Ҳара аԥсҭалара шыҟало агәра ҳгоит!

1, 2. Изықәгәыӷуазеи Иегова имаҵзуҩцәа?

АУАҨЫ гәыӷрада дзынхом. Шьоукы рҭаацәалазаара насыԥ рзаанагалоит, насгьы рхәыҷқәа агәабзиара бзиа роуеит ҳәа игәыӷуеит, егьырҭ — ачымазара ӷәӷәа иаиааиуеит ҳәа. Ҳәарада, ҳаргьы уи ҳақәгәыӷуазар ҟалоит. Аха еиҳарак ҳгәыӷра зыдҳәалоу уи акәӡам. Ҳара наӡаӡа ҳшынхало, насгьы иԥсхьоу ҳауацәеи ҳҭынхацәеи рыԥсы шҭало ҳақәгәыӷуеит.

² Апостол Павел иҳәеит: «Агәыӷра сымоуп... Анцәа ииаша-ҵабыргу рнаҩсангьы, агәнаҳа змоу иреиуоугьы иԥсхьоу рахьтә [иширгылауа]» (Аус. 24:15). Аԥсҭалара шыҟало раԥхьа изҳәаз Павел иакәӡамызт. Иара иаԥхьа инхоз апатриарх Иовгьы уи дақәгәыӷуан. Иара агәра ганы дыҟан дыԥсыргьы Анцәа дшихамышҭуаз, насгьы иԥсы шҭеиҵоз (Иов 14:7—10, 12—15).

3. Хәарҭас иаҳзаанагозеи 1 Коринфаа рахь 15-тәи ахы?

³ Аԥсцәа рыԥсы шҭало иазку аҵабырг ихадоу ақьырсиантә ҵабыргқәа ируакуп (Аур. 6:1, 2). Актәи Коринфаа рахь 15-тәи ахаҿы Павел аԥсҭалара далацәажәеит. Уа иара ииҩыз раԥхьатәи ақьырсианцәа ргәы шьҭнахзар ҟалап. Аԥсҭалара шыҟало агәра ҳгоижьҭеи шаҟа ҵуазаалакгьы, 1 Коринфаа рахь 15-тәи ахы иану ҳаргьы ҳгәы шьҭнахуеит, насгьы ҳгәыӷра хымԥада ишынаӡо ала ҳагәрагара арӷәӷәоит.

4. Избан иԥсхьоу ҳауацәеи ҳҭынхацәеи рыԥсы шҭало агәра ганы ҳзыҟоу?

⁴ Иисус Христос иԥсы ахьҭалаз ишьақәнарӷәӷәоит иԥсхьоу ҳауацәеи ҳҭынхацәеи рыԥсы шҭало. Уи Павел коринфаа ирылаирҵәоз ажәабжь бзиа иахәҭакын (1 Кор. 15:1, 2). Иара иҳәеит ақьырсиан Христос иԥсы шҭалаз хеимҵозҭгьы, игәрахаҵара акгьы шаанамгоз (1 Кор. 15:17). Христос иԥсы ахьҭалаз аԥсҭалара шыҟало агәра ҳнаргоит.

5, 6. Иҳаилнаркаауазеи 1 Коринфаа рахь 15:3, 4 иану?

⁵ Павел аԥсҭалара ахцәажәара далагаанӡа х-фактк еиқәиԥхьаӡеит: Христос ҳагәнаҳақәа рзы дыԥсит, дыржит, «ахымыш рыҽны, Аҩыра ишаҳәоз ала, дыбзахеит, дгылт». (Шәаԥхьа 1 Коринфаа рахь 15:3, 4.)

⁶ Избан ҳара ҳзы арҭ афактқәа зхадоу? Аԥааимбар Исаиа иҳәеит адгьыл иқәынхо Мессиа дыршьуеит, насгьы ацәгьоуцәа дрыцыржуеит ҳәа. Аха уи адагьы, Исаиа иҳәеит Мессиа аӡәырҩы рыгәнаҳақәа шигоз. Ари аԥааимбаражәа наӡеит Иисус ҳагәнаҳақәа рҟынтә ҳҿихырц азы иԥсы анҳахҭниҵа (Ис. 53:8, 9, 12; Матф. 20:28; Рим. 5:8). Ус анакәха, Иисус дахьыԥсыз, дахьыржыз, насгьы иԥсы ахьҭалаз агәнаҳаи аԥсреи рҟынтә ахақәиҭра ҳаур шҳалшо, иара убас иԥсхьоу рыԥсы шҭало шьақәнарӷәӷәоит.

АӠӘЫРҨЫ РЫШАҲАҬРА

7, 8. Избан ҳара Иисус иԥсы шҭалаҵәҟьаз агәра ҳгар зҳалшо?

⁷ Ишаҳҳәаз еиԥш, ҳара аԥсҭалара агәра заҳго Иисус иԥсы ахьҭалаз азоуп. Убри аҟынтә уи агәра гаҵәҟьаны ҳаҟазароуп. Избан Иегова Иисус иԥсы шҭеиҵаз агәра ганы ҳаҟазар зҳалшо?

⁸ Иисус иԥсы шҭалаз зыблала избаз, насгьы уи шаҳаҭра азызуаз рацәан (1 Кор. 15:5—7). Павел еиқәиԥхьаӡаз ашаҳаҭцәа рҟынтә раԥхьа Кифа (Пиотр) иӡбахә иҳәеит. Пиотр зыԥсы ҭалаз Иисус дшибаз егьырҭ аҵаҩцәагьы ирҳәеит (Лука 24:33, 34). Анаҩс Павел иҳәеит зыԥсы ҭалаз Иисус жәаҩаҩык апостолцәагьы дшырбаз. «Ашьҭахь... зхыԥхьаӡара хәышәҩык иреиҳаз аишьцәа дрызцәырҵит». Иҟалап уи Матфеи 28:16—20 аҿы зыӡбахә ану агәырӷьара зҵаз аиқәшәараҿы акәзар иахьыҟалаз. Анаҩс Павел иҳәеит Иисус Иаков дизцәырҵит ҳәа. Ара Павел зыӡбахә иҳәаз Иисус иашьа иакәзар ҟалап. Уи уаанӡа Иисус Мессиа шиакәыз агәра игомызт (Иоанн 7:5). Аха иԥсы шҭалаз аниба ашьҭахь игәра игеит. 55 шықәса аҟара ҳ. ҳ. азы Павел ари асаламшәҟәы аниҩуаз, зыԥсы ҭалаз Иисус дызбаз аӡәырҩы рыԥсы ҭан. Убри аҟынтә уи агәра агара зцәыцәгьаз дарбанзаалак урҭ дрыдҵаалар илшон.

9. Ишԥашьақәнарӷәӷәеи Аусқәа 9:3—5 иану Павел дзықәшәаз ахҭыс Иисус иԥсы шҭалаз?

⁹ Ԥыҭрак ашьҭахь Павел ихаҭа зыԥсы ҭалаз Иисус дибеит (1 Кор. 15:8). Павел (усҟан Савл) Дамаскҟа амҩа данықәыз зыԥсы ҭалаз Иисус ибжьы иаҳаит, ажәҩан аҿы имоу хьӡи-ԥшеигьы ибеит. (Шәаԥхьа Аусқәа 9:3—5.) Уи ахҭысгьы Иисус иԥсы шҭалаҵәҟьаз шьақәнарӷәӷәеит (Аус. 26:12—15).

10. Иҟаиҵози Павел Иисус иԥсы шҭалаз агәра анига ашьҭахь?

¹⁰ Павел зыԥсы ҭалаз Иисус дахьибаз, насгьы уи ахьиҳәоз шьоукы рзы еиҳагьы аинтерес аҵан, избанзар уаанӡа иара ақьырсианцәа дрышьҭашәарыцон. Аха Иисус иԥсы шҭалаз агәра анига ашьҭахь, уи аҵабырг ауаа рҟынӡа инеигарц азы ихы деигӡомызт. Иисус дшыԥсыз, аха иԥсы шҭалаз ахьиҳәоз азы иара дрыпҟон, абахҭа дҭаркуан. Уи адагьы, уи ажәабжь ауаа рҟынӡа инеигарц азы амҩа данықәыз аӷбаӡааҟәрыларақәа дрықәшәахьан (1 Кор. 15:9—11; 2 Кор. 11:23—27). Павел Иисус иԥсы шҭалаз агәра гаҵәҟьаны дыҟан, убри аҟынтә уи аҵабырг ауаа рҟынӡа инеигарц азы аԥсрагьы дазхиан. Агәра шәыдмыргаӡои Иисус иԥсы шҭалаз збаз ашаҳаҭцәа ражәақәа Анцәа Иисус иԥсы шҭеиҵаҵәҟьаз? Иамырӷәӷәаӡои уи аԥсҭалара иадҳәалоу шәгәыӷра?

ИИАШАМ АГӘААНАГАРАҚӘА

11. Избан Коринф инхоз ақьырсианцәа шьоукы аԥсҭалара агәра зырымгоз?

¹¹ Бырзентәыла иаҵанакуаз ақалақь Коринф инхоз ақьырсианцәа шьоукы аԥсҭалара иазкны ииашам агәаанагарақәа рыман. Шьоукы «иԥсыз гылашьа имам» ҳәагьы рҳәон. Избан? (1 Кор. 15:12). Иҟалап дара Афинақәа рҿы инхоз афилософцәа рхәыцшьа рнырзар. Урҭ Иисус иԥсы ҭалеит ҳәа зҳәоз зегьы ирхыччон (Аус. 17:18, 31, 32). Егьырҭ ақьырсианцәа аԥсҭалара иаанаго даҽакуп ҳәа рыԥхьаӡон. Дара ргәанала агәнаҳа иаҵаз ауаа аԥсцәа реиԥш иԥхьаӡан, аха ақьырсианра анрыдыркыла ашьҭахь рыгәнаҳақәа ахьранажьыз абзоурала зыԥсы ҭалаз реиԥш иԥхьаӡахеит. Ишыҟазаалакгьы, дара аԥсҭалара агәра ахьырымгоз иаанарԥшуан Иисус иԥсы шҭалаз агәра шырымгоз, убри аҟынтә рыгәрахаҵара акгьы иаԥсамызт. Анцәа Иисус иԥсы ҭеимҵазҭгьы, дара зегьы агәнаҳа ишаҵаз иаанхон, анажьрагьы роуамызт. Убри аҟынтә аԥсҭалара агәра зымгоз агәыӷра ҳәа акгьы рымамызт (1 Кор. 15:13—19; Аур. 9:12, 14).

12. Ишԥаҳаилнаркаауеи 1 Пиотр 3:18, 22 иану Иисус иԥсҭалареи иара иҟынӡа зыԥсы ҭаҵаз рыԥсҭалареи шеиԥшымыз?

¹² Павел иблақәа рыла зыԥсы ҭалаз Иисус дибеит. Анцәа Иисус иԥсы ҭеиҵаанӡагьы адгьыл аҿы ауаа рыԥсы ҭеиҵахьан, аха урҭ уеизгьы иԥсит. Убри аҟынтә Иисус иԥсҭалареи урҭ рыԥсҭалареи зынӡаск еиԥшӡамызт. Павел иҳәеит Иисус «иԥсхьоу зегь рахьтә раԥхьаӡа ибзахаз, игылаз» иоуп ҳәа. Избан Павел Иисус иоуп раԥхьаӡа ибзахаз ҳәа зиҳәаз? Избанзар иара иоуп раԥхьаӡакәны адоуҳатә шамҭа еиԥш зыԥсы ҭаҵаз, насгьы ажәҩан ахь ихалаз (1 Кор. 15:20; Аус. 26:23; шәаԥхьа 1 Пиотр 3:18, 22).

ЗЫԤСЫ ҬАҴАХО

13. Излеиԥшымзеи Адами Иисуси, Павел ииҳәаз инақәыршәаны?

¹³ Иалшома аӡәызаҵәык иԥсра миллионҩыла ауаа аԥсҭазаара рнаҭар? Павел уи ҟалашьас иамоу ҳаилиркааит. Иара иҳәеит Адам иҟаиҵаз иалҵшәахази Христос иԥсхҭынҵара иалҵшәахази злеиԥшым. Адам изкны Павел иҩит: «Аԥсра уаҩык ила [иааит]». Адам агәнаҳа аныҟаиҵа ихгьы ихылҵраны иҟазгьы аԥсра иҭаиргылеит. Иара имӡырҩра иахҟьаны иахьа уажәраанӡагьы агәаҟра ҳаҿуп. Аха Анцәа Иԥа иԥсы ахьҭеиҵаз абзоурала иԥсхьоу ҿыц инхалар рылшоит! Павел иациҵеит: «Абзахарагьы убас аӡә ила иааит. Адам иҟны зегь шыԥсыз еиԥш, Христос иҿы зегьы рыԥсы ҭалоит» (1 Кор. 15:21, 22).

14. Иԥсы ҭеиҵома Анцәа Адам? Иҳаилшәыркаа.

¹⁴ Ииҳәарц ииҭахызи Павел «Адам иҟны зегь [ԥсуеит]» ҳәа аниҳәаз? Ара Павел зыӡбахә иҳәоз Адам ихылҵыз роуп. Дара агәнаҳаи анамӡареи рҭынхеит аҟынтә иԥсуеит (Рим. 5:12). Адам зыԥсы ҭаҵахо рыбжьара дҟалом. Христос иԥсхҭынҵара уи игәнаҳа хнаҩаӡом, избанзар иара дшынаӡазгьы, Анцәа дизымӡырҩӡеит. Адам иԥеиԥшхаз рԥеиԥшхоит «Ауаҩытәыҩса Иԥа» «аџьмақәа» реиԥш ииԥхьаӡо ауаа. Дара наӡаӡа иқәгахоит (Матф. 25:31—33, 46; Аур. 5:9).

15. Изҵанакуада 1 Коринфаа рахь 15:22 иану ажәақәа?

¹⁵ Павел иҳәеит «Христос иҿы зегьы рыԥсы ҭалоит» ҳәа (1 Кор. 15:22). Иара ари асаламшәҟәы ззиҩуаз Коринф инхоз, иԥшьоу адоуҳала иалхыз, насгьы жәҩантәи аԥсҭазааразы зыԥсы ҭаҵахоз ақьырсианцәа ракәын. Павел урҭ «Христос Иисус ила ирлашоу» ҳәа рзиҳәеит. «Христос ихаҵара зманы [иԥсыз]» ҳәа зыӡбахә иҳәазгьы, иԥшьоу адоуҳала иалхыз ақьырсианцәа роуп (1 Кор. 1:2; 15:18; 2 Кор. 5:17). Иԥшьоу адоуҳа ацхыраарала Павел ииҩыз даҽа саламшәҟәык аҿы иҳәеит Иисус иеиԥш иԥсыз Иисус иеиԥш рыԥсы ҭаҵахоит ҳәа (Рим. 6:3—5). Анцәа Иисус адоуҳатә шамҭа еиԥш иԥсы ҭеиҵеит, насгьы ажәҩанахь дигеит. Ус анакәха, иԥшьоу адоуҳала иалху Христос иҵаҩцәагьы ирԥеиԥшу уи ауп.

16. Избан Павел Христос иоуп «раԥхьаӡа ибзахаз» ҳәа зиҳәаз?

¹⁶ Павел иҳәеит Христос «иԥсхьоу зегь рахьтә раԥхьаӡа ибзахаз» иоуп ҳәа. Ҳәарада, Анцәа Иисус иԥсы ҭеиҵаанӡагьы Лазарьи егьырҭ ауааи рыԥсы ҭеиҵахьан, аха Иисус иоуп раԥхьаӡакәны адоуҳатә шамҭа еиԥш зыԥсы ҭаҵаз, насгьы наунагӡатәи аԥсҭазаара зауз. Иисус израильаа Анцәа изнаргоз раԥхьатәи аҽаҩра даҿҳарԥшыр ҳалшоит. Уи адагьы, Павел Иисус «раԥхьаӡа ибзахаз» ҳәа ахьизиҳәаз иаҳнарбоит ажәҩан аҿы анхаразы зыԥсы ҭаҵахоз иара заҵәык шиакәмыз. Апостолцәеи иԥшьоу адоуҳала иалхыз егьырҭ аҵаҩцәеи Христос иеиԥш ажәҩан аҿы инхаларц азы рыԥсы ҭалар акәын.

17. Ироураны ианбаҟаз иԥшьоу адоуҳала иалхыз ақьырсианцәа жәҩантәи аҳамҭа?

¹⁷ Павел коринфаа асаламшәҟәы анырзиҩуаз иԥшьоу адоуҳала иалхыз Христос иҵаҩцәа рҟынтә аӡәгьы жәҩантәи аԥсҭазааразы иԥсы ҭамлаӡацызт. Ус анакәха, 1 Коринфаа рахь 15:23 иану ажәақәа аниҳәоз иара дызлацәажәоз иҟалараны иҟаз акәын: «Зегьы аамҭа-аамҭала: раԥхьаӡа акәны Христос, нас, Иара иитәу — Иара данаауа аамҭазы» (1 Фес. 4:15, 16). Иахьа ҳара Христос дааины даныҟоу аамҭазы ҳанхоит. Ааи, апостолцәеи иԥшьоу адоуҳала иалхыз егьырҭ аҵаҩцәеи жәҩантәи аҳамҭа роурц, насгьы Христос ицҟаларц азы данааиуаз аамҭа иазыԥшыр акәын.

ҲГӘЫӶРА ХЫМԤАДА ИНАӠОИТ!

18. а) Избан жәҩантәи аԥсҭалара адагьы, даҽа ԥсҭаларак ҟалоит ҳәа ҳҳәар зҳалшо? б) Иҟалозеи ажәҩан аҿы 1 Коринфаа рахь 15:24—26 иану инақәыршәаны?

¹⁸ Аха ирзыԥшузеи жәҩантәи агәыӷра змам Анцәа изиашоу ақьырсианцәа? Даргьы аԥсҭалара иақәгәыӷуеит. Абиблиа иануп Павели жәҩантәи агәыӷра змаз егьырҭ ақьырсианцәеи «заа иҟало аԥсҭалара» роураны ишыҟаз (Флп. 3:11). Иаҳнамырбаӡои уи даҽа ԥсҭаларакгьы ҟалараны ишыҟоу? Иов уи агәра игон (Иов 14:15). Иаарласны Иисус «еиҳабырас иҟоу зегьы, мычрас иҟоу зегьы аԥихуеит». Уи аамҭазы «иара иитәу» ажәҩан аҿы ицзаауеит. Анаҩс «иаԥихуеит аҵыхәтәантәи иаӷагьы — аԥсра». Ааи, жәҩантәи аԥсҭазааразы зыԥсы ҭаҵахо ахаан иԥсӡом. Аха иаҳҳәар ҳалшозеи егьырҭ ирызкны? (Шәаԥхьа 1 Коринфаа рахь 15:24—26.)

19. Изықәгәыӷлар рылшозеи адгьыл аҿы анхаразы агәыӷра змоу?

¹⁹ Изықәгәыӷлар рылшозеи адгьыл аҿы анхаразы агәыӷра змоу? Дара Павел ииҳәаз шынаӡо агәра ганы иҟазар рылшоит: «Агәыӷра сымоуп... Анцәа ииаша-ҵабыргу рнаҩсангьы, агәнаҳа змоу иреиуоугьы иԥсхьоу рахьтә [иширгылауа]» (Аус. 24:15). Еилкаауп ажәҩан ахь агәнаҳа змоу иреиуоу дышзымцо, ус анакәха, ара зыӡбахә ҳәо адгьыл аҿы иҟало аԥсҭалара ауп.

20. Ишԥарӷәӷәеи ари астатиа аԥсҭалара иадҳәалоу шәгәыӷра?

²⁰ Ааи, иԥсхьоу хымԥада рыԥсы ҭалоит! Адгьыл аҿы зыԥсы ҭаҵахо, наунагӡа ара анхаразы агәыӷра роуеит. Шәара уи агәра ганы шәыҟазар шәылшоит. Иԥсхьоу шәыуацәеи шәҭынхацәеи шәанрызхәыцуа ари агәыӷра шәгәы арԥхоит. Дара рыԥсы ҭаҵахоит Христос аҳра ицзулои иареи 1 000 шықәса аҳра аныруло (Аат. 20:6). Зқьышықәсатәи Христос инапхгара алагаанӡа шәыԥсыргьы, усҟан шәыԥсы шҭало агәра ганы шәыҟазар шәылшоит. Ҳара «Анцәа амала баша ҳиқәгәыӷуам» (Рим. 5:5). Ҳгәыӷра ҳмаҵзураҿы амчи агәырӷьареи ҳнаҭоит. Аха 1 Коринфаа рахь 15-тәи ахы иаҳнарҵо уи мацара акәӡам.