Шәазыԥшума шәара «идыргылараны» иҟоу ақалақь?

1. Мап зцәыркуазеи Анцәа имаҵзуҩцәа аӡәырҩы, насгьы избан дара уи аҩыза ахамеигӡара заадырԥшуа?

ИЕГОВА имаҵзуҩцәа аӡәырҩы ахамеигӡара ду аадырԥшуеит. Имаҷҩымкәа аишьцәеи аиҳәшьцәеи аҭаацәара иаламларц рыӡбеит. Аҭаацәара иалоу аӡәырҩы ахшараиура иахыццакӡом. Ахәыҷқәа змоу аҭаацәарақәа амал ду арҳара иашьҭаӡам. Избан? Дара зегьы ихадоу ахықәкы рымоуп — иахьынӡарылшо еиҳаны Иегова имаҵ руларц рҭахуп. Дара ирымоу иалагәырӷьоит, насгьы Иегова ирҭахыҵәҟьоу зегь шриҭало агәра ргоит. Баша иақәгәыӷуама дара уи? Мап. Избан уи агәра ганы ҳзыҟоу? Избанзар Иегова ажәытәан имаҵзуҩцәа дреиҷаҳауан. Иаҳҳәап, иара дизылԥхеит ахаҵара змоу зегьы ирабу Авраам (Рим. 4:11).

2. а) Избан Авраам Ур алҵра дзазхиаз, Ауриацәа рахь 11:8—10, 16 иану инақәыршәаны? б) Еилҳаргозеи ари астатиаҿы?

² Авраам ишәҭыкакаҷуаз ақалақь Ур дынхон, аха иара уи алҵра дазхиан. Избан? Избанзар «идыргылараны иҟаз ақалақь» дазыԥшын. (Шәаԥхьа Ауриацәа рахь 11:8—10, 16.) Иарбан «қалақьыз» уи? Иарбан уадаҩрақәоу Авраам дзықәшәоз уи ақалақь аргылара дазыԥшнаҵы? Насгьы ҳарҿыԥшлар шԥаҳалшо Авраами иахьатәи аамҭазы инхо Анцәа имаҵзуҩцәеи?

ИАРБАН «ҚАЛАҚЬУ» «ИДЫРГЫЛАРАНЫ ИҞАЗ»?

3. Иарбан қалақьу Авраам дыззыԥшыз?

³ Авраам дыззыԥшыз ақалақь Анцәа Иаҳра ауп. Иисус Христос уи Аҳра аҳас дахагылоуп. 144 000-ҩык доуҳала иалху ақьырсианцәа иара аҳра ицыруеит. Павел уи Аҳра «зыԥсҭоу Анцәа иқалақь, ижәҩантәу Иерусалим» ҳәа азиҳәеит (Аур. 12:22; Аат. 5:8—10; 14:1). Иисус иҵаҩцәа идирҵон Анцәа Иаҳра ааирц, насгьы ажәҩан аҿы еиԥш адгьыл аҿгьы Анцәа игәаԥхара нанагӡарц азы Анцәа иҳәаларц (Матф. 6:10).

4. Иидыруази Авраам Анцәа дзықәиргәыӷыз ақалақь, ма Аҳра, иазкны, Аҟазаара 17:1, 2, 6 иану инақәыршәаны?

⁴ Идыруазма Авраам Анцәа Иаҳра иадҳәалоу акәамаҵамарақәа зегьы? Мап, издыруамызт. Ашәышықәсақәа рыҩныҵҟа уи маӡан, иҵәахын (Еф. 1:8—10; Кәал. 1:26, 27). Аха иара идыруан ихылҵуаз шьоукы аҳра шырулоз, избанзар Иегова уи дақәиргәыӷит. (Шәаԥхьа Аҟазаара 17:1, 2, 6.) Авраам Анцәа Иаҳраҿы аҳас иҟалоз Мессиа дибозшәа акәын игәрахаҵара шыӷәӷәаз. Убри азоуп Иисус аиудеиаа изреиҳәаз: «Авраам, шәара шәаб, Сара сбарамш дазгәырӷьон: иагьибеит, дагьеигәырӷьеит» (Иоанн 8:56). Излаҳбо ала, Авраам идыруан ихылҵуаз шьоукы Иегова ишьақәиргылараны иҟаз Аҳраҿы аҳра шырулоз. Иара уи аамҭа азыԥшра дазхиан.

5. Иабантәиҳдыруеи Авраам Анцәа иқалақь дшазыԥшыз?

⁵ Ишԥааирԥши Авраам Анцәа иқалақь, ма Иаҳра, дшазыԥшыз? Актәи, иара адгьыл аҿы иҟаз аҳрақәа иҽрыдимкылаӡеит. Иара анхаразы ҭыԥк алхны имамызт, уи ҭыԥк аҟынтә даҽа ҭыԥк ахь диасуан. Иара убасгьы ихаан инхоз аҳцәа дрыдгыломызт, ихатә аҳрагьы ашьақәыргылара дашьҭаӡамызт. Авраам Иегова иҳәатәы дықәныҟәон, насгьы уи дзықәиргәыӷыз зегь анынаигӡо аамҭа дазыԥшын. Убас ала иара игәрахаҵара шыӷәӷәаз ааирԥшит. Шәааи еилаҳкаап иарбан уадаҩрақәаз Авраам дзықәшәоз, насгьы иҿаҳҵаар ҳалшо ҳазхәыцып.

АВРААМ ДЗЫҚӘШӘОЗ АУАДАҨРАҚӘА

6. Изеиԥшрази ақалақь Ур?

⁶ Авраам иаанижьыз ақалақь Ур аҿы анхара маншәалан, иагьшәарҭамызт. Уа инхоз ауаа аҵареи амали рыман, аҩышьеи аԥхьаӡашьеи рдыруан. Аҭӡамц ҳаракқәеи иҵаулаз аӡиасқәеи ақалақь аӷацәа рҟынтә ирыхьчон. Иҟалап уа инхоз ауаа аӡәырҩы ахәаахәҭра рнапы алакызҭгьы. Археологцәа ирыԥшааз адокументқәа уи шьақәнарӷәӷәоит. Аҩнқәа қьырмытла идыргылон, нас ишьыхны, ишкәакәаны иршәуан. Иҟан 13—14 уада змаз аҩнқәа, урҭ ауадақәа рҟынтә хаҳәла иҟаҵаз ашҭахь удәылҵуан.

7. Избан Авраам агәра игалар зихәҭаз Иегова иҭаацәеи иареи шихьчало?

⁷ Авраами Сарреи ихьчаз ақалақьи аҩн бзиеи ааныжьны ханаантәи адәҳәыԥшқәа рҿы ақьалаҿы анхара иалагеит. Уажәшьҭа иҟамызт дара зыхьчоз аҭӡамц ҳаракқәеи аӡиас ҵаулақәеи. Иаазҭаххоз зегь рықәлар рылшон. Ҳәарада, Авраам Иегова иҭаацәеи иареи шихьчало агәра имгозҭгьы, Ур изныжьуамызт.

8. Дзықәшәазеи Авраам зны?

⁸ Авраам Анцәа игәаԥхара наигӡон, ус шакәызгьы, иҭаацәа рныҟәгара еснагь изымариамызт. Иегова дахьишьҭыз адгьыл аҿы амлакра ӷәӷәа ҟалеит. Аҭагылазаашьа даараӡа аҽарцәгьеит аҟынтә, Авраам аамҭала Мысраҟа диасырц иӡбеит. Аха уа аҳас иҟаз афараон Авраам иԥҳәыс димхны дигеит. Шәхаҿы иаажәг Авраам ихы шибоз Иегова афараон Сарра дирхынҳәырц иеиҳәаанӡа (Аҟаз. 12:10—19).

9. Иарбан уадаҩрақәоу Авраам иҭаацәараҿы имаз?

⁹ Авраам иҭаацәараҿгьы ауадаҩрақәа ыҟан. Бзиа иибоз иԥҳәыс Сарра акыршықәса ахшара длоуамызт. Уи даараӡа ргәы днархьуан. Аҵыхәтәаны Сарра маҵуҩыс илымаз Агарь Авраам дилҭеит, лара лҟынтә ахәыҷқәа роурц азы. Аха Агарь лцәа ахшара даналашәа, Сарра датәалымбо далагеит. Аҭагылазаашьа убраанӡа инеит, Сарра Агарь ддәылылцар акәхеит (Аҟаз. 16:1—6).

10. Иарбан ҭагылазаашьақәоу Авраам Иегова иахь имаз агәрагара ԥызшәаз?

¹⁰ Ԥыҭрак ашьҭахь Сарра аԥа длоуит, Авраам уи Исаак ихьӡиҵеит. Авраам иԥацәа рҩыџьагьы бзиа ибон. Аха Измаил Исаак иҽеимкәа дахьизныҟәоз азы, Авраам Измаилгьы Агарьгьы дәылицар акәхеит (Аҟаз. 21:9—14). Акыршықәса рышьҭахь Иегова Авраам диҳәеит Исаак кәырбанс дизнеигарц (Аҟаз. 22:1, 2; Аур. 11:17—19). Аҩҭагылазаашьак рҿы Авраам агәра ганы дыҟазар акәын Иегова Авраам иԥацәа ирызкны ииҳәахьаз ажәа шынаигӡоз.

11. Избан Авраам Иегова дизыԥшлар зихәҭаз?

¹¹ Арҭ ашықәсқәа рыҩныҵҟа Авраам Иегова изыԥшышьа иҵалар акәын. Иҭаацәа иманы Ур даналҵыз иара 70 шықәса дырҭысхьазар ҟаларын (Аҟаз. 11:31—12:4). Шәышықәса раҟара иара ханаантәи адгьыл аҿы ҭыԥк аҟынтә даҽа ҭыԥк ахь диасуа ақьалақәа рҿы дынхон. 175 шықәса анихыҵ иара дыԥсит (Аҟаз. 25:7). Авраам имбаӡеит Иегова уи адгьыл ихылҵшьҭра ишриҭаз. Иара убасгьы иара имбаӡеит Анцәа ишьақәиргылаз ақалақь, ма Аҳра. Ус шакәугьы, Абиблиа иануп Авраам «дажәны, иԥсҭазаара зегь гәахәарыла иҭәны» дыԥсит ҳәа (Аҟаз. 25:8). Ауадаҩра ӷәӷәақәа дышрықәшәозгьы, Авраам игәрахаҵара шыӷәӷәаз иаанхон. Иара Иегова изыԥшра дазхиан. Ицхраазеи Авраам ауадаҩрақәа рыхгара? Иегова Авраам еснагь дихьчон, насгьы ҩызак иеиԥш дизыҟан (Аҟаз. 15:1; Ис. 41:8; Иак. 2:22, 23).

12. Ҳаззыԥшузеи ҳара, насгьы еилҳаргозеи уажәы?

¹² Авраам иеиԥш ҳаргьы уи ақалақь ҳазыԥшуп. Аха ҳара уи анбадыргыло ҳәа ҳаԥшӡам, избанзар иаҳдыруеит Анцәа Иаҳра 1914 шықәсазы ишышьақәыргылаз, насгьы уажәы ажәҩан аҿы Анцәа игәаԥхара шынанагӡо (Аат. 12:7—10). Аха ҳара ҳазыԥшуп уи адгьыл зегь напхгара аназнауло аамҭа. Уи аамҭа ҳазыԥшнаҵы, Авраами Сарреи зықәшәоз ауадаҩрақәа ҳрықәшәар алшоит. Иахьатәи аамҭазы Авраам иҿыԥшуа Анцәа имаҵзуҩцәа рацәоуп. «Ахьчаратә бааш» аҿы иану ҳашьцәеи ҳаҳәшьцәеи рҭоурыхқәа иаҳдырбоит дара Авраами Сарреи реиԥш агәрахаҵареи ачҳареи шаадырԥшуа. Шәааи ҭоурыхқәак ҳрызхьаԥшып, насгьы урҭ иаҳдырҵо ҳазхәыцып.

АВРААМ ИҾЫԤШУАЗ АУАА

13. Ишәнарҵозеи аиашьа Уолден иҿырԥштәы?

¹³ Ахамеигӡара аарԥшра шәазхиаз. Анцәа иқалақь ма Иаҳра ҳаԥсҭазаараҿы раԥхьатәи аҭыԥ ааннакылаларц ҳҭахызар, Анцәа дҳаргәырӷьаларц азы Авраам иеиԥш ахамеигӡара аарԥшра ҳазхиазароуп (Матф. 6:33; Марк 10:28—30). Шәааи ҳахәаԥшып аиашьа Билл Уолденb иҿырԥштәы. Иара Ауниверситет аҿы аргылаҩ-нџьнырс аҵара иҵон. 1942 шықәсазы уи аҵара далгараны даныҟаз, Иегова ишаҳаҭцәа Абиблиа рыцҭҵаара далагеит. Билл аҵара изырҵоз апрофессорцәа руаӡәк аусурҭа изиԥшааит, аха иара уи мап ацәикит. Иара апрофессор иеиҳәеит иаамҭа зегь аԥара бзианы иахьизыршәало аусура азкра аасҭа, Анцәа имаҵ аура иазиклар шиҭаху. Дук мырҵыкәа Билл аррахь иԥхьеит. Иара уи мап ацәикит, убри аҟынтә 10 000 доллар шәатәыс иқәырҵеит, насгьы 5 шықәса ҳәа дҭаркит. Хышықәса рышьҭахь абахҭа аҟынтә доурышьҭит. Ԥыҭрак ашьҭахь Галаад ашкол ахь даарыԥхьеит, анаҩс миссионерс Африкаҟа дрышьҭит. Уи ашьҭахь Билл Ева зыхьӡыз аиаҳәшьа ԥҳәысс дигеит. Дара ахамеигӡара аарԥшуа Африка Анцәа имаҵ еицыруан. Шықәсқәак рышьҭахь дара Билл иан илхылаԥшларц азы Еиду Аштатқәа рахь ихынҳәит. Абар Билл иԥсҭазаара иазкны ииҳәо: «70 шықәса инареиҳаны Иегова имаҵ аураҿы ихы сахьаирхәоз саназхәыцуа, сылаӷырӡқәа хажжылоит. Сара Иегова лассы-лассы иҭабуп ҳәа иасҳәоит сыԥсҭазаара имаҵ аура иазыскырц дахьсыцхрааз». Ишәылшома шәара шәыԥсҭазаара Анцәа имаҵ аура иазышәкыр?

14, 15. Ишәдырҵозеи аиашьа Аристотелис иԥҳәыси иареи рҿырԥштәы?

¹⁴ Уадаҩрак шәақәшәарым ҳәа шәымхәыцлан. Авраам иҿырԥштәы иаҳнарбоит зыԥсҭазаара зегьы Иегова имаҵ аура иазызкуагьы ауадаҩрақәа ишрықәшәо (Иак. 1:2; 1 Пиотр 5:9). Шәааи ҳахәаԥшып аиашьа Аристотелис Апостолидисc иҿырԥштәгьы уи шышьақәнарӷәӷәо. Иара аӡы иҽӡааихит Бырзентәыла 1946 шықәсазы. 1952 шықәсазы Елени зыхьӡыз аиаҳәшьа ԥҳысс дигеит, дара рҩыџьагьы раамҭа Анцәа имаҵ аура иазырклар рҭахын. Аха дара еибагаанӡа Елени дычмазаҩхеит, насгьы лыхшыбаҩ акьыба амоуп ҳәа ларҳәеит. Лара дырхәышәтәит, аха аҭаацәара даналала ашьҭахь шықәсқәак анҵы лчымазара еиҭах ицәырҵит. Аҳақьымцәа дԥырҟеит, аха лызбжак лымнахит, насгьы уаҳа уаҩҵас дызцәажәомызт. Елени лчымазареи ашьҭашәырацарақәеи дырмыхәаԥшӡакәа, амаҵзураҿы агәацԥыҳәара аалырԥшуан.

¹⁵ Аристотелис 30 шықәса раҟара иԥҳәыс дибон. Убри аамҭазгьы иара аизара еиҳабыс, насгьы аконгрессқәа ркомитет аҿы амаҵ иуан. Уи адагьы, Аконгресстә зал аргылараҿы дрыцхраауан. 1987 шықәсазы Елени ажәабжьҳәара даныҟаз амашәыр дақәшәеит. Уи иахҟьаны лара 3 шықәса акома далан, аха дзалымҵкәа дыԥсит. Аристотелис еиҭеиҳәоит арҭ ауадаҩрақәа зегьы шинырыз: «Акыршықәса рыҩныҵҟа имаҷымкәа ауадаҩрақәа схызгон, уадаҩрақәак иаалырҟьаны ицәырҵуан. Урҭ схызгарц азы сыӷәӷәазар акәын. Иегова уи азы еснагь амч сиҭон» (Аԥсал. 94:18, 19). Иегова даараӡа бзиа ибоит ауадаҩрақәа ирмыхәаԥшӡакәа, имаҵ аура иаҟәымҵуа имаҵзуҩцәа!

16. Иарбан лабжьара бзиоу аиашьа Норр иԥҳәыс илиҭаз?

¹⁶ Ԥхьаҟатәи аԥеиԥш шәазхәыцла. Авраам Иегова иҟынтә иоураны иҟаз азылԥхарақәа дрызхәыцуан. Уи дзықәшәоз ауадаҩрақәа рыхгара ицхраауан. Аиаҳәшьа Одри Ҳаид раԥхьатәи лхаҵа Неитан Норр акьыба дагеит, аҩбатәи лхаҵа Гленн Ҳаид Альцгеимер ичымазара ихьитd. Ус шакәызгьы, лара ԥхьаҟатәи аԥеиԥш дазхәыцуан. Лара илҳәеит аиашьа Норр дыԥсаанӡа илеиҳәаз урҭ ауадаҩрақәа рыхгара ишлыцхрааз. Лара илҳәоит: «Неитан исгәалаиршәеит: „Ҳаныԥслак ашьҭахь ҳзықәгәыӷуа наӡоит, насгьы уаҳа ахаангьы ҳгәаҟлаӡом“. Анаҩс иациҵеит: „Ԥхьаҟа быԥшла, избанзар уа аҳамҭа бзыԥшуп“... Иара убас Неитан исеиҳәеит: „Еснагь егьырҭ рзы абзиара аҟаҵара башьҭаз, усҟан агәырӷьара бцәыӡӡом“». Ари ҳара ҳзгьы лабжьара бзиоуп. Даараӡа ихадоуп ауаа абзиара рзыҟаҵара, насгьы ҳгәыӷра алагәырӷьара! (Рим. 12:12).

17. а) Избан уажәы ԥхьаҟатәи ҳԥеиԥш еиҳагьы ҳазхәыцлар зҳахәҭоу? б) Ишԥаҳацхраауеи Михеи 7:7 иану ҳаԥхьаҟа иҳауа азылԥхарақәа рылагәырӷьара?

¹⁷ Иахьа ҳара ԥхьаҟатәи ҳԥеиԥш еиҳагьы ҳазхәыцлароуп. Адунеи аҿы имҩаԥысуа ахҭысқәа иаҳдырбоит аҵыхәтәантәи амшқәа рынҵәамҭазы ҳшынхо. Иаарласны Анцәа Иаҳра адгьыл зегьы напхгара азнаулоит, убри аҟынтә уи азыԥшра аҭаххаӡом. Ҳара азылԥхарақәа рацәаны иҳауеит. Иаҳҳәап, иԥсхьоу ҳҭынхацәеи ҳареи ҩаԥхьа ҳаибабар ҳалшоит. Убри аамҭазы Иегова Авраам агәрахаҵареи ачҳареи ахьааирԥшуаз азы дизылԥхоит — иҭаацәеи иареи рыԥсы ҭеиҵоит. Шәҟалома шәара урҭ ирԥыло рыбжьара? Хымԥада шәҟалоит, аха уи азы Авраам иеиԥш Анцәа Иаҳра аус азы ахамеигӡара аарԥшра шәазхиазароуп, ауадаҩрақәа шәанрықәшәо агәрахаҵара аашәырԥшлароуп, насгьы ачҳара аарԥшны Иегова шәизыԥшызароуп. (Шәаԥхьа Михеи 7:7.)