleso sigaba bese nixoxa ngempendulo ndawonye. Fundani futhi nixoxe ngemiBhalo ekhonjiwe esekela impendulo. Mbonise ukuthi uyidwebele kanjani impendulo encwadini yakho.
Fundani isigaba esilandelayo, kodwa kulokhu cela umninikhaya azame ukuphendula umbuzo ngamazwi akhe.
Mncome, wenze namalungiselelo okuphinde ubuye nizoqedela leso sihloko.
Uma kufaneleka, mbonise i-video ekuyi-jw.org ethi Siqhutshwa Kanjani Isifundo SeBhayibheli?

Zama Lokhu Phakathi Nenyanga:

Thandaza kuJehova umcele abusise imizamo yakho yokuqala isifundo seBhayibheli.—Fil. 2:13.
Zama ukubonisa umninikhaya indlela yokuqhuba isifundo seBhayibheli ngencwadi ethi Okufundiswa IBhayibheli noma ubonise othile i-video ethi Siqhutshwa Kanjani Isifundo SeBhayibheli? okungenani kanye lapho usenkonzweni.