Анцәа имҵахырхәаразы ашәа ҿыцқәа!
1 2014 шықәса октиабр 4 рзы имҩаԥысыз есышықәсатәи Ахьчаратә бааши, Абиблиеи атрактатқәеи Реилазаара (Пенсильваниа) аизараҿы ирылаҳәан ашәаҳәага ашәҟәы аиҭахәаԥшра ргәы ишҭоу. Ииашаҵәҟьаны ари узыргәырӷьо жәабжьын! Иалахәыз зегьы иргәаларшәан Аҳра иазку ашәақәа Анцәа имҵахырхәараҿы ароль хада шамоу (Ԥс. 96:2).
2 Иҟалап шәазҵаар: «Изаҭахузеи ашәаҳәага шәҟәы аиҭахәаԥшра?» Уи азы иҟоуп мзызқәак. Зегь раԥхьаӡа иргыланы, Аҩыра аилкаара еиҳа-еиҳа иаатуеит, уи ашәақәа ртекст ианыԥшыр алшоит (Ажәам. 4:18). Уи адагьы, ашәақәа рҿы ажәақәеи аҳәоуқәеи аагоуп уаанӡа иҭыҵыз «Адунеи ҿыц аиҭага» (англ.) аҟынтә. Уажәшьҭа урҭ риашатәуп, еиҭаҭыжьыз Абиблиа иақәшәарц азы. Уи азы аус ду мҩаԥгатәын аҟынтә, иӡбан ашәаҳәага шәҟәы иҿыцу ашәақәак ацҵара.
3 Иазыԥштәума ашәаҳәага шәҟәы ҿыц аҭыжьра, ашәа ҿыцқәа рынагӡаразы? Мап. Ҳара гәахәарыла ишәылаҳҳәоит ашәа ҿыцқәа иааиуа амзақәа рзы ҳсаит jw.org аҿы ишыҟало. Ашәа ҿыц ҭыҵцыԥхьаӡа, уи амаҵзуратә еиԥылара аихшанҵаҿы аҵыхәтәаны ианызаауеит «ашәа ҿыц» ҳәа иарбаны.
4 Ашәа ҿыцқәа шҵатәу. Ашәа ҿыц аҵара мариамхар алшоит. Ус шакәугьы, аԥсаломшәаҳәаҩ иеиԥш, ҳара аизарақәа рҿы ашәа ҳҳәалар ҳҭахуп, ҿымҭ ҳамтәакәа (Ԥс. 30:12). Абар иуадаҩым лабжьарақәак.
Зныкымкәа уазыӡырҩы ҳсаит аҿы иҭагалахо афортепианатә аккомпанемент нҵамҭа. Уи амелодиа лассы-лассы уазыӡырҩлар, ирласны игәнукылоит.
Ашәа ажәақәа урыхәаԥш, насгьы уҽазышәа урҭ ргәынкылара.
Ашәа амузыка иацҳәала. Ибзианы иуҵаанӡа иҳәала.
Аҭаацәаратә мҵахырхәараҿы ашәа ҿыцқәа изныкымкәа ишәҳәала, шәҭаацәа зегь ибзианы ирҵаанӡа.
5 Ашәа ҿыц амаҵзуратә еиԥылараҿы аихшанҵа иананылалак, аизараҿы уи анҵамҭа (афортепианатә аккомпанемент) знык иазыӡырҩуеит. Анаҩс зегьы ари ашәа амузыка иацырҳәоит.
6 Ҳара зегьы ҳабжьқәа ҭганы ҳаиԥыларақәа рҿы ашәақәа рыла Иегова данҳараҳкуа, уи ҳаргәырӷьоит. Убри аҟынтә шәааи шьцыларас ишьҭаҳамхып ашәаҳәара аамҭа анааилак иаҭахымкәа азал аҟынтә адәылҵра.
7 Ишԥаҳалшо еиҭа аџьшьара аарԥшра ҳмузыка азы? Аконгрессқәа рҿы апрограмма иалагаанӡа, амузыка аҳәоит. Шықәсык ахь ҩынтә адунеи зегь аҟынтә аишьцәеи аиаҳәшьцәеи рхатә харџьла, ҳаиԥыларақәа рҿы иаҳәо амузыка ԥшӡа аҭаҩразы Паттерсон (Ньиу-Иорк аштат) иаауеит. Убри аҟынтә, апрограмма ахантәаҩы ааԥхьара анҳаиҭалак ҳҭыԥқәа аанкыланы уи аркестр иархиаз амузыка ҳазыӡырҩырц, шәааи ус егьыҟаҳҵап. Уи апрограмма азыӡырҩразы ҳгәазыҟаҵара иҳацхраауеит (Езд. 7:10).
8 Иахьатәи ҳаиԥылара хҳаркәшоит ашәа ҿыц «Аҳра шьақәыргылоуп. Иааиааит уи!» захьӡу ала. Ари ашәа нагӡан ааигәа имҩаԥысыз есышықәсатәи аизараҿы, уи ҷыдала иҩын Аҳра 100 шықәса ахыҵра иазкны.
9 Ҳәарада, арҭ ашәақәа — Иегова иҟынтә «ҳалалроуп» (Матф. 12:35а). Шәааи ҳҽазаҳшәап ашәа ҿыцқәа рҵара, насгьы гәыкала Иегова ихьӡ ҳаракуа рҳәара! (Ԥс. 147:1).