Иегова бзиа ибоит ахачҳара аарԥшны аҽаҩра аазго имаҵзуҩцәа

1, 2. а) Избан ауаа реиҳараҩык ахьымӡырҩуа аҭыԥқәа рҿы ажәабжь зҳәо ҳашьцәа рҿырԥштәы ҳгәы зарӷәӷәо? (Шәахәаԥш астатиа алагамҭаҿы иаагоу асахьа.) б) Ииҳәазеи Иисус «иԥсадгьыли иҩни рҿы» ажәабжьҳәара иазкны?

СЕРЏЬО иԥҳәыс Олиндеи иареи Еиду Аштатқәа рҿы пионерс амаҵ руеит. Дара рҩыџьагьы 80 шықәса ирҭысхьеит. Аҵыхәтәантәи аамҭазы ршьапқәа ахьрыхьуа иахҟьаны аныҟәара рцәыцәгьоуп. Аха акыршықәса ишыҟарҵоз еиԥш, дара ашьыжь асааҭ быжьба рзы ауаа рацәа ахьеизо аҭыԥахь ицоит. Уа автобусқәа раангыларҭа азааигәара игыланы имҩасуа ауаа ҳпубликациақәа рыдыргалоит. Ауаа реиҳараҩык Серџьои Олиндеи ирызхьаԥшӡом, аха дара уеизгьы рҭыԥ аҿы игылоуп, насгьы имҩасуа ауаа ирҿаччоит. Шьыбжьон урҭ ашьшьыҳәа аҩныҟа ицоит. Адырҩаҽны, ашьыжь асааҭ быжьба рзы автобусқәа раангыларҭахь еиҭахынҳәуеит. Ашықәсқәа рыҩныҵҟа дара мчыбжьык ахь фымш, есышьыжь ажәабжь рҳәоит.

² Серџьои Олиндеи реиԥш аишьцәеи аиаҳәшьцәеи аӡәырҩы иахьынхо аҭыԥ аҿы акыршықәса ажәабжь рҳәоит, ауаа реиҳараҩык шырзымӡырҩуагьы. Иҟалап шәаргьы ус еиԥш иҟоу аҭыԥ аҿы ажәабжь шәҳәозар. Ус акәзар, шәара арҽхәара шәаԥсоуп, избанзар ахачҳара аарԥшуа ажәабжь шәҳәоит, уи аҟаҵара шышәзымариамгьыa. (Шәахәаԥш албаага.) Шәҿырԥшы аӡәырҩы аишьцәеи аиаҳәшьцәеи ргәы шьҭнахуеит, акыршықәса Анцәа имаҵ зуагьы уахь иналаҵаны. Абар араионтә хылаԥшыҩцәа шьоукы ирҳәаз: «Ус еиԥш иҟоу аишьцәеи аиаҳәшьцәеи амаҵ анрыцызуа рҿырԥштәы даара амч снаҭоит». «Урҭ иаадырԥшуа азиашара сгәы шьҭнахуеит, насгьы смаҵзура гәацԥыҳәарала анагӡара сгәазҭанаҵоит». «Дара рҿырԥштәы сгәы арӷәӷәоит».

3. Иарбан зҵаарақәоу еилҳарго, насгьы избан?

³ Ари астатиаҿы ҳара х-зҵаарак рҭак ҟаҳҵоит: избан зны-зынла ҳгәы зкаҳауа? Иаанагозеи ажәабжьҳәараҿы аҽаҩра аагара? Иҳацхраауазеи анаҩсгьы ахачҳара аарԥшны аҽаҩра аагара? Арҭ азҵаарақәа рҭак еилаҳкаар, уи анаҩсгьы Иисус иҳадиҵаз ажәабжьҳәаратә ус анагӡара иҳацхраауеит.

ИЗБАН ЗНЫ-ЗЫНЛА ҲГӘЫ ЗКАҲАУА?

4. а) Ишԥеиныруаз Павел ауриацәа ажәабжь бзиа ахьрыдрымкылоз? б) Избан иара ус еиԥш иҟоу ацәаныррақәа зизцәырҵуаз?

⁴ Шәгәы каҳахьоума зныкыр шәахьынхо аҭыԥ аҿы ауаа Аҳра иазку ажәабжь иахьазымӡырҩуа иахҟьаны? Ааи акәзар, шәара апостол Павел ицәаныррақәа реилкаара шәылшоит. Иара 30 шықәса раҟара ажәабжь иҳәон, насгьы аӡәырҩы ақьырсианра адкылара дрыцхрааит (Аусқәа 14:21; 2 Коринфаа рахь 3:2, 3). Аха ауриацәа рҟынтә ақьырсианра здызкылаз маҷҩын. Урҭ реиҳараҩык Павел изыӡырҩуамызт, уи инеиҳангьы, шьоукгьы ишьҭашәарыцон (Аусқәа 14:19; 17:1, 4, 5, 13). Иарбан цәаныррақәоу Павел уи изцәырнагоз? Иара иҳәеит: «Сара сзы даара илахьеиқәроуп, сгәы зегьы еихсыӷьшьа змам гәырҩала иҭәуп» (Римаа рахь 9:1—3). Избан иара ас еиԥш иҟоу ацәаныррақәа зизцәырҵыз? Избанзар иара ииҳәоз ажәабжьи уи зеиҳәоз ауааи гәык-ԥсыкала бзиа ибон. Павел ииашаҵәҟьаны ауриацәа дрыхӡыӡаауан, убри аҟынтә урҭ Анцәа игәшаҭара мап ахьацәыркыз игәы инархьуан.

5. а) Ҳгәазҭазҵозеи ауаа ажәабжь бзиа рзеиҭаҳәара? б) Избан зны-зынла ҳгәы ахькаҳауа зџьашьатәым?

⁵ Павел иеиԥш ҳаргьы ауаа ҳреиҷаҳауеит, насгьы ҳрыцхраар ҳҭахуп аҟынтә ажәабжь бзиа рзеиҭаҳҳәоит (Матфеи 22:39; 1 Коринфаа рахь 11:1). Ҳара ҳхатә ԥышәала агәра ҳгеит Иегова имаҵ аура зегь раасҭа ишеиӷьу. Убри аҟынтә даргьы рыԥсҭазаара еиҳа еиӷьхар шалшо аилкаара ҳрыцхраар ҳҭахуп! Убри азоуп ҳара ауаа ргәы зазҭаҳҵо Иегова изку аҵабырг, насгьы ауаатәыҩса рганахь ала имоу агәҭакы аилкаара. Уи зыхә ҳараку аҳамҭа рызнаҳгоушәа, насгьы абас раҳҳәоушәа иаҩызоуп: «Ҳшәыҳәоит, ишәыдышәкыл абри». Убри аҟынтә дара уи аҳамҭа мап анацәыркуа Павел иеиԥш ҳгәы ахьҳахьуа џьашьатәым. Ҳара ҳгәы зҳахьуа ҳагәрахаҵара ахьмаҷу азы акәӡам, аха ииашаҵәҟьаны ауаа бзиа иахьаҳбо азы ауп. Убри аҟынтә зны-зынла ҳгәы шкаҳауагьы, уеизгьы анаҩс ажәабжь бзиа ҳҳәоит. Ҳара 25 шықәса инареиҳаны пионерс амаҵ зуа Елена илҳәаз ҳақәшаҳаҭуп: «Ажәабжьҳәаратә ус анагӡара сзымариам. Аха уи иеиӷьасшьо аус ыҟам».

ИААНАГОЗЕИ АЖӘАБЖЬҲӘАРАҾЫ АҼАҨРА ААГАРА?

6. Иарбан зҵаароу уажәы ҳазлацәажәо?

⁶ Избан амаҵзураҿы ақәҿиара шҳамазаауа агәра ганы ҳаҟазар зҳалшо, ажәабжь ахьаҳҳәо аҭыԥ зеиԥшразаалакгьы? Ихадоу ари азҵаара аҭак ҟаҳҵарц азы шәааи еилҳаргап Иисус ииҳәаз ажәамаанақәа ҩба, урҭ рҿы иара аҽаҩра аагара шаҭаху далацәажәон (Матфеи 13:23). Актәи ажәамаана аӡахәа иазкуп.

7. а) Иаадырԥшуада Иисус иажәамаанаҿы аӡахәааӡаҩ, аӡахәа, насгьы амахәҭақәа? б) Иарбан зҵаароу зҭак ҟаҳҵар акәу?

⁷ Шәаԥхьа Иоанн 15:1—5, 8. Иисус иҳәеит ари ажәамаанаҿы аӡахәааӡаҩ Иегова шиакәу, иара аӡахәа шиакәу, иҵаҩцәа амахәҭақәа шракәуb. (Шәахәаԥш албаага.) Анаҩс Иисус иапостолцәа иреиҳәеит: «Шәара ирацәаны абзиара шәхылҵны, Сара шәысҵаҩцәаны шәҟалар, убри ала Сабгьы дҳаракхоит». Ҵакыс ирымозеи ажәақәа «ирацәаны абзиара шәхылҵны... шәҟалар»? Иисус имҳәаӡеит иарбан бзиароу ари ажәамаанаҿы дызлацәажәоз, аха уи аилкаара иҳацхраауа акы далацәажәеит.

8. а) Избан Иисус иажәамаанаҿы аҽаҩра аагара иаҵанакуа аҵаҩцәа разыҟаҵара закәым? б) Иарбан усқәоу Иегова ҳара иҳадиҵо?

⁸ Иисус иаб изкны иҳәеит: «Ашәыр аазмышьҭуаны исымоу иарбан махәҭазаалакь Уи иҿахиҵәоит». Даҽакала иуҳәозар, Иегова имаҵзуҩцәа ҳакәзарц азы аҽаҩра ааҳгалар ауп (Матфеи 13:23; 21:43). Ари ажәамаанаҿы аҽаҩра аагара иаҵанакуа аҵаҩцәа разыҟаҵара акәӡам (Матфеи 28:19). Уи ус акәызҭгьы, аҵаҩцәа ҿыцқәа разыҟаҵара злымшаз Анцәа изиашоу имаҵзуҩцәа аҽаҩра аазымго амахәҭақәа иреиԥшхон. Аха уи ус акәӡам! Избан? Избанзар ҳара ауаа Иисус иҵаҩцәа ракәхарц ҳазрыдцалаӡом. Иегова абзиабара аазырԥшуа Нцәоуп, убри аҟынтә иара иҳалымшо аҟаҵара ахаан иҳадиҵаӡом. Иара иҳалшо мацара ауп иҳадиҵо (Ҩынтәзакәан 30:11—14).

9. а) Ишԥаҳалшо ҳара аҽаҩра аагара? б) Иарбан ажәамааноу уажәы еилҳарго?

⁹ Нас иаанагозеи аҽаҩра аагара? Уи ҳара зегьы иҳалшо ак акәзар ауп. Иарбан усу Иегова имаҵзуҩцәа зегьы ирыдиҵаз? Анцәа Иаҳра иазку ажәабжь бзиа ауаа рзеиҭаҳәараc. (Шәахәаԥш албаага.) (Матфеи 24:14). Ажәлаҟьаҩ изку Иисус иажәамаана уи ус шакәу ҳнарбоит. Шәааи еилҳаргап уи ажәамаана.

10. а) Иаадырԥшуазеи ажәлеи адгьыли Иисус иажәамаанаҿы? б) Иарбан ҽаҩроу ачарыц иаанаго?

¹⁰ Шәаԥхьа Лука 8:5—8, 11—15. Ажәлаҟьаҩ изку ажәамаана аҟны Иисус иҳәеит ажәла Анцәа иажәа ма Анцәа Иаҳра иазку ажәабжь шаанарԥшуа. Адгьыл ауаа рыгәқәа аанарԥшуеит. Адгьыл бзиа иақәшәаз ажәла адацқәа ашьҭит, ахы ыҵнахит, анаҩс аҵиаа аизҳара иалагеит. Аҵиаа ианазҳа, шәынтә рыла еиҳаны аҽаҩра аанагеит. Аҵиаа ачарыц ахәҵәы акәызҭгьы, иарбан ҽаҩроу уи иаанагоз? Ихәыҷыз ачарыц хәыҵәқәа? Мап, уи ачарыц жәлақәа аанагон, урҭ ажәлақәагьы ианрызҳалак иҵиаахон. Ари ажәамаанаҿы жәла заҵәык шә-жәлак аанагеит. Иаҳнарҵозеи ари ҳмаҵзура иазкны?

11. а) Иаҳнарҵозеи ажәлаҟьаҩ изку ажәамаана ҳмаҵзура иазкны? б) Ишԥаҳалшо ажәла ҿыцқәа раагара?

¹¹ Ҳҭаацәа ма Иегова ишаҳаҭцәа руаӡәк раԥхьаӡа акәны Анцәа Иаҳра иазку ажәабжь анҳзеиҭарҳәа, уи адгьыл бзиаҿы ажәла ларҵазшәа иеиԥшын. Дара аҵабырг шҳадаҳкыла анырба даара иеигәырӷьеит. Уи ажәла аизҳара иалагеит, насгьы аҽаҩра аагара иалагаанӡа еизҳауан. Хыхь зыӡбахә ҳәаз ачарыц ахәҵәы иаанагаз иҿыцу ачарыц хәыҵәқәа ракәӡам, аха иҿыцу ажәлақәа роуп. Убас еиԥш ҳаргьы ҽаҩрас иааҳго иҿыцу аҵаҩцәа ракәӡам, аха ажәла ҿыцқәа роупd. (Шәахәаԥш албаага.) Ишԥаҳалшо ажәла ҿыцқәа раагара? Анцәа Иаҳра аӡбахә ауаа ианрылаҳҳәо, ҳгәаҿы илаҵоу Аҳра ажәлақәа ҳҟьоит, насгьы урҭ рхыԥхьаӡара еизҳарҳауеит ҳәа ҳҳәар ҳалшоит (Лука 6:45; 8:1). Убас ала, Анцәа Иаҳра иазку ажәабжь анаҳҳәо, ҳара ахачҳара аарԥшны аҽаҩра ааҳгоит.

12. а) Иаҳдырҵозеи аӡахәеи ажәлаҟьаҩи ирызку Иисус иажәамаанақәа? б) Иарбан цәаныррақәоу уи ишәызцәырнаго?

¹² Иаҳдырҵозеи аӡахәеи ажәлаҟьаҩи ирызку Иисус иажәамаанақәа? Ҳара еилаҳкаауеит аҽаҩра ааҳгоу иааҳамгоу зхьыԥшу ауаа ҳажәабжь ишақәҿырҭуа шакәым. Уи зхьыԥшу ажәабжьҳәаратә ус наҳагӡоу инаҳмыгӡоу ауп. Павел убри аҩыза азхәыцра далацәажәон, иара иҳәеит: «Доусы иџьабаа зеиԥшроу алагьы аҳамҭа иоуеит» (1 Коринфаа рахь 3:8). Иегова дыззылԥхо ҳџьабаа алҵшәақәа ракәымкәа, иаҳбо аџьабаа ауп. 20 шықәса пионерс амаҵ зуа Матильда илҳәоит: «Иегова ҳџьабаа дшазылԥхо саназхәыцуа сгәы еизҳауеит».

ИҲАЦХРААУАЗЕИ АНАҨСГЬЫ АХАЧҲАРА ААРԤШНЫ АҼАҨРА ААГАРА?

13, 14. Избан Павел ажәабжьҳәара дзаҟәымҵуаз Римаа рахь 10:1, 2 иану инақәыршәаны?

¹³ Иҳацхраауазеи анаҩсгьы ахачҳара аарԥшны аҽаҩра аагара? Шәааи зҿлымҳарала еилҳаргап Павел иҿырԥштәы. Ҳара иаҳдыруеит ауриацәа Аҳра иазку ажәабжь ахьрыдрымкылоз Павел игәы шинархьуаз. Ус шакәызгьы, иара ажәабжь аҳәара даҟәыҵуамызт. Иара ауриацәа дшырзыҟаз иазкны иҳәеит: «Сашьцәа! Сгәы зсыхьуа, Анцәа сызиҳәо Израил аиқәырхаразы ауп. Сара шаҳаҭс самоуп урҭ Анцәа ишихыбаауа, аха абри ахыбаара ҵаҵӷәыдоуп, дыррала ишьақәырӷәӷәам» (Римаа рахь 10:1, 2). Избан нас Павел уеизгьы ажәабжь бзиа зеиҭеиҳәоз?

¹⁴ Актәи, Павел иҳәеит иашьцәа рзы игәы шихьуаз. Иара ииашаҵәҟьаны иҭахын урҭ еиқәхарц (Римаа рахь 11:13, 14). Аҩбатәи, иара дара рзы Анцәа диҳәон. Павел Анцәа диашьапкны диҳәон, ауриацәа Аҳра иазку ажәабжь адкылара дрыцхраарц азы. Ахԥатәи, Павел иҳәеит дара Анцәа ишихыбаауаз. Павел ауаа ирылаз абзиара ибон, насгьы Анцәа имаҵ аура иалагар шрылшоз идыруан. Иара еиликаауан агәацԥыҳәара злаз ауриацәа иара иеиԥш гәацԥыҳәарала Иисус ишьҭанеира шрылшоз.

15. Ишԥаҳалшо Павел иҿыԥшра? Иаажәга аҿырԥштәқәа.

¹⁵ Ишԥаҳалшо ҳара Павел иҿыԥшра? Актәи, ҳара «наӡаӡатәи аԥсҭазаара иазыԥҵәо» рыԥшаара ҳҭахыҵәҟьазароуп. Аҩбатәи, ҳара Анцәа ҳиашьапкны ҳиҳәоит гәыкала иҟоу ауаа ажәабжь бзиа анырзеиҭаҳҳәо уи азыӡырҩра дрыцхраарц азы (Аусқәа 13:48; 16:14). Убас ҟалҵоит 30 шықәса раҟара пионерс амаҵ зуа Сильвана. Лара илҳәоит: «Ажәабжьҳәаразы исзалху аҭыԥахь сцаанӡа, сара Анцәа агәазыҟашьа бзиа сиҭарц азы сиҳәоит». Иара убас ҳара Анцәа ҳиҳәоит амаалықьцәа аӡырҩра иазхиоу ауаа рыԥшаара иҳацхраарц азы (Матфеи 10:11—13; Аатра 14:6). 30 шықәса инареиҳаны пионерс амаҵ зуа Роберт иҳәоит: «Зыҩнашә уасуа ауаа рыԥсҭазаашьа зеиԥшроу здыруа амаалықьцәа амаҵ рыцура даара аинтерес аҵоуп». Ахԥатәи, ҳара ауаа ирылоу абзиара агәаҭара ҳҽазаҳшәоит, насгьы Иегова имаҵ аура иалагар шалшо агәра ҳгоит. 50 шықәса раԥхьа аӡы зыҽӡаазхыз Карл аизара аиҳабыс амаҵ иуеит. Иара иҳәоит: «Сара сҽазысшәоит ауаҩы гәык-ԥсыкала дшыҟоу сзырбо ак аԥшаара. Иаҳҳәап, иара дысҿаччозар, иблақәа ақьиара рныԥшуазар, мамзаргьы гәыкала азҵаарақәа сиҭозар, сара сзы уи дыргоуп». Ҳаргьы абас ҟаҳҵозар, Павел иеиԥш ахачҳара аарԥшуа аҽаҩра ааҳгалоит.

«УНАПЫ АԤСШЬАХА АУМҬАН»

16, 17. а) Иаҳнарҵозеи Екклезиаст 11:6 иану? б) Ишԥарныруеи инаҳагӡо ажәабжьҳәаратә ус ҳазбо ауаа?

¹⁶ Ҳара ахаангьы иаҳхаҳмыршҭлар ауп ажәабжьҳәаратә ус ауаа шаҟа иӷәӷәаны ирнырыр алшо, аӡәымзар-аӡәгьы дӡырҩуам ҳәа ҳгәы иаанагозаргьы. (Шәаԥхьа Екклезиаст 11:6.) Ауаа ҳара иҳахәаԥшуеит. Дара ирбоит шаҟа ҳаиқәҷаб ҳаилаҳәо, иара убас ахаареи аҟәымшәышәреи шааҳарԥшуа. Уи дара ирнырыр, насгьы ԥыҭрак ашьҭахь бзиа ҳзымбогьы ргәаанагара рыԥсахыр ҟалоит. Серџьои Олиндеи уи рхатә ԥышәала агәра ргеит.

¹⁷ Серџьо иҳәоит: «Ԥыҭраамҭак ҳачмазҩын аҟынтә ауаа рацәа ахьеизо аҭыԥ ахь ҳзымцеит. Уахь ҳаныхынҳә имҩасуаз ауаа ҳазҵаауан: „Ишәыхьзеи, шәабаҟаз? Ҳара шәыгәхьааҳгон“». Олинда иацылҵоит: «Автобус аныҟәцаҩцәа рнапқәа ҟьаны аԥсшәа рҳәон, насгьы абас ҿырҭуан: „Аферымқәа!“ Дара ажурналқәагьы ирыҳәеит». Серџьои Олиндеи даара иџьаршьеит хаҵак даарыдгыланы, ашәҭқәа ҳамҭас ианриҭа, насгьы инарыгӡо аус азы иҭабуп ҳәа анреиҳәа.

18. Избан шәара ахачҳара аарԥшны аҽаҩра аагара шәзазхиоу?

¹⁸ Ауаа Анцәа Иаҳра иазку ажәабжь рзеиҭаҳәо шәнапы аԥсшьаха анашәымҭо, ажәларқәа зегьы шаҳаҭра рыҭара аус шәацхраауеит (Матфеи 24:14). Аха зегь раасҭа ихадоу, шәара агәырӷьара ду шәымазаауеит, избанзар Иегова игәаԥхара шынашәыгӡо жәдыруеит. Иара ахачҳара аарԥшны аҽаҩра аазго зегьы бзиа ибоит!