2015 шықәсазы Атеократиатә маҵзура ашкол аҟазара змоу арҵаҩцәа ҳакәны аҟалара иҳацхраауеит

¹ Аԥсаломшәаҳәаҩ Давид иҩуан: «Сажәақәеи сыгәҭахәыцрақәеи уара иугәаԥхалааит, о Иегова, сара Сыцаҟьа, сара Сҿыхҩы» (Ԥс. 19:14). Ҳаргьы иаҳҭахуп ҳажәақәа Иегова игәаԥхаларц, избанзар ҳара ахә ҳаракны иаҳшьоит аизараҿы, насгьы ажәабжьҳәараҿы аҵабырг атәы ахьаҳҳәо. Иегова ажәабжьҳәара ҳазыҟаиҵоит, иаҳҳәап, Атеократиатә маҵзура ашкол ацхыраарала. Ари ашкол аҿы арҵара мҩаԥысуеит есымчыбжьа, адунеи зегь аҿы 111 000 раасҭа еиҳаны аизарақәа рҟны. Уи иазыҟанаҵеит еиуеиԥшым ахылҵшьҭра змоу аишьцәеи аиаҳәшьцәеи ажәабжь бзиа аиҭаҳәара, насгьы ауаа агәра дырганы, аҳаҭырбареи агәымшәареи аарԥшны дырҵашьа (Аус. 19:8; Кәал. 4:6).

² Ашкол 2015 шықәсазтәи апрограммаҿы ианылоит аброшиура «Анцәа Иажәа раԥхьатәи абадырра», насгьы аусумҭа «Аҩыра Аилкаара» рҟынтә атемақәа. Уи адагьы, иԥсаххоит Абиблиа аҟынтә ихархәагоу азхәыцрақәа, насгьы адҵа №1 ирзалху аамҭа. Еиҳа инарҭбааны арҭ аԥсахрақәа, насгьы апунктқәа рымҩаԥгашьа ҵаҟа ҳахцәажәоит.

³ Абиблиа аҟынтә ихархәагоу азхәыцрақәа. Ари адҵа зду аиашьа амчыбжь азы Абиблиа аԥхьаразы иазалху аинтерес зҵоу зхәыцрак дахцәажәарц азы, имазаауеит ҩ-минуҭк. Ибзианы иҽазыҟаиҵар, иара илшоит иазалху аамҭа иҽалагӡаны, акрызҵазкуа азхәыцрақәа дрылацәажәар. Анаҩс аизара иалахәу, ишаԥу еиԥш, ирымазаауеит ф-минуҭк, доусы 30 секунд, ма еиҵаны рыла амчыбжь азы Абиблиа аԥхьара иазалху аинтерес зҵоу азхәыцрақәа ирылацәажәарц. 30 секунд рыла аҵакы змоу аҭак аҭаразы, иаҭахуп ибзианы аҽазыҟаҵареи адисциплинеи, уи ҳара ҳзы ҽаршьцылара бзиоуп. Иара убас, ҳара алшара раҳҭоит егьырҭ зҽазыҟазҵазгьы иҭырҵааз аҳәара́.

⁴ Адҵа №1. Абиблиа аԥхьара иазалху аамҭа еиҵахоит х-минуҭк рҟынӡа, ма еиҵаны, насгьы изыԥхьатәу ацыԥҵәаха еиҳа икьаҿхоит. Уи адҵа зду рыбжьы ҭганы акырынтә заа иаԥхьароуп, ҷыдала иазнеилароуп ииашаны, ирццакны аԥхьара, азхәыцрақәа ииашаны еилыркаарц азы. Иегова ижәлар зегьы рҽазыршәалароуп ибзианы аԥхьара, избанзар уи Анцәа имҵахырхәараҿы даара ихадоуп. Шаҟа угәы иахәозеи, ҳхәыҷқәа реиҳараҩык ибзианы аԥхьашьа ахьырдыруа! Уи аганахь ала бзиабарала зхәыҷқәа ирыцхраауа аҭаацәа арҽхәара иаԥсоуп.

⁵ Адҵа №2. Хә-минуҭк рыла инагӡатәу ари адҵа аиаҳәшьа илыдҵатәуп. Лара илыду атема лхы иалырхәароуп. Аброшиура «Анцәа Иажәа раԥхьатәи абадырра» уи адҵа шьаҭас иамазар, аматериал ажәабжьҳәара хкык иадҳәалатәуп, уи амаҵзураҿы ахархәаразы. Адҵа «Аҩыра аилкаара» аҿы зыӡбахә ану абиблиатә персонаж изкызар, аиаҳәшьа уи ихьӡ зызку астатиа даԥхьароуп, иақәшәо ажәеинраалақәа лхы иархәаны, иаалырԥшыроуп уи аперсонаж иҿырԥшы иаҳнарҵо. Иара убас, лхы иалырхәар ҟалоит атема иадҳәалоу егьырҭ ажәеинраалақәа. Ашкол ахылаԥшҩы цхырааҩс даҽа иаҳәшьак длиҭоит.

⁶ Адҵа №3. Хә-минуҭк рыла инагӡатәу ари адҵа аиашьа, ма аиаҳәшьа ирыдҵатәуп. Уи аиаҳәшьа ианлыдырҵо, адҵа № 2 еиԥш инагӡатәуп. Ари адҵа аиашьа ианидырҵо, уи аматериал — ашәҟәы «Аҩыра аилкаара» шьаҭас иамазар — аӡырҩцәа рахь ирхоу ажәахә еиԥш инагӡатәуп. Адҵа зду иақәшәо ажәеинраалақәа ихы иархәаны, атема ааиртыроуп, иааирԥшыроуп абиблиатә персонаж иҿырԥшы иаҳнарҵо.

⁷ Аишьцәа рзы иҟоу адҵа №3 аҿы иҿыцу аҷыдара. Аиашьа аброшиура «Анцәа Иажәа раԥхьатәи абадырра» шьаҭас измоу аматериал ани́дырҵо, иара иалихроуп аҭаацәаратә мҵахырхәара, ма ажәабжьҳәаратә маҵзура аазырԥшуа аҭагылазаашьа. Ишаԥу еиԥш, Ашкол ахылаԥшҩы иоуп иалызхуа ацхырааҩи аҭагылазаашьеи. Цхырааҩс дыҟазароуп иҭаацәа руаӡәк, ма аизара аҟынтә иашьак. Иара убас, ухы иаурхәар ҟалоит атема иадҳәалоу абиблиатә принципқәа бзианы иаазырԥшуа егьырҭ ажәеинраалақәа. Зны-зынла ари аҩыза адҵа аизара аиҳабы идырҵаргьы ҟалоит. Иара ихала иалихыр илшоит ииҭаху ацхырааҩи аҭагылазаашьеи. Ҳәарада, аизара иалахәу рзы ихәарҭахо́ит аизара аиҳабы ирҵаратә ҟазара ахьыдирбо аиашьа, ма иҭаацәа аҵара дырҵауа.

⁸ Алабжьара. Адҵақәа назыгӡоз анықәгылалак ашьҭахь, Ашкол ахылаԥшҩы имоуп ҩ-минуҭк, иқәгылаз гәык-ԥсыкала ирҽхәарц, насгьы ашәҟәы «Атеократиатә маҵзура ашкол аҿы аҵара ҳҵоит» аҟынтә алабжьара риҭарц. Ашкол ахылаԥшҩы иқәгыло идҵа анрылеиҳәо, уи аус здиулоз аурок далацәажәаӡом. Аха адҵа змаз иқәгылара даналгалак ашьҭахь, Ашкол ахылаԥшҩы иқәгылаз дырҽхәаны, уи аус здиулоз аурок ахьӡ иҳәоит, насгьы аӡырҩцәа идеилиркаауеит иқәгылаз аурок анагӡара ицхрааз, мамзаргьы хаала иҳәоит уи аурок анаҩсгьы аус адулара заҭаху.

⁹ Арҵаратә бланк уԥшаар улшоит ашәҟәы «Амаҵзура ашкол» адаҟьақәа 79—81 рҟны, уи ашәҟәы аизараҿы иқәгыло зегьы ирымоуп. Адҵа назыгӡо даналгалак, Ашкол ахылаԥшҩы ашәҟәаҿы иахәҭоу азгәаҭақәа ҟаиҵоит, насгьы хаҭала диазҵаауеит аурок иадҳәалоу аҽаршьцылара наигӡоу-инаимыгӡоу. Иқәгылоз ирҽхәара, насгьы алабжьарақәа иҭара ҟалоит аизара ашьҭахь, ма даҽазны. Ашкол ахылаԥшҩы иқәгылаз иахь хаҭалатәи азҿлымҳара анааирԥшуа, уи ацхыраара ду ииҭоит доуҳала иеизҳараҿы (1 Тим. 4:15).

¹⁰ Адҵа зманы иқәгылаз иазалху аамҭа дахыԥазар, Ашкол ахылаԥшҩы, ма ицхырааҩ адырга ииҭароуп. Иаҳҳәап, иара илшоит аҵәҵәа дасыр, ма даҽакала иирбар аамҭа дшахыԥаз. Иқәгыло аҳәоу нагӡаны, асцена аҟнытә дцароуп. (Уахә. ашәҟәы «Амаҵзура ашкол», ад. 282, абз 4.)

¹¹ Ҳара ргәазҭаҳҵоит аҭахрақәа ирықәшәо зегьы Атеократиатә маҵзура ашкол рыҽҭарҩырц. (Уахә. ашәҟәы «Амаҵзура ашкол», ад. 282, абз 6.) Ари Ашкол имҩаԥнаго арҵара абзоурала, Иегова иуаажәлар Аҳра иазку ажәабжь бзиа ауаа ирыларҳәоит гәрагарала, насгьы апатуқәҵареи абзиабареи аарԥшуа. Ҳәарада, Иегова игәы иахәоит Атеократиатә маҵзура ашкол аҿы аҵара зҵо зегьы ихьӡ ахьыҳараркуа! (Ԥс. 148:12, 13; Ис. 50:4).