Аиашамра. Иҟаҵатәуи иҟаҵатәыми

1, 2. Иарбан цәаныррақәоу иҳазцәырҵуа аиашамра анаҳбо, насгьы иарбан зҵаарақәоу уи инадҳәаланы иҳазцәырҵыр алшо?

ҲАРА ҳанхоит аиашара ахьыҟам адунеи аҿы. Ауаа ииашамкәа иахьрызныҟәо зыхҟьо амзызқәа рацәоуп: рмилаҭ, рцәа аԥштәы ма иахьӷару. Аӡәырҩы аекологиа аицәахара иахьаҿу иахҟьаны игәаҟуеит, избанзар аполитикцәеи абизнесменцәеи ак анырыӡбо ажәлар ракәымкәа, рхы мацара ауп изызхәыцуа. Ус акәу, егьыс акәу аиашамра зегьы иаҳныруеит.

² Иџьашьатәӡам аӡәырҩы ииашамкәа ианрызныҟәо ма егьырҭ ииашамкәа ишрызныҟәо анырбо рыԥсахы ахьеибакуа. Ҳара зегьы иаҳҭахуп аиашара ахьыҟоу ишәарҭам адунеиаҿ ҳанхаларц. Убри аҟынтә шьоукы ауадаҩрақәа ҳхаҭа иҳаӡбоит ҳәа иалагоит. Иаҳҳәап, амитингқәа еиҿыркаауеит, аҿагыларақәа шьҭырхуеит, ауадаҩрақәа зегь ҳаӡбоит ҳәа иақәзыргәыӷуа аполитикцәа ирыдгылоит. Аха ҳара иаҳдыруеит ақьырсианцәа ари адунеи ишатәым, агәра гангьы ҳаҟоуп аиашамра ықәызго Анцәа Иаҳра заҵәык шакәу (Иоанн 17:16). Ҳәарада, уи иаанагаӡом егьырҭ ииашамкәа ианрызныҟәо ҳара ҳгәы ҳнархьӡом ма ҳаԥсахы еибанаркӡом ҳәа. Абарҭ реиԥш иҟоу азҵаарақәа ҳазцәырҵыр алшоит: «Схы шԥамҩаԥызгари аиашамра анызбо? Исылшома уажәнатә ак аҟаҵара аҭагылазаашьа сыԥсахырц азы?» Абарҭ азҵаарақәа рҭак ҟаҳҵаанӡа, шәааи, Иеговеи Иисуси аиашамра ишазыҟоу ҳалацәажәап.

ИЕГОВЕИ ИИСУСИ АИАШАМРА РЦӘЫМӶУП

3. Избан аӡәы ииашамкәа ианизныҟәо заҳгәамԥхо? (Исаиа 5:7).

³ Абиблиа иҳаилнаркаауеит егьырҭ ииашамкәа ианрызныҟәо заҳгәамԥхо. Уа иануп Иегова иара ҳиеиԥшны ҳшишаз, иара убас «аиашареи иашала аӡбареи» бзиа ишибо (Аԥсал. 33:5; Аҟаз. 1:26). Иара ихаҭа ахаан егьырҭ ииашамкәа дрызныҟәаӡом, аӡәы ииашамкәа изныҟәаларгьы иҭахӡам (Ҩынтә. 32:3, 4; Мих. 6:8; Зах. 7:9). Иаҳҳәап, аԥааимбар Исаиа ихаан израильаа дара-дара ииашамкәа еизныҟәон. Анцәа «игәаҟуаз ргәынқьбжьы» иаҳаит. (Шәаԥхьа Исаиа 5:7.) Иегова зныкымкәа агәҽанызаара шриҭахьазгьы, дара азакәан еиларгон, насгьы ауаа дыргәаҟуан. Убри аҟынтә Иегова урҭ ахьирхәит (Ис. 5:5, 13).

4. Иарбан цәаныррақәоу Иисус иибоз аиашамра изцәырнагоз? (Шәахәаԥш иара убас асахьа.)

⁴ Иисус жәҩантәи Иаб иеиԥш аиашара бзиа ибоит аиашамра ицәымӷуп. Ҽнак зны Иисус адгьыл аҿы даныҟаз, знапы ҩаны иҟаз хаҵак дибеит. Иара уи дрыцҳаишьан, дихәышәтәит. Аха агәы зызҭамыз афарисеицәа уи ргәамԥхаӡеит. Дара ачымазҩы игәаҟрақәа ахьынҵәаз хьаас ирымаӡамызт. Урҭ рзы ихадаз, Иисус еилеигеит ҳәа ирыԥхьаӡоз, асабша иазкыз азакәан ақәныҟәара акәын. Иарбан цәаныррақәоу уи Иисус изцәырнагаз? Иара «убриаҟара ргәы ахьхаҳәыз» илахь еиқәнаҵеит (Марк 3:1—6).

5. Иаҳхаҳмыршҭлар ҳахәҭоузеи агәыԥжәара иазкны?

⁵ Ишаҳбаз еиԥш, Иеговеи Иисуси аиашамра рцәымӷуп. Убри азы аиашамра ҳгәы ԥнажәозар, уи акагьы амаӡам (Еф. 4:26, насгьы англыз бызшәала иҭыжьу «Учебная Библия» аҿы ажәақәа «шәгәы аныԥжәо» рахь иаагоу акомментари). Аха иаҳхаҳмыршҭлароуп гәыԥжәарала аиашара шузышьақәмыргыло, агәыԥжәаразы амзыз ыҟазаргьы. Аха акыраамҭа агәыԥжәара ҳҽаҳҭозар, уи ҳгәабзиара иазеицәахар алшоит (Аԥсал. 37:1, 8; Иак. 1:20). Иҟаҳҵар ҳалшозеи аиашамра анаҳбо ма ҳхаҭа аиашамра ҳанақәшәо? Иҟаиҵози Иисус? Шәааи еилаҳкаап.

ИИСУС АИАШАМРА АНИБОЗ ИҞАИҴОЗ

6. Иарбан иашамроу Иисус адгьыл аҿы даныҟаз иибоз? (Шәахәаԥш иара убас асахьа.)

⁶ Иисус адгьыл аҿы даныҟаз ирацәаны аиашамрақәа ибон. Адиннапхгаҩцәа ажәлар рыԥсҭазаара зырцәгьоз аԥҟарақәа рацәаны шьақәдыргылеит (Матф. 23:2—4). Римтәи анапхгаҩцәа ракәзар, рнапаҵаҟа иҟаз ажәлар дыргәаҟуан. Ауриацәа аӡәырҩы Рим аҟынтә ахьыԥшымра роур рҭахын. Урҭ рҟынтә шьоукы, иаҳҳәап азелотцәа, абџьар кны уи азы ақәԥара иазхиан. Аха Иисус аиҭакрақәа рыҟаҵара ргәазҭеиҵаӡомызт, насгьы уи азы иқәԥоз дрывагылаӡомызт. Ауаа аҳас дҟарҵарц шырҭахыз анеиликаа, дырԥырҵны дцеит (Иоанн 6:15).

7, 8. Избан Иисус адгьыл аҿы дыҟанаҵы иибоз аиашамра зегьы ааныскылоит ҳәа дзаламгоз? (Иоанн 18:36).

⁷ Иисус адгьыл аҿы даныҟаз усҟантәи аамҭазы иҟаз аполитикцәа дрылагыланы иҟаз ауадаҩрақәа рыӡбара даҿӡамызт. Избан? Иара еиликаауан ауаа егьырҭ напхгара рзура азин шрымамыз. Уи адагьы, Анцәа ауаа уи аҩыза алшара рылаҵаны имшаӡеит (Аԥсал. 146:3; Иер. 10:23). Насгьы дара аиашамра ахыҵхырҭа рзықәгаӡом — Аҩсҭааи ауаа рынамӡареи. Адунеи зегьы ауаа аиашамра ргәазҭазҵо игәымбылџьбароу анапхгаҩы инапаҵаҟа иҟоуп (Иоанн 8:44; Еф. 2:2). Уи адагьы, абзиара згәы иҭоу ауаа бзиақәагьы рынамӡара иахҟьаны есымша ииашаны ахымҩаԥгара рылшаӡом (Еккл. 7:20).

⁸ Иисус идыруан ауадаҩрақәа зегьы зыхҟьо ақәгара зылшо Анцәа Иаҳра заҵәык шакәу. Убри азы иаамҭеи имчи ззикуаз Анцәа Иаҳра иазкыз ажәабжь бзиа аҳәара акәын (Лука 8:1). Иара «аиашара иазгәаҟуаз агәра диргон», акоррупциеи аиашамреи хымԥада рҵыхәтәа шыԥҵәахо (Матф. 5:6, насгьы «Учебная Библия» аҿы иаагоу акомментари; Лука 18:7, 8). Аха уи зыбзоурахо ауаа иҟарҵо аиҭакрақәа ракәӡам, жәҩантәи Анцәа инапхгара ауп. Уи «адунеи аҳрақәеи» иареи акгьы рзеилаӡам. (Шәаԥхьа Иоанн 18:36.)

АИАШАМРА АНЫЖӘБО ИИСУС ИЕИԤШ ШӘХЫ МҨАԤЫЖӘГАЛА

9. Избан агәра ганы шәзыҟоу Анцәа Иаҳра заҵәык шакәу ауадаҩрақәа зегьы ықәызго?

⁹ Ҳара ҳанхоит «аҵыхәтәантәи амшқәа» рзы. Иахьа Иисус ихаан аасҭагьы аиашамра еиҳа ирацәоуп. Уаанӡа еиԥш иахьагьы аиашамра хыҵхырҭас иамоу Аҩсҭааи иара анырра зиҭо инаӡам ауааи роуп (2 Тим. 3:1—5, 13; Аат. 12:12). Иисус иеиԥш ҳаргьы иаҳдыруеит ауадаҩрақәа зегьы Анцәа Иаҳра заҵәык шакәу изыӡбо. Ҳара убри анапхгара ауп ҳзыдгыло, убри аҟынтә аиашамра иаҿагыларц азы имҩаԥырго амитингқәа ҳаҽрылаҳархәӡом. Ҳахәаԥшып Стеи́сиa зыхьӡу аиаҳәшьа лҿырԥшы. Лара аҵабырг еилылкаанӡа аиашамра иаҿагыланы иқәԥоз дрылагылан. Аха аамҭак азы Стеиси иҟасҵо ахәарҭа аанагома ҳәа ахәыцра далагеит. Лара еиҭалҳәоит: «Ааи, сара апротестқәа сыҽрыласырхәуан, аха нас иааныскыло аган иашоума ҳәа схәыцуа салагеит. Аха уажәшьҭа Анцәа Иаҳра садгылоит, агәыҩбарагьы сымаӡам. Сара агәра ганы сыҟоуп Иегова аиашамра иақәшәаз сара саасҭагьы еиҳа еиҳаны дышрыцхраауа» (Аԥсал. 72:1, 4).

10. Избан аԥсахрақәа рыҟаҵаразы имҩаԥырго амитингқәа Иисус Матфеи 5:43—48 аҟны ииҳәаз изаҿагыло? (Шәахәаԥш иара убас асахьа.)

¹⁰ Амитингқәа ирылахәу аӡәырҩы рыԥсахы еибакны иҟоуп, азакәан еиларгоит, насгьы ауаа ааха рырҭоит. Аха Иисус ауаа идирҵоз зынӡа даҽакын (Еф. 4:31). Абар Џье́ффри зыхьӡу аиашьа ииҳәо: «Акциақәа анымҩаԥырго ауаа рхымҩаԥгашьа аконтроль узамҭо иҟалар алшоит, насгьы урҭ ирбо зегь аԥҽреи, аӷьычреи, аҟәаҟәареи иалагар ауеит». Аха иаҳирҵози Иисус? Ауаа зегьы бзиа рбара, иҳақәшаҳаҭымгьы, иҳашьҭашәарыцогьы хаала рзыҟазаара. (Шәахәаԥш Матфеи 5:43—48.) Ҳара еснагь Иисус ҳаиҿыԥшуеит, насгьы иҵарақәа ирҿагыло акгьы ҟаҳҵаӡом.

11. Избан имариамзар залшо аполитикеи асоциалтә зҵаарақәеи рҿы аӡәы иган аанымкылара?

¹¹ Ҳәарада, ҳара иаҳдыруеит Анцәа Иаҳра аиашамра зегь аҵыхәтәа шыԥнаҵәо. Аха ҳхаҭа аиашамра ҳанақәшәо, Иисус иҿыԥшра ҳцәыцәгьахар ауеит. Абар лцәаԥштәы иахҟьаны ауадаҩрақәа ирықәшәаз Џьа́ниа еиҭалҳәо: «Сгәаӷ еилашуан. Ииашамкәа иахьсызныҟәоз сгәы снархьуан, ииашамкәа исызныҟәозгьы рықәнага иақәыршәазар сҭахын. Сара сазхәыцуа салагеит зцәаԥштәы иахырҟьаны иладырҟәуаз ауаа еиҿыркааз агәыԥқәа срыдгыланы сықәԥаларц. Уи ала сгәыԥжәара схызгоит ҳәа сгәы иаанагон». Аамҭак ашьҭахь Џьаниа еилылкааит ишәарҭоу амҩа дшанылаз. Лара илҳәоит: «Сара игәасҭеит сызцылаз ауаа шхәыцуаз еиԥш ахәыцра сшалагаз. Еилыскааит ауадаҩрақәа рыӡбара Иегова иҟынтә акәымкәа, ауаа рҟынтә сшазыԥшыз. Убри аҟынтә урҭ агәыԥқәа зегь сырԥырҵит, уаҳагьы сыҽрылазгалаӡомызт». Аиашамра анаҳбо ҳгәы ԥжәозар ауеит, аха аполитикеи асоциалтә зҵаарақәеи рҿы аӡәы иган аанаҳамкыларц азы ҳгәаҳҽанызароуп (Иоанн 15:19).

12. Избан ҳзыԥхьо аинформациа зеиԥшроу гәаҳҭалар зхадоу?

¹² Иҳацхраауеи аиашамра анаҳбо ма ҳхаҭа аиашамра ҳанақәшәо ҳемоциақәа рыҽрымҭара? Иаҳҳәап, ҳзыԥхьо, ҳаззыӡырҩуа, ҳазхәаԥшуа зеиԥшроу гәаҳҭозароуп. Аинтернет аҿы ианырҵо аинформациа хықәкыс иамоу ауаа ршьара рықәырҟьареи аҳәынҭқарцәа рахь агәынамӡара рызцәыргареи ауп. Ажәабжьқәа рҿгьы лассы-лассы иҟаҵәҟьоу акәымкәа, рхатә гәаанагара ауп ирҳәо. Аха ауадаҩра ыҟаҵәҟьазаргьы, ҳааҟәымҵӡакәа уи ҳахьазхәыцуа ма ҳахьаԥхьо уи ӡбахома? Уи аинформациа шаҟа ирацәаны ҳхы азаҳашьҭуа аҟара еиҳа иаҳзеицәоуп (Ажәам. 24:10). Уи иахҟьаны Анцәа Иаҳра мацара ауп аиашамра аанызкыло ҳәа иҳамоу агәрагара ҳцәыӡыр алшоит.

13. Ишԥаҳацхраауеи Абиблиа аԥхьара иаҳбо аиашамра ииашаны азнеира?

¹³ Ҳара есыҽны Абиблиа ҳаԥхьозар, ҳзыԥхьаз ҳазхәыцуазар, иаҳбо аиашамра ииашаны ҳазнеилоит. Али́а зыхьӡу аиаҳәшьа ауаа ацәгьа рзызуа рықәнага ишақәдмыршәо ахьылбоз лгәы лнархьуан. Лара илҳәоит: «Ҽнак зны снатәан, схы сазҵааит: „Агәра сгома Иегова арҭ ауадаҩрақәа зегь шиӡбо?“ Сара Иов 34:22—29 саԥхьеит. Урҭ ажәеинраалақәа исгәаладыршәеит Иегова зегь шибо, иара иҟынтә уҽшузымҵәахуа. Иара иоуп издыруа аиашараҵәҟьа закәу, насгьы зегь рыриашара иара заҵәык иоуп изымчу». Аха уи иаанагаӡом Анцәа Иаҳра ҳазыԥшнаҵы зынӡа акгьы ҟаҳамҵалароуп ҳәа. Ҳаргьы иҟаҳҵаша ак ыҟоуп. Изакәи уи?

УАЖӘНАТӘ ИҞАҲҴАР ҲАЛШО

14. Иҟаҳҵар ҳалшои адунеи аҿы иҟоу аиашамра еиҳа имаҷхарц азы? (Колоссаа 3:10, 11).

¹⁴ Ҳара ауаа зегь бзиа еибабаларц ҳзыҟаҵаӡом. Аха ҳхаҭа урҭ ҳшырзыҟазаауа зыӡбо ҳара ҳауп. Хыхь ишҳәаз еиԥш, ҳара Иисус ҳаиҿыԥшуеит, убри азы ауаа бзиа рбара ҳҽазаҳшәоит. Абзиабара ауаа зегьы, иҳашьҭашәарыцогьы уахь иналаҵаны, пату рықәҵара ҳгәазҭанаҵоит (Матф. 7:12; Рим. 12:17). Иегова деигәырӷьоит ауаа хаалеи иашаралеи ҳанрызныҟәо. (Шәаԥхьа Колоссаа 3:10, 11.)

15. Избан ажәабжьҳәаратә ус абзоурала адунеи аҿы аиашамра еиҳа имаҷхоит ҳәа ҳҳәар зҳалшо?

¹⁵ Иҟаҳҵар ҳалшои иҵегьы иааҳакәыршаны иҟоу аиашамра маҷхарц азы? Ажәабжь бзиа ҳҳәалароуп. Избан уи зегь раасҭа изхадоу? Избанзар «Иегова изку адыррақәа» ауаҩы иԥсҭазаара рыԥсахыр алшоит. Уаанӡа згәыжәла цәгьаз ауаа уаа қьиақәаны, аҭынчра бзиа избо ракәны иҟалар рылшоит (Ис. 11:6, 7, 9). Абар Џьема́л иҭоурых. Иара аҵабырг еиликаанӡа аиҳабыра хзырбгаларц иашьҭаз агәыԥ дрылан. Иара иҳәоит: «Ауаа мчыла иузыԥсахуам. Урҭ Абиблиа иану аҵабырг мацара ауп изыԥсахыр алшо. Убри ауп саргьы сзыԥсахыз». Џьемал Анцәа Иажәа аҟынтә еиликааз игәазҭанаҵеит уи агәыԥ ааныжьра. Абиблиа абзоурала зҽызыԥсахуа ауаа рхыԥхьаӡара рацәахар, аиашамра ҟазҵо рхыԥхьаӡарагьы еиҳа имаҷхоит.

16. Ҳгәазҭазҵозеи Анцәа Иаҳра аӡбахә ауаа рзеиҭаҳәара?

¹⁶ Иисус ауаа идирҵон Анцәа Иаҳра заҵәык шакәу ауадаҩрақәа зегь зыӡбо. Ҳара иаҳҭахуп ирацәаҩны ауаа уи аӡбахә раҳар, избанзар агәыӷра аиашамра иахҟьаны ауадаҩра иақәшәаз ргәы арҭынчыр алшоит (Иер. 29:11). Хыхь зыӡбахә ҳәаз Стеиси илҳәоит: «Аҵабырг ахьеилыскааз аиашамра анызбо, насгьы схаҭа уи санақәшәо мыцхәы сгәы иасмырсырц исыцхраауеит. Иегова ҳгәы ширҭынчша идыруеит. Абиблиа абзоурала сара агәҭынчра соуит». Ҳара иаҳҭахуп егьырҭгьы агәҭынчра рымазарц. Иҟаҵатәузеи уи азы? Зегь раԥхьа иргыланы аиашамреи агәаҟрақәеи мзызс ирымоу иазкны Абиблиа иаҳәо ҳхаҭа иаҳдыруазароуп. Убасҟан аусура аҿы аума, ашкол аҿы аума уи аӡбахә цәырыргар, ҳаҭырқәҵарала иаҳҳәаша ҳдырлоитb.

17. Дышԥаҳацхраауеи Иегова иашамрала иҭәу ари адунеи аҿы анхара?

¹⁷ Ҳара еилаҳкаауеит ари адунеи Аҩсҭаа напхгара аиҭонаҵы, ауаа аиашамра ишақәшәало. Аха ус есымша иҟазаалаӡом. Иегова ҳақәиргәыӷуеит цхыраарада ҳшаанимыжьуа, иаарласынгьы Аҩсҭаа наҟ дшықәицо (Иоанн 12:31). Абиблиа аиашамра мзызс иамоу ҳаилнаркаауеит. Уи адагьы, Анцәа агәра ҳиргоит ҳзықәшәо агәаҟрақәа игәы шидырхьуа (Аԥсал. 34:17—19). Иегова Иԥа адгьыл ахь дааишьҭит. Иара иаҳирбеит аиашамра ҳанақәшәо иҟаҳҵалашеи иҟаҳамҵалашеи. Уи адагьы, Анцәа ҳақәиргәыӷуеит иаарласны Иаҳра ауадаҩрақәа зегьы наӡаӡа ишықәнаго (2 Пиотр 3:13). Шәааи анаҩсгьы Аҳра иазку ажәабжь бзиа ауаа ирылаҳҳәалап, избанзар уи Аҳра анапхгара аҵаҟа адгьыл зегьы иашарала иҭәуеит (Ис. 9:7).