Авигеиеи Давиди

ДУДЫРУАМА Давид иахь инеиуа ари аԥҳәыс ԥшӡа? Уи Авигеиа лыхьӡуп. Уи даара дыԥҳәыс ҟәышуп, Давидгьы иҽеимкәа ахымҩаԥгашьа цәгьа аҟынтә даанылкылоит. Уи ҳлабадыраанӡа, шәааи, еилаҳкаап Давид ихьыз.

Саул иҟнытә дыҩны данца, Давид иҽиҵәахуеит аҳаԥаҿы. Уаҟа иара иахь инеиуеит иашьцәеи егьырҭ иҭынхацәеи. Иааидкыланы иара иахь инеиуеит 400-ҩык раҟара. Давидгьы урҭ хадас дроуеит. Нас Давид Моавиттәи аҳ иахь дцаны диҳәоит: ‘Азин сыҭ, иҟалозар, сани саби уара уҟны иаанхарц, сара исыхьуа еилыскаанӡа’. Уи ашьҭахь Давид иуааи иареи ашьхаҟны рҽырҵәахуеит.

Абар, Давид Авигеиа диқәшәоит. Уи лхаҵа — Навал — ибеиоу адгьыл зымҟәыҵакыу уаҩуп. Уи, иара убас, 3 000 уасеи 1000 џьмеи имоуп. Навал дуаҩы цәгьоуп. Аха иԥҳәыс — Авигеиа — даара дыԥҳәыс ԥшӡоуп. Уи иара убас илдыруеит ииашаны ахымҩаԥгашьа. Зынгьы лҭаацәа еиқәлырхахьеит. Уааи, еилаҳкаап уи шыҟалаз.

Давид иуааи иареи Навал абзиара изыруит. Уи иуасақәа рыхьчараҿы ицхраахьеит. Убри азы ҽнак зны Давид Навал иахь иуаажәлар ишьҭоит, аказы иҳәарц. Давид иуаажәлар анааилак, Навал ицхырааҩцәеи иареи ауасақәа дырҟәдуеит. Ари ныҳәа мшуп — Навал афатә хаақәа рацәаны имоуп. Убри азы Давид иуаажәлар иҳәоит: ‘Ҳара абзиара узаҳуит. Уусақәа акызаҵәыкгьы ҳамгаӡеит, уимоу ахылаԥшраҿгьы ҳуцхрааит. Убри азы афатә ҳаҭ, иҟалозар, уажәы’.

— Шәара шәеиԥш иҟоу ирысҭом афатә,— иҳәеит Навал. Уи абас даара ихжәаны дцәажәоит, иара убас, абзиагьы иҳәом Давид изы. Ауаа хынҳәны ианааи, Давид абри зегьы анеизеиҭарҳәалакгьы, уи даара иԥсахы еибакуеит. ‘Аҳәақәа шьҭышәх’,— нарыдиҵоит уи ауаажәлар. Урҭ дәықәлоит Навал иуаажәлари иареи ршьырц.

Уи ииҳәаз ажәа хжәақәа заҳаз, Навал ируаа руаӡәк, иааҟалаз зегьы Авигеиа илзеиҭеиҳәоит. Авигеиа иаразнак афатә еидылкылоит. Аҽадақәа инарықәҵаны амҩагьы дықәлоит. Давид данылба, аҽада дылбааны диеихырхәоит, иагьылҳәоит: ‘Саҳ, иҟалозар, схаҵа Навал ииҳәаз ухахьы иааумган. Уи дыхшыҩдоуп, абзамыҟәрақәагьы рацәаны иҟаиҵоит. Ари ҳамҭоуп. Ига, иҟалозар, ари. Иҟалаз азгьы ҳаҭоумҵан’.

— Бара быԥҳәыс ҟәышуп,— лаҭеикуеит Давид.— Бара Навал дсыбмыршьит, ацәгьара исзиуз иахырҟьаны. Аҩныҟа бгьежьы аҭынчра быманы.— Нас, Навал даныԥслак, Давид иҳәсақәа дыруаӡәкхоит Авигеиа.