Иегова иахь иҳамоу абзиабара ашәара аиааира ишҳацхраауа

1. Еиқәышәыԥхьаӡа еиҳарак ауаа зыршәо ҭагылазаашьақәак.

ХАҴЕИ-ԤҲӘЫСИ Сантиагоиb Мариеи ажәабжьҳәаҩцәа ахьазымхо аҭыԥ аҿы амаҵ рулар рҭахын. Уи азы рыԥсҭазаараҿы ак рыԥсахыр рыхәҭан. Аха дара еиҳа имаҷны аԥара дырҳалар аԥсҭазаараҿы анасыԥ рмоур ҳәа ишәон. Биниам Иегова ишаҳаҭцәа ажәабжьҳәаразы азин ахьрымам атәылаҿы дынхоит. Иара Иегова ишаҳаҭ иакәны даныҟала ашьҭашәарыцарақәа дышрықәшәало еиликаауан. Уи дацәшәон. Аха еиҳагьы дзыцәшәоз иуацәеи иҭынхацәеи Иегова ишаҳаҭ иакәны дахьыҟалаз иахырҳәаауа акәын. Валери акьыба шлымоу ларҳәеит. Лара ашьалаҵарада дԥызҟо аҳақьым дылзыԥшаауамызт. Валери лчымазара лиааины дыԥсыр ҳәа дшәон.

2. Избан ҳшәара аконтроль аҭашьа ҳҵалар зхадоу?

² Аӡәырҩы уи аҩыза ашәара закәу ҳдыруеит. Аха ҳшәара аконтроль ҳзамҭалар, Иеговеи ҳареи ҳаиҩызара бжьызхыр алшо аӡбарақәа ҳадаҳкылалоит. Аҩсҭаа уи ауп ииҭаху. Уи адагьы, иара иҭахуп ҳшәаны Иегова изакәанқәа еилаҳгарц, иаҳҳәап ажәабжьҳәара ҳаҟәыҵырц (Аат. 12:17). Аҩсҭаа дгәымбылџьбароуп, арыцҳашьара илаӡам, насгьы амч ду имоуп. Аха ҳара ҳхы ҳахьчар ҳалшоит. Ишԥа?

3. Иҳацхраауазеи ашәара аиааира?

³ Ҳара Иегова бзиа ҳшибо, насгьы дышҳацу агәра ганы ҳаҟазар, Аҩсҭаа ахаан ҳаршәара илшаӡом (Аԥсал. 118:6). Иаҳҳәап 118-тәи Аԥсалом зҩыз Анцәа имаҵзуҩы ирацәаны ауадаҩрақәа дрықәшәеит. Уи ирацәаҩны аӷацәа иман. Урҭ рахьтә шьоукы амчрагьы рыман (ажәеинраалақәа 9, 10). Зны-зынла иаӷацәа уаҳа наилымшо аҟынӡа днаргон (ажәеинраала 13). Уи адагьы Иегова ӷәӷәала дахьирхәит (ажәеинраала 18). Аха аԥсаломшәаҳәаҩ абас ашәа иҳәон: «Аӡәгьы сицәшәаӡом». Избан иара дзымшәоз? Иегова имаҵзуҩы дшахьирхәызгьы, иара идыруан жәҩантәи Иаб иӷәӷәаны бзиа дшибоз. Аԥсаломшәаҳәаҩ агәра ганы дыҟан дзықәшәозаалакгьы иеиҷаҳауа Анцәа еснагь дышицхраало (Аԥсал. 118:29).

4. Иарбан шәарақәоу ҳазиааиуа Анцәа бзиа ҳшибо агәра ганы ҳаҟазар?

⁴ Иегова бзиа ҳшибо агәра ганы ҳаҟазар, еиҳараӡак ауаа зыцәшәо х-ҭагылазаашьак ҳариааиуеит: 1) ҳҭаацәа ҳазныҟәымгар ҳәа ҳаншәо, 2) ауаа ҳанрыцәшәо, насгьы 3) аԥсра ҳанацәшәо. Актәи абзац аҿы зыӡбахә ҳәаз аишьцәеи аиҳәшьцәеи ирымаз ашәарақәа ириааит, избанзар Анцәа бзиа ишибо агәра ганы иҟан.

ҲҬААЦӘА ҲАЗНЫҞӘЫМГАР ҲӘА ҲАНШӘО

5. Хьаас имазар алшозеи аҭаацәара ахада? (Шәахәаԥш ацәаҿы иану асахьа.)

⁵ Ақьырсианцәа рҭаацәарақәа рныҟәгара ҭакԥхықәрала иазнеиуеит (1 Тим. 5:8). Ҳаҭыр зқәу аҭаацәарақәа рхадацәа, акоронавирус апандемиа ирацәаны ауадаҩрақәа шәзаанагеит. Иҟалап шәара шәшәозҭгьы шәусура шәцәыӡыр, даҽак шәзымԥшаар ҳәа. Усҟан шәҭаацәа шәызныҟәымгалар, ма шәыҩны ахә шәзымшәалар ҳәа шәгәы ҭынчмызҭгьы. Мамзаргьы, иҟалап, Сантиагои Мариеи реиԥш шәхәыцуазҭгьы еиҳа имаҷны аԥара шәырҳалар, шәхы шәызныҟәгалаӡом ҳәа. Аҩсҭаа урҭ рҩызцәа ашәарақәа ихы иаирхәоит.

6. Зыгәра ҳиргар иҭахузеи Аҩсҭаа?

⁶ Аҩсҭаа агәра ҳиргар иҭахуп Иегова имаҵзуҩцәа дырмеиҷаҳауашәа, насгьы рҭаацәарақәа рныҟәгара дырмыцхраауашәа. Уи амц агәра ҳгар, абас ахәыцра ҳалагар алшоит: ҳусура ҳцәымӡырц азы иҳалшо зегь ҟаҳҵалароуп, абиблиатә принципқәа еилагатәхаргьы.

7. Зыгәра ҳиргозеи Иисус?

⁷ Иисус Иегова зегь раасҭа еиӷьны дидыруеит. Иара агәра ҳиргоит: «Шәаб шәара шәзыргәаҟуа идыруеит, уи азыҳәан иҳәара шәалагаанӡагьы» (Матф. 6:8). Иисус идыруеит Анцәа есымша иҳагу зегь шҳаиҭало. Ҳара, ақьырсианцәа, Иегова иҭаацәара ҳахәҭакуп. Ҳәара аҭахума, Иегова аҭаацәара ахада иеиԥш, 1 Тимофеи иахь 5:8 аҿы иану апринцип ихаҭагьы дықәныҟәоит.

8. а) Иҳацхраауазеи ҳҭаацәара ҳазныҟәымгар ҳәа ашәара аиааира? (Матфеи 6:31—33). б) Шәахәаԥш асахьа. Ҳарҿыԥшлар шԥаҳалшо аиаҳәшьа афатә лзаазгаз аҭаацәа?

⁸ Иегова ҳҭаацәеи ҳареи бзиа ҳшибо агәра ҳгозар, зда ԥсыхәа ыҟам шҳаиҭало агәра ҳгалоит. (Шәаԥхьа Матфеи 6:31—33.) Иегова ҳаиҷаҳара игәаԥхоит. Иара аҟәымшәышәреи агәыҳалалреи злоу Аб иоуп! Иара адгьыл анишоз ауаа зда ԥсыхәа ыҟам мацара акәӡам ириҭаз. Иегова агәырӷьара ҳазҭо рацәаны иаҳзыҟаиҵеит (Аҟаз. 2:9). Аха зны-зынла иҳамоу зда ԥсыхәа ыҟам мацара акәзаргьы, уи ахьҳамоу ҳхы азыҳашьҭлап, избанзар Иегова дҳаиҷаҳауеит (Матф. 6:11). Шәааи иаҳхаҳмыршҭлап: аԥсҭазаараҿы ак мап ацәаҳкуазаргьы, бзиа ҳазбо Анцәа уажәы иҳаиҭои аԥхьаҟа иҳаиҭараны иҟоуи уи иузадкылаӡом. Сантиагои Мариеи уи ус шакәу агәра ргеит (Ис. 65:21, 22).

9. Иаҳнарҵозеи Сантиагои Мариеи рҿырԥшы?

⁹ Колумбиа инхо Сантиагои Мариеи аҩны ԥшӡеи аусура бзиеи рыман. Дара ирҳәоит: «Ҳара ҳаԥсҭазаараҿы ак ԥсахны ҳмаҵзура ҳарҭбаар ҳҭахын, аха ҳшәон. Ҳгәы иаанагон еиҳа имаҷны аԥара ҳарҳалар, аԥсҭазаара агәырӷьара ҳзаанагалаӡом ҳәа». Ирыцхраазеи урҭ ршәара аиааира? Сантиагои Мариеи Иегова уаанӡа изныкымкәа дара рахь абзиабара шааирԥшуаз ргәаладыршәо иалагеит. Уи Иегова ахаан ишаанимыжьуа агәра днаргеит, убри аҟынтә аԥара бзианы иахьроуаз аусура аанрыжьит. Дара рыҩны ҭины ртәылаҿы ажәабжьҳәаҩцәа ахьазымхоз даҽа ҭыԥк ахь ииасит. Иахырҳәаауеи дара ирыдыркылаз аӡбара? Сантиаго иҳәоит: «Ҳара агәра ҳгеит Матфеи 6:33 иану шиашоу! Ҳара иаҳҭаху зегь ҳамоуп. Уи адагьы, уаанӡа аасҭа еиҳа агәырӷьара ҳамоуп».

АУАА ҲАНРЫЦӘШӘО

10. Избан изџьашьатәым ауаа дара-дара ахьеицәшәо?

¹⁰ Адами Евеи раахыс ауаа дара-дара аԥхасҭа рибаҭоит (Еккл. 8:9). Уи ҳзырбо аҿырԥштәқәа рацәоуп. Аҳәынҭқарцәа ирымоу амчра ииашамкәа рхы иадырхәоит, зехьынџьара ацәгьоурақәа ыҟоуп, ашколқәа рҿы ахәыҷқәа аҵара рыцызҵо рҩызцәа ирхыччоит, аҭаацәарақәа рҿгьы агәымбылџьбарара ыҟоуп. Иџьашьатәӡам ауаа дара-дара ахьеицәшәо. Ихы ишԥаирхәо Аҩсҭаа уи ашәара?

11, 12. Ихы ишԥаирхәо Аҩсҭаа ауаа рҿаԥхьа иҳамоу ашәара?

¹¹ Аҩсҭаа иҭахуп ауаа ҳрыцәшәаны Анцәа изакәанқәа еилаҳгаларц, мамзаргьы ажәабжьҳәара ҳаҟәыҵырц. Тәылақәак рҿы иара инырра иахҟьаны ажәабжьҳәара азин ҳарҭаӡом, насгьы иҳашьҭашәарыцоит (Лука 21:12; Аат. 2:10). Аӡәырҩы Иегова ишаҳаҭцәа ирызкны ииашам аинформациеи амци рыладырҵәоит. Уи амц агәра зго ҳхыччоит, гәаӷшақәгьы иҳазныҟәоит (Матф. 10:36). Аха иџьаҳшьома ҳара уи? Мап. Актәи ашәышықәсазгьы Аҩсҭаа уи атактика ихы иаирхәон (Аус. 5:27, 28, 40).

¹² Аҩсҭаа аҳәынҭқарцәа ахьҳашьҭашәарыцо мацара акәӡам ихы иаирхәо. Шьоукы Иегова ишаҳаҭцәа ракәны иҟалар, уи рҭаацәарақәа иахырҳәаауа иацәшәоит. Дара уи ирыпҟар аасҭагьы иацәшәоит. Урҭ рҭынхацәа бзиа ирбоит, насгьы даргьы Иегова деилкааны бзиа дырбар рҭахуп. Рҭынхацәа Анцәеи имаҵзуҩцәеи иҽеимкәа ианрыхцәажәо ргәы днархьуеит. Аха зны-зынла аҵабырг аӡбахә заҳарц зҭахымыз рҭынхацәагьы Иегова ишаҳаҭцәа ракәны иҟалоит. Иҳацхраауазеи Иегова ишаҳаҭцәа ҳакәны ҳахьыҟалаз азы ҳҭынхацәа ҳацәажәара иаҟәыҵзар? Ҳхы шԥамҩаԥаҳго?

13. Ишԥаҳацхраауеи Анцәа бзиа ҳшибо анаҳдыруа, ҳҭынхацәа ҳарҭахымзаргьы? (Аԥсалом 27:10).

¹³ Аԥсалом 27:10 (шәаԥхьа) иану ажәа хаақәа ҳгәы шьҭырхыр алшоит. Иегова шаҟа иӷәӷәаны бзиа ҳаибо ҳаназхәыцуа агәҭынчра ҳауеит, ҳауацәа ҳарҭахымзаргьы. Ҳара агәра ганы ҳаҟоуп иаҳхаҳго зегьы рзы Анцәа дшаҳзылԥхо. Иегова аԥсҭазааразы иаҳҭаху акгьы ҳагирхаӡом, насгьы агәҭынчреи агәырӷьареи ҳаиҭалоит. Иара убас иареи ҳареи ҳаиҩызара арӷәӷәара дҳацхраалоит. Иара заҵәык иоуп ари зегь ҳазҭар зылшо. Биниам уи ус шакәу иҳәоит.

14. Иаҳнарҵозеи Биниам иҿырԥшы?

¹⁴ Биниам Иегова имаҵ иуларц иӡбеит, дахьынхоз атәылаҿы Иегова ишаҳаҭцәа ишрышьҭашәарыцозгьы. Иара Иегова бзиа дшибоз агәра игон. Ишԥаицхрааи уи ауаа рҿаԥхьа имаз ашәара аиааира? Иара иҳәоит: «Сгәы иаанагомызт ашьҭашәарыцарақәа абас иӷәӷәахоит ҳәа. Аха сҭаацәа исыдыскылаз аӡбара иахырҳәаауаз акәын еиҳараӡак сзыцәшәоз. Иегова ишаҳаҭ сакәны сҟалар, уи саб иахиҳәаауаз, насгьы сҭаацәа акгьы злымҵыз аӡә еиԥш срыԥхьаӡалар шалшоз саназхәыцуаз сцәа сҭаӡыӡон». Аха Биниам агәра ганы дыҟан Иегова бзиа иибо ахаан ишаанимыжьуа. Анаҩс иара иҳәоит: «Сара сазхәыцуан Иегова егьырҭ аишьцәеи аиҳәшьцәеи дышрыцхраауаз, иаҳҳәап, аԥара анырзымхоз, милаҭла ианеилырхуаз, насгьы ауаа еизаны ианрыжәлоз. Сара издыруан Иегова даансмыжьыр дышсықәныҳәо. Сара зныкымкәа абахҭа сҭаркхьан, насгьы ирҭахыз сдырҳәарц азы сдыргәаҟуан. Аха сара еилыскааит: Анцәа гәыкала ҳаизыҟазар ахаан ҳаанижьӡом». Иегова Биниам Абыс дизыҟалеит, Иегова ишаҳаҭцәа ҭаацәарас изыҟалеит.

АԤСРА ҲАНАЦӘШӘО

15. Избан аԥсра ҳахьацәшәо цәгьарак заҵам?

¹⁵ Абиблиаҿы аԥсра аӷа ҳәа азҳәоуп (1 Кор. 15:25, 26). Аԥсра азхәыцраҵәҟьагьы ҳацәшәоит, еиҳарак ҳхаҭа, ма иаҳзааигәоу аӡәы данычмазаҩу. Аха избан аԥсра ҳзацәшәо? Избанзар Иегова наӡаӡа ҳанхаларц агәаҳәара ҳалаҵаны ҳаишеит (Еккл. 3:11). Аԥсра ҳахьацәшәо ҳаԥсҭазаара ахьчаргьы ауеит. Иаҳҳәап, усҟан ҳгәабзиара иазеиӷьу афатә ҳфалоит, абаҩрҵәыра ҟаҳҵалоит, ианаҭаху аҳақьым иахь ҳцалоит, насгьы ҳаԥсҭазаара ашәарҭара иҭаҳаргылаӡом.

16. Ихы ишԥаирхәо Аҩсҭаа аԥсра аҿаԥхьа иҳамоу ашәара?

¹⁶ Аҩсҭаа идыруеит аԥсҭазаара ахә ҳаракны ишаҳшьо. Иара иҳәеит ҳаԥсҭазаара еиқәҳархарц азы акгьы ҳшамеигӡо, Иеговеи ҳареи ҳаиҩызарагьы (Иов 2:4, 5). Шаҟа агха ихьуазеи иара! Аха аԥсра аҳас иамоу Аҩсҭаа уеизгьы игәы каижьӡом. Аԥсра ҳахьацәшәо ихы иархәаны Анцәа даанҳажьырц азы илшо зегь ҟаиҵоит (Аур. 2:14, 15). Аҩсҭаа анырра зиҭо ауаа зны-зынла Иегова ишаҳаҭцәа ирықәмақаруеит, Шәынцәа дааншәмыжьыр шәаҳшьуеит ҳәа. Мамзаргьы аҳақьым ицхыраара анаҳҭаху Аҩсҭаа уи аҭагылазаашьа ихы иаирхәар ауеит Иегова ҳаизымӡырҩырц азы. Аҳақьымцәеи Иегова имаҵ зымуа ҳҭынхацәеи ашьалаҵара ҳақәшаҳаҭхарц ҳадырцалалар ауеит, убас Анцәа изакәан еилаҳгарц азы. Мамзаргьы абиблиатә принципқәа ирҿагыло ахәшәтәышьа алаҳхырц ҳарҳәалар алшоит.

17. Избан аԥсра ҳацәымшәалар зҳахәҭоу? (Римаа рахь 8:37—39).

¹⁷ Ҳара аԥсра ҳҭахӡам, аха ҳаԥсыргьы Иегова бзиа ҳбара дшаҟәымҵуа ҳдыруеит. (Шәаԥхьа Римаа рахь 8:37—39.) Анцәа иԥсхьоу иҩызцәа рыԥсы ҭоушәа игәалашәараҿы иҟоуп (Лука 20:37, 38). Иара урҭ рыԥсы ҭеиҵар даара иҭахуп (Иов 14:15). Иегова бзиа иибо Иԥа димеигӡаӡакәа ахә ду ҳхишәааит, «иара дхазҵауа дарбанзаалакь... наӡаӡатәи аԥсҭазаара иауразы» (Иоанн 3:16). Иара гәыкала бзиа ҳшибо, насгьы дышҳаиҷаҳауа ҳдыруеит. Убри аҟынтә ҳачмазаҩызаргьы, аԥсра ҳхықәгылазаргьы, Иегова даанҳажьӡом. Иара агәҭынчреи, аҟәыӷареи, амчи ҳаиҭарц еиҳагьы ҳиҳәалоит. Валери лыԥшәмеи лареи убас ауп ишыҟарҵаз (Аԥсал. 41:3).

18. Иаҳнарҵозеи Валери лҿырԥшы?

¹⁸ Валери 35 шықәса анылхыҵуаз шамахамзар иуԥымло акьыба чымазара хкы лыдырбалеит. Ишԥалыцхрааи Иегова иахь илымаз абзиабара аԥсра аҿаԥхьа ашәара аиааира? Шәааи ажәа лаҳҭап: «Сшычмазаҩу анеилаҳкаа ҳаԥсҭазаара зегьы аҽаԥсахит. Сара сԥырҟар акәхеит. Аҳақьымцәа аӡәырҩы срацәажәеит, аха ашьалаҵарада сыԥҟара аӡәгьы иҭахӡамызт. Сара уи саршәон! Аха уеизгьы ашьа сыларҵар суӡомызт, избанзар усҟан Анцәа изакәан еилазгон. Сыԥсҭазаараҿы изныкымкәа избахьан Иегова бзиа сшибо. Уажәшьҭа сара исоуит алшара иара иӷәӷәаны бзиа дшызбо шьақәсырӷәӷәарц азы. Аҳақьым сусқәа шҽеим сеиҳәацыԥхьаӡа, еиҳагьы Иегова дсыргәырӷьалар сҭахын. Аҩсҭаа дысиааир сҭахӡамызт. Изулакгьы, ашьалаҵарада сԥызҟашаз дсыԥшааит. Уажәгьы сгәабзиара ҽеиӡам, аха Иегова ахаан ҳаанижьӡом. Иаҳҳәап, акьыба шсымоу сарҳәаанӡа мышқәак шагыз аизараҿы „Сохраняйте мужество в бедственные времена“c захьӡу астатиа еилҳаргон. Уи иаҳҭахыҵәҟьаз акәын! Сыԥшәмеи сареи уи астатиа лассы-лассы ҳаиҭаԥхьон. Урҭ иреиԥшу астатиақәеи Иегова имаҵ аура иадҳәалоу аусқәеи сыԥшәмеи сареи агәҭынчра ҳарҭоит, насгьы ииашоу аӡбарақәа рыдкылара иҳацхраауеит».

ҲШӘАРАҚӘА ҲАРИААИУЕИТ

19. Иҟалозеи иаарласны?

¹⁹ Адунеи зегь аҿы ақьырсианцәа Иегова ицхыраарала ауадаҩрақәа рхыргоит, насгьы Аҩсҭаа риааира илдыршаӡом (1 Пиотр 5:8, 9). Шәаргьы урҭ шәреиуоуп! Иаарласны Иегова адҵа ҟаиҵоит Иисуси напхгара ицзуло 144 000-ҩыки Аҩсҭаа иҟаиҵаз аԥхасҭа зегьы ықәыргарц (1 Иоанн 3:8). Уи ашьҭахь ауаа акгьы иацәымшәо Анцәа имаҵ рулоит (Мих. 4:4; Ис. 54:14). Аха уи аамҭа бзиа ааиаанӡа, шәааи, ҳшәарақәа ҳаҽрыҳамҭаларц азы иҳалшо зегь ҟаҳҵалап.

20. Иҳацхраауазеи ҳшәарақәа риааира?

²⁰ Ҳара Иегова иҩызцәа бзиа ишибо, насгьы ишихьчо ала ҳагәрагара ҳарӷәӷәалароуп. Ишԥаҳалшо уи ҟаҳҵалар? Шәааи Иегова ажәытәан имаҵзуҩцәа шихьчоз ҳазхәыцлап, насгьы уи ҳалацәажәалап. Уи адагьы, иуадаҩу аҭагылазаашьақәа раан ҳаргьы дышҳацхраауаз ҳхаҳмыршҭлап. Иегова ицхыраарала ҳшәарақәа ҳариааир ҳалшоит! (Аԥсал. 34:4).