Адемонцәа имцны ирҳәоит: иԥсхьоу аԥсҭазаара иацырҵоит

Абиблиаҿы иҳәоуп Аҩсҭаа адунеи зегь ирҩашьоит ҳәа (Аатра 12:9). Аҩсҭаа идемонцәеи иареи ирҭахӡам ҳара Анцәа Иажәа, Абиблиа, агәра ҳгаларц. Дара рҽазҵәылхны иашьҭоуп ауаа мчыла агәра ддыргарц, иԥсыз џьанаҭ рыԥсҭазаара иацырҵошәа. Уааи еилаҳкаап дара уи шыҟарҵо.

Амц динхаҵара

Ирацәаны адинхаҵарақәа иддырҵоит дарбанзаалак ауаҩы адоуҳатә ԥсҭазаарахь ииасуа аԥсы имоушәа. Урҭ иддырҵоит ацәеижь ԥсыргьы аԥсы аԥсҭазаара иацнаҵоит ҳәа. Уи адагьы, урҭ ишьақәдырӷәӷәоит аԥсы ԥсӡом ҳәа, избанзар уи ԥсра ақәӡам ҳәа ирыԥхьаӡоит.

Аха Анцәа Иажәа иаҳнарҵо зынӡа даҽакуп. Абиблиа иаҳәоит аԥсы — ари ауаҩы ихаҭа иоуп, иҩныҵҟа илоу акы акәым ҳәа. Аҿырԥшы аагозар, Адам дышшаз иазкны Абиблиа иаҳәоит: «Анцәа Иегова ауаҩы асаба далихит, дагьиҿаҭәҳәаны аԥсыԥ лагаҩагаразы аԥсҭазаара ииҭеит, дагьышьақәгылеит ауаҩы зыԥсы ҭоу иакәны» (Аҟазаара 2:7). Абасала, Адам аԥсы имаӡамызт, иара ихаҭа иакәын аԥсы.

Аԥстәқәагьы аԥсқәа ҳәа ирышьҭоуп (Аҟазаара 1:20, 21, 24, 30).

Абиблиатә ажәа «аԥсы» ауаҩы ихаҭа изкуп аҟнытә, ҳара иџьаҳамшьозароуп аԥсцәа ԥсра зқәым шракәым, дара шыԥсуа. Аԥшьаҩыра иаҳәоит:

• «Аԥсы, агәнаҳа ҟазҵо, ԥсуеит» (Иезекииль 18:4).

• «Иагьиҳәеит Самсон: „Ирыцԥсааит сыԥсы филистимаа“» (Аӡбаҩцәа 16:30).

• «Иҟаҵатәузеи асабшаҽны: абзиара акәу, ацәгьара акәу? аԥсы ҿыхтәу, мамзаргьы иҭархатәу?» (Марк 3:4).

Егьырҭ Аҩыра ҭыԥқәа рҿы иаҳәоит аԥсы ақәхра шалшо (Аҟазаара 17:14), а́ҳәала ишушьуа (Иисус Навин 10:37), ишухәаҽуа (Иов 7:15), иагьшӡааурҟәыло (Иона 2:6). Абри алагьы иубоит аԥсы шыԥсуа.

Абиблиа ахы инаркны аҵыхәанӡа уаԥхьар, џьаргьы иуԥылаӡом «имԥсуа аԥсы» ҳәа афраза. Ауаҩы иԥсы доуҳаӡам. Имԥсуа аԥсы иазку аҵара — ари библиатә ҵарам. Ари Аҩсҭаа идемонцәеи иареи иртәу ҵароуп. Иегова ицәымӷуп адинхаҵаратә мцы (Ажәамаанақәа 6:16—19; 1 Тимофеи 4:1, 2).

Аспиритизм знапы алаку амедиумцәа

Ауаа рырҩашьаразы Аҩсҭаа иара убас ихы иаирхәоит амедиумцәа. Амедиум — ари адоуҳатә дунеи аҟынтәи хаҭала аацҳарақәа зауа уаҩуп. Ԥыҭҩык ауаа, дара амедиумцәа рхаҭақәагьы, агәра ргоит арҭ аацҳарақәа иԥсхьоу рдоуҳақәа рҟнытә ишаауа. Аха ҳара Абиблиа аҟнытә ишаҳдырыз ала, ари ҟалашьа амам (Екклезиаст 9:5, 6, 10).

Зҟнытә иаауада нас арҭ аацҳарақәа? Адемонцәа рыҟнытә! Адемонцәа ауаҩы иԥсы анҭаз дырбон, убри азы дара ирдыруеит иара дышцәажәоз, дзеиԥшраз, иҟаиҵоз, иидыруаз. Убри аҟнытә дара рзы иуадаҩӡам иԥсхьоу ауаҩы рыҽиеиԥштәра (1 Самуил 28:3—19).

Имцу ажәабжьқәа

Аҩсҭаа амц дадгылоит, иԥсхьоу ауаа рҭагылазаашьа иазку амц жәабжьқәа ихы иархәаны. Арҭ реиԥш иҟоу аҭоурыхқәа лассы-лассы ауаа абиблиатә ҵабырг иацәдырҟьалоит (2 Тимофеи 4:4).

Африка иԥсхьоу рыԥсы ҭаны ишырбаз иазку аҭоурыхқәа рацәаны еиҭарҳәоит. Еиҳарак урҭ рбон иахьынхоз аҭыԥ иацәыхараны. Аха ухы уазҵаа: ауаҩы иԥсхьоу рдунеи аҟнытә ахынҳәра илшозар, дцарызма иҭаацәеи иҩызцәеи иахьырцәыхароу аҭыԥ ахь?

Уи адагьы, иҟалап ирбаз ауаҩы иԥсыз баша диеиԥшзар. Ҿырԥштәыс иаагозар, ҩыџьа ақьырсиантә маҵзуҩцәа қыҭак аҿы Анцәа иажәабжь шырҳәоз, дгәарҭеит акраамҭа даарыцрымҵӡакәа ирышьҭаз, зықәрахь инеихьаз аӡәы. Еилкаахеит шықәсқәак раԥхьа иԥсхьаз иашьа ажәабжьҳәаҩцәа руаӡәк иоуп ҳәа дшиԥхьаӡаз. Ҳәарада, уи иара иашьа иакәӡамызт, аха ахаҵа ари агәра агара мап ацәикуан. Ухаҿы иааугар улшоит уи ашьҭахь иҩызцәеи игәылацәеи ирзеиҭеиҳәоз!

Абарақәеи, аԥхыӡқәеи, абжьқәеи

Уара иуаҳахьазар акәхап аӡәырҩы абарақәеи, аԥхыӡқәеи, абжьқәеи реиԥш иҟоу уамашәа иубаша ацәырҵрақәа ишрықәшәахьоу. Арҭ реиԥш иааџьоушьартә иҟоу ацәырҵрақәа хымԥада удыршәоит. Мраҭашәаратәи Африка инхо Мареин уахынла лассы-лассы иԥсхьаз ланду лыбжьы лаҳалон, уи лара длыԥхьон. Мареин дшәаны убас дыҳәҳәон, лҭаацәа зегьы лырҿыхон. Аҵыхәтәаны лара лхы еилаԥсеит.

Иԥсхьоу ииашаҵәҟьаны рыԥсҭазаара иацырҵозар, дара бзиа ирбо ауаа дыршәозма? Ҳәарада, мап. Узыршәо арҭ абжьқәа адемонцәа ирхылҵуеит.

Аха ирхуҳәаарц улшозеи ихәарҭоушәа, игәыҟаҵагоушәа иҟоу аацҳарақәа? Ҿырԥштәыс иаагозар, Сьерра-Леоне инхо Гбассаи данычмазаҩха, иԥсхьаз лаб ԥхыӡ дылбеит. Иара илабжьеигеит дцаны ҵлак абӷьыц ҿыхны, аӡаҿы иҟәаҟәаны, нас уи аӡы аҵхны илжәырц. Убраанӡа уи аӡәгьы диацәажәар ҟаломызт. Лара убас егьыҟалҵеит, иаарласынгьы дыбзиахеит.

Даҽа ԥҳәыск еиҭалҳәон лхаҵа данԥсы адырҩауха дшылбаз. Лара лажәақәа рыла, иара ишәын амаҭәа ԥшӡа, иҭеиҭыԥшгьы бзиан.

Арҭ реиԥш иҟоу аацҳарақәеи абарақәеи цәгьара рыҵамшәа, уи акәым, ихәарҭоушәагьы убоит. Анцәа иҟнытә иаауама дара? Мап! Иегова — «аҵабырг Нцәа» иоуп (Аԥсалом 30:6 [31:5, АдҾ]). Уи ахаангьы ҳаижьарц, мамзаргьы ҳирҩашьарц далагом. Ус ҟазҵар зылшо адемонцәа заҵәык роуп.

Иҟоума иқьиоу адемонцәа? Мап. Зны-зынла урҭ уцхраауашәа убаргьы, дара зегьы цәгьақәоуп. Аҩсҭаа Ева данлацәажәоз, уи даара иҽырхааны дыҟан (Аҟазаара 3:1). Аха иҟалазеи, лара иара данизыӡырҩ, насгьы илыдигалаз аныҟалҵа ашьҭахь? Лара дыԥсит.

Иумдыруеи уара, ицәгьоу ауаҩы амц иҳәарц, мамзаргьы аӡәы дирҩашьарц аниҭаху, хымԥада иара дҩыза бзианы иҽшыҟаиҵо. Африкатәи ажәаԥҟа иаҳәоит: «Ахаԥыц шкәакәа — агәы еиқәаҵәа». Анцәа Иажәа агәҽанызаара ҳнаҭоит «Аҩысҭаа ихаҭа Амаалықь-лаша исахьа исахьатәны» дцәырҵуеит ҳәа (2 Коринфаа 11:14).

Анцәа уаҳа ауаа ирзааишьҭӡом адоуҳатә дунеи аҟнытә ԥхыӡла, барала, бжьыла аацҳарақәа. Иара ауаа мҩақәиҵоит «аус бзиақәа, аус хирқәа» ҳрызхианы ҳҟазҵо Абиблиа ала (2 Тимофеи 3:17).

Убри азы Аҩсҭаа ишьацҳәақәа ҳарцәыхьчауа, Иегова ҳара ҳахь абзиабара ааирԥшуеит. Иара идыруеит адемонцәа ишәарҭоу аӷацәа шракәу.