Иалагоит аԥсҭазаара цәгьа

ЕДЕМТӘИ абаҳча анҭыҵ Адами Евеи даара ирцәыцәгьан. Рыфатә аадрыхырц азы аџьабаа ӷәӷәа рбон. Ашәырҵла ԥшӡақәа рцынхәрас иаарыкәаршаны мӷрахеит, жәырҭрахеит. Абри ауп иалҵыз Анцәа иҳәатәхамҵареи иҩызара аҵәыӡреи.

Адами Евеи аԥсра иахьалагаз ауп зегь реиҳа еицәахаз. Иугәаларшәа,— Анцәа ргәырҽаниҵахьан, иалкаау аҵла аҟнытә ашәыр рфар ишԥсуаз. Убас иагьыҟалеит — ашәыр анырфа инаркны аԥсра иалагеит. Заҟа ибзамыҟәқәазеи Адами Евеи, Анцәа иахьизымӡырҩыз.

Анцәа Едемтәи абаҳча ианҭица ашьҭахь ауп Адами Евеи ахшаара анроуз. Убри азоуп рыхшаарагьы имԥсыр, имажәыр амуа изыҟалаз.

Адами Евеи Иегова изыӡырҩызҭгьы, рыхшаареи дареи рыԥсҭазаара насыԥ аҵаны иҟалон. Урҭ зегьы наӡаӡатәи аԥсҭазаареи анасыԥи рыманы инхаларын адгьылаҿы. Аӡәгьы иқәшәомызт ажәреи, ачымазаҩхареи, аԥсреи.

Анцәа иҭахыуп, ауаа наӡаӡеи насыԥлеи инхалар, иара ҳақәиргыӷуеит — мышкы-зны урҭ наӡаӡа ишынхало ала. Усҟан адгьыл иссирханы мацара акәым, ауаагьы агәабзиара роуеит. Адгьыл аҿы зегьы еиҩызцәаны иҟалоит, Анцәагьы иҩызцәахоит.

Ева уаҳа Анцәа диҩызамызт. Убри аҟнытә ахшааиура лзымариамызт. Ахьаа лнаҭон. Иубоума, шаҟа рыцҳара лзаанагаз Иегова иҳәатәхамҵара?

Адами Евеи аԥацәеи ԥҳацәеи рацәаҩны ирыман. Раԥхьа ироуз рԥа Каин ихьӡыртәит. Аҩбатәи рԥа ихьӡыртәит Авел. Иудыруама, урҭ зықәшәаз?