Шәара иҽеим агәаҳәарақәа шәыриааир шәылшоит

1. Изықәшәозеи инаӡам ауаа зегьы?

ИШӘЫЗЦӘЫРҴХЬОМА Иегова игәамԥхо ак аҟаҵаразы агәаҳәара ӷәӷәа? Ишәызцәырҵхьазар, шәгәы кашәмыжьын. Ус зыхьуа шәымацара шәакәӡам. Абиблиаҿы иануп: «Шәзықәшәо аԥышәарақәа ауаа зегь зықәшәо аԥышәарақәа роуп» (1 Кор. 10:13). Убри аҟынтә иҽеим агәаҳәара шәаҿагылазар, егьырҭгьы иҽеим агәаҳәарақәа ишырҿагыло жәдыруаз. Иегова ицхыраарала аиааира жәгар шәылшоит.

2. Иарбан иҽеим гәаҳәарақәоу ақьырсианцәеи Абиблиа зҵои рҟынтә шьоукы ирызцәырҵуа? (Шәрыхәаԥш иара убас асахьақәа.)

² Иара убас Абиблиаҿы иануп: «Ауаҩы дԥызшәо, дагьхызхуа ихатә гәаҳәара ауп» (Иак. 1:14). Ари ажәеинраала ишаҳнарбо еиԥш, ауаҩы ихатә гәаҳәара дыхнахуеит. Уи аҩыза иақәымшәо уаҩ дыҟам. Иаҳҳәап, ақьырсианцәа шьоукы иламысдароу асексуалтә гәаҳәара рызцәырҵуеит. Иҟоуп убас еиԥш иҟоу агәаҳәара ахацәа аҳәса рахь ианрызцәырҵуа, насгьы аҳәса ахацәа рахь. Аха иҟоуп ахацәа ахацәа рахь ианрыхо, аҳәса — аҳәса рахь. Егьырҭ анкьа апорнографиа иахәаԥшуан. Дара уи еиҭах иахәаԥшларц агәаҳәара рызцәырҵуазар алшоит. Убас еиԥш иҟоу ауадаҩрақәа уаанӡа анаркотикқәа здызкылоз, мамзаргьы аҩы зҽазыршьуаз ирызцәырҵуазар ауеит. Арҭ иҽеим агәаҳәарақәа мацара ракәӡам ақьырсианцәеи Абиблиа зҵои рҟынтә шьоукы ирызцәырҵлар алшо. Ҳара зегьы апостол Павел ицәаныррақәа рҩызцәа анҳазцәырҵуаз ыҟазҭгьы ҟаларын. Иара иҳәеит: «Абзиара аҟаҵара анысҭаху, ацәгьарахь схы хоит» (Рим. 7:21).

3. Игәы иаанагозар алшозеи еснагь иҽеим гәаҳәарак зызцәырҵуа ауаҩы?

³ Шәара еснагь иҽеим гәаҳәарак шәызцәырҵуазар, уи аҿагылара шәылшом ҳәа шәгәы иаанагозар ауеит, иара убас акгьы шәылҵӡом ҳәа шәхәыцуазар алшоит, иҽеим агәаҳәара ахьшәызцәырҵыз мацаразы Иегова наӡаӡа анхаразы алшара шәимҭошәа. Аха уигьы-уигьы иашаӡам. Ари астатиаҿы ҳара ҩ-зҵаарак еилҳаргоит: 1) Избан акгьы ҳалымшошәа, насгьы акгьы ҳалымҵуашәа ҳгәы иаанагозар залшо? 2) Иҳацхраауазеи иҽеим агәаҳәарақәа риааира?

АҨСҬАА ЗЫГӘРА ҲИРГАРЦ ДЗЫШЬҬОУ

4. а) Избан Аҩсҭаа иҽеим агәаҳәарақәа рҿагылара ҳалшаӡом ҳәа ҳгәы иаанагалар зиҭаху? б) Иабантәиҳдыруеи иҽеим агәаҳәарақәа рҿагылара шҳалшо?

⁴ Аҩсҭаа иҭахуп иҽеим ҳгәаҳәарақәа рҿагылара ҳалымшошәа ҳгәы иаанагаларц. Иисус уи идыруан аҟынтә, иҵаҩцәа абас Анцәа иҳәаларц реиҳәон: «Ҳхызхуа ҳҽаҳамҭарц уҳацхраа, Аҩсҭаа ҳаицәыхьча» (Матф. 6:13). Аҩсҭаа иҳәоит ауаҩы дхызхуа акы дақәшәар, Иегова даанижьуеит ҳәа (Иов 2:4, 5). Аҩсҭаа ихаҭа ихы шымҩаԥигаз еиԥш егьырҭгьы рхы мҩаԥыргалоит ҳәа игәы иаанагоит. Аха иара иоуп иҽеим згәаҳәара зҽазҭаз, Иеговагьы даанзыжьыз. Ҳаргьы иара иеиԥш ҳхызхуа акы ҳақәшәар, иаразнак Иегова даанҳажьуеит ҳәа игәахәуазар акәхап. Аҩсҭаа инаӡоу Анцәа Иԥаҵәҟьагьы дхихыр алшоит ҳәа игәы иаанагон! (Матф. 4:8, 9). Аха шәааи ҳазхәыцып: иҽеим агәаҳәарақәа ҳара ҳаасҭа иӷәӷәаҵәҟьоума? Насгьы ҳара урҭ рҿагылара ҳалымшо ҳаҟаҵәҟьоума? Ҳәарада, мап! Ҳара апостол Павел ииҳәаз абарҭ ажәақәа ҳрықәшаҳаҭуп: «Амч сызҭо ибзоурала сара зегь схызгар сылшоит» (Флп. 4:13).

5. Иабантәиҳдыруеи Иегова иҽеим агәаҳәарақәа ҳарҿагылар шҳалшо агәра ганы дшыҟоу?

⁵ Аха Иегова агәра ганы дыҟоуп иҽеим агәаҳәарақәа ҳарҿагылар шҳалшо. Иабантәиҳдыруеи уи? Иара заа иҳәахьан ԥхьаӡашьак змам ауаа рацәа иара изиашаны ишаанхо, насгьы арыцҳара ду шырхырго. Шәазхәыц уи иаанаго. Амц зымҳәо Анцәа иҳәеит ԥыҭҩык ракәымкәа, ауаа рацәа «иауз амаҭәа шкәакәақәа» рышәҵаны, даҽакала иуҳәозар, Иегова иҿаԥхьа ицқьаны, адунеи ҿыц ахь ишнеиуа (Аат. 7:9, 13, 14). Ишаҳбо ала, Иегова иҽеим агәаҳәарақәа ҳзыриааиӡом ҳәа дхәыцӡом.

6, 7. Зыгәра ҳиргар иҭахузеи иҵегьы Аҩсҭаа?

⁶ Аҩсҭаа иҭахуп иҽеим агәаҳәарақәа рҿагылара ҳалымшошәа, насгьы акгьы ҳалымҵуашәа ҳхы ҳбаларц. Иара иҭахуп иҽеим агәаҳәара ахьҳазцәырҵыз мацаразы Иегова иразра ҳцәыӡуазшәа ҳхәыцларц. Избан ус ҳхы ҳбаларц зиҭаху? Избанзар иара иоуп Иегова иразра зцәыӡыз, насгьы наӡаӡа анхаразы агәыӷра змам (Алаг. 3:15; Аат. 20:10). Аҩсҭаа ҳаицәымӷуп, избанзар ҳара аԥеиԥш бзиа шаҳзыԥшу ала агәыӷра ҳамоуп. Иара уи имаӡам. Убри азоуп Аҩсҭаа иара иеиԥш ҳхы ҳбаларц зиҭаху. Иегова даҽакалоуп ҳара дышҳахәаԥшуа. Иара иҭахуп наӡаӡа ҳанхаларц. Анцәа «аӡә дҭахар иҭахӡам, зегьы рыгәнаҳақәа ирыхьхәырц ауп ииҭаху» (2 Пиотр 3:9).

⁷ Иҽеим агәаҳәарақәа рҿагылара ҳалшаӡом ма акгьы ҳалҵӡом ҳәа ҳхәыцуазар, Аҩсҭаа иара итәы иаиргеит ҳәа ҳҳәар ҳалшоит. Убри ҳхаҳмыршҭлар, Аҩсҭаа иҿагылара ҳалшоит (1 Пиотр 5:8, 9).

ҲАХЬЫНАӠАМ ИАХҞЬАНЫ ИҲАЗЦӘЫРҴЛАР АЛШО АЦӘАНЫРРАҚӘА

8. Иаҳԥырхагахар алшозеи иҵегьы иҽеим агәаҳәарақәа рҿагылара? (Аԥсалом 51:5). (Шәахәаԥш иара убас «Жәақәак рҵакы».)

⁸ Иҽеим агәаҳәарақәа рҿагылара ҳалшаӡом ма акгьы ҳалҵӡом ҳәа ҳхәыцуазар, уи Аҩсҭаа ихарамзаргьы ауеит. Уи аҩыза ахәыцрақәа ҳахьынаӡам иахҟьангьы иҳазцәырҵуазар алшоит, даҽакала иуҳәозар, Адами Евеи рҟынтә иаҳҭынхаз агәнаҳаa иахҟьаны (Иов 14:4; шәаԥхьа Аԥсалом 51:5).

9, 10. а) Рхы шԥарбеи Адами Евеи агәнаҳа аныҟарҵа ашьҭахь? (Шәахәаԥш иара убас асахьа.) б) Ишԥаҳныруеи Адами Евеи рҟынтә иаҳҭынхаз агәнаҳа?

⁹ Иаҳгәалаҳаршәап Адами Евеи агәнаҳа аныҟарҵа рхы шырбаз. Иегова иҳәатәы ианахыԥа, дара рҽырҵәахит, рцәеижь злахырҩашагьы акы иашьҭалеит. «Понимание Писания» аҟны уи иазкны абас ануп: «Агәнаҳа аныҟарҵа, дара ахара шрыду еилыркааит, агәҭынчымра рызцәырҵит, иԥхашьогьы иалагеит». Уи Адами Евеи х-уадак мацара ахьыҟоу аҩны иҩнахазшәа иаҿурԥшыр ауеит. Дара уадак аҟынтә даҽа уадак ахь иҩналалар рылшон, аха аҩны издәылҵӡомызт, даҽакала иуҳәозар, агәнаҳа изаҵыҵӡомызт.

¹⁰ Ҳәарада, ҳара ҳҭагылазаашьа Адами Евеи рҭагылазаашьа иеиԥшӡам. Аҿыхра агәнаҳа аҟынтә ҳарыцқьоит, Иегова иҩызахаразгьы алшара ҳнаҭоит, Адами Евеи рзы ус узҳәом (1 Кор. 6:11). Ус ишыҟоугьы, ҳара агәнаҳаи анамӡареи ҳҭынхеит. Убри аҟынтә иџьашьатәӡам ҳаргьы ҳхы ахара ахьадаҳҵо, ҳгәы ахьҭынчым, аԥхашьарагьы ахьҳазцәырҵуа. Абиблиа излаҳәо ала, агәнаҳа иахьа уажәраанӡагьы ауаа ӷәӷәала ирныруеит, «Адам иҟаиҵаз агәнаҳа аҩыза ҟазымҵаз» ауаагьы уахь иналаҵаны (Рим. 5:14). Аха ҳара ҳахьынаӡам иахҟьаны ииашаны ахымҩаԥгара ҳалшом ҳәа, насгьы гәыӷрас акгьы ҳамаӡам ҳәа ҳамхәыцлароуп. Урҭ рҩызцәа ахәыцрақәа наҟ иаҳԥыраҳцалароуп. Иҳацхраауазеи уи аҿы?

11. Иҟаҳҵалар ҳахәҭоузеи, Римаа 6:12 иану инақәыршәаны, иҽеим агәаҳәарақәа рҿагылара ҳалшаӡом ҳәа ҳгәы иаанагозар?

¹¹ Ҳанамӡара иҳаҵанаҳәозар ауеит иҽеим агәаҳәарақәа рҿагылара ҳалшаӡом ҳәа. Аха уи ҳазымӡырҩлароуп. Избан? Избанзар Абиблиа иҳанаҳәоит агәнаҳа иаҭаху ҳарҟаҵара алҳмыршалар шхаҳәҭоу. (Шәаԥхьа Римаа 6:12.) Ус анакәха, иҽеим агәаҳәарақәа иҳаҵарҳәо ҟаҳамҵалар ҳалшоит (Гал. 5:16). Иегова агәра ганы дыҟоуп ҳара ҳхызхуа ак ҳақәшәар, уи ҳаҿагылар шҳалшо. Ус акәмызҭгьы, ҳхызхыр алшо зегьы ҳаҿагылаларц ҳаиҳәаӡомызт (Ҩынтә. 30:11—14; Рим. 6:6; 1 Фес. 4:3). Еилкаауп иҽеим агәаҳәарақәа рҿагылара ҳалымшо ҳшыҟам.

12. Иҟаҵатәузеи, акгьы ҳалҵӡом ҳәа ҳхәыцуазар, насгьы избан уи зыҟаҵатәу?

¹² Иара убас ҳанамӡара иҳаҵанаҳәозар ауеит ҳара акгьы ҳалҵӡом ҳәа, насгьы иҽеим агәаҳәара ахьҳазцәырҵыз мацаразы Иегова иразра ҳцәыӡуеит ҳәа. Аха уи ҳазымӡырҩлароуп. Избан? Избанзар Абиблиаҿы иануп Иегова ҳара иҳазкны зегь шидыруа, насгьы агәнаҳа дасу ишиныруа шеиликаауа (Аԥсал. 103:13, 14; 1 Иоанн 3:19, 20). Ҳара иҽеим агәаҳәарақәа ҳарҿагылозар, насгьы урҭ наҳмыгӡозар, Иегова ҳуаа цқьақәаны ҳиԥхьаӡоит. Избан уи ус шакәу агәра ганы ҳаҟазар зҳалшо?

13, 14. Иҽеим агәаҳәарақәа ҳазцәырҵуазар, иаанагома уи Иегова даҳзыразӡам ҳәа? Иҳаилшәыркаа.

¹³ Абиблиа иҽеим аусқәеи иҽеим агәаҳәарақәеи злеиԥшым ҳнарбоит. Иҽеим агәаҳәарақәа аконтроль анузрымҭогьы ыҟоуп. Урҭ иаҳҭахӡамкәа иҳазцәырҵлар ауеит. Иҽеим аусқәа ракәзар, урҭ ҟаҳамҵаларц азы ҳхы аконтроль аҳҭалар ҳалшоит. Иаҳҳәап, коринфтәи аизараҿы иҟаз шьоукы иқьырсианцәахаанӡа игомосексуалистцәан. Павел иҩит: «Урҭ реиԥш иҟазгьы шәыҟоуп». Иаанагома уи аӡы рҽанӡаарх ашьҭахь уаанӡа ирымаз иҽеим агәаҳәарақәа уаҳа ирызцәырҵӡомызт ҳәа? Ирызцәырҵуазҭгьы ҟаларын, избанзар ус еиԥш иҟоу ашьцыларақәа рдацқәа ӷәӷәоуп, риааирагьы даараӡа ицәгьоуп. Аха ақьырсиан аҽынкылара аарԥшны игәаҳәарақәа дырҿагылозҭгьы, Иегова уи дизыразын. Анцәа уи дуаҩы цқьаны диԥхьаӡон (1 Кор. 6:9—11). Иахьагьы убасҵәҟьа ауп ишыҟоу.

¹⁴ Ишәызцәырҵуа иҽеим агәаҳәарақәа зеиԥшразаалакгьы, урҭ шәыриааир шәылшоит! Урҭ уаҳа ахаан ишәызцәырымҵлартә еиԥш ишәзыҟамҵаргьы, аҽынкылара аашәырԥшлар, насгьы игәнаҳау шәгәаҳәарақәеи шәхәыцрақәеи ишәыҵарҳәо ҟашәымҵалар шәылшоит (Еф. 2:3). Уажәшьҭа ҳарзааҭгылап иҽеим агәаҳәарақәа риааира иҳацхраауа лабжьарақәак.

АИААИРА АГАРА ИҲАЦХРААУА

15. Избан иҽеим агәаҳәарақәа ҳариааирц азы аԥсыҽра шҳалоу еилаҳкаауазар зҳахәҭоу?

¹⁵ Иҽеим агәаҳәарақәа шәыриааирц азы раԥхьаӡа иргыланы аԥсыҽра шшәылоу еилышәкаароуп. Шәхы шәымжьалан (Иак. 1:22). Уи аҩыза шәыхьыр шԥалшо? Иаҳҳәап, шьоукы егьырҭ сара саасҭа еиҳаны иржәуеит ҳәа иҟарҵо уиаҟара ицәгьамшәа рхы ржьоит. Даҽа шьоукы дара иҟарҵо азы егьырҭ ахара рыдырҵоит. Дара абас рҳәоит: «Сыԥшәма еиҳа ахаара аалырԥшуазҭгьы, сара апорнографиа сахәаԥшлаӡомызт». Аха ус шәхәыцлар, иҽеим агәаҳәарақәа шәзырҿагылаӡом, урҭ еиҳагьы ишәиааиуеит. Убри аҟынтә шәхы ариашара аҭыԥан, шәхымҩаԥгашьазы аҭакԥхықәра зду шәара шшәакәу еилышәкаа (Гал. 6:7).

16. Иҳацхраар алшозеи иҵегьы ииашаны ахымҩаԥгара?

¹⁶ Иҟаҵатәузеи аԥсыҽра шшәылоу анеилышәкаа ашьҭахь? Уи шәыҽшашәымҭо шәыӡба (1 Кор. 9:26, 27; 1 Фес. 4:4; 1 Пиотр 1:15, 16). Ашьацҳәа шәаҿашәар аналшо, насгьы уи ҟалар ахьалшо шәазхәыц. Иҟалап еиҳа шәхызхыр алшо ак ыҟазар, мамзаргьы шәааԥсаны шәаныҟоу ма аҵх анынаскьахьоу еиҳараӡак ахыхра аҿагылара шәцәыцәгьазар. Шәхызхыр алшо шәазхәыцны, уи шәшаҿагылаша шәхаҿы иаажәг. Ибзиоуп уи аҩыза аҭагылазаашьа шәақәшәаанӡа уи ҟашәҵар (Ажәам. 22:3).

17. Иаҳнарҵозеи Иосиф иҿырԥшы? (Алагамҭа 39:7—9). (Шәрыхәаԥш иара убас асахьақәа.)

¹⁷ Иаҳгәалаҳаршәап Потифар иԥҳәыс Иосиф дхылхырц данашьҭала иара ихы шымҩаԥигаз. Иосиф дымлакҩакӡакәа, иаразнак мап лцәикит. (Шәаԥхьа Алагамҭа 39:7—9.) Иаҳнарбозеи уи? Иосиф уи аҭагылазаашьа дақәшәаанӡа ҽаӡәы иԥҳәыс дылзыҟазар шихәҭоу иӡбахьан. Убас еиԥшҵәҟьа шәаргьы ахыхра шәақәшәаанӡа шәхы шымҩаԥыжәгаша шәазхәыцыр шәылшоит. Убасҟан иҟашәҵо шәзымдыруа шәықәхаӡом, ииашаны ахымҩаԥгарагьы еиҳа ишәзымариахоит.

«ШӘЗЕИԤШРОУ ЕИЛЫШӘКААЛА»

18. Иҳацхраауазеи иҵегьы иҽеим агәаҳәарақәа рҿагылара? (2 Коринфаа 13:5).

¹⁸ Иҳацхраауазеи иҵегьы иҽеим агәаҳәарақәа рҿагылара? Ҳара ҳааҟәымҵӡакәа ҳзеиԥшроу гәаҳҭалароуп. (Шәаԥхьа 2 Коринфаа 13:5.) Ак аԥсахра аҭаху-иаҭахыму еилаҳкаарц азы аамҭа-аамҭала ҳхәыцрақәеи ҳхымҩаԥгашьеи зеиԥшроу гәаҳҭалароуп. Иаҳҳәап, ахыхра шәҽашәымҭазаргьы, шәхы шәазҵаа: «Шаҟаамҭа сҭаххеи уи мап ацәкразы?» Уи аамҭа мгаӡакәа, иаразнак мап шәзацәымкӡеит ҳәа шәгәы иаанагозар, шәхы шәмацәҳалан. Уи аҭыԥан даҽазны уи аҩыза шәақәшәар, еиҳа еиӷьны шәхы мҩаԥыжәгар шшәылшо шәызхәыц. Абарҭ азҵаарақәа шәхы иашәҭ: «Иарзанак исԥырысцома иҽеим ахәыцрақәа? Ус акәымзар, исылшома схы аус адызулар? Иалсхуа агәырҿыхагақәа ахыхра аҿагылара исԥырхагаӡами? Аламысдара ахьану сахьак анысԥыхьашәо, сыблақәа иаразнак иаҟәызгома? Агәра згома Иегова инормақәа зегьы ишреиӷьу, урҭ рықәныҟәара шымариамгьы?» (Аԥсал. 101:3).

19. Иаҳԥырхагахар шԥарылшо иҽеим ашьаҿақәа, урҭ маҷзаргьы, иҽеим агәаҳәарақәа рҿагылара?

¹⁹ Иара убас шәхы ариашара шәашьҭамлан. Абиблиаҿы иануп: «Зегь раасҭа игьангьашу, ибааԥсу агәы ауп» (Иер. 17:9). Иисус иҳәеит «агәы аҟынтә ауп иахьаауа... ахәыцра цәгьақәа» ҳәа (Матф. 15:19). Иаҳҳәап, апорнографиа ахәаԥшра иаҟәыҵыз ауаҩы аамҭак ашьҭахь ахәыцра далагар ауеит асексуалтә гәаҳәарақәа узцәырызго асахьақәа дрыхәаԥшлар, ашәарҭара аҵаӡам ҳәа, уа зцәеижь хту ауаа анымзар. Мамзаргьы иара абас дхәыцлар ауеит: «Цәгьарас иаҵоузеи иҽеим акы сазхәыцлар, сыԥсҭазаараҿы ус схы мҩаԥысымгозар?» Ус еиԥш иҟоу ауаҩы игәаҳәара ҟьашьқәа шынаигӡаша дазхәыцуеит ҳәа ҳҳәар ҳалшоит (Рим. 13:14). Гаӡарак шәмыхьааит, уи маҷзаргьы. Ииашам ашьаҿақәа, урҭ маҷзаргьы, хәыҷы-хәыҷла ииашам ашьаҿа ду шәдырҟаҵар рылшоитb. Иҽеим ахымҩаԥгашьа цәгьарак аҵаӡам ҳәа шәыҵазҳәо ахәыцрақәа зегьы шәԥырышәцала.

20. Иарбан ԥеиԥшу Иегова иҳазирхиаз, насгьы дышԥаҳацхраауеи иара уажәнатә ииашаны ахымҩаԥгара?

²⁰ Ишеилаҳкааз еиԥш, Иегова ицхыраарала ҳара ахыхрақәа ҳарҿагылар ҳалшоит. Иара убас аҿыхра абзоурала ҳара адунеи ҿыц аҿы наӡаӡа анхаразы агәыӷра ҳамоуп. Уа ҳара иҽеим агәаҳәарақәа ҳазцәырҵлаӡом. Шаҟа гәырӷьара ҳзаанагалозеи адунеи ҿыц аҿы Иегова имаҵ аура! Уи аамҭа ааиаанӡа, иҽеим агәаҳәарақәа ҳарҿагылалароуп. Ҳара агәра ганы ҳаҟоуп Иегова ицхыраарала аиааира шаҳго!