Жәа-рыцҳарак

УРЫХӘАԤШИ арҭ асахьақәа. Сахьа-цыԥхьаӡа иарбоуп Иегова Мсыр изықәиршәаз жәа-рыцҳарак рҟнытә руак. Уахәаԥши раԥхьатәи асахьа — Аарон илабашьала Нил аӡы дынҭасуеит. Аӡиас зегьы шьаарҵәыраха иааҟалоит. Аԥсыӡқәа зегьы ԥсуеит, аӡиас аҟнытә афҩы цәгьа ҵысуа иалагеит.

Анаҩс иҟаз адажәқәа ракәын: Иегова идҵала урҭ Нил иҭыҵит. Иабаҟамыз урҭ: аԥечкақәа, аԥлакьқәа, ауаа риарҭақәа рҟны,— ажәакала, зехьынџьара. Адажәқәа анԥсы, мсыраа урҭ еидыркылеит чаҟәа дуқәаны, адгьылгьы урҭ рҟнытә абаафҩы ықәшәшәо иҟалеит.

Нас Аарон лабашьала адгьыл дасит, асабагьы аӡқәа алҵит. Аӡқәа — ари иухьратәы ицҳауа ахәаҷа-маҷа ссақәа роуп. Уи Мсыр ирзынашьҭыз ахԥатәи арыцҳара акәын.

Егьырҭ арыцҳарақәа зегьы мсыраа роуп ԥырхага знаҭа, израилаа зынӡа иркьымсӡеит. Аԥшьбатәи арыцҳара — ари амҵ дуқәа ракәын, урҭ рҽеизганы мсыраа рыҩнқәа ирыҩналон. Ахәбатәи арыцҳара аԥстәқәа ирзынашьҭын. Уи иахҟьаны иԥсит ажәқәа, ауасақәа, аџьмақәа рацәаӡаны.

Анаҩс Моисеии Аарони ахәшырб шьҭыхны аҳауа иаларԥсеит. Ари ауааи аԥстәқәеи аԥхҭрақәа рызнарҵысит. Абас иҟан афбатәи арыцҳара.

Уи ашьҭахь Моисеи ажәҩанахь инапқәа шьҭихит, Иеговагьы адыди акырцхи ааишьҭит. Ари Мсыртәи аҭоурыхаҽы зегь реиҳа ибааԥсыз ақәыршыҩи акырцхи ракәын.

Аабатәи арыцҳара — ари амаҵа рацәа ракәын. Ахаангьы, уи ашьҭахьгьы, ари аҩыза амаҵа рацәа ҟамлацызт. Урҭ акырцх иацәынхаз зегьы рфеит.

Ажәбатәи арыцҳара — ари алашьцара акәын. Хымш адгьыл зегьы алашьцара еишьылра ахатәан, аха израилаа ахьынхоз ԥыхьеиԥш лашаран.

Аҵыхәтәан Анцәа ижәлар иреиҳәеит аҩны ашәқәа рыбжьандақәа аӡысқәеи асыс ԥшқақәеи ршьа ахьыршьырц. Уи ашьҭахь, Анцәа имаалықь Мсыр дналсит. Уи зыҩны ашьа ибаз рҟны аӡәгьы дишьуамызт. Аха зыҩны ашә абжьандақәа рҟны ашьа имбаз Анцәа имаалықь ауаа раԥхьахшаақәеи аԥстәқәа раԥхьа ирхылҵызи ишьуан. Ари ажәабатәи арыцҳара акәын.

Аҵыхәтәантәи арыцҳара аниас, афараон израилаа ирыдиҵеит ицарц. Анцәа ижәлар зегь хиан, убри аухаҵәҟьа урҭ Мсыр иалҵит.