АҴАРАЗЫ АСТАТИА 42
Шәрыцхраала Абиблиа зшәырҵо аҽӡаахра аҽазыҟаҵара (аҩбатәи ахәҭа)
«Еснагь ухы уацклаԥшла, насгьы егьырҭ ишыдурҵо гәаҭала» (1 ТИМ. 4:16, АдҾ).
АШӘА 77 Илашьцоу адунеи аҟны алашара
АХҲӘААa
1. Избан иаҳҳәар зҳалшо аҵаҩцәа разыҟаҵара аус ауаа рыԥсҭазаара еиқәнархоит ҳәа?
АҴАҨЦӘА разыҟаҵара — ауаа рыԥсҭазаара еиқәзырхо усуп! Избан ус ҳҳәар зҳалшо? Иисус иҵаҩцәа Матфеи 28:19, 20 иану адҵа анриҭоз иҳәеит: «Шәца... исҵаҩцәаны иҟашәҵа... иӡаашәхла». Шаҟа ихадоузеи аҽӡаахра? Ҳара наунагӡа ҳанхаларц ҳҭахызар, ҳаҽӡааҳхроуп. Зыҽӡаазхыр зҭаху ауаҩы агәра игозар ауп Христос ҳагәнаҳақәа рзы дымԥсызҭгьы, насгьы иԥсы мҭалазҭгьы наунагӡатәи аԥсҭазаара шаҳмоуаз. Убри азоуп апостол Пиотр ақьырсианцәа изреиҳәаз аӡӡаахра Иисус Христос иԥсҭалара абзоурала шәеиқәнархоит ҳәа (1 Пиотр 3:21). Ус анакәха, ауаҩы иҽанӡааихлак, аиқәхара мҩа данылоит.
2. Ҳгәы зызҭанаҵозеи рҵаҩцәак раҳасабала 2 Тимофеи иахь 4:1, 2 иану?
2 Аҵаҩцәа азыҟаҳҵаларц азы ҳара ҳарҵаратә ҟазара еиӷьаҳтәлароуп. (Шәаԥхьа 2 Тимофеи иахь 4:1, 2.) Избан? Избанзар Иисус иҳадиҵеит: «Шәца... исҵаҩцәаны иҟашәҵа... идшәырҵала». Апостол Павел Тимофеи иеиҳәеит «уҽадцаланы уи уаҿыз, усҟан ухгьы иузыӡырҩуагьы еиқәурхоит» ҳәа. Анаҩс иациҵеит: «Еснагь... егьырҭ ишыдурҵо гәаҭала» (1 Тим. 4:16, АдҾ). Аҵаҩцәа азыҟаҳҵаларц азы ҳара арҵаратә ус аҿы ҳҟазара еиӷьаҳтәлароуп.
3. Еилҳаргозеи ари астатиаҿы?
3 Адунеи ахьынӡанаӡааӡо ҳара миллионла абиблиатә ҵарақәа мҩаԥаҳгоит. Ҳазхысыз астатиаҿы ишҳәаз еиԥш, ҳара иаҳдыруазар ҳҭахуп Абиблиа зҳарҵо иӡааху Христос иҵаҩцәа ракәны иҟаларц азы ҳашрыцхрааша. Ари астатиаҿы еилҳаргоит Абиблиа зҳарҵо аҽӡаахра ргәазҭаҳҵарц азы иҵегьы иҟаҳҵар ҳалшо хә-шьаҿак.
АБИБЛИА АЦӘАЖӘАРАЗЫ АЛШАРА АШӘҬ
Шәиҳәа аԥышәа змоу ажәабжьҳәаҩ абиблиатә ҵара анымҩаԥыжәго Абиблиа еиӷьны ахархәашьа шәирҵарц. (Шәрыхәаԥш абзацқәа 4—6.)f
4. Изихәҭоузеи абиблиатә ҵара мҩаԥызго аҽынкылара аарԥшра? (Шәахәаԥш албаага.)
4 Ҳара Анцәа Иажәа иану аҵабырг бзиа иаҳбоит. Бзиа иаҳбо акы ҳааҟәымҵӡакәа ҳалацәажәалар ҳалшоит. Аха имҩаԥаҳго «Ахьчаратә бааш» аҵара акәзаргьы, аизараҿы Абиблиа аҵара акәзаргьы, абиблиатә ҵара акәзаргьы, амцхә ҳамцәажәалароуп. Арҵаҩцәа раҳасабала, ҳара ауаа аҵабырг андҳарҵо Абиблиа ҟазарала ҳхы иаҳархәалар ҳҭахуп. Убри азы Абиблиа иану жәеинраалак ма темак иазкны иааҳдыруа зегьы аиҭаҳәара ҳаламгарц азы ҳаҽнаҳкылалароуп (Иоанн 16:12)b. Еиҿшәырԥш шәҽанӡаашәхуаз ишәымаз адыррақәеи уажәы ишәымоу адыррақәеи. Усҟан ижәдыруаз ихадоу абиблиатә ҵабыргқәа рымацара ракәызҭгьы ҟалап (Аур. 6:1). Уажәы ишәымоу адыррақәа шәырҳарц азы ашықәсқәа шәҭаххеит. Убри аҟынтә ауаҩы зегь зныкала ишәырҵарц шәаламган.
5. а) Еилыркаалар ҳҭахузеи Абиблиа зҳарҵо, 1 Фессалоникаа рахь 2:13 иану инақәыршәаны? б) Игәазҭаҳҵар шԥаҳалшо ауаҩы еиликааз иазкны игәаанагара иҳәаларц?
5 Ҳара иаҳҭахуп ауаҩы еиликааларц иҳарҵо ахьынтәиааҳго Анцәа идоуҳа зҵоу Абиблиа аҟынтә шакәу. (Шәаԥхьа 1 Фессалоникаа рахь 2:13.) Иҟаҵатәузеи уи азы? Игәазҭашәҵала еиликааз иазкны игәаанагара иҳәаларц. Есымша абиблиатә жәеинраалақәа иеилыркаара аҭыԥан, зны-зынла иара ишәеилиркааларц шәиҳәала. Шәицхраа Анцәа Иажәа аҟынтә иоуа адыррақәа хаҭала иара ишиҵанакуа аилкаара. Ишәҭала дзырхәыцша, насгьы игәаанагара аҳәара игәазҭазҵо азҵаарақәа, усҟан еилышәкаауеит еиликааз дшазыҟоу (Лука 10:25—28). Ишәҭала абас еиԥш иҟоу азҵаарақәа: «Еилукаазеи ари ажәеинраала аҟынтә Иегова иҟазшьақәа ирызкны?» «Ишԥауцхраауеи уара уажәы еилукааз?» «Иахуҳәаауазеи еилукааз?» (Ажәам. 20:5). Аус злоу ауаҩы шаҟа идыруа акәӡам, аха еиликаауа шаҟа игәаԥхо, насгьы ихы иаирхәо ауп.
6. Избан изыбзиоу аԥышәа змоу ажәабжьҳәаҩцәа абиблиатә ҵарахьы иааҳаԥхьалар?
6 Иаашәыԥхьахьоума шәара абиблиатә ҵарахьы аԥышәа змоу ажәабжьҳәаҩцәа? Шәара урҭ шәрыҳәар шәылшоит абиблиатә ҵара шымҩаԥыжәго, насгьы Абиблиа шәхы ишашәырхәо иазкны игәарҭаз шәарҳәарц. Шәырҵаратә ҟазара еиӷьашәтәырц шәҭахызар, ахынраалара аашәырԥшлароуп (Иаҿшәырԥш Аусқәа 18:24—26). Иара убас шәиазҵаар шәылшоит иара излагәеиҭаз ала, ауаҩы абиблиатә ҵабырг шԥеиликаауеи ҳәа. Мчыбжьык ҳәа, ма еиҳаны џьара шәцараны шәыҟазар, уи ажәабжьҳәаҩ шәиҳәа шәаиаанӡа абиблиатә ҵара мҩаԥигаларц. Убас ала ауаҩы абиблиатә ҵара бжьаижьӡом, насгьы уи шаҟа ихадоу еиликаауеит. Ахаангьы шәымхәыцлан уи «шәара» шәыҭҵаара ауп ҳәа, насгьы шәара шәыда уи амҩаԥгара аӡәгьы илшом ҳәа. Ҳара иҳалшо зегь ҟаҳҵалар ҳҭахуп Абиблиа зҳарҵо ауаҩы Анцәа Иажәа аҟынтә иоуа адыррақәа еизирҳаларц азы.
ШӘАЖӘАҚӘА АԤСЫ РХАЗ, РЫГӘРА УГАРТӘГЬЫ ИҞАЗ
Абиблиа зшәырҵо изеиҭашәҳәала зыԥсҭазаара зыԥсахыз аишьцәеи аиҳәшьцәеи рҿырԥштәқәа, усҟан еиликаауеит абиблиатә принципқәа ихы ишаирхәалаша. (Шәрыхәаԥш абзацқәа 7—9.)g
7. Ицхраар алшозеи Абиблиа зшәырҵо абиблиатә ҵабырг бзиа абара?
7 Абиблиа зшәырҵо ибозар ауп абиблиатә ҵабыргқәа бзиа ишыжәбо, насгьы рыгәра шыжәго (1 Фес. 1:5). Усҟан иаргьы урҭ бзиа рбара иҭаххар ауеит. Ишәылшома Абиблиа зшәырҵо ауаҩы изеиҭашәҳәар абиблиатә принципқәа шәара ишшәыцхрааз? Уи абзоурала иара еиликаауеит Абиблиа иану алабжьарақәа ахәарҭа шаарго, иаргьы ицхраар шрылшо.
8. Иҟашәҵар шәылшозеи иҵегьы Абиблиа зшәырҵо шәицхраарц азы?
8 Абиблиатә ҵараан ауаҩы изеиҭашәҳәалар шәылшоит иара дызҭагыло ауадаҩрақәа рҩыза змаз, насгьы урҭ ириааиз аишьцәеи аиҳәшьцәеи рҿырԥштәқәа. Даашәыԥхьа абиблиатә ҵарахьы ус еиԥш иҟоу ажәабжьҳәаҩ. Мамзаргьы асаит jw.org аҿы иҟоу арубрика «Абиблиа ауаа рыԥсҭазаашьа аԥсахуеит»c аҟны ауаҩы ицхраауа ҭоурыхк шәыԥшаа. Урҭ астатиақәеи авидеонҵамҭақәеи ауаҩы идырбоит абиблиатә принципқәа аҽыԥсахра ицхраар шалшо.
9. Игәазҭашәҵар шԥашәылшо Абиблиа зшәырҵо ауаҩы еиликаауа иҭынхацәеи иҩызцәеи ирзеиҭеиҳәаларц?
9 Аҭаацәара далоума Абиблиа зшәырҵо ауаҩы? Ааи акәзар, ихатә ҩызагьы абиблиатә ҵара идыжәгал. Абиблиа зшәырҵо ауаҩы еиликаауа иҭынхацәеи иҩызцәеи ирзеиҭеиҳәаларц игәазҭашәҵала (Иоанн 1:40—45). Ишԥа? Иаҳҳәап, ус шәиазҵаар шәылшоит: «Ишԥадеилуркаарыз ари аҵабырг уҭынхацәа?» ма «Иарбан жәеинраалоу ухы иаурхәарыз уҩыза ари аҵабырг агәра иургарц азы?» Убас ала, ауаҩы ирҵаратә ҟазара аизырҳара шәицхраалоит. Анаҩс аҭахрақәа данрықәшәало, аизараҿы иӡаахым ажәабжьҳәаҩ иеиԥш амаҵ аура далагар илшоит. Шәиазҵаа Абиблиа аҵара зҭаху ӡәыр дидыруама ҳәа. Ааи акәзар, иаразнак уи ауаҩы шәидҵаал, насгьы абиблиатә ҵара идыжәгал. Ишәырба «Ишԥамҩаԥысуеи абиблиатә ҵара?»d захьӡу авидеонҵамҭа.
АИЗАРАҾЫ АҨЫЗЦӘА ИԤШААЛАРЦ ИГӘАЗҬАШӘҴАЛА
Игәазҭашәҵала Абиблиа зшәырҵо аизараҿы аҩызцәа рыԥшаара. (Шәрыхәаԥш абзацқәа 10, 11.)h
10. Ҳаиҿыԥшлар шԥаҳалшо Павел, 1 Фессалоникаа рахь 2:7, 8 иану инақәыршәаны?
10 Абиблиа зшәырҵо рахь гәыкала аинтерес аашәырԥшла. Урҭ иҳашьцәахо ма иҳаҳәшьцәахо реиԥш шәрыхәаԥшла. (Шәаԥхьа 1 Фессалоникаа рахь 2:7, 8.) Дара ирзымариаӡам рҩызцәа рааныжьра, насгьы Иегова имаҵ ауразы иаҭаху аԥсахрақәа рыҟаҵара. Ҳара ҳрыцхраароуп аизараҿы аҩызцәа бзиақәа рыԥшаара. Абиблиа зшәырҵо ҩызас шәизыҟаз, Абиблиа анишәырҵо адагьы, аамҭа ицышәхыжәгала. Аҭел шәизасла, смс-аацҳарақәа изышәышьҭла, ма маҷк шәааиацәажәарц азы сасра шәизнеила, убас ала ишәырбоит хьаас дышшәымоу.
11. Избан Абиблиа зҳарҵо аизараҿы аҩызцәа иԥшаарц заҳҭаху?
11 «Напеилаԥса уаҩ дааӡоит» рҳәоит. Убас еиԥшҵәҟьа Абиблиа зҵо ауаҩы аизара зегь дааӡоит. Убри азоуп изхадоу Абиблиа зҳарҵо аишьцәеи аиҳәшьцәеи иабардырра. Усҟан иара Анцәа ижәлар рацәажәара игәаԥхалоит, даргьы Иегова изааигәахара ицхраалоит, ауадаҩрақәа данрықәшәогьы, ивагылоит. Ҳара иаҳҭахуп ауаҩы аизара, насгьы ҳдоуҳатә ҭаацәара дахәҭакны ихы ибаларц. Иаҳҭахуп ҳқьырсиантә бзиабара игәы арԥхаларц. Усҟан еиҳа изымариахоит Иегова изааигәахара иԥырхаго иҩызцәа рааныжьра (Ажәам. 13:20). Ҩызцәас ииԥхьаӡоз ауаа иацәажәара иаҟәыҵыргьы, иара идырлоит Иегова иорганизациаҿы аҩызцәа бзиақәа ирҳар шилшо (Марк 10:29, 30; 1 Пиотр 4:4).
АНЦӘА ИҼИЗКРЕИ АҼӠААХРЕИ ШХАДОУ ИАШӘҲӘАЛА
Аҽӡаахра зҭаху ауаҩы хәыҷы-хәыҷла уи иҽазыҟаиҵоит! (Шәрыхәаԥш абзацқәа 12, 13.)
12. Избан Абиблиа зҳарҵо Анцәа иҽизкреи аҽӡаахреи шхадоу иаҳҳәалар закәу?
12 Ауаҩы Абиблиа зиҳарҵо Иегова имаҵ ауреи аҽӡаахреи ҳицхраарц азы ауп. Убри аҟынтә шәыԥхамшьалан ауаҩы Анцәа иҽизкреи аҽӡаахреи даара ишхадоу иаҳәара. Ауаҩы иааиԥмырҟьаӡакәа Абиблиа иҳарҵоижьҭеи мызқәак ҵуазар, еиҳарак аизарақәа рахь аныҟәара далагахьазар, иара идыруазароуп Абиблиа зиҳарҵо Иегова ишаҳаҭ иаҳасабала имаҵ аура далагарц азы шакәу.
13. Иарбан шьаҿақәоу ауаҩы иҟаиҵар акәу иҽӡааихырц азы?
13 Зыҽӡаазхырц зҭаху ауаҩы абарҭ ашьаҿақәа ҟаиҵар ауп: раԥхьа иара Иегова деиликаароуп, бзиа дибароуп, насгьы иара иахь агәрахаҵара еизирҳароуп (Иоанн 3:16; 17:3). Анаҩс Иеговеи иареи, насгьы аизараҟынтә аишьцәеи аиҳәшьцәеи иареи рыбжьара аиҩызара еизирҳалароуп (Аур. 10:24, 25; Иак. 4:8). Нас аус цәгьақәа ахьыҟаиҵоз дахьхәуеит, иагьаанижьуеит (Аус. 3:19). Игәрахаҵара игәазҭанаҵоит еиликааз егьырҭ рзеиҭаҳәара далагарц (2 Кор. 4:13). Аҵыхәтәаны Анцәа иҽизикуеит, иагьҽӡааихуеит (1 Пиотр 3:21; 4:2). Уи ҳара ҳзы гәырӷьара дууп! Абиблиа зшәырҵо ауаҩы арҭ ашьаҿақәа ҟаиҵацыԥхьаӡа, гәык-ԥсыкала дшәырҽхәала, насгьы анаҩсгьы ԥхьаҟа дцаларц игәазҭашәҵала.
ААМҬА-ААМҬАЛА ДОУҲАЛА ДЕИЗҲАУОУ-ДЕИЗЫМҲАУОУ ГӘАШӘҬАЛА
14. Еилаҳкаар шԥаҳалшо ауаҩы доуҳала деизҳауоу-деизымҳауоу?
14 Ауаҩы Анцәа иҽизикырц, насгьы иҽӡааихырц даназыҟаҳҵо ачҳара ааҳарԥшлароуп. Аха ҳара иаҳдыруазароуп иара Иегова имаҵ аура иҭаху-иҭахыму. Ижәбома шәара ауаҩы Иисус иԥҟарақәа рықәныҟәара иҽшазишәо? Ма баша Абиблиа аҟынтә ак аилкаара игәаԥхоу?
15. Иарбан зҵаарақәоу шәхы иашәҭар шәылшо ауаҩы доуҳала деизҳауоу-деизымҳауоу еилышәкаарц азы?
15 Ауаҩы доуҳала деизҳауоу-деизымҳауоу еилышәкаарц азы аамҭа-аамҭала шәхы шәазҵаала: иҳәома иара Иегова бзиа дшибо? Диҳәома иара Иегова? (Аԥсал. 116:1, 2). Игәаԥхома Абиблиа аԥхьара? (Аԥсал. 119:97). Дныҟәома аизарақәа рахь есымчыбжьа? (Аԥсал. 22:22). Кыр иԥсаххьоума иԥсҭазаараҿы? (Аԥсал. 119:112). Далагахьоума еиликааз иҭынхацәеи иҩызцәеи рзеиҭаҳәара? (Аԥсал. 9:1). Еиҳарак ихадоу, иҭахума Иегова ишаҳаҭ иакәхарц? (Аԥсал. 40:8). Ауаҩы деизымҳауазар, шәҽазышәшәа уи мзызс иамоу аилкааразы ирҟәымшәышәны, аха иаартны иацәажәараe.
16. Иаҳзырбар алшозеи анаҩсгьы ауаҩы Абиблиа ирҵара ишаԥсам?
16 Аамҭа-аамҭала шәазхәыцла ауаҩы анаҩсгьы Абиблиа ирҵара иаԥсоу-иаԥсаму. Шәхы шәазҵаала: «Иҽазыҟаиҵома ауаҩы абиблиатә ҵара? Иҭахума аизарақәа рҭаара? Икаижьма иҽеим ашьцыларақәа? Иаанижьма амц динхаҵара?» Арҭ азҵаарақәа рҭак мап акәзар, уи анаҩсгьы Абиблиа ирҵара зыҽзырбааӡар зҭахым ауаҩы аӡсашьа ирҵара иаҩызоуп! Ауаҩы иоуа адыррақәа рыхә имшьозар, насгьы аҽыԥсахра иҭахымзар, иаԥсоума анаҩсгьы Абиблиа ирҵара?
17. Иҟарҵалар рыхәҭоузеи абиблиатә ҵарақәа мҩаԥызго, 1 Тимофеи иахь 4:16 иану инақәыршәаны?
17 Ҳара ҳзы даараӡа ихадоуп аҵаҩцәа разыҟаҵаразы иҳаду адҵа анагӡара. Убри аҟынтә Абиблиа зҳарҵо рыҽӡаархыртә еиԥш еизҳарц азы ҳрыцхраар ҳҭахуп. Уи ахықәкы наҳагӡарц азы Абиблиа цәажәаларц алшара аҳҭоит, ҳажәақәа аԥсы рхаҳҵоит, насгьы ауаҩы иаҳҳәо агәра игартә изеиҭаҳҳәоит, аизараҿы аҩызцәа иԥшааларц игәазҭахҵоит, Анцәа иҽизкреи аҽӡаахреи шаҟа ихадоу иаҳҳәоит, аамҭа-аамҭала доуҳала деизҳауоу-деизымҳауоу гәаҳҭоит. (Шәахәаԥш арамака «Иҟаҳҵалар ҳалшозеи ҳара Абиблиа зҳарҵо аҽӡаахра ҳрыцхраарц азы?») Шаҟа гәырӷьара дуузеи ҳара ҳзы ауаа рыԥсҭазаара еиқәзырхо аус ҳахьалахәу! Шәааи иҳалшо зегь ҟаҳҵалап Абиблиа зҳарҵо аҽӡаахра аҽазыҟаҵара ҳрыцхрааларц азы!
АШӘА 79 Урҭ ахачҳара аарԥшышьа дшәырҵала
a Иегова ҳара иҷыдоу аҳамҭа ҳаиҭеит. Ҳара иҳалшоит Абиблиа зҳарҵо Иегова ддыргәырӷьаларц азы рхәыцшьеи рхымҩаԥгашьеи аԥсахра ҳрыцхраалар. Ари астатиа аҟынтә еилаҳкаауеит ҳарҵаратә ҟазара еиӷьаҳтәларц азы иҵегьы иҟаҳҵалар ҳалшо.
b Шәахәаԥш сентиабр 2016 шықәсазы иҭыжьыз «Ҳаԥсҭазаареи ҳмаҵзуреи» аҿы астатиа «Абиблиатә ҵара анымҩаԥуго иҟаҵатәым».
c Шәахәаԥш аҟәша ҲАРА ИҲАЗКНЫ > АԤСҬАЗААРА АҞЫНТӘ АХҬЫСҚӘА.
d Апрограмма JW Library® аҿы шәахәаԥш аҟәша МУЛЬТИМЕДИА > НАШИ ВСТРЕЧИ И СЛУЖЕНИЕ > ПОСОБИЯ ДЛЯ СЛУЖЕНИЯ.
e Шәрыхәаԥш март 2020 шықәсазы иҭыжьыз «Ахьчаратә бааш» аҿы астатиақәа «Иегова бзиа дыжәбар, шәыҽӡаашәхырц шәҭаххоит», насгьы «Шәазхиоума шәара аҽӡаахра?».
f АСАХЬАҚӘА РҾЫ ИАҲБО: абиблиатә ҵара ашьҭахь аԥышәа змоу аиаҳәшьа абиблиатә ҵара мҩаԥызгоз аиаҳәшьа илалҳәоит мыцхәы ацәажәара изаԥсам.
g АСАХЬАҚӘА РҾЫ ИАҲБО: абиблиатә ҵараан аԥҳәыс еилылкаауеит лроль еиӷьны ишыналыгӡалаша. Ԥыҭрак ашьҭахь еилылкааз лхаҵа изеиҭалҳәоит.
h АСАХЬАҚӘА РҾЫ ИАҲБО: Абиблиа зҵо аԥҳәыс аизараҿы аиаҳәшьа длабадыруеит, анаҩс лхаҵеи лареи урҭ рахь сасра инеиуеит.