Аԥааимбарцәа рҟынтә аҿырԥшы жәгала. Наум
1. Еилаҳкаауазеи ҳара Наум ишәҟәы аҟынтәи?
1 Еилаԥыххааса иҟоу ажәытәтәи Ниневиа ишьақәнарӷәӷәоит Наум Иегова иаӷацәа ирызкны заа ишиҳәахьаз еиԥш, Иегова ишьа шиуа, насгьы иара иҿаԥхьа даара игәымбылџьбароугьы акгьы шрылымшо (Наум 1:2, 6). Наум иԥааимбаражәа еилҳаргар, ҳмаҵзура иахәаша рацәаны иаҳнарҵоит.
2. Ишԥарыдгалатәу аҵабырг ауаа ргәы канамыжьыртә еиԥш?
2 Агәыӷра рышәҭала, ргәы ҟашәҵала. Наум ишәҟәы уанаԥхьо, раԥхьа агәаанагара узцәырҵыр алшоит аԥагьара аазырԥшуаз ажәытәтәи Ассириа аҳҭнықалақь Ниневиа ақәӡаара иазку ажәабжь мацара ауп ара иану ҳәа (Наум 1:1; 3:7). Аха Иегова ижәлар рзы ари гәырӷьажәабжьын. Наум, зыхьӡ «агәыҟаҵаҩ» аа́наго, дызланхоз ижәлар иаарласны раӷа дшықәххо ала агәра диргон. Иара убасгьы иргәалаиршәон Иегова — «арыцҳара амш аҽны узықәгәыӷуа» шиакәу (Наум 1:7). Ҳаргьы ажәабжьҳәараан ауаа ргәы шьҭызхуа ажәабжь рзеиҭаҳҳәоит, Иегова иҿы аҽыҵәахырҭа аԥшаара ргәазҭаҳҵоит (Наум 1:15).
3. Ишԥаҳалшо ҳара, Наум иеиԥш, аҿырԥштәқәа ҳхы иаҳархәалар?
3 Аҿырԥштәқәа шәхы иашәырхәала. Иегова Наум игәазҭеиҵеит Ниневиа ахыбгалара Ассириаа иқәырхыз мсыртәи ақалақь Фива (Но-Аммон) ахыбгалара иаҿирԥшырц (Наум 3:8—10). Ҳара ицқьам ари асистема ақәӡаара атәы ауаа ианырзеиҭаҳҳәо, иазхьаҳарԥшыр ҳалшоит Иегова иқәыргәыӷрақәа инҭкааны ишынаигӡо шьақәзырӷәӷәо абиблиатә ԥааимбаражәақәа. Иаҳҳәап, 632 шықәсазы ҳ.ҟ. вавилонааи мидиааи ақалақь Ниневиа ианакәша, икыдҵәаны илеиуаз ақәа иахҟьаны аӡиас Тигр анхыҵ, ззааигәахара цәгьаз ақалақь аҭӡамцқәа џьара-џьара еилаҳаит. Уи ашьҭахь Ниневиа иаарласӡаны рнапахьы иааргоит, Иегова заа ишиҳәахьаз еиԥш (Наум 1:8; 2:6).
4. Ишԥаҳалшо амаҵзураҿы еилыкка ацәажәара?
4 Еилыкка ишәҳәала. Наум ишәҟәы исахьарку астиль ала иҩуп. Аԥааимбар ихадоу азхәыцрақәа еилукаартә иҳәеит (Наум 1:14; 3:1). Ҳаргьы ауаа ирзеилкаауа ажәақәа ҳхы иаҳархәарц ҳҭахуп (1 Кор. 14:9). Раԥхьаӡа акәны уаннеиуа, узааз иаразнак иҳәа. Ауаҩы Абиблиа аҵара уанизахысуа, Иеговеи иара Иажәеи рахь агәрахаҵара еизирҳаларц, насгьы иоуз адыррақәа ихы ишаирхәаша еиликааларц уицхраала (Рим. 10:14).
5. Зыгәра ҳнаргозеи ҳара Наум иԥааимбаражәа?
5 Наум ишәҟәаҿы иаҵшьуп аԥааимбар Иегова иажәақәа хымԥада ишынаӡо агәра ганы дшыҟоу. Аҩсҭаа исистема аҵыхәтәа ааигәахара ианаҿу аамҭазы, ҳара даараӡа ҳгәы ҟанаҵоит Анцәа иажәақәа: «Уаҳа иҟалаӡом арыцҳара» (Наум 1:9).