1921 — Шәышықәса раԥхьа
«Иарбан усу сынтәа инаҳагӡар акәу?» Ари азҵаара Абиблиа аҭҵааҩцәа зегьы ирыҭан ианвар 1, 1921 шықәсазы иҭыҵыз «Ахьчаратә бааш» аҿы. Азҵаара аҭак Исаиа 61:1, 2 (АдҾ) аҟынтә иааган. Уи дара иргәаланаршәеит ажәабжьҳәара дҵас ишрыдыз. «Иегова ауаа ҟәымшәышәқәа ажәабжь бзиа рзеиҭасҳәаларц азы салихит. ...Иегова арыцҳашьара анааирԥшуа ашықәс шааиз, насгьы Ҳанцәа ишьоура амш шааиз рыласҳәарц».
АГӘЫМШӘАРА ЗЛОУ АЖӘАБЖЬҲӘАҨЦӘА
Абиблиа аҭҵааҩцәа ирыдыз адҵа анагӡаразы агәымшәара рҭахын. Дара ауаа ҟәымшәышәқәа ажәабжь бзиа рылаҳәара адагьы, ацәгьара ҟазҵозгьы Анцәа «ишьоура амш шааиз» рыларҳәалар акәын.
Канада инхоз аиашьа Џьон Хоскин агәымшәара злаз жәабжьҳәаҩын. Зны ааԥын, 1921 шықәсазы иара аметодистцәа руахәама амаҵзуҩы диқәшәеит. Џьон уи ус иеиҳәеит: «Шәааи ҭынч Абиблиа ҳалацәажәап. Зҵаарақәак рҿы ҳгәаанагарақәа еиқәымшәаргьы, ажәа еимамккәа ҭынч ҳаиԥырҵып». Аха ус иалымҵӡеит. Аиашьа Хоскин игәалашәоит: «Минуҭқәакгьы мҵӡацызт еиԥш иара игәы ԥжәаны убас ашә кыдиҟьеит, иҭагылаз асаркьа ԥыххааса ицоз џьысшьеит».
«Уи Анцәа дыззымдыруа ирзеиҭаҳәала!» — сықәҿиҭит иара. Џьон ҿимҭӡеит, аха игәы иаанагеит: «Ухаҭагьы урҭ уреиуами!»
Аха аметодист уи аҿы даанымгылаӡеит. Аиашьа Хоскин излеиҳәаз ала, адырҩаҽны уи ахаҵа иуахәама иаҭаауаз ауаа иреиҳәеит, Џьон уи ақалақь аҿы зеиԥшҟамлац ацәгьаҟаҵаҩ иакәушәа, насгьы игәыдҵан дышьтәуп ҳәа. Аха ҳашьа уи дамыршәаӡеит. Иара анаҩсгьы ажәабжь иҳәон, ақәҿиарагьы иман. Џьон еиҭеиҳәоит: «Усҟан ажәабжьҳәара алҵшәа бзиақәа аанагон. Амаҵзураҿы шьоукы ус сарҳәон: „Уара Анцәа ихаҭа уаҳзааишьҭит!“ Дара ак сыгхар ҳәа ишәаны ацхыраара сыдыргалон».
ХАҬАЛАТӘИ АҬҴААРЕИ АҬААЦӘАРАТӘ МҴАХЫРХӘАРЕИ
Аҵабырг ахь аинтерес аазырԥшуаз ауаа доуҳала аизҳара ирыцхраарц азы, Абиблиа аҭҵааҩцәа ажурнал «Золотой век»a аҿы еиуеиԥшым арҵаратә программақәа ркьыԥхьуан. Иаҳҳәап, уа иааган аҭаацәа ирыцхраауаз арубрика «Юные исследователи Библии». Анацәеи абацәеи рхәыҷқәа уа иаагаз азҵаарақәа рырҭон, нас Абиблиаҿы аҭак аԥшаара ирыцхраауан. Зҵаарақәак зынӡа имариан, иаҳҳәап: «Заҟа шәҟәы ыҟоузеи Абиблиаҿы?» Егьырҭ азҵаарақәа, аҿарацәа гәымшәарыла ажәабжь аҳәара иазыҟанаҵон. Иаҳҳәап, абри аҩыза азҵаара: «Ирықәшәалома ақьырсианцәа зегьы ашьҭашәарыцарақәа?»
Иара убас иркьыԥхьуан арубрика «Углублённый курс изучения Божьего плана веков». Уа еиҳа иҵаулаз атемақәа уеилзыркаауаз азҵаарақәа еилдыргон. Азхәыцрақәа ааган ашәҟәы «Исследования Писания» актәи атом аҟынтә. Урҭ арубрикақәа рыҩбагьы зықьҩыла аԥхьаҩцәа ахәарҭа рзаанагеит. Аха декабр 21, 1921 шықәсазы иҭыҵыз «Золотой век» аҭыжьымҭаҿы ианын урҭ арубрикақәа уаҳа ишыркьымԥхьло. Аха избан?
АШӘҞӘ ҾЫЦ!
Ашәҟәы «Арфа Божия»
Акарточка-агәылаҵа изыԥхьатәыз адаҟьақәа анҵаны
Ҳаҭалатәи аҭҵааразы азҵаарақәа зныз акарточка
Анапхгара зуаз аишьцәа еилыркааит аҵабырг ахь аинтерес аазырԥшуаз ауаа Абиблиа дырҵаразы, уи еиҿкааны ишыҟаҵалатәу. Убри аҟынтә, ноиабр мза, 1921 шықәсазы «Арфа Божия» захьӡыз ашәҟәы ҭыжьын. Уи згоз ауаҩы ихаҭа дызхысыр илшоз абиблиатә курс ахь дҭарыҩуан. Уи акурс аԥхьаҩцәа иреилнаркаауан Анцәа ауаа наӡаӡатәи аԥсҭазаара рыҭара гәҭакыс ишимоу. Ишԥамҩаԥысуаз уи арҵара?
Ашәҟәы иацны ауаҩы иоуан акарточка-агәылаҵа. Уа изыԥхьатәыз адаҟьақәа анын. Мчыбжьык ашьҭахь ауаҩы ԥошьҭала даҽа карточкак иоуан. Уа дзыԥхьаз аматериал иазкны азҵаарақәа ааган. Иара убас уаҟа иааиуа амчыбжь азы дзыԥхьаша адҵа анын.
Уи акурс 12 мчыбжь азалхын. Аҭыԥантәи Абиблиа аҭҵааҩцәа рыкружок (усҟан ус акәын аизарақәа ишрыхьӡыз) есымчыбжьа адҵа зныз иҿыцыз акарточка ауаҩы изырышьҭуан. Уи адҵа еиҳарак изырҭоз зықәрахь инеихьаз, ма ачымазара иахҟьаны аҩны издәылымҵуаз аишьцәеи аиҳәшьцәеи ракәын. Абар Милвеил (аштат Пенсильваниа) инхоз Анна Гарднер илҳәаз: «Саҳәшьа Теил дызныҟәаӡомызт. Аха ашәҟәы „Арфа Божия“ абзоурала лара еиҳаны ажәабжь аҳәара алшара лоуит. Уи Абиблиа зҵоз азҵаарақәа зныз акарточкақәа рзылышьҭуан». Ауаҩы акурс даналгалак ашьҭахь аҭыԥантәи акружок аҟынтә аӡәы диҭаауан, еиҳа еиӷьны Абиблиа аилкаара дицхраарц азы.
Теил Гарднер аинвалидцәа рҟәардә дантәаланы
ИҞАҴАТӘУ РАЦӘОУП
1921 шықәса анҵәамҭазы аиашьа Џьозеф Рутерфорд агәыԥқәа зегьы асаламшәҟәы рзиҩит. Уа ианын: «Сынтәа Аҳра иазку ажәабжь ахаан ишыҟамлац еиԥш ирылаҳәан, насгьы аҭагалара аҭоурых аҿы ишыҟамлацыз еиԥш уи ажәабжь ирацәаҩны ауаа ирыцхрааит». Аха иара аишьцәеи аиҳәшьцәеи уи аҿы иаанымгыларц ргәазҭеиҵеит: «Иҟаҳҵаша макьана ирацәоуп. Анцәа дзықәныҳәо ари аус аҿы егьырҭгьы рҽаладырхәларц ргәазҭашәҵала». Аҭоурых излаҳнарбаз ала Абиблиа аҭҵааҩцәа ииҳәаз иазыӡырҩит. 1922 шықәса инаркны урҭ Аҳра иазку ажәабжь еиҳагьы гәацԥыҳәаралеи гәымшәаралеи ирҳәон.
a 1937 шықәсазы ажурнал «Золотой век» «Утешение» ахьӡхеит, 1946 шықәсазы «Пробудитесь!» ахьӡхеит.