Алҵшәа бзиа аазго алагамҭақәа шырхиатәу
1. Шаҟа акраҵанакуазеи алагамҭа бзиа?
1 Афатә хаа афҩы акрыфара шугәанарԥхо еиԥш, алагамҭа бзиа библиатә темак ала аинтерес зҵоу аицәажәарахь унанагар алшоит. Алҵшәа аазго алагамҭақәа аамҭалеи ҵакылеи еиԥшымзар ауеит, аха ус акәзаргьы акрыфара угәазырԥхо афатә афҩы еиԥш, урҭ заа рызхәыцра аҭахуп, насгьы «ирхиатәуп» (Ажәам. 15:28). Ишԥархиатәу алҵшәа бзиа аазго алагамҭа?
2. Ишԥархиатәу аинтерес узцәырызго алагамҭа?
2 Иалх аинтерес зҵоу атема. Алагамҭа ауаҩы аинтерес изцәырнагозар ауп, мамзар иуацәажәо аицәажәара ҿахиҵәар илшоит. Убри аҟынтә заа урызхәыц уахьынхо аҭыԥаҿы зинтерес рымоу атемақәа. Аиҳабыра бзиа? Насыԥ змоу аҭаацәаратә ԥсҭазаара? Аибашьрақәа рҵыхәтәа? Ауаа реиҳараҩык ргәаанагара аҳәара бзиа рбоит аҟынтә, акраҵанакуеит ргәаанагара уеилзыркаауа азҵаара архиара. Ухы иаурхәар ҟалоит «Ҳаҳратә маҵзура» аҟны иану адгаларақәа руак, насгьы уахьынхо аҭыԥ иақәшәартә иҟауҵар улшоит. Убасгьы алагамҭақәа уҽырзыҟауҵар улшоит аҭаацәаратә мҵахырхәара аан.
3. Ишԥархиатәу алагамҭа, ҳахьынхо аҭыԥаҿы иҟоу ауаа ркультуреи рдинхаҵареи ҳрызхәыцны?
3 Урызхәыцла акультуреи адинхаҵареи. Культурақәак рҿы иаԥуп ауаҩы дыззааз иаразнак аҳәара, даҽаџьара — раԥхьа иԥсҭазаашьа иазҵаауеит, ма инеиз ауаҩы хәыҷӡак иԥсҭазаашьа далацәажәоит. Ауаа ирымоу агәрахаҵара ҳназхәыцны иахьынхозаалакгьы, зны-зынла иаразнак Абиблиа аӡбахә ҳҳәар ҟалоит (Аус. 2:14—17). Аха ауаа ақьырсианра ахьныҟәрымго, ма адинхаҵара зынӡа иахьазхьамԥшуа ҭыԥқәак рҿы, еиӷьхоит Абиблиа аӡбахә даҽазны ҳаннеиуа иаҳҳәар (Аус. 17:22—31).
4. Изызхәыцтәузеи, ҳазлалаго ажәақәа анҳархио?
4 Ҳазлалаго ажәақәа. Ибзианы урызхәыц узлалаго ажәақәа. Еиӷьхоит икьаҿу, имариоу аҳәоуқәа ҳхы иаҳархәалар. Иара убасгьы урҭ шуҳәо акраҵанакуеит. Аԥсы ахаҵаны иҳәала. Ухаҿсахьа ианыԥшуазароуп ауаҩы гәыкала ушизыҟоу, иара иахь аинтерес шумоу. Арҭ алабжьарақәа ҳхы иархәаны, ҳара иҳалшоит «акрыфара угәазырԥхо» алагамҭақәа рырхиара, ауаа «Иҳақәиҭу иеишәа», даҽакала иуҳәозар Иегова иҳаиҭо адоуҳатә фатәы адкылара ргәазырԥхо (1 Кор. 10:21).