АУРОК 13

Иуҳәо ахәарҭа алырхыр шалшо дырбала

Ажәамаанақәа 3:21

ИҞАҴАТӘУ Урыцхраа аӡырҩцәа ироуҳәо дара ишрыҵанакуа аилкаара, насгьы уи рхы ишадырхәаша дырба.

Иузыӡырҩуа урызхәыц. Уазхәыц иузыӡырҩуа ироуҳәарц иуҭаху раҳар зрыхәҭоу, насгьы ироуҳәо аҟынтә еиҳарак ирыцхраар алшо.
Ажәахә уҳәонаҵы иузыӡырҩуа иҟарҵаша дырбала. Ажәахә уаналагалак инаркны аӡырҩцәа зегьы хәыцыр ауп: «Ари сара исызкуп». Ихадоу зхәыцрак анеилургалак ашьҭахь, уи рхы ишадырхәаша дырбаны, даҽа зхәыцрак ахь уиас. Уахыкәшаны умцәажәалан.

Абиблиатә принцип рхы ишадырхәаша анырзеиҭаухәо, абзиабара аарԥшла, насгьы рцәаныррақәа шеилукаауа дырба. Ахара рыдушәа дырбара аҭыԥан, Иегова иахь ирымоу абзиабареи рыгәрахаҵареи рӷәӷәа, идырба агәра шуго дара ииашаны рхы шымҩаԥыргало, насгьы ируҭо алабжьара ишықәныҟәало.