Шәышықәса раԥхьа: 1922-тәи ашықәс

«УИ АЗХӘЫЦРАГЬЫ ҲАЦӘШӘОН»

Ажәабжьҳәаратә ус аҽарҭбаауан, убри аҟынтә еиҳаны алитература аҭахын. Бруклинтәи Вефиль аҿы амаҵ зуаз аишьцәа ажурналқәа ркьыԥхьуан, аха зцәа кьакьаз ашәҟәқәа акоммерциатә фирмақәа ракәын изкьыԥхьуаз. Аха урҭгьы ирацәаны амзақәа рыҩныҵҟа уи аус иахьӡаӡомызт. Ашәҟәқәа ҳазхаӡомызт, уи ажәабжьҳәаратә ус иаԥырхаган. Убасҟан аиашьа Рутерфорд, атипографиаҿы инарыгӡоз аусқәа знапы ианыз, Роберт Мартин, диазҵааит, ҳхала ашәҟәқәа ҳкьыԥхьлар иахыуҳәаауазеи ҳәа.

Аиашьа Мартин игәалаиршәон: «Уи азхәыцрагьы ҳацәшәон, избанзар, усҟан атипографиа ҿыц аартны, ҳхала зегь ҟаҳҵалар акәхон: атекст анҵара, „гальванопокрытие“ захьӡу аҟаҵара, акьыԥхьра, насгьы ацәа ахҟьара». Аишьцәа Бруклин иҟаз Конкорд-стрит, 18, аҭыӡҭыԥ ала ахыбра арендала иргеит, насгьы иаҭахыз атехника аархәеит.

Аха уи згәы иамыхәазгьы ҟалеит. Ҳтипографиа даҭааит, уаанӡа ҳашәҟәқәа зкьыԥхьуаз акомпаниа адиректор. Иара иҳәеит: «Шәара шәтипографиа зегь иреиӷьу атипографиақәа иреиуоуп, аха атәы здыруа ҳәа аӡәгьы дшәымаӡам. Шықәсыбжак ала зегь бжьысны ишеилагылазаауа жәбап».

«Иажәақәа рыгәра угартә иҟан, — иҩуан аиашьа Мартин. — Аха иара издырӡомызт, Иҳақәиҭу есымша дышҳацыз». Аиашьа Мартин диашан. Хара имгакәа ҳтипографиа мышкала 2 000 шәҟәы ҭнажьуа иалагеит.

АРАДИОПРОГРАММА ИАЗЫӠЫРҨУАЗ ЗЫҚЬҨЫЛА АУАА

Иегова имаҵзуҩцәа рхала ашәҟәқәа ркьыԥхьра адагьы, агәырӷьажәабжь ауаа рылаҳәаразы аметод ҿыц рхы иадырхәо иалагеит — арадиодырраҭара. 1922 шықәса, февраль 26, амҽыша, аиашьа Рутерфорд раԥхьаӡа акәны арадио ала дықәгылеит. Иара ииҳәаз ажәахә «Миллионы теперь живущих никогда не умрут» ахьӡын, уи атранслиациа Лос-Анџьелес аҟынтә ицон.

Апрограмма 25 000-ҩык раҟара азыӡырҩит. Шьоукы арадиодырраҭаразы ҭабуп ҳәа ахьырҳәоз асаламшәҟәқәа ҳзаарҭиуан. Руак ақалақь Санта-Ана (аштат Калифорниа) аҟынтә Уиллард Ашфорд иаҳзиҩит. Иара аиашьа Рутерфорд ҭабуп ҳәа иеиҳәеит, аинтерес зҵаз иқәгыларазы, насгьы иҳәеит: «Ҳара ҳҭаацәараҿы хҩык чмазҩуп, насгьы аҩны издәылҵӡом. Арадио акәмызҭгьы, шәажәахә ҳаҳараны ҳаҟаӡамызт, уи ахьышәҳәоз ҳгәылара акәзаргьы».

Анаҩстәи амчыбжьқәа рзы егьырҭ адырраҭарақәагьы ыҟан. Ашықәс анҵәамҭазы «Ахьчаратә бааш» аҿы ианын, «арадио ала 300 000-ҩык иреиҵамкәа ажәабжь бзиа шраҳаз».

Урҭ арадиодырраҭарақәа ауаа ишрыдыркылаз Абиблиа аҭҵааҩцәа ргәы шьҭнахит, убри аҟынтә ирыӡбеит бруклинтәи Вефиль иацәыхарамкәа иҟаз адгьылбжьаха Статен аҿы рхатә радиостанциа дыргыларц. Анаҩстәи ашықәсқәа рзы дара уи арадиостанциа, WBBR, рхы иадырхәон, еиуеиԥшым аҭыԥқәа рҿы Аҳра иазку ажәабжь ирацәаҩны ауаа ираҳарц азы.

ADV

1922 шықәса, ииун 15 азы иҭыҵыз «Ахьчаратә бааш» аҿы ирылаҳәан, сентиабр 5 инаркны 13-нӡа Сидар-Поинт аконгресс шымҩаԥысуа. Абиблиа аҭҵааҩцәа Сидар-Поинт ианеиза, зегь гәырӷьаҵәа иҟан.

Апрограмма алагамҭазы аиашьа Рутерфорд еизаз зегьы абас реиҳәеит: «Агәра ганы сыҟоуп Иҳақәиҭу ари аконгресс дшақәныҳәо, насгьы, адунеи аҿы ахаан ишыҟамлац еиԥш, шаҳаҭра шауа». Егьырҭ ажәахәҟаҵаҩцәагьы изныкымкәа ирҳәеит, ажәабжьҳәара шаҭаху.

Ахәаша, сентиабр 8 азы, аиашьа Рутерфорд иажәахә иазыӡырҩырц азы азал аҿы 8 000-ҩык раҟара еизеит. Зегьы азыԥшын, аконгресс апрограммаҿы ианыз анбанқәа ADV ҵакыс ирымоу деилиркаауеит ҳәа. Ҳәарада, рҭыԥқәа анааныркылоз шьоукы игәарҭеит, асцена ахаҿы рулон дук аба шыкнаҳаз. Талса (аштат Оклахома) аҟынтә аконгресс ахь иааз Артур Клаус, апрограмма ибзианы иахьиаҳалоз ҭыԥк иԥшааит. Уи мариамызт, избанзар аконгресс аҿы абжьы ибзианы иузырҳауаз аппаратура ыҟаӡамызт.

Зегьы апрограмма ибзианы иазыӡырҩларц азы, аконгресс ахантәаҩы ирылеиҳәеит, аиашьа Рутерфорд данықәгылало азал ахь аӡәгьы дышзыҩнамло. 9:30 рзы Рутерфорд иажәахә далагеит, Матфеи 4:17 иану Иисус ииҳәаз ажәақәа рыла: «Ажәҩан Аҳра ааскьеит!» Уи Аҳра аӡбахә ауаа ишраҳауа дахцәажәо, иара иҳәеит: «Иисус ихаҭа иҳәеит, данаалак аҽаҩра шҭеигалало, насгьы ииашоу, гәыкала иҟоу ауаа шеизиго».

Аиашьа Клаус ихадоу азал аҿы дтәан. Иара игәалашәоит: «Ҳара ажәакгьы бжьаҳажьыр ҳҭахӡамызт». Аха иаалырҟьаны игәы ҽеимкәа ибан, ддәылҵыр акәхеит. Артур ишиҭахымыз ддәылҵит, азал ахь дышзымхынҳәуаз дырны.

Минуҭқәак рышьҭахь еиҳа деиӷьхеит. Дхынҳәны дшааиуаз азал аҟынтә анапеинҟьабжь ӷәӷәа иаҳаит. Уи еиҳагьы аинтерес изцәырнагеит. Артур иӡбеит, аҭӡамц дхалар акәхаргьы, зеиԥшыҟамыз уи ажәахә зланҵәо еиликаарц. Аиашьа Клаус усҟан 23 шықәса ракәын ихыҵуаз, убри аҟынтә ахыб ахалара изымариан. Саркьала иҟаҵаз аҭуан аҿы ԥенџьыр хәыҷқәак аартын, урҭ данырзааигәаха, игәеиҭеит, ҵаҟа ирҳәоз бзианы ишуаҳауаз.

Аха ахыб аҿы Артур имацара иакәӡамызт иҟаз — уахь иҩызцәақәакгьы неихьан.

Руаӡәк, Френк Џьонсон, дыҩны днеин, диазҵааит:

— Аҳәызба хәыҷ умазар?

— Ишԥасымам! — иҳәеит Артур.

— Уара ула Анцәа ҳаҳәарақәа рҭак ҟаиҵеит! — ҿааиҭит Френк. — Иубома арулон ду? Ари плакатуп. Аӡбаҩa ибзианы уизыӡырҩла. «Шәара ирылашәҳәала, ирылашәҳәала» ҳәа аниҳәалак, арҭ ԥшь-шахак ԥҟа.

Артур аҳәызба кны дыԥшын. Иаарласны аиашьа Рутерфорд иажәахә анҵәамҭахь днеит. Иара ииҳәоз аԥсы ахаҵаны иҳәон. Ибжьы аӷьеҩҳәа игон: «Иҳақәиҭу гәыкала изыҟоу, ииашаҵәҟьоу ишаҳаҭцәа шәакәыз. Вавилон ыҟамызшәа иқәӡаанӡа ақәԥара шәаҟәымҵын. Ажәабжь зехьынџьара ишәҳәала. Адунеи иадырроуп Иегова Анцәа шиакәу, Иисус Христос — аҳцәа Раҳ, насгьы напхгара зуа Ирықәиҭу шиакәу. Аҭоурых аҿы ари зегь раасҭа ихадоу мшуп! Абар, Аҳ аҳра иуеит! Шәара — уи ицҳаражәҳәаҩцәа шәоуп. Убри аҟынтә ирылашәҳәала, ирылашәҳәала, ирылашәҳәала Аҳ, насгьы иара Иаҳра аӡбахә!»

Артури егьырҭ аишьцәеи ашахақәа анԥырҟа аплакат аатит. Аконгресс иаҭааз зегьы рзы еилкаахеит анбанқәа ADV ҵакыс ирымаз. Аплакат аҿы абас анын: «Ирылашәҳәала Аҳ, насгьы Аҳра аӡбахә». (ADV — англыз бызшәала ари аҳәоу раԥхьатәи х-нбанк роуп: Advertise the King and Kingdom.)

АУС ХАДА

Сидар-Поинт иҟаз аконгресс аишьцәа ргәазҭанаҵеит ихадоу аус, Аҳра иазку ажәабжь, ауаа рыларҵәара. Гәыкала иҟаз ауаа гәырӷьаҵәа уи аус рнапы адыркит. Оклахома инхоз, ашәҟәқәа зшоз аӡәы (усҟан апионерцәа убас рыхьӡын) иҩит: «Ҳара ашахтақәа ахьыҟоу аҳаблаҿы ажәабжь ҳҳәоит. Ара ауаа ӷарны инхоит. Ажурнал „Золотой век“ аҟынтә ажәабжь анраҳауа, дара лассы-лассы рылаӷырӡқәа рзынкылом». Аиашьа иҳәоит: «Шаҟа ҳаҭыр дуузеи ус еиԥш иҟоу ауаа ргәы ашьҭыхра!»

Урҭ Абиблиа аҭҵааҩцәа еилыркаауан Лука 10:2 (АдҾ) иану Иисус иажәақәа шаҟа ихадоу: «Аҽаҩра беиоуп, аха аусуцәа маҷҩуп». 1922-тәи ашықәс анҵәамҭазы дара еиҳагьы агәаҳәара рыман Аҳра иазку ажәабжь зехьынџьара ауаа рзеиҭаҳәара.