Дыҟоума Анцәа?

Абиблиа иану

Ааи, дыҟоуп. Абиблиаҿы уи агәра узырго ашьақәырӷәӷәарақәа ануп. Уи ҳгәазҭанаҵоит адинхаҵарақәа иаарҳәо зегь агәра агара аҭыԥан, ҳахшыҩ ҳхы иархәаны Анцәа иахь ахаҵара аизырҳара (Римаа 12:1; 1 Иоанн 5:20). Шәрыхәаԥш Абиблиа шьаҭас измоу шьақәырӷәӷәарақәак:

• Адунеи аҿы иҟоу аиҿкаареи аԥсҭазаареи ишьақәдырӷәӷәоит Ҳазшаз дшыҟоу. Абиблиа иануп: «Иарбан ҩнызаалак аргылаҩ дамоуп, аха зегь зыргылаз Анцәа иоуп» (Ауриацәа 3:4). Иаармарианы иҳәоуп, аха аҵара змоу аӡәырҩы уи ахшыҩ аҵоуп ҳәа рыԥхьаӡоитa.

• Ауаҩы аԥсҭазаара ҵакыс иамоу аилкааразы агәаҳәара шилоу диуеит. Уи агәаҳәара ҭаха инаҭаӡом, зда ԥсыхәа имам зегь имазаргьы. Абиблиа иануп уи агәаҳәареи ауаҩы Анцәа иеилкаареи имҵахырхәареи рзы илоу агәаҳәареи адоуҳатә ҭахрақәа ишрыхәҭаку (Матфеи 5:3; Аатра 4:11). Ауаҩы адоуҳатә ҭахрақәа ахьилоу Анцәа дшыҟоу шьақәнарӷәӷәоит. Аха уи адагьы уи ишьақәнарӷәӷәоит Ҳазшаз ауаа бзиа ишибо, насгьы рыԥсҭазаара аҵакы аиурц, дагьеилыркаарц шиҭаху (Матфеи 4:4).

• Абиблиатә ԥааимбаражәақәа ҩын инаӡаанӡа ашәышықәсақәа шагыз. Уа зыӡбахә аныз ахҭысқәа Анцәа иазалихыз аамҭазы инаӡеит. Аԥааимбаражәақәа ишаныҵәҟьаз еиԥш иахьынаӡаз, насгьы ирыдҳәалаз акәамаҵамарақәа рацәаны иахьаагаз ишьақәнарӷәӷәоит урҭ ауаа рхы ишҭырымҳәааз (2 Пиотр 1:21).

• 

  Абиблиа зыҩуаз ирымаз адыррақәа рхаан инхоз ауаа ирымаӡамызт. Ажәытәан ауаа ргәы иаанагон адгьыл ԥстәқәак ирықәгылоуп ҳәа, иаҳҳәап, аслан, абынҳәа, ацә, ма даҽа ԥстәык. Аха Абиблиа ианын Анцәа «акгьы иаркымкәа адгьыл кнеиҳаит» ҳәа (Иов 26:7). Уи адагьы, Абиблиа адгьыл аформа иазкны иану иашоуп. Уа иануп адгьыл шыкәымпылу (Исаиа 40:22). Аӡәырҩы агәра ганы иҟоуп уи ишышьақәнарӷәӷәо Абиблиа зыҩуаз адыррақәа рызҭоз Анцәа шиакәыз.

• Абиблиа имариам азҵаарақәа рҭак ҟанаҵоит. Урҭ рҭак ззымԥшааз ауаҩы Анцәа ихаҵара даҟәыҵыр алшоит. Иаҳҳәап, Анцәа абзиабара илазар, насгьы Зегьзымчу иакәзар, избан адунеи аҿы абриаҟара ацәгьареи агәаҟрақәеи зыҟоу? Избан адинхаҵарақәа ауаа абзиара аасҭа ацәгьара аҟаҵара ргәы зазҭарҵо? (Тит 1:16).