АЦӘА АҞЫНТӘ ИААГОУ АТЕМА | ИУМОУ АУСУРА БЗИА ИШБАТӘУ
Иуадаҩу аусура — ииасыма уи амода?
Алекс ишыҟаиҵац еиԥш, аидарамҩангага амашьына аиашьыкь нақәҵаны, даақәыԥсычҳауеит: «Сыԥсы ахьынӡаҭоу еидарашьҭыхҩыс сыҟазаауама? — дхәыцуеит иара.— Ианбасыԥшаауеи аусура бзиа? Ишԥабзиаз зынӡа аус сымуазҭгьы!»
Алекс иеиԥш, аӡәырҩы иргәаԥхом иуадаҩу аусура. «Аӡәырҩы ирыԥхьаӡоит аӡә имаҵ ахьутәу аҭыԥқәа рҿы аусура уланарҟәуеит ҳәа,— иҳәеит амашьына аремонт ҟазҵо Аарон. „Уи еиӷьу аусура сыԥшаанӡа ауп“,— ргәы иаанагоит дара».
Избан аӡәырҩы ргәы изаанаго иуадаҩу аусура дара рзы акәӡам ҳәа? Иҟалап амассатә информациа ахархәагақәа ракәзар уи зыхҟьаз. Урҭ ауаа ргәазҭарҵоит «иреиӷьу» аԥсҭазаара — ари ауаҩы мыцхәы аџьабаа мбакәа зегьы анимоу ауп ҳәа. «Ауаа ирыԥхьаӡоит ухныҟәгаразы шаҟа ирацәаны аус ууа, убысҟак имаҷны аихьӡара умоуп ҳәа»,— иҳәеит атехмаҵзура знапы алаку Метиу. Амҩадуқәа рыԥссара ала зхы ныҟәызго Шеин зыхьӡу ахаҵагьы игәеиҭеит убас еиԥш иҟоу атенденциа. Уи иҳәеит: «Иахьа аӡәгьы иҭахӡам мышкы хәлаанӡа аусура зегь ироуа аулафахәы азы».
Зыԥсҭазаара иахамышшаауа аӡәырҩы ауаа иргәаԥхоит иуадаҩу аусура анагӡара. «Сара сгәы иаанагоит иуадаҩу аусура агәахәара узаанагоит ҳәа, еиҳараӡак уи ахықәкы бзиа азы ианыҟауҵо»,— иҳәеит 25 шықәса зхыҵуа аргыларақәа ирҿу Дениел. Уи диқәшаҳаҭуп 23-шықәса зхыҵуа Андре. Иара иазгәеиҭеит: «Анасыԥи агәахәареи ҳусушьа ӷәӷәала иадҳәалоуп. Амшгареи имаҷны аусуреи анасыԥ узааргом. Еиҳа-еиҳа агәҿыӷь уагалоит!»
Ишԥарылшеи Дениели Андреи реиԥш иҟоу ауаа русурахь ииашоу азнеишьа аиура? Иааркьаҿны иуҳәозар, урҭ абиблиатә принципқәа рыԥсҭазаараҿы рхы иадырхәеит. Абиблиа иуадаҩу аусура иаԥсам акоуп ҳәа иахцәажәаӡом, аха ҳгәазҭанаҵоит агәақәкреи аҽадцалареи. Анцәа Иажәа ус баша ҳгәазҭанаҵом аусура. Уа иаҳәоит иумоу аусура бзиа ишбатәу.
Иарбан библиатә принципқәоу иҳацхраауа ҳусураҿы агәырӷьара аԥшаара? Анаҩстәи астатиаҿы принципқәак ҳрылацәажәап.