Анцәа Авраам ихаҵара ԥишәоит

ИУБОУМА, Авраам иҟаиҵо? Инапы аҳәызба акыуп, насгьы иҷкәын ишьра иҽазикуашәа даҿуп. Аха изыҟаиҵои уи абас? Уааи, раԥхьа еилаҳкаап Авраами Сарреи аԥа дахьынтәааргаз.

Иугәаларшәа, Анцәа урҭ аԥа дшәоуеит ҳәа иргәыӷит. Аха Авраами Сарреи даара иахьажәыз иахҟьаны, уи ҟалашьа амамшәа угәы иабон. Аха Авраам агәра игон — Анцәа илшоит ҟалашьа змам аҟаҵара. Иҟалазеи нас?

Абар, уажәшьҭа шықәсык нықәҳа ицеит Анцәа ажәа ҟаиҵеижьҭеи. Абар, уажәшьҭа Авраам 100 шықәса анихыҵуаз, Сарра — 90, урҭ дырхылҵит Исаак зыхьӡыз аԥа. Анәа иажәа наигӡеит!

Исаак данызҳа Иегова Авраам ихаҵара ԥишәеит. Уи дааиԥхьеит: ‘Авраам!’ — ‘Абар сахьыҟоу!’ — наиаҭеикит Авраам. Убасҟан Анцәа идиҵеит: ‘Уҷкәын, уҷкәын заҵәы Исаак даашьҭхны, сара иусырбо ашьха ухал. Уаҟа уҷкәын дышьны кәырбанс днаг’.

Шаҟа илахь еиқәырҵазеи арҭ ажәақәа Авраам — мшәан уи убысҟаҟра иӷәӷәаны бзиа димбози иҷкәын. Иугәаларшәа даҽакы: Анцәа ажәа ҟаиҵахьан Авраам ихәыҷқәа ханаантәи адгьылаҿы ишынхало ала. Аха Исаак дыԥсыр уи зланагӡахои? Авраам уи шизеилымкаауазгьы, зегьы акоуп уи Анцәа иҳәатәы хеиҵеит.

Авраам ашьха дынхала, Исаак дҿеиҳәеит, уаанӡа иеиқәиҵахьазгьы акәырбан нагарҭаҿы дықәиҵеит. Нас аҳәызба ҭигеит иҷкәын дишьразы. Аха убри аминуҭазы Анцәа имаалықь дааиԥхьеит: ‘Авраам, Авраам!’ — ‘Абар сахьыҟоу!’ — ақәҽиҭит Авраам.

— Изакәызаалак ԥырхагак изумун арԥыс, акымзаракгьы изумун,— идиҵеит иара Анцәа.— Уажәшьҭа сара издыруеит сыгәра шуго, избанзар уҷкәын уимеигӡеит — уҷкәын заҵәы — сара сзы.

Закәытә хаҵара дуӡӡоузеи Анцәа иахь Авраам имаз! Уи ихеиҵон Иегова илымшо ҳәа акгьы шыҟам, иҷкәын иԥсҭаҵараҵәҟьагьы шилшо. Анцәа иҭахӡаҵәҟьамызт Авраам иҷкәын дишьыр. Убри аҟнытә, Анцәа ауаса ааигәа ачықь иалаԥаҭаратә иҟаиҵеит, Авраамгьы уи иҷкәын ицынхәра кәырбанс инеигаратәгьы.