«Шәхымҩаԥгашьа егьырҭ ажәларқәа рҿаԥхьа анаҩсгьы иҿырԥшыгаз»

1. Избан аобласттә конгресс аан ҳхымҩаԥгашьа зҿырԥшыгазар акәу?

¹ Есышықәса аобласттә конгрессқәа рзы ҳанеизо ҳара ауаа ҳахәаԥшуеит, убри аҟнытә даара ихадоуп ҳхымҩаԥгашьа ианырлар дарбан Нцәоу ҳара ҳзымҵахырхәо (Алев. 20:26). Ҳара ҳхымҩаԥгашьеи, ҳаилаҳәашьеи, ҳҭеиҭыԥши рыла ҳардыруазар ауп ииашоу Христос ишьҭанеицәа шҳакәу. Ишԥаҳалшо ҳара аобласттә конгресс аан анаҩстәи ажәақәа: «Шәхымҩаԥгашьа егьырҭ ажәларқәа рҿаԥхьа анаҩсгьы иҿырԥшыгаз» рықәныҟәара,— убри алагьы жәҩантәи ҳ-Аб ирҳаракра? (1 Пиот. 2:12).

2. Ишԥаилшо аконгресс анымҩаԥысуа аамҭазы ақьырсиан иқәнагоу аҟазшьа бзиақәа раарԥшра?

² Ақьырсиан иқәнагоу аҟазшьақәа аашәырԥшла. Ҳабжьара иааҳарԥшуа абзиабара, насгьы «адәныҟатәқәа» ҳшырзыҟоу ари адунеи аҿы иҟоу ахымҩаԥгашьа зынӡаск еиԥшӡам (Кәал. 3:10; 4:5; 2 Тим. 3:1—5). Ҳара ақьиареи ачҳареи ааҳарԥшлароуп асасааирҭақәеи, акаҳуажәырҭақәеи, аресторанқәеи рҿы аус зуа рахь, уадаҩрақәак цәырҵуазаргьы. Ҳара ахымҩаԥгашьа бзиа ааҳарԥшуеит амаҵ ҳзызуа излаҳалшо ала хәыҷӡак аԥара рзаанҳажьлар.

3. Ирыхәҭоузеи аҭаацәа ирхадмыршҭларц, насгьы избан?

³ Аҭаацәа рхәыҷқәа ирхылаԥшлар рыхәҭоуп аконгресси, аресторанқәеи, насгьы асасааирҭеи рҿы (Ажәам. 29:15). Асасааирҭаҿы иҟоу аресторан аменеджер хаҵеи-ԥҳәыси убас ралҳәеит: «Ҳара даараӡа бзиа шәаҳбоит! Шәхәыҷқәеи шәареи шәцәажәашьа, шәааӡашьа убарҭоуп. Аус ҳацызуа зегьы шәыӡбахә бзианы ирҳәоит. Ҳара даара ҳаигәырӷьон аԥсшьарамшқәа раан ҳара ҳҿы шәыԥсы шәшьалозҭгьы».

4. Изеиԥшразар акәузеи ҳара ҳҭеиҭыԥш аконгресс анымҩаԥысуа аан?

⁴ Иӡыргацәам амаҭәа. Аконгресс анымҩаԥысуа ҳара иӡыргацәамкәа иҟоу ари адунеи адоуҳа знымԥшуа маҭәала ҳаилаҳәазар ҳахәҭоуп (1 Тим. 2:9). Асасааирҭаҿы ҳҽанҭаҳаҩуа, ҳҽанҭаҳго, насгьы аконгресс анымҩаԥымсуа аан ҳаԥсы анаҳшьо, ҳара ишабалак, ҳаиҿкааӡамкәа ҳҽеилаҳҳәаӡом. Усҟан ҳара ҳаҭырбарала иныҟәаҳгоит ҳаԥхьа иаҳҭо аплакетка, ҳагьыԥхашьаӡом алшара анҳауа ашаҳаҭра аҭара. 2014 шықәсазтәи аобласттә конгресс аан ҳара ҳҭеиҭыԥши ҳхымҩаԥгашьеи гәык-ԥсык ала иҟоу ауаа хьанарԥшуеит Абиблиа иану аиқәырхаратә жәабжь ахь, иара убасгьы Иегова даргәырӷьоит (Соф. 3:17).

2014 шықәсазтәи аконгресс иазку агәаларшәарақәа

◼ Аконгресс аихшанҵа. Апрограмма есҽны иалагалоит 9:20. Агәашә аартызаауеит асааҭ 8:00 инаркны. Амузыка шыҟало иазкны алаҳәара аныҟарҵалак, зегьы рҭыԥқәа ааныркылар рыхәҭоуп, апрограмма ишақәнагоу еиԥш иалагарц. Ахәашеи асабшеи аҵыхәтәантәи ашәеи анцәаиҳәареи ҟалоит асааҭ 16:55 рзы, амҽышаҽны — 15:50 рзы.

◼ Жәларбжьаратәи аконгрессқәа. Ҳәынҭқаррақәак рҿы имҩаԥыслоит жәларбжьаратәи аконгрессқәа. Иаҳгәалашәозар ахәҭоуп афилиалқәа ибзиаӡаны ишазхәыцыз шаҟа еизара, насгьы атәым тәылақәа рҟынтә шаҟаҩык аделегатцәа аарыԥхьаша, атәарҭеи, амашьынақәа рыргыларҭеи, асасааирҭа ҭыԥқәеи инарызхәыцны. Абарҭқәа зегьы азымхар ҟалоит, жәларбжьаратәи аконгрессқәа рахь ааԥхьара змам ауаа цар. Уара ааԥхьара ахьуҭоу аобласттә конгресс ахь узымцозар, иаԥсам жәларбжьаратәи аконгресс ахь адәықәлара.

◼ Амашьынақәа рыргыларҭа. Аконгрессқәа ахьымҩаԥысуа аҭыԥқәа рҿы иахьынӡазалшо ала хәыда-ԥсада амашьынақәа рыргыларҭа ҭыԥқәа рхиазаауеит. Амашьына аргылара ҟалоит ушнеилак иҭацәу ҭыԥк аҿы. Аҭыԥқәа еснагь иахьмаҷу иахҟьаны, ибзиахон аделегатцәа иахьынӡазалшо ала машьынак ала еицны инеилар. Аинвалидцәа рмашьынақәа рзы хазы аҭыԥ алхуп, рмашьына иахәҭоу арбага амазар.

◼ Атәарҭа ҭыԥқәа. Агәашәқәа анаадыртуа, ҳуҳәоит уахымыццакын зегь иреиӷьу аҭыԥ аанкылара, егьырҭ урацлабуазшәа. Ҳхамеигӡара ҳгәазҭанаҵар ахәҭоуп егьырҭ реиҷаҳара. Уи ҳара ииашоу ақьырсианцәа реиԥш ҳалнакаауеит, насгьы ҳхымҩаԥгашьа иацклаԥшуа ауаа Анцәа ирҳаракра ргәазҭанаҵоит. (Иоан. 13:34, 35; 1 Кор. 13:4, 5; 1 Пиот. 2:12). Аҭыԥқәа раанкылара ҟалоит машьынак аҿы иуцааз, уҭаацәа, мамзаргьы Абиблиа зурҵо рзы. Аинвалидцәа, ма зықәрахь инеихьоу ауаа, хазы ирзалхзаауеит аҭыԥқәа. Урҭ ахьмаҷу иахҟьаны, аинвалидцәа ирыдтәалар ҟалоит ирхылаԥшуа аӡәы ма ҩыџьа.

◼ Шьыбжьхьа. Уара шьыбжьон аконгресс аҟынтә џьаргьы ацара уқәымшәарц, шьыбжьхьа шьҭых. Иуҭахызар иугар улшоит идуум аҵааршәыга-сумка, аҟәардә иузыҵаргылартә еиԥш. Даара идуу аҵааршәыга-сумка, ма асаркьа иалху ачысмаҭәа аконгресс ахь анагара ҟалаӡом.

◼ Хатәгәаԥхарала аҭара. Ҳара аконгресс аиҿкааразы аџьшьара ааҳарԥшыр ҳалшоит хатәгәаԥхарала аҭара ҟаҳҵозар, адунеизегьтәи аус ахь ҳ-Аҳратә Зал, ма аконгресс аҿы.

◼ Ахәшә. Аҳақьым иузылиҩааз ахәшәқәа удукылозар, ҳуҳәоит урҭ ргара ухоумыршҭын, избанзар аконгресс аҿы урҭ ахәшәқәа ҟалаӡом. Аинсулинтә шприцқәеи агәырқәеи — ари ишәарҭоу гәам-самуп, убри аҟынтә аконгресс ахьымҩаԥысуа аҭыԥқәа рҿы аурнақәа рҭажьра ҟалом, иара убас асасааирҭа ҭыԥқәа рҿгьы.

◼ Ашәарҭадаратә уснагӡатәқәа. Еиҳараӡак агәҽанызаара аарԥшлатәуп ҳанныҟәо ааха ҳмоурц, избанзар иҟоуп иахьыҵәырҵәыруа, иахьҭаҟәаҭаҿароу. Есышықәса ашьапымаҭәа иахҟьаны аахақәа зауа ҟалоит, еиҳараӡак аимаа ашьхәа ахьыҳараку азы. Ашьапымаҭәа ӡыргацәамкәа иҟазар ауп, аҭагылазаашьа инақәыршәаны, убасҟан ауп ақәныҟәара аныманшәалахо, еиҳараӡак амардуанқәа рҿы, ма аихацқәа ахьышьҭоу уҳәа убас иҵегьы.

◼ Ахәыҷтәы кәырҷыжьи еиҵало аҟәардәқәеи. Аконгресс ахьымҩаԥысуа аҭыԥқәа рахь рнагара ҟалаӡом ахәыҷтәы кәырҷыжьқәеи еиҵало аҟәардәқәеи. Аха азин ыҟоуп ахәыҷы иҭариага анагара, аҭаацәа рывараҿы аҟәардә ақәыргыларазы.

◼ Апарфиумериа. Иахьатәи аамҭазы аконгрессқәа реиҳарак аҳауеиҭныԥсахлара ахьмаҷу иарку ахыбрақәа рҟны имҩаԥысуеит. Убри аҟынтә егьырҭ рахь абзиабара аарԥшуа, мыцхәы зыфҩы ӷәӷәоу апарфиумериа ирмаҷны ҳхы иаҳархәар ауп. Уи ареспиратортә чымазара змоу, насгьы згәабзиара ҽеим ауаа ирԥырхагахар алшоит (1 Кор. 10:24).

◼ Абланкқәа «Ҳуҳәоит, ари ауаҩы уиҭаа» (S-43). Аконгресс аҿы ауаҩы иформалтәым ашаҳаҭра ухы иархәаны ажәабжь аниауҳәоз аинтерес ааирԥшызар, абланк (S-43) ухы иархәаны аацҳара ҟаҵа. Ихарҭәаау абланкқәа рыҭатәуп алитературатә ҟәшахьы, ма аконгресс аҟынтә уаныхынҳәлак уеизара амаӡаныҟәгаҩ иуҭар улшоит.

◼ Акаҳуажәырҭақәеи аресторанқәеи. Акаҳуажәырҭақәеи аресторанқәеи рҿы уаныҟоу, ухымҩаԥгашьа бзиала Иегова ихьӡ ырҳаракла. Ақьырсиантә маҵзуҩы ишиқәнаго еиԥш уҽеилаҳәала. Ус иаԥҵазар, ахәынаҳаҩ иацҵаны аԥара изныжь.

◼ Асасааирҭақәа.

Ауадақәа мыцхәы аанумкылан, насгьы ауада ирацәаҩны шәыҩнамлан, уи аҩыза азин ыҟамзар.
Узқәымгәыӷуа ҭагылазаашьак уақәымшәакәа, ауада мап ацәумкын. Ус ҟалазар, иахьынӡазалшо ала асасааирҭахь заа аацҳара дәықәҵа, егьырҭ уи ауада аҩналара иахьӡарц (Матф. 5:37). Ауада мап ацәукзар, уи зыршаҳаҭуа аномер шурҭаз ала агәра га. Асасааирҭаҿы ауада аҩналара 48 сааҭ шыбжьоу мап ацәукзар, аԥара узыргьежьхаӡом.
Асасааирҭаҿы аҽҭаҩраан акредиттә ма адебетортә харҭәаабӷьыцқәа зхы иазырхәо рзы азгәаҭа: ишаԥу еиԥш асасааирҭа ахарҭәаабӷьыц аҿы аԥара ааннакылоит ауада аанкылараан, иҟалап ауада ааха аиузар ма даҽа ҭагылазаашьак уақәшәазар ахә злахушәаауа умазарц. Асасааирҭа аҟынтәи уанцалак мышқәак рышьҭахь шәеилгаанӡа, уара арҭ аԥарақәа ухы иузархәаӡом.
Акәырҷыжь угар улшоит убагаж аиҭагаразы ихиазар, анаҩс иаразнак иганы аҭыԥахь иргыл егьырҭ рхы иадырхәарц азы.
Ус иаԥызар, асасааирҭа амаҵзуҩцәа убагаж анаарго, ма ууада анеилдырго, аԥара рыҭ.
Афатә ҟаҵала уи аҭыԥ ахьазалху мацараҿы.
Цәгьашақә ухы иаумырхәалан амалаҳәа иурҭо шьыжьхьа, акаҳуа, ма аҵаа — ари алшара ухы иаурхәар ауеит асасааирҭаҿы уҟазар. Иаԥсаӡам шьыжьхьа аҟынтәи афатә аконгресс ахь агара.
Еснагь асасааирҭа аусзуҩцәа уанрацәажәо, аҟазшьа бзиақәа аарԥшла. Дара ауаа рацәа рымаҵ руеит, убри аҟынтә иааурԥшуа ақьиареи, ачҳареи, аҟәыӷареи пату рзақәуп.
Аҭаацәа рхәыҷқәа еснагь ирхылаԥшлар рыхәҭоуп асасааирҭаҿы иҟанаҵ, иаҳҳәап алифт, абассеин, авестибиуль, аспорттә зал аҿы уҳәа убас иҵегьы.
«Иудыргало анхарҭа ҭыԥқәа реиқәыԥхьаӡа» аҿы иаагоуп уахык ауада шаҟа иаԥсоу. Заа инумкылаз, ма ухы иаумырхәаз азы иацны ахә ахушәаарц удыргалозар мап ацәкы, насгьы иахьынӡазалшо ала заа аацҳара рыҭ уи азҵаара аус адызуло аишьцәа.
Асасааирҭатә уада иадҳәалоу ауадаҩрақәа зегьы иаразнак уи азҵаара аус адызуло аишьцәа ираҳәала.

◼ Хатәгәаԥхаралатәи амаҵзура аҟәша. Ацхыраара аҟаҵара зҭаху зегьы хатәгәаԥхаралатәи амаҵзура аҟәшахьы инеир рылшоит. Ахәыҷқәагьы ирылшо ахәыҷы ҟарҵар ҟалоит ран ма раб, ма ахәыҷы ихылаԥшра аҭаацәа азин зырҭаз аӡәы дицзар.