Избан Анцәа ҳиҳәаларц агәазҭаҵара зҳаиҭо?

Анцәа аиҩызара ҳадигалоит.

Ишдыру еиԥш, аиҿцәажәара аиҩызара арӷәӷәоит. Анцәа иара ҳиацәажәаларц ҳгәазҭеиҵоит, избанзар иҭахуп еизааигәоу ҩызцәаны ҳҟаларц. Уи иҳәоит: «Шәара шәсыԥхьалоит, шәааины шәагьсыҳәалоит, саргьы сышәзыӡырҩлоит» (Иеремиа 29:12). Анцәаиҳәараан шәгәы иҭоу анизаашәыртуа, уи шәизааигәахоит, «Иаргьы дышәзааигәахоит» (Иаков 4:8). Абиблиа агәра ҳнаргоит: «Иегова и́ҳәо зегьы дырзааигәоуп» (Ԥсалом 145:18). Ҳара шаҟа лассы-лассы Анцәа ҳиҳәо аҟара, иареи ҳареи ҳаиҩызара ӷәӷәахоит.

Анцәа дшәыцхраарц иҭахуп.

Иисус иҳәеит: «Дыҟоума шәара шәыбжьара убас аиԥш иҟоу ауаҩԥсы, аб, иԥа ача данаҳәауа аамҭазы, ахаҳә изҭауа? Аԥсыӡ данаҳәауа, амаҭ изыркуа? Шәарҭ... шәыхшара рзыҳәан ахирра аҟаҵара шәазхиазар, Жәҩан иҟоу Шәаб урҭқәа иреиҳау лыԥхаҟаҵара илшоит» (Матфеи 7:9—11). Ааи, Анцәа иара иҳәара шәгәазҭеиҵоит, «избан акәзар Иара гәҭыха-хьаас шәимоуп» (1 Пиотр 5:7). Уи ишәымоу ауадаҩрақәагьы изеиҭашәҳәаларц шәааиԥхьоит. Абиблиаҿы иҳәоуп: «Ак гәырҩажәымган, ак хьаашәымган, аха гәҭыхас ишәымоу, шәзыргәамҵуа шәныҳәарақәа раан Анцәа инапы ианышәҵала, шәиаҭабуны» (Филиппаа 4:6).

Ауаа адоуҳатә ҭахрақәа рымоуп.

Апсихологцәа игәарҭеит миллионҩыла ауаа анцәаиҳәара аҭахра шрымоу — атеистцәеи агностикцәеи уахь иналаҵаныa. Уи иаанарԥшуеит ауаа адоуҳатә ҭахрақәа рыҭаны ишшаз. Иисус иҳәеит: «Бзазара рымоуп доуҳала зҽыздыруа» (Матфеи 5:3). Урҭ аҭахрақәа зланаугӡо азнеишьақәа иреиуоуп иааиԥмырҟьаӡакәа Анцәа иацәажәара.

Ҳара Анцәа ҳиҳәаларц иҳамоу ааԥхьара ҳадаҳкылозар, ишԥаҳацхраауеи уи ҳаԥсҭазаараҿы?