Избан ҳара ирацәаны абзиара аҟаҵара, мамзаргьы аҽаҩра аагара, ҳзаҟәымҵуа?

1, 2. а) Иреиҳәози Иисус иҵаҩцәа иԥсра уахык шагыз? (Шәахәаԥш астатиа алагамҭаҿы иаагоу асахьа.) б) Избан ҳара ажәабжьҳәаратә ус зынаҳагӡо ҳхаҳмыршҭлар зҳахәҭоу? в) Еилҳаргозеи ари астатиаҿы?

ИИСУС иԥсра уахык шагыз апостолцәа акыраамҭа драцәажәон. Иара урҭ даара бзиа ишибо агәра диргон. Иара убас уи ирзеиҭеиҳәеит ҳазхысыз астатиаҿы зыӡбахә ҳәаз аӡахәа иазку ажәамаана. Иисус иҵаҩцәа ргәазҭеиҵарц иҭахын анаҩсгьы абзиара ҟарҵаларц, мамзаргьы Аҳра иазку ажәабжь бзиа хачҳарала ауаа ирыладырҵәаларцa. (Шәахәаԥш албаага.) (Иоанн 15:8).

² Аха Иисус иҵаҩцәа иреиҳәаз иҟарҵалар рыхәҭаз мацара акәӡам, иара иҳәеит уи аҟаҵара зрыхәҭаз. Иара ажәабжьҳәаратә ус анагӡаразы мзызқәас иҟоу реиҳәеит. Ҳаргьы ажәабжьҳәаратә ус зынаҳагӡо ҳхаҳмыршҭлароуп. Урҭ амзызқәа ҳрызхәыцуазар, уи ажәларқәа зегьы шаҳаҭра рыҭара аус аҿы ахачҳара аарԥшра иҳацхраауеит (Матфеи 24:13, 14). Ари астатиаҿы еилҳаргоит Иԥшьоу аҩыра инақәыршәаны ажәабжьҳәартә ус анагӡаразы иҳамоу ԥшь-мзызк. Иара убас ҳрылацәажәоит Иегова уи аус анагӡара дҳацхраарц азы иҳаиҭаз ԥшь-ҳамҭак.

ИЕГОВА ДҲАРАҲКУЕИТ

3. а) Иарбан зегь реиҳа ихадоу мзызу ажәабжьҳәаратә ус анагӡаразы иҳамоу, Иоанн 15:8 инақәыршәаны? б) Иаадырԥшуазеи ажьымжәақәа Иисус иажәамаанаҿы, насгьы избан уи аиҿырԥшра ара изанаало?

³ Раԥхьаӡа иргыланы ажәабжьҳәара ҳгәазҭазҵо уи Иегова хьӡи-ԥшеи иҭара, насгьы ихьӡ арҳаракра ахьаҳҭаху ауп. (Шәаԥхьа Иоанн 15:1, 8.) Иисус аӡахәа иазку ажәамаана даналацәажәоз, Иегова ажь зааӡо аӡахәааӡаҩ, мамзаргьы абаҳчааӡаҩ диҿирԥшит. Иара иҳәеит аӡахәа иара ихаҭа шиакәыз, амахәҭақәа иҵаҩцәа шракәыз (Иоанн 15:5). Уи ажәамаанаҿы ажьымжәақәа иаадырԥшуеит Иисус иҵаҩцәа иаарго алҵшәақәа, мамзаргьы инарыгӡо ажәабжьҳәаратә ус. Иисус апостолцәа иреиҳәеит: «Шәара ирацәаны абзиара шәхылҵны, Сара шәысҵаҩцәаны шәҟалар, убри ала Сабгьы дҳаракхоит». Аӡахәа ажьымжәа бзиақәа анаанаго, уи аӡахәааӡаҩ ихьӡ шьҭнахуеит. Убас еиԥш Анцәа Иаҳра иазку ажәабжь аҳәара ҳамчқәа зегь аназаҳкуа, ҳара Иегова дҳараҳкуеит (Матфеи 25:20—23).

4. а) Ишԥаҳалшо ҳара Анцәа ихьӡ арҳаракра? б) Иарбан цәаныррақәоу ишәзаанаго Анцәа ихьӡ арҳаракра аҳаҭыр ахьшәаҭәашьоу?

⁴ Анцәа ихьӡ ԥшьоуп. Уи еиҳагьы иԥшьахарц азы ҳара акгьы ҳзыҟаҵом. Нас ишԥаҳалшо Анцәа ихьӡ арҳаракра, ажәабжь бзиа анаҳҳәо? Аԥааимбар Исаиа иҳәеит Иегова заҵәык шиакәу иԥшьоу, убри аҟынтә ихьӡ шҳараклатәу (Исаиа 8:13). Ҳара Анцәа ихьӡ ҳараҳкуеит уи еиҳау ахьӡ шыҟам еилаҳкаауазар, насгьы уи шыԥшьоу аилкаара егьырҭ ҳрыцхраауазар (Матфеи 6:9). Иаҳҳәап, Иегова иссиру иҟазшьақәа ирызку аҵабырг ауаа иандҳарҵо, насгьы ауаатәыҩса џьанаҭ дгьыл аҿы наӡаӡа инхаларц азы ишишаз анырзеиҭаҳҳәо, Аҩсҭаа Иегова изкны ииҳәаз зегь шымцу аилкаара ҳрыцхраауеит (Аҟазаара 3:1—5). Иара убас ҳара Анцәа ихьӡ ҳараҳкуеит иара «ахьӡ-аԥша, аҳаҭыр, амч-алшара рыдкылара» дшаԥсоу ауаа ианырзеиҭаҳҳәо (Аатра 4:11). 16 шықәса пионерс амаҵ зуа Руне илҳәоит: «Жәҩантәыла зегь Зшаз изкны шаҳаҭра аҭара алшара ахьсымоу, агәырӷьара ду сзаанагоит. Уи анаҩсгьы ажәабжьҳәаразы агәазыҳәара снаҭоит».

ҲАРА ИЕГОВА ИԤЕИ ИАРЕИ БЗИА ИАҲБОИТ

5. а) Избан ажәабжь заҳҳәо Иоанн 15:9, 10 инақәыршәаны? б) Дышԥарыцхрааи Иисус иҵаҩцәа ахачҳара шырҭаххо аилкаара?

⁵ Шәаԥхьа Иоанн 15:9, 10. Ажәабжьҳәара ҳгәазҭазҵо аҩбатәи амзыз уи Иеговеи Иисуси рахь иҳамоу абзиабара ауп (Марк 12:30; Иоанн 14:15). Иисус иҵаҩцәа «сыбзиабараҿ шәыҟаз» ҳәа реиҳәеит. Избан? Избанзар идыруан иҵаҩцәа ииашаҵәҟьоу ақьырсианцәа реиԥш инхаларц азы ахачҳара шырҭаххоз. Ааи, Иоанн 15:4—10 аҟны Иисус зныкымкәа ихы иаирхәеит ажәа шәыҟаз, иара убас уи иеиԥшу егьырҭ ажәақәа иҵаҩцәа ахачҳара шырҭаххо деилиркаарц азы.

6. Ишԥаҳалшо Христос ибзиабараҿ ҳаҟазарц шаҳҭаху аарԥшра?

⁶ Ишԥаҳалшо Христос ибзиабараҿ ҳаҟазарц, насгьы иразра ҳамазарц шаҳҭаху аарԥшра? Иара ҳаизыӡырҩуазар. Иисус ҳара иҳадиҵо ихаҭа иҟаиҵоз аусқәа роуп. Иара иҳәеит иаб иԥҟарақәа шынаигӡоз, убри аҟынтә ибзиабараҿ дшыҟаз. Иара ҳара ҳзы аҿырԥшы нижьит (Иоанн 13:15).

7. Ишԥеидҳәалоу азыӡырҩреи абзиабареи?

⁷ Иисус еилыкка иаҳирбеит азыӡырҩреи абзиабареи шеидҳәало. Иара иҳәеит: «Сара сыԥҟарақәа змоу, ирықәныҟәауа — Сара бзиа сибоит» (Иоанн 14:21). Иисус иԥҟарақәа ирхыҵхырҭоу Иегова иоуп, убри аҟынтә ажәабжь аҳәаразы Иисус иҳадиҵаз адҵа анынаҳагӡо, Иеговагьы бзиа дшаҳбо ааҳарԥшуеит (Матфеи 17:5; Иоанн 8:28). Иеговеи Иисуси бзиа ишаҳбо анааҳарԥшуа, дара рыбзиабараҿ ҳаҟазаауеит.

АУАА РГӘЫРҼАНАҲҴОИТ

8, 9. а) Иарбан мзызу еиҭа ажәабжь аҳәаразы иҳамоу? б) Ҳгәы шԥазҭарҵо Иезекииль 3:18, 19, насгьы 18:23 ирну Иегова иажәақәа анаҩсгьы ажәабжь аҳәара?

⁸ Ажәабжь аҳәара ҳгәазҭазҵо ахԥатәи амзыз уи Иегова имш шааиуа ала ауаа ргәырҽанаҳҵар ахьаҳҭаху ауп. Абиблиаҿы Нои ауаа «аиаша-ҵабырг рылазырҵәоз» ҳәа изҳәоуп. (Шәаԥхьа 2 Пиотр 2:5.) Аӡхыҵра ҟалаанӡа Нои ауаа ирылаирҵәоз ажәабжь агәҽанҵара рнаҭон. Избан ус ҳҳәар зҳалшо? Избанзар Иисус иҳәеит: «Избан акәзар убасҟангьы, аӡхыҵра иалагаанӡа, Нои иӷба дҭалаанӡа, ауаа акрырфон, акрыржәуан, хаҵа ицон, аҳәса ааргон. Аӡхыҵра рыжәланы, зегьы ықәнахаанӡа убри ишазымхәыцуаз, гәҩара шрымамыз аиԥш ауп, Ауаҩытәыҩса Иԥа иаарагьы шыҟало» (Матфеи 24:38, 39). Еиҳараҩык ауаа Нои ишизымӡырҩуазгьы, иара зиашарыла Иегова ииҭаз агәҽанҵаратә ажәабжь ауаа ирылаирҵәон.

⁹ Иахьа Анцәа Иаҳра иазку ажәабжь ауаа ирылаҳарҵәоит, избанзар иаҳҭахуп зегьы еилыркаарц Анцәа ауаатәыҩса рзы ҳаԥхьаҟа иҟаиҵо. Иегова иеиԥш ҳара ииашаҵәҟьаны иаҳҭахуп ауаа уи ажәабжь иазыӡырҩырц, насгьы инхаларц. (Иезекииль 18:23). Ҩнаҭацыԥхьаӡа, насгьы ауаа рацәа ахьеизо аҭыԥқәа рҿы ажәабжь анаҳҳәо, ҳара иахьынӡалшо еиҳаны ауаа ргәырҽанаҳҵоит, насгьы ираҳҳәоит иаарласны Анцәа Иаҳра ицәгьоу ари адунеи шықәнахуа (Иезекииль 3:18, 19; Даниил 2:44; Аатра 14:6, 7).

ҲАРА АУАА БЗИА ИАҲБОИТ

10. а) Иарбан мзызу ажәабжьҳәаратә ус анагӡаразы Матфеи 22:39 иаҳнаҭо? б) Ишԥаицхрааи Павели Силеи абахҭа ахьчаҩцәа реиҳабы?

¹⁰ Ажәабжьҳәара ҳгәазҭазҵо аԥшьбатәи амзыз уи ауаа рахь иҳамоу абзиабара ауп (Матфеи 22:39). Уи анаҩсгьы ажәабжь аҳәара иҳацхраауеит, избанзар иаҳдыруеит ауаа рҭагылазаашьа аҽанаԥсахуа, ргәаанагарагьы рыԥсахыр шрылшо. Иаҳҳәап, Филиппқәа рҿы Павели Силеи абахҭа иҭаркит. Аха ҵхагәҭаны уа адгьылҵысра ҟалеит, уи абахҭа зегьы архыџ-хыџит, насгьы ашәқәа зегь аатит. Абахҭа ахьчаҩцәа реиҳабы абаандаҩцәа зегь бналаны ицеит ҳәа дшәеит, убри аҟынтә иҽишьырцгьы далагеит. Аха Павел уи дааникылеит, иара ус изҿиҭит: «Ухы ҭоумырхан». Усҟан абахҭа ахьчаҩцәа реиҳабы дҵааит: «Схы злеиқәсырхарызеи?» Павели Силеи ус иарҳәоит: «Иҳақәиҭу Иисус Христос дхаҵа, убасҟан уаргьы, уҩнаҭа иеиуоугьы шәҽеиқәшәырхоит» (Аусқәа 16:25—34).

11, 12. а) Иаҳнарҵозеи ҳмаҵзура иазкны абахҭахьчаҩцәа реиҳабы изку ахҭыс? б) Избан ҳара анаҩсгьы ауаа ажәабжь бзиа рзеиҭаҳәара заҳҭахәу?

¹¹ Иаҳнарҵозеи абахҭа ахьчаҩцәа реиҳабы иҿырԥштәы ҳмаҵзура иазкны? Иазгәашәҭ абахҭа ахьчаҩцәа реиҳабы игәаанагара аниԥсах, насгьы ацхыраара данаҳәа адгьылҵысра аныҟала ашьҭахь шакәу. Убас еиԥш абиблиатә жәабжь азыӡырҩра зҭахым шьоукы ргәаанагара рыԥсахыр, насгьы ацхыраара иаҳәар рылшоит рыԥсҭазаараҿы рыцҳарак ианақәшәалак. Иаҳҳәап, шьоукы русура ахьырцәыӡыз ма иахьеилыҵыз иахҟьаны ааха ӷәӷәа роузар алшоит. Егьырҭ ачымазара ӷәӷәа шрымоу еилыркаазар, мамзаргьы ирзааигәоу аӡәы дырцәыԥсызар ҟалоит. Абас еиԥш иҟоу аамҭақәа рзы ауаа аԥсҭазаараҿы ихадоу азҵаарақәа рықәыргылара иалагар алшоит, уаанӡа ахаан иззымхәыцуаз азҵаарақәа. Иҟалап дара ҵааргьы: «Схы злеиқәсырхарызеи?» Раԥхьаӡакәны дара агәыӷра рызҭо ажәабжь азыӡырҩра рҭаххар алшоит.

¹² Ҳара зиашарыла ажәабжьҳәаратә ус наҳагӡозар, ауаа агәырҭынчра адкылара анырҭаххо рыцхраара ҳазхиазаауеит (Исаиа 61:1). 38 шықәса пионерс амаҵ зуа Шарлотта илҳәоит: «Иахьа ауаа иҟарҵара рыздыруам. Дара ажәабжь бзиа раҳартә еиԥш алшара рымазар ауп». 34 шықәса пионерс амаҵ зуа Еивор иҳәоит: «Иахьа ауаа даара ргәы каҳаны иҟоуп. Сара ииашаҵәҟьаны урҭ срыцхраар сҭахуп. Уи ажәабжь бзиа рзеиҭаҳәара сгәазҭанаҵоит». Ииашаҵәҟьаны, ауаа рахь абзиабара ажәабжь бзиа рзеиҭаҳәара ҳгәазҭазҵо зеиԥшыҟам мзызуп!

АХАЧҲАРА ААРԤШРА ИҲАЦХРААУА АҲАМҬАҚӘА

13, 14. а) Иарбан ҳамҭоу Иоанн 15:11 аҿы зыӡбахә ану? б) Ишԥаҳалшо ҳара Иисус имаз агәырӷьара аиура? в) Ишԥаҳацхраауеи агәырӷьара ҳмаҵзураҿы?

¹³ Иисус иԥсра уахык шагыз иҵаҩцәа аҽаҩра аагара, мамзаргьы ажәабжьҳәара, ирыцхраауа аҳамҭақәа дрылацәажәон. Иарбан ҳамҭақәоу иара зыӡбахә иҳәоз, насгьы ишԥаҳацхраауеи урҭ иахьа?

¹⁴ Агәырӷьара. Иаҳцәыцәгьоума ҳара ажәабжь бзиа аҳәара? Мап. Иисус аӡахәа иазку ажәамаана анааига ашьҭахь, иҳәеит ажәабжь анаҳҳәо иара игәырӷьара шҳауа. (Шәаԥхьа Иоанн 15:11.) Ишԥа? Ишәгәалашәыршәа уи ажәамаанаҿы Иисус ихы аӡахәа ишаҿирԥшыз, иҵаҩцәа амахәҭақәа ишрыҿирԥшыз. Амахәҭақәа аӡи ихырҳагоу амаҭәашьарқәеи роуларц азы аӡахәа иамадазар ауп. Убасҵәҟьа ҳара Иисус иеиԥш агәырӷьара ҳамазарц азы иҳәатәы хаҳҵалар, насгьы имҩала ҳцалар ауп. Усҟан ҳара Анцәа игәаԥхара анагӡара иузаанаго агәырӷьара, Иисус имоу агәырӷьара, ҳамазаауеит (Иоанн 4:34; 17:13; 1 Пиотр 2:21). 40 шықәса инареиҳаны пионерс амаҵ зуа Ҳанне илҳәоит: «Ажәабжьҳәара исзаанго агәырӷьара анаҩсгьы Иегова имаҵ аура сгәазҭанаҵоит». Агәырӷьара анаҩсгьы ажәабжь аҳәаразы амч ҳнаҭоит, ауаа реиҳараҩык аӡырҩра рҭахымзаргьы (Матфеи 5:10—12).

15. а) Иарбан ҳамҭоу Иоанн 14:27 аҿы зыӡбахә ҳәоу? б) Ишԥаҳацхраауеи аҭынчра анаҩсгьы ажәабжь аҳәара?

¹⁵ Аҭынчра. (Шәаԥхьа Иоанн 14:27b, шәахәаԥш албаага.) Иара убас уи аухазы Иисус иҵаҩцәа иреиҳәеит: «Исымоу аҭынчра шәара ишәысҭоит». Ишԥаҳацхраауеи Иисус иҳаиҭо аҭынчра ажәабжьҳәаратә ус анагӡара? Ҳара ажәабжь бзиа анаҳҳәо аҭынчра ҳамоуп, избанзар Иеговеи Иисуси шҳаргәырӷьо ҳдыруеит (Аԥсалом 149:4; Римаа рахь 5:3, 4; Кәаласаа рахь 3:15). 45 шықәса пионерс амаҵ зуа Ульф иҳәоит: «Ажәабжьҳәаратә ус сарааԥсоит, аха уи аамҭазгьы ииашаҵәҟьоу агәахәара сзаанагоит, насгьы сыԥсҭазаара аҵакы анаҭоит». Ҳара инымҵәаӡо аҭынчра ахьаҳаԥшааз ахә ҳаракны иаҳшьоит!

16. а) Иарбан ҳамҭоу Иоанн 15:15 аҿы зыӡбахә ҳәоу? б) Иҟарҵалар акәзи апостолцәа Иисус иҩызцәа ракәны иаанхаларц азы?

¹⁶ Иисус иҩызахара алшара. Иисус иапостолцәа агәырӷьара рымазарц шиҭаху анреиҳәа ашьҭахь, идеилиркааит ахамеигӡара злоу абзиабара аарԥшра даара изхадоу (Иоанн 15:11—13). Анаҩс иреиҳәеит: «Шәарҭ шәысҩызцәоуп». Иисус иҩызахара алшара зыхә ҳараку ҳамҭоуп! Аха ишԥарылшоз апостолцәа Иисус иҩызцәа ракәны аанхара? Иисус иҳәеит иҵаҩцәа анаҩсгьы абзиара аҟаҵара, мамзаргьы аҽаҩра аагара, шрыхәҭаз. (Шәаԥхьа Иоанн 15:14—16.) Даҽакала иуҳәозар, анаҩсгьы ажәабжь рҳәалар акәын. Ҩышықәса раҟара раԥхьа Иисус иапостолцәа иреиҳәеит: «Шәахьнеиуа уазны ирашәҳәала Жәҩанаҿтәи Аԥсҳара шааигәахаз» (Матфеи 10:7). Убри азоуп Иисус иԥсра уахык шагыз иҵаҩцәа ажәабжьҳәаратә ус анагӡаразы ахачҳара аадырԥшларц ргәы зазҭеиҵоз (Матфеи 24:13; Марк 3:14). Ҳәарада, Иисус идыруан уи шымариамхоз, аха дара уи ҟарҵалар, насгьы иҩызцәаны иаанхалар рылшон. Ишԥа? Даҽа ҳамҭак абзоурала.

17, 18. а) Иарбан ҳамҭоу Иоанн 15:7 аҟны зыӡбахә ҳәоу? б) Ишԥарыцхраауаз уи аҳамҭа Иисус иҵаҩцәа? в) Иарбан ҳамҭақәоу иахьа иҳацхраауа?

¹⁷ Ҳара ҳаҳәарақәа рҭак ҳауеит. Иисус иҵаҩцәа иреиҳәеит: «Иаашәҭаххалакь, шәызҳәозаалакь шәоуеит» (Иоанн 15:7, 16). Иҟалап Иисус ииҳәаз арҭ ажәақәа апостолцәа ргәы даара ишьҭнахзарc. (Шәахәаԥш албаага.) Апостолцәа ирзеилкаауамызт Иисус иаарласны дшыԥсуа, аха иара иқәыргәыӷра агәра днаргон урҭ цхыраарада ишаанымхо. Иегова дазхиан урҭ рыҳәарақәа рҭак аҟаҵара, насгьы ажәабжьҳәаратә ус анагӡара рыцхраара. Иара ус иагьыҟаиҵон. Иисус данԥсы ашьҭахь дук мырҵыкәа апостолцәа Иегова агәымшәара риҭарц иҳәеит, иара урҭ рыҳәарақәа рҭак ҟаиҵеит (Аусқәа 4:29, 31).

¹⁸ Иахьагьы ус иҟоуп. Ахачҳара аарԥшуа ажәабжь бзиа ҳҳәозар, Иисус иҩызцәа ҳакәны ҳаанхоит. Иара убас агәра ганы ҳаҟазар ҳалшоит Иегова ҳаҳәарақәа рҭак шыҟаиҵало, ажәабжьҳәара дҳацхраарц азы ҳаниҳәало (Филиппаа рахь 4:13). Иегова ҳаҳәарақәа рҭак ахьыҟаиҵо, насгьы Иисус ҩызас дахьҳамоу ҳара ахә ҳаракны иаҳшьоит. Иегова иҳаиҭо арҭ аҳамҭақәа анаҩсгьы аҽаҩра аагара иҳацхраауеит (Иаков 1:17).

19. а) Избан ҳара ажәабжьҳәара ҳзаҟәымҵуа? б) Иҳацхраауазеи Анцәа иҳадиҵаз аус анагӡара?

¹⁹ Ари астатиа аҟынтә ҳара еилаҳкааит ажәабжьҳәаратә ус анагӡаразы иҳамоу ԥшь-мзызк: 1) уи ала Иегова хьӡи-ԥшеи иаҳҭоит, насгьы ихьӡ ҳараҳкуеит, 2) Иеговеи Иисуси рахь абзиабара ааҳарԥшуеит, 3) ауаа ргәырҽанаҳҵоит, 4) иара убас урҭ бзиа ишаҳбо ааҳарԥшуеит. Уи адагьы, ҳрыхцәажәеит иҳамоу ԥшь-ҳамҭак: агәырӷьара, аҭынчра, Иисус иҩызахара алшара, насгьы ҳаҳәарақәа рҭак ҳауеит. Арҭ аҳамҭақәа Анцәа иҳадиҵаз аус анагӡаразы амч ҳарҭоит. Иегова даара игәы иахәоит анаҩсгьы аҽаҩра ааҳгаларц азы аџьабаа шаҳбо анибо!