«Шәцаны ажәларқәа зегьы рыҩнуҵҟа аҵаҩцәа азыҟашәҵала»
«Шәцаны ажәларқәа зегьы рыҩнуҵҟа шәуазҳәала [«аҵаҩцәа азыҟашәҵала», АдҾ]... ишәнаҭла, идшәырҵала, ишшәасҳәаз ала, аԥҟарақәа зегьы ирықәныҟәаларазы» (МАТФ. 28:19, 20).
1, 2. Иарбан зҵаарақәоу Матфеи 24:14 иану Иисус иажәақәа инарықәыршәаны ицәырҵуа?
АУАА шьоукы зыгәра ҳго иақәшаҳаҭуп, егьырҭ даара иаҳҿагылоит. Аха Иегова ишаҳаҭцәа ражәабжьҳәаратә ус абзоурала ауаа ибзианы ирдыруеит, уи ус шакәугьы, мап ацәызкуа маҷуп. Шәара амаҵзураҿы ишәықәшәахьазар ауеит зыгәра ҳго иақәшаҳаҭым, аха ҳус азы пату ҳақәызҵо ауаа. Ишаҳдыруа еиԥш, Иисус заа иҳәахьан Аҳра иазку ажәабжь адунеи зегь ишахыҵәо (Матф. 24:14). Аха избан ҳара агәра ганы ҳзыҟоу имҩаԥаҳго аус Христос иԥааимбаражәа шынанагӡо? Иааҳмырԥшӡо мыцхәы ахақәгәыӷцәара, ари аус назыгӡо ҳара ҳамацара ҳауп ҳәа ҳгәы иаанагозар?
2 Имаҷымкәа адинхаҵаратә гәыԥқәа ирҳәоит Аевангелие, мамзаргьы ажәабжь бзиа, ауаа ирыладырҵәоит ҳәа. Аха лассы-лассы ражәабжьҳәаратә ус ахь иаҵанакуа ауахәамаҿы, телехәаԥшрала, ма интернетла ажәабжьҳәара ауп, мамзаргьы баша егьырҭ агәрахаҵара шроуз рзеиҭарҳәоит. Шьоукы агәыҳалалратә усқәа ирҿуп, мамзаргьы амедицинеи аҵарадырреи рганахь ала ацхыраара ҟарҵоит. Иаҳҳәар ҳалшома убасала дара Иисус идҵа нарыгӡоит ҳәа?
3. Иарбан шьаҿақәоу Иисус ишьҭанеицәа рҟынтәи дыззыԥшу, Матфеи 28:19, 20 иану инақәыршәаны?
3 Иисус ишьҭанеицәа баша итәаны ауаа дара рахь ианнеиуа ҳәа иԥшызар акәызма? Ҳәарада, мап! Иԥсы анҭала ашьҭахь, шәҩыла иҵаҩцәа иреиҳәеит: «Убри аҟынтә шәцаны ажәларқәа зегьы рыҩнуҵҟа шәуазҳәала [«аҵаҩцәа азыҟашәҵала», АдҾ]... ишәнаҭла, идшәырҵала, ишшәасҳәаз ала, аԥҟарақәа зегьы ирықәныҟәаларазы» (Матф. 28:19, 20). Ара ԥшь-шьаҿак еиқәыԥхьаӡоуп. Ҳара аҵаҩцәа азыҟаҳҵалар, иаҳнаҭлар, мамзаргьы аӡы иӡааҳхлар, насгьы идҳарҵалар ауп, аха иҟаҳҵар акәзеи зегь раԥхьа иргыланы? Иисус «шәца» иҳәеит. Библиаҭҵааҩык ари адҵа абас дахцәажәеит: «Ацара — ари агәрахаҵара змоу зегьы рзы дҵоуп, амҩа еихҵәаны ауаа рахь днеиуазаргьы, аокеан дахысуазаргьы (Матф. 10:7; Лука 10:3).
4. Иаанагозеи «иуаакцәаҩны» аҟазаара?
4 Иисус зыӡбахә иҳәоз хаҭа-хаҭала иҵаҩцәа иҟарҵоз аҽазышәарақәа роума, мамзаргьы дызлацәажәоз еиҿкааны имҩаԥысуа ажәабжьҳәаратә ус акәу? Ажәларқәа зегь рахь аӡәы ихала дызцом аҟнытә, ауаа рацәа рџьабаа аҭахуп. Убри ауп Иисус ииҳәарц ииҭахыз ишьҭанеицәа «иуаакцәаҩны» иҟаларц ианааиԥхьоз. (Уаԥхьа Матфеи 4:18—22.) Иара зыӡбахә иҳәоз аԥсыӡкҩы ихала иҵәгәыр кны дтәаны аԥсыӡ анбакуеи ҳәа данԥшу акәӡам. Иара дызлацәажәоз акаҭа ала аԥсыӡкра ауп. Уи даара аџьабаа ӷәӷәа ацуп, насгьы ауаа рацәа реицхыраара аҭахуп (Лука 5:1—11).
5. Иарбан зҵаарақәоу зҭак ҟаҵатәу, насгьы избан?
5 Иисус иԥааимбаражәа анагӡаразы ажәабжь бзиа рылазырҵәо зусҭцәоу аилкааразы, шәааи анаҩстәи ԥшь-зҵаарак рҭак еилҳаргап:
Иарбан жәабжьу ирыларҵәатәу?
Ҳгәазҭазҵозар акәзеи уи аҟаҵара?
Иарбан методқәоу ҳхы иаҳархәалар акәу?
Изеиԥшразар акәзеи ажәабжьҳәаратә ус амҽхак, насгьы шаҟа аамҭа имҩаԥыслар акәзеи уи?
Арҭ азҵаарақәа рҭак ари аиқәырхаратә ус мҩаԥызго реилкаара, насгьы зиашарала анаҩсгьы уи амҩаԥгара ҳазхиазарц иҳацхраауеит (1 Тим. 4:16).
ИАРБАН ЖӘАБЖЬУ ИРЫЛАРҴӘАТӘУ?
6. Избан агәра ганы ҳаҟазар зҳалшо Иегова ишаҳаҭцәа Аҳра иазку ажәабжь шрыладырҵәо?
6 Уаԥхьа Лука 4:43. Иисус Аҳра иазку ажәабжь бзиа ауаа ирылаирҵәон, ишьҭанеицәагьы убас ҟарҵоит ҳәа дазыԥшуп. Изусҭцәада ари ажәабжь «ажәларқәа зегьы» ирзеиҭазҳәо? Аҭак еилкаауп — Иегова ишаҳаҭцәа рымацара роуп. Иаҳҿагылоу рахьтә шьоукгьы уи иақәшаҳаҭуп. Иаҳҳәап, иԥшьаҩыз миссионерк ҳашьа иеиҳәеит еиуеиԥшым атәылақәа рҿы дшынхоз, насгьы зехьынџьара Иегова ишаҳаҭцәа дышразҵаауаз иарбан жәабжьу ауаа ирыладырҵәо ҳәа. Иаҳауази иара ҭакс? Иара иҳәоит: «Урҭ убриаҟара ихшыҩдақәан, дара зегьы ирҳәоз ак акәын: „Аҳра иазку ажәабжь бзиа“». Ҳәарада, урҭ хшыҩдақәамызт. Дара иҟарҵаз аҭакқәа ииашаҵәҟьоу ақьырсианцәа ирымазар акәу акзаара аадырԥшит (1 Кор. 1:10). «Сторожевая башня возвещает Царство Иеговы» захьӡу ажурнал аҿгьы уи ажәабжь ауп зыӡбахә ану. Ари ажурнал 254 бызшәа рыла иҭыҵуеит, уи есымзатәи атиражгьы адунеи зегь аҿы зегь раасҭа еиҳауп — бжьаратәла 59 миллион инарзынаԥшуа екземплиар!
7. Иабантәиаадыруеи ауахәама анапхгаҩцәа Аҳра иазку ажәабжь ауаа ишрыладмырҵәо?
7 Ақьырсиантә дунеи адиннапхгаҩцәа Анцәа Иаҳра иазку ажәабжь ауаа ирзеиҭарҳәаӡом. Дара уи аӡбахә рҳәозаргьы, цәаныррак ма агәы аҭагылазаашьа еиԥш ауп ишалацәажәо. Урҭ ауаа иддырҵаӡом Анцәа Иаҳра Иисус Христос дызхагылоу жәҩантәи анапхгара шакәу, насгьы уи ауаатәыҩса рыуадаҩрақәа шаӡбо, иара убас адгьыл аҟынтә ацәгьара шықәнахуа (Аат. 19:11—21). Уи аҭыԥан Иисус Қьырса ныҳәеи Мшаԥи рзы ауп даныргәалашәо. Ишаҳбо еиԥш, урҭ Иисус инапхгара иҟанаҵо атәы зынӡа акгьы рыздыруам. Ауахәама амаҵзуҩцәа ауаа ирыладырҵәар акәу ажәабжь раҩрыжьзар, иџьашьатәума дара ажәабжь аҳәара ргәазҭазҵар акәу ахьыргәаламшәо?
ҲГӘАЗҬАЗҴОЗАР АКӘЗЕИ ҲАРА АЖӘАБЖЬҲӘАРА?
8. Иарбан мотивқәоу ажәабжьҳәараҿы иҳамамзар акәу?
8 Ҳгәазҭазҵозар акәзеи ажәабжьҳәара? Ҳәарада, уи зеиԥшыҟам ахыбра ԥшӡақәа рыргыларазы аԥара аизгара акәӡам. Иисус иҵаҩцәа иреиҳәеит: «Амала ишшәоуз аиԥш, амала ирышәҭала» (Матф. 10:8). Анцәа Иажәа аԥара аларҳара ахәҭам (2 Кор. 2:17). Ажәабжь бзиа ауаа ирылазҳәо рхатә феида иашьҭамзар ауп. (Уаԥхьа Аусқәа 20:33—35.) Еилыкка иҟоу арҭ амҩақәҵарақәа ирмыхәаԥшӡакәа, ауахәамақәа аԥара аизгареи афинанстә цхыраара аԥшаареи ирҿуп. Дара аԥшьаҩцәеи егьырҭ русуҩцәеи аԥара рзыршәалар ауп. Лассы-лассы ауахәама адиннапхгаҩцәа амал ду дырҳауеит (Аат. 17:4, 5).
9. Ишԥаадырԥши ажәабжьҳәараҿы Иегова ишаҳаҭцәа ииашоу амотивқәа шрымоу?
9 Иаҳҳәар ҳалшозеи Иегова ишаҳаҭцәа ирызкны? Урҭ рус хатәгәаԥхаралатәи аҭара ала имҩаԥысуеит (2 Кор. 9:7). Дара Аҳратә залқәеи аконгрессқәеи рҿы аԥара еизыргаӡом. Иегова ишаҳаҭцәа аҵыхәтәантәи ашықәсқәа руак аҩныҵҟа ажәабжь бзиа рылаҳәара ҩ-миллиард сааҭк инарзынаԥшуа иазыркит. Есымза дара хәыда-ԥсада жә-миллионк инареиҳаны абиблиатә ҵарақәа мҩаԥыргон. Дара рус азы аԥара роуӡом, гәахәарылагьы рхатә харџь ҟарҵоит. Ҭҵааҩык Иегова ишаҳаҭцәа ирызкны иҩит: «Урҭ рхықәкы хада ауаа ажәабжь раҳәареи адырра рыҭареи ауп... Дара рҿы аԥшьаҩцәа ыҟаӡам, уи, ҳәарада, ахарџь армаҷуеит». Ҳгәазҭазҵозеи ҳара ари аус анагӡара? Ажәакала иуҳәозар, уи аҟаҵара ҳара ҳхаҭа иаҳҭахуп, избанзар Иеговеи иаҳзааигәоуи бзиа иаҳбоит. Ҳара Аԥсалом 109:3 (110:3, АдҾ) (уаԥхьа) иану аԥааимбаражәа иаҳәо инақәыршәаны ҳазхиоуп уи аус анагӡара.
ИАРБАН МЕТОДҚӘОУ ҲХЫ ИАҲАРХӘАЛАР АКӘУ?
Ҳара ауаа ахьыҟоу зехьынџьара ажәабжь ҳҳәоит (Шәахәаԥш абзац 10.)
10. Иарбан методқәоу Иисус ишьҭанеицәеи иареи ажәабжьҳәаратә ус аҿы рхы иадырхәоз?
10 Иарбан методқәоу Иисус ишьҭанеицәеи иареи рхы иадырхәоз, ажәабжь бзиа аларҵәаразы? Дара ауаа ахьыҟаз ицон, иаԥсаны иҟоу рыԥшаауан, ауаа рацәа ахьеизоз аҭыԥқәа рҿы еиԥш, ҩнаҭацыԥхьаӡагьы ажәабжь ҳәо (Матф. 10:11; Лука 8:1; Аус. 5:42; 20:20). Абас еиԥш иҟаз азнеишьа иаанарԥшуан дара еилых шыҟарымҵо.
11, 12. а) Иарбан ҽазышәарақәоу ақьырсиантә дунеи иаанарԥшуа ажәабжь бзиа аларҵәаразы? б) Иаҳҳәар ҳалшозеи Иегова ишаҳаҭцәа рзы?
11 Иаҳҳәар ҳалшозеи ақьырсиантә дунеи иазкны? Уахь иныҟәо ауаа еигәырӷьоит ажәабжьҳәаратә ус аԥара ззыршәо аԥшьаҩцәа иахьымҩаԥырго. Урҭ аԥшьаҩцәа «иуаакцәаҩны» иҟоуп ҳәа узҳәом. Дара еиҳарак ргәы иҵхо ирымоу «аԥсыӡ» шааныркылаша ауп. Аха зны-зынла аԥшьаҩцәа рахьтә шьоукы ауаа Аевангелие ажәабжь аҳәара ргәаназҭарҵогьы ыҟоуп. Иаҳҳәап, 2001-тәи ашықәс алагамҭазы папа Иоанн Павел II исаламшәҟәаҿы иҩит: «Ашықәсқәа рыҩныҵҟа сара зныкымкәа аевангелизациа ҿыц ргәазҭасҵон. Сара уи уажәгьы иҟасҵоит... Ҳара ҳабжьара еиҭаҳарҿыцроуп Павел ӷәӷәала зыгәра игоз, уи иҳәеит: „Сара сзы инасыԥдароуп, гәырҩа-гәаҟроуп абри ауазҳәара санаҿым!“». Анаҩс папа иазгәеиҭеит ажәабжьҳәара аус иазыҟаҵоу шьоукы рымацара шракәым имҩаԥызгалаша, аха ауахәамахь инеиуа зегьы уалс ишрыду. Аха ирацәаҩума уи иақәҿызҭыз?
12 Иаҳҳәар ҳалшозеи Иегова ишаҳаҭцәа рзы? Урҭ рымацара роуп 1914 шықәса инаркны Иисус Аҳак иаҳасабала напхгара шиуа ауаа ирылазҳәо. Иисус ишрыдиҵаз еиԥш, дара ари аус зегь раԥхьаӡа идыргылоит (Марк 13:10). Шәҟәык аҿы иазгәаҭоуп: «Иегова ишаҳаҭцәа рзы амиссионертә ус зегь раасҭа ихадоуп» (Pillars of Faith—American Congregations and Their Partners). Уа иара убас иҳәоуп урҭ амла иакуа, изаҵәу, згәабзиара ҽеим ауаа анырбо ишрыцхраауа, аха ахаангьы ишырхамышҭуа зегь раасҭа хадара змоу рыдҵа — адунеи аҵыхәтәа шааиуа, насгьы аиқәырхара иазку ажәабжь рылаҳәара. Иегова ишаҳаҭцәа иахьагьы уи ажәабжь ауаа ирыларҳәоит Христос ишьҭанеицәеи иареи рхы иадырхәоз аметодқәа рыла.
ИЗЕИԤШРАЗАР АКӘЗЕИ АЖӘАБЖЬҲӘАРАТӘ УС АМҼХАК, НАСГЬЫ ШАҞА ААМҬА ИМҨАԤЫСЛАР АКӘЗЕИ УИ?
13. Изеиԥшразар акәзеи ажәабжьҳәаратә ус амҽхак?
13 Иисус ажәабжьҳәаратә ус зеиԥшрахо данахцәажәоз, ажәабжь бзиа «аԥсабара зегьы» иахыҵәоит ҳәа иҳәеит (Матф. 24:14). «Ажәларқәа зегьы» рыбжьара аҵаҩцәа азыҟаҵалатәуп (Матф. 28:19, 20). Уи иаанагоит ажәабжьҳәаратә ус адунеи зегь амҽханакыр шакәу.
14, 15. Иарбан шьақәырӷәӷәарақәоу иҟоу ажәабжьҳәара амҽхак аганахь ала, Иисус иԥааимбаражәа Иегова ишаҳаҭцәа ишынарыгӡо узырбо? (Шәахәаԥш астатиа алагамҭаҿы иаагоу асахьа.)
14 Инарыгӡома Иегова ишаҳаҭцәа ажәабжьҳәаратә ус, Иисус иԥааимбаражәаҿы ииҳәаз амҽхак инақәыршәаны? Фактқәак еилҳаргап. Еиду Аштатқәа рҿы еиуеиԥшым адинхаҵарақәа ирыҵанакуа 600 000-ҩык раҟара аԥшьаҩцәа ыҟоуп. Уаҵәҟьа 1 200 000-ҩык раҟара Иегова ишаҳаҭцәа ажәабжь бзиа ауаа ирыладырҵәоит. Адунеи ахьынӡа-наӡааӡо акатоликтә уахәамахь иаҵанакуа 400 000-ҩык раҟара аԥшьаҩцәа ыҟоуп. Ари ахыԥхьаӡара Аҳра иазку ажәабжь рылазырҵәо Иегова ишаҳаҭцәа рхыԥхьаӡара иаҿшәырԥш. Аа-миллионҩык раҟара 240 тәылеи территориеи рҿы Анцәа имаҵзуҩцәа хатәгәаԥхарала ауаа ажәабжь рыларҳәоит. Ииашаҵәҟьаны Иегова ишаҳаҭцәа зеиԥшыҟам аус нарыгӡоит, уи ала Иегова дҳараркуеит, насгьы ихьӡ ҭыргоит (Аԥсал. 33:2 [34:1, АдҾ]; 50:17 [51:15, АдҾ]).
15 Ҳара, Иегова ишаҳаҭцәа, даараӡа иаҳҭахуп ицқьам ари адунеи аҵыхәтәа ааиаанӡа ажәабжь бзиа иахьынӡазалшо ирацәаҩны ауаа ирзеиҭаҳҳәарц. Убри азоуп ҳара, егьырҭ реиԥш акәымкәа, Абиблиа шьаҭас измоу апубликациақәа зеиҭаҳго, насгьы изҭҳажьуа. Ҳара хәыда-ԥсада миллионла ашәҟәқәеи, ажурналқәеи, абуклетқәеи, аконгрессқәа, насгьы Ахәылԥаз ахь ааԥхьарақәеи ҳшоит. Ҳҭыжьымҭақәа 700 инарзынаԥшуа бызшәа рыла иҭыҵуеит. «Иԥшьоу Аҩыра — адунеи ҿыц аиҭага» 130 бызшәа инареиҳаны рыла 200 миллион инарзынаԥшуа екземплиар ҭыжьын. Иаҳхысыз ашықәс мацара иалагӡаны 4,5 миллиард екземплиар абиблиатә литература ҭыжьын. Ҳофициалтә саит аҿы 750 бызшәа инареиҳаны рыла аинформациа уԥшаар улшоит. Иҟоума абри аҩыза аус назыгӡо даҽа шьоукы?
16. Иабантәиаадыруеи Иегова ишаҳаҭцәа Анцәа идоуҳа шрымоу?
16 Шаҟа аамҭа имҩаԥыслозеи уи ажәабжьҳәаратә ус? Иисус иҳәеит ари адунеизегьтәи аус аҵыхәтәантәи амшқәа рыҩныҵҟа ишымҩаԥысло, «убасҟан иԥҵәоит зегьы рҵыхәтәа» (Матф. 24:14). Иарбан даҽа динхаҵароу иҷыдоу ари апериод аан ажәабжь бзиа ауаа ирылазҳәо? Иҟалап амаҵзураҿы иҳақәшәо ауаа шьоукы ирҳәозар: «Ҳара иԥшьоу адоуҳа ҳамоуп, шәара егьи аус зегь ҟашәҵоит». Аха иаанамырԥшӡои ари аус аҿы иааҳарԥшуа ахачҳара Анцәа идоуҳа шҳамоу? (Аус. 1:8; 1 Пиотр 4:14). Аамҭа-аамҭала динхаҵарақәак Иегова ишаҳаҭцәа иҟарҵо ҟарҵарц рҽазыршәоит, аха уи зегь лҵшәада иаанхоит. Егьырҭ амиссионертә ус зыхьӡырҵо аамҭала рҽаладырхәуеит, аха анаҩс изышьцылахьоу аԥсҭазаарахь ихынҳәуеит. Иҟоуп ҩнаҭацыԥхьаӡа ажәабжьҳәара зҽазызшәогьы, аха ирҳәозеи дара? Еилкаауп дара Христос ихациркыз аус шакәым инарыгӡо.
ИРЫЛАЗҲӘОДА ИАХЬА АЖӘАБЖЬ БЗИА?
17, 18. а) Избан ҳара агәра ганы ҳзыҟоу Иегова ишаҳаҭцәа рымацара шракәу иахьа Аҳра иазку ажәабжь ауаа ирылазҳәо? б) Иҳацхраауазеи ҳара анаҩсгьы ари аус анагӡара?
17 Изусҭцәада иахьа Аҳра иазку ажәабжь ауаа ирылазҳәо? Ҳара аҵыхәтәанынӡа агәра ганы иаҳҳәар ҳалшоит Иегова ишаҳаҭцәа шракәу. Избан ус агәра ганы ҳзыҟоу? Избанзар ҳара Анцәа Иаҳра иазку, ииашоу ажәабжь рылаҳҳәоит. Ҳара ииашоу аметодқәа ҳхы иаҳархәоит, избанзар ҳхаҭа ауаа рахь ҳцоит. Ҳара ари аус анагӡара ииашоу амотивқәа ҳгәазҭарҵоит — ауаа рахь абзиабара, феида алхра акәымкәа. Ҳажәабжьҳәаратә ус амҽхак ду амоуп, ажәларқәа зегьы бызшәа рацәала ажәабжь раҳҳәоит. Ҳара анаҩсгьы, аҵыхәтәа ааиаанӡа ари аус наҳагӡалоит.
18 Анцәа ижәлар аҵыхәтәантәи арҭ амшқәа рзы инарыгӡо аус даара иџьоушьартә иҟоуп. Изыбзоурахазеи уи? Апостол Павел филиппаа ирзиҩыз асаламшәҟәаҿы ари азҵаара аҭак ҟаиҵоит: «Анцәа ихаҭа шәыҩнуҵҟа шәгәы-шәыԥсаҿы аусура даҿуп — Иара игәы ишақәшәо ала агәаҳәара шәиҭоит, ииҭаху шәирҟаҵоит» (Флп. 2:13). Бзиа ҳазбо Ҳаб анаҩсгьы амч ҳаиҭалааит иҳалшо зегь ҟаҳҵаларц, насгьы ишаҭәоу еиԥш ҳмаҵзура наҳагӡаларц азы! (2 Тим. 4:5).