Урыцхраала илашәу ауаа Иегова изку аиаша аилкаара

1. Ишԥааирԥши Иисус арыцҳашьара илашәыз ауаа рахь?

¹ Иисус иԥсра мышқәак агуп. Иара Иерихонынтәи даныгьежьуаз аамҭазы, ҩыџьа алашәцәа изҿырҭуеит: «Ҳрыцҳашьа, Иҳақәиҭу, Давид Иԥа!» Иисус ихәыцрақәа зегь изыԥшыз аԥышәарақәа ишрызкызгьы, иара даангыланы ирызҿиҭуеит иааигәа иааирц, нас ихәышәтәуеит (Матф. 20:29—34). Ишԥаҳалшо ҳара Иисус иҿыԥшра, илашәу ауаа рахь арыцҳашьара аарԥшуа?

2. Ишԥаҳалшо илашәу ауаҩы шаҳаҭра иҭара, амҩан дҳақәшәазар?

² Ацхыраара рыдгалала. Иаҳҳәап амҩан илашәу ауаҩы дуԥылазар, аԥсшәа иаҳәа, ухы ирдыр, насгьы ацхыраара идгал. Раԥхьа угәра имгар алшоит, избанзар илашәу ауаа лассы-лассы амцҳәаҩцәа иржьоит. Аха угәаартреи угәрагареи рыла уара ауаҩы дузыӡырҩыртә агәаҳәара изцәыругар улшоит. Иухоумыршҭын, алашәцәа зегь еиԥшӡам, аӡәы еиҳа еиӷьны ибозар алшоит даҽаӡәы иаасҭа, насгьы ирҭаху ацхыраара еиԥшӡам. Уанрыцхраалак ашьҭахь иуҳәар улшоит абиблиатә рҵаратә ус ушалахәу. Уиҳәа азин уиҭарц уизаԥхьарц абиблиатә жәеинраала иаҳҳәап, Ԥсалом 146:8, ма Исаиа 35:5, 6. Иара Браиль исистема ала аԥхьашьа идыруазар, уиазҵаа иҭахума еиҳа еиӷьны Абиблиа аилкааразы, Браиль ашрифт ала иҟоу апубликациақәа иоурц. Иара убас уицхраар улшоит ҳсаит аҟынтә аудиофаилқәа рыхҩылаара. Иара ихы иаирхәозар аекран аҟынтә аԥхьара ахьалшо апрограмма змоу акомпиутер, усҟан иара иҭаххар алшоит ҳсаит аҿы иҟоу икьыԥхьу астатиақәеи, RTF аформат ала ихуҩылаар алшо апубликациақәеи ихы иаирхәарц. (Уахә. арамка «Илашәу ацхыраара идгало...».)

3. Ишԥаԥшаалатәу шәахьынхо аҭыԥ аҿы инхо илашәу ауаа?

³ Илашәу ԥшаала. Ҩнаҭацыԥхьаӡа ажәабжь анаҳҳәо ҳара шамахамзар илашәу ауаа ҳԥылаӡом, избанзар урҭ ирзымдыруа ауаа ашә рзаадыртӡом. Убри азы имаҷымкәа аҽазышәарақәа аҭахуп урҭ реиԥш иҟоу ауаа рыԥшаареи шаҳаҭра рыҭареи азы (Матф. 10:11). Иҟоума аус уцызуа, мамзаргьы аҵара уцызҵо ауаа рыбжьара илашәу ауаа? Урҭ урацәажәарц азы алшара ԥшаа. Шәеизара атерриториаҿы иҟазар илашәу ауаа рзы ашкол, ирыдгал ашколтә библиотеказы Браиль ишрифт ала икьыԥхьу апубликациақәа. Иудыруа ауаа илашәу аҭынхацәа рымоума? Иҟоума шәара шәахьынхо атерриториаҿы алашәцәа ацхыраара рызҭо аорганизациақәа, мамзаргьы алашәцәа ахьынхо абыргцәа рыҩнқәа? Аҭынха, амаӡаныҟәгаҩ, ма адиреқтор иеилуркаар улшоит Иегова ишаҳаҭцәа алашәцәа ирыцхраарц шырҭаху, нас идугалар улшоит Браиль ишрифт ала икьыԥхьу алитература, мамзаргьы аудионҵамҭа изаагара. Ирба Абиблиаҿы иану Анцәа иқәыргәыӷра, иаарласны илашәу ауаа ирбо ишыҟало. Дахәаурԥшыр улшоит умобилтә хархәагала авидеоролик «Исыздырам уи ада иҟасҵалоз!» ҳәа хьӡыс измоу, Браиль ишрифт ала Абиблиа аԥхьара ахәарҭа́ ззаанаго илашәу ахаҵа изку. Урҭ узнеиз ахықәкы бзианы идеилуркаар, иҟалап азин урҭар анаҩсан илашәу ауаа рахь анеира.

4. Иаҳнарҵозеи ҳара Џьанеҭ дзықәшәаз ахҭыс?

⁴ Џьанеҭ зыхьӡу илашәу аиаҳәшьа даҭааит илашәу ауаа ахьынхоз абыргцәа рыҩны. Лара иқәыԥшыз ԥҳәыск лацәажәара далагеит. Џьанеҭ уи илалҳәеит: «Иисус алашәцәа ирбо изыҟаиҵоз, илашәу ауаа зегь рзы ҳаԥхьаҟа иҟаиҵо ҳирбарц азы ауп». Дара Аатра 21:3,4 иахцәажәеит, нас Џьанеҭ аԥҳәыс илеиллыркааит уи ақәыргәыӷра шынаӡо Анцәа Иаҳра абзоурала. Уи аԥҳәыс даахәыцын, ус лҳәеит: «Арҭ рҩызцәа ажәақәа илашәу ауаҩы иҟынтә раԥхьаӡа акәны исаҳауеит. Илашәым ауаа реиҳараҩык ргәы иаанагоит, алашәра — ари алашәцәа, ма рҭынхацәа иҟарҵаз агәнаҳазы хьырхәроуп ҳәа». Џьанеҭ уи аԥҳәыс аелеқтронтә ԥошьҭала илзылҭиит ашәҟәы «Иаҳнарҵаҵәҟьозеи Абиблиа» ахь ахьарԥш, уажәшьҭа дара мчыбжьыкахь ҩынтә Абиблиа аҵара мҩаԥыргоит.

5. Избан илашәу ауаа рахь арыцҳашьара ааҳарԥшлар зҳахәҭоу, Иисус иеиԥш урҭ рыхәышәтәра шҳалымшогьы?

⁵ Ҳәарада ҳара Иисус иеиԥш иаҳзыҟаҵаӡом илашәу ирбалартә, аха ҳара иҳалшоит ари адунеи анцәа зыхшыҩ ирлашәыз ауаа, илашәугьы уахь иналаҵаны, Анцәа Иажәа аҟынтә аиаша деилҳаркаар (2 Кор. 4:4). Иисус Иерихон азааигәара иԥылаз ҩыџьа алашәцәа ихәышәтәит, избанзар урҭ рыцҳаишьеит (Матф. 20:34). Ҳаргьы убас еиԥш илашәу ауаа рахь арыцҳашьара ааҳарԥшлар, иҟалап урҭ рахьтә аӡәырҩы, алашәра аҵыхәтәа ԥызҵәо Иегова иӡбахә реилыркаара ҳалшар.